৭. তিৰোকুট্টসুত্তং

১. তিৰোকুট্টেসু তিট্ঠন্তি, সন্ধিসিঙ্ঘাটকেসু চ;

দ্ৱাৰবাহাসু তিট্ঠন্তি, আগন্ত্ৱান সকং ঘৰং.

২. পহূতে অন্নপানম্হি, খজ্জভোজ্জে উপট্ঠিতে;

ন তেসং কোচি সৰতি, সত্তানং কম্মপচ্চযা.

৩. এৱং দদন্তি ঞাতীনং, যে হোন্তি অনুকম্পকা;

সুচিং পণীতং কালেন, কপ্পিযং পানভোজনং;

ইদং ৱো ঞাতীনং হোতু, সুখিতা হোন্তু ঞাতযো.

৪. তে চ তত্থ সমাগন্ত্ৱা, ঞাতিপেতা সমাগতা;

পহূতে অন্নপানম্হি, সক্কচ্চং অনুমোদৰে.

৫. চিৰং জীৱন্তু নো ঞাতী, যেসং হেতু লভামসে;

অম্হাকঞ্চ কতা পূজা, দাযকা চ অনিপ্ফলা.

৬. ন হি তত্থ কসি [কসী (সী.)] অত্থি, গোৰক্খেত্থ ন ৱিজ্জতি;

ৱণিজ্জা তাদিসী নত্থি, হিৰঞ্ঞেন কযোকযং [কযাক্কযং (সী.), কযা কযং (স্যা.)];

ইতো দিন্নেন যাপেন্তি, পেতা কালঙ্কতা [কালকতা (সী. স্যা. কং.)] তহিং.

৭. উন্নমে উদকং ৱুট্ঠং, যথা নিন্নং পৱত্ততি;

এৱমেৱ ইতো দিন্নং, পেতানং উপকপ্পতি.

৮. যথা ৱাৰিৱহা পূৰা, পৰিপূৰেন্তি সাগৰং;

এৱমেৱ ইতো দিন্নং, পেতানং উপকপ্পতি.

৯. অদাসি মে অকাসি মে, ঞাতিমিত্তা [ঞাতি মিত্তো (?)] সখা চ মে;

পেতানং দক্খিণং দজ্জা, পুব্বে কতমনুস্সৰং.

১০. ন হি ৰুণ্ণং ৱা সোকো ৱা, যা চঞ্ঞা পৰিদেৱনা;

ন তং পেতানমত্থায, এৱং তিট্ঠন্তি ঞাতযো.

১১. অযঞ্চ খো দক্খিণা দিন্না, সঙ্ঘম্হি সুপ্পতিট্ঠিতা;

দীঘৰত্তং হিতাযস্স, ঠানসো উপকপ্পতি.

১২. সো ঞাতিধম্মো চ অযং নিদস্সিতো, পেতান পূজা চ কতা উড়াৰা;

বলঞ্চ ভিক্খূনমনুপ্পদিন্নং [… মনুপ্পদিন্নৱা (ক.)], তুম্হেহি পুঞ্ঞং পসুতং অনপ্পকন্তি.

তিৰোকুট্টসুত্তং নিট্ঠিতং.