৪২৫. অট্ঠানজাতকং (৯)

৭৭. গঙ্গা কুমুদিনী সন্তা, সঙ্খৱণ্ণা চ কোকিলা;

জম্বু তালফলং দজ্জা, অথ নূন তদা সিযা.

৭৮. যদা কচ্ছপলোমানং, পাৱাৰো তিৱিধো সিযা;

হেমন্তিকং পাৱুৰণং [পাপুৰণং (সী. স্যা. পী.)], অথ নূন তদা সিযা.

৭৯. যদা মকসপাদানং [দাঠানং (সী. পী.)], অট্টালো সুকতো সিযা;

দড়্হো চ অৱিকম্পী চ [অপ্পকম্পী চ (সী. পী.)], অথ নূন তদা সিযা.

৮০. যদা সসৱিসাণানং, নিস্সেণী সুকতা সিযা;

সগ্গস্সাৰোহণত্থায, অথ নূন তদা সিযা.

৮১. যদা নিস্সেণিমাৰুয্হ, চন্দং খাদেয্যু মূসিকা;

ৰাহুঞ্চ পৰিপাতেয্যুং [পৰিবাহেয্যুং (স্যা.)], অথ নূন তদা সিযা.

৮২. যদা সুৰাঘটং পিত্ৱা, মক্খিকা গণচাৰিণী;

অঙ্গাৰে ৱাসং কপ্পেয্যুং, অথ নূন তদা সিযা.

৮৩. যদা বিম্বোট্ঠসম্পন্নো, গদ্ৰভো সুমুখো সিযা;

কুসলো নচ্চগীতস্স, অথ নূন তদা সিযা.

৮৪. যদা কাকা উলূকা চ, মন্তযেয্যুং ৰহোগতা;

অঞ্ঞমঞ্ঞং পিহযেয্যুং, অথ নূন তদা সিযা.

৮৫. যদা মুড়াল [পুলস (সী. পী.), পুলাস (স্যা.)] পত্তানং, ছত্তং থিৰতৰং সিযা;

ৱস্সস্স পটিঘাতায, অথ নূন তদা সিযা.

৮৬. যদা কুলকো [কুলুঙ্কো (সী. পী.), কুলুকো (স্যা.)] সকুণো, পব্বতং গন্ধমাদনং;

তুণ্ডেনাদায গচ্ছেয্য, অথ নূন তদা সিযা.

৮৭. যদা সামুদ্দিকং নাৱং, স-যন্তং স-ৱটাকৰং [সপটাকাৰং (ক.)];

চেটো আদায গচ্ছেয্য, অথ নূন তদা সিযাতি.

অট্ঠানজাতকং নৱমং.