৮. নিধিকণ্ডসুত্তং

১. নিধিং নিধেতি পুৰিসো, গম্ভীৰে ওদকন্তিকে;

অত্থে কিচ্চে সমুপ্পন্নে, অত্থায মে ভৱিস্সতি.

২. ৰাজতো ৱা দুৰুত্তস্স, চোৰতো পীড়িতস্স ৱা;

ইণস্স ৱা পমোক্খায, দুব্ভিক্খে আপদাসু ৱা;

এতদত্থায লোকস্মিং, নিধি নাম নিধীযতি.

৩. তাৱস্সুনিহিতো [তাৱ সুনিহিতো (সী.)] সন্তো, গম্ভীৰে ওদকন্তিকে;

ন সব্বো সব্বদা এৱ, তস্স তং উপকপ্পতি.

৪. নিধি ৱা ঠানা চৱতি, সঞ্ঞা ৱাস্স ৱিমুয্হতি;

নাগা ৱা অপনামেন্তি, যক্খা ৱাপি হৰন্তি নং.

৫. অপ্পিযা ৱাপি দাযাদা, উদ্ধৰন্তি অপস্সতো;

যদা পুঞ্ঞক্খযো হোতি, সব্বমেতং ৱিনস্সতি.

৬. যস্স দানেন সীলেন, সংযমেন দমেন চ;

নিধী সুনিহিতো হোতি, ইত্থিযা পুৰিসস্স ৱা.

৭. চেতিযম্হি চ সঙ্ঘে ৱা, পুগ্গলে অতিথীসু ৱা;

মাতৰি পিতৰি চাপি [ৱাপি (স্যা. কং.)], অথো জেট্ঠম্হি ভাতৰি.

৮. এসো নিধি সুনিহিতো, অজেয্যো অনুগামিকো;

পহায গমনীযেসু, এতং আদায গচ্ছতি.

৯. অসাধাৰণমঞ্ঞেসং, অচোৰাহৰণো নিধি;

কযিৰাথ ধীৰো পুঞ্ঞানি, যো নিধি অনুগামিকো.

১০. এস দেৱমনুস্সানং, সব্বকামদদো নিধি;

যং যদেৱাভিপত্থেন্তি, সব্বমেতেন লব্ভতি.

১১. সুৱণ্ণতা সুসৰতা, সুসণ্ঠানা সুৰূপতা [সুসণ্ঠানসুৰূপতা (সী.), সুসণ্ঠানং সুৰূপতা (স্যা. কং.)];

আধিপচ্চপৰিৱাৰো, সব্বমেতেন লব্ভতি.

১২. পদেসৰজ্জং ইস্সৰিযং, চক্কৱত্তিসুখং পিযং;

দেৱৰজ্জম্পি দিব্বেসু, সব্বমেতেন লব্ভতি.

১৩. মানুস্সিকা চ সম্পত্তি, দেৱলোকে চ যা ৰতি;

যা চ নিব্বানসম্পত্তি, সব্বমেতেন লব্ভতি.

১৪. মিত্তসম্পদমাগম্ম, যোনিসোৱ [যোনিসো ৱে (সী.), যোনিসো চে (স্যা.), যোনিসো চ (?)] পযুঞ্জতো;

ৱিজ্জা ৱিমুত্তি ৱসীভাৱো, সব্বমেতেন লব্ভতি.

১৫. পটিসম্ভিদা ৱিমোক্খা চ, যা চ সাৱকপাৰমী;

পচ্চেকবোধি বুদ্ধভূমি, সব্বমেতেন লব্ভতি.

১৬. এৱং মহত্থিকা এসা, যদিদং পুঞ্ঞসম্পদা;

তস্মা ধীৰা পসংসন্তি, পণ্ডিতা কতপুঞ্ঞতন্তি.

নিধিকণ্ডসুত্তং নিট্ঠিতং.