৯. মেত্তসুত্তং

১. কৰণীযমত্থকুসলেন, যন্তসন্তং পদং অভিসমেচ্চ;

সক্কো উজূ চ সুহুজূ [সূজূ (সী.)] চ, সুৱচো চস্স মুদু অনতিমানী.

২. সন্তুস্সকো চ সুভৰো চ, অপ্পকিচ্চো চ সল্লহুকৱুত্তি;

সন্তিন্দ্ৰিযো চ নিপকো চ, অপ্পগব্ভো কুলেস্ৱননুগিদ্ধো.

৩. ন চ খুদ্দমাচৰে কিঞ্চি, যেন ৱিঞ্ঞূ পৰে উপৱদেয্যুং;

সুখিনোৱ খেমিনো হোন্তু, সব্বসত্তা [সব্বে সত্তা (সী. স্যা.)] ভৱন্তু সুখিতত্তা.

৪. যে কেচি পাণভূতত্থি, তসা ৱা থাৱৰা ৱনৱসেসা;

দীঘা ৱা যেৱ মহন্তা [মহন্ত (?)], মজ্ঝিমা ৰস্সকা অণুকথূলা.

৫. দিট্ঠা ৱা যেৱ অদিট্ঠা [অদিট্ঠ (?)], যে ৱ [যে চ (সী. স্যা. কং. পী.)] দূৰে ৱসন্তি অৱিদূৰে;

ভূতা ৱ [ৱা (স্যা. কং. পী. ক.)] সম্ভৱেসী ৱ [ৱা (সী. স্যা. কং. পী.)], সব্বসত্তা ভৱন্তু সুখিতত্তা.

৬. ন পৰো পৰং নিকুব্বেথ, নাতিমঞ্ঞেথ কত্থচি ন কঞ্চি [নং কঞ্চি (সী. পী.), নং কিঞ্চি (স্যা.), ন কিঞ্চি (ক.)];

ব্যাৰোসনা পটিঘসঞ্ঞা, নাঞ্ঞমঞ্ঞস্স দুক্খমিচ্ছেয্য.

৭. মাতা যথা নিযং পুত্তমাযুসা একপুত্তমনুৰক্খে;

এৱম্পি সব্বভূতেসু, মানসং ভাৱযে অপৰিমাণং.

৮. মেত্তঞ্চ সব্বলোকস্মি, মানসং ভাৱযে অপৰিমাণং;

উদ্ধং অধো চ তিৰিযঞ্চ, অসম্বাধং অৱেৰমসপত্তং.

৯. তিট্ঠং চৰং নিসিন্নো ৱ [ৱা (সী. স্যা. কং. পী.)], সযানো যাৱতাস্স ৱিতমিদ্ধো [ৱিগতমিদ্ধো (বহূসু)];

এতং সতিং অধিট্ঠেয্য, ব্ৰহ্মমেতং ৱিহাৰমিধমাহু.

১০. দিট্ঠিঞ্চ অনুপগ্গম্ম, সীলৱা দস্সনেন সম্পন্নো;

কামেসু ৱিনয [ৱিনেয্য (সী.)] গেধং, ন হি জাতুগ্গব্ভসেয্য পুন ৰেতীতি.

মেত্তসুত্তং নিট্ঠিতং.