৪. সঙ্খাৰজাযমানপঞ্হো

৪. ৰাজা আহ ‘‘ভন্তে নাগসেন, অত্থি কেচি সঙ্খাৰা, যে জাযন্তী’’তি? ‘‘আম, মহাৰাজ, অত্থি সঙ্খাৰা, যে জাযন্তী’’তি. ‘‘কতমে তে, ভন্তে’’তি? ‘‘চক্খুস্মিঞ্চ খো, মহাৰাজ, সতি ৰূপেসু চ চক্খুৱিঞ্ঞাণং হোতি, চক্খুৱিঞ্ঞাণে সতি চক্খুসম্ফস্সো হোতি, চক্খুসম্ফস্সে সতি ৱেদনা হোতি, ৱেদনায সতি তণ্হা হোতি, তণ্হায সতি উপাদানং হোতি, উপাদানে সতি ভৱো হোতি, ভৱে সতি জাতি হোতি, জাতিযা সতি জৰামৰণং সোকপৰিদেৱদুক্খদোমনস্সুপাযাসা সম্ভৱন্তি, এৱমেতস্স কেৱলস্স দুক্খক্খন্ধস্স সমুদযো হোতি. চক্খুস্মিঞ্চ খো, মহাৰাজ, অসতি ৰূপেসু চ অসতি চক্খুৱিঞ্ঞাণং ন হোতি, চক্খুৱিঞ্ঞাণে অসতি চক্খুসম্ফস্সো ন হোতি, চক্খুসম্ফস্সে অসতি ৱেদনা ন হোতি, ৱেদনায অসতি তণ্হা ন হোতি, তণ্হায অসতি উপাদানং ন হোতি, উপাদানে অসতি ভৱো ন হোতি, ভৱে অসতি জাতি ন হোতি, জাতিযা অসতি জৰামৰণং সোকপৰিদেৱদুক্খদোমনস্সুপাযাসা ন হোন্তি, এৱমেতস্স কেৱলস্স দুক্খক্খন্ধস্স নিৰোধো হোতী’’তি.

‘‘কল্লোসি, ভন্তে নাগসেনা’’তি.

সঙ্খাৰজাযমানপঞ্হো চতুত্থো.