৪২২. চেতিযজাতকং (৬)

৪৫. ধম্মো হৱে হতো হন্তি, নাহতো হন্তি কিঞ্চনং [কঞ্চিনং (পী.)];

তস্মা হি ধম্মং ন হনে, মা ত্ৱং [তং (স্যা. পী.)] ধম্মো হতো হনি.

৪৬. অলিকং ভাসমানস্স, অপক্কমন্তি দেৱতা;

পূতিকঞ্চ মুখং ৱাতি, সকট্ঠানা চ ধংসতি;

যো জানং পুচ্ছিতো পঞ্হং, অঞ্ঞথা নং ৱিযাকৰে.

৪৭. সচে হি সচ্চং ভণসি, হোহি ৰাজ যথা পুৰে;

মুসা চে ভাসসে ৰাজ, ভূমিযং তিট্ঠ চেতিয.

৪৮. অকালে ৱস্সতী তস্স, কালে তস্স ন ৱস্সতি;

যো জানং পুচ্ছিতো পঞ্হং, অঞ্ঞথা নং ৱিযাকৰে.

৪৯. সচে হি সচ্চং ভণসি, হোহি ৰাজ যথা পুৰে;

মুসা চে ভাসসে ৰাজ, ভূমিং পৱিস চেতিয.

৫০. জিৱ্হা তস্স দ্ৱিধা হোতি, উৰগস্সেৱ দিসম্পতি;

যো জানং পুচ্ছিতো পঞ্হং, অঞ্ঞথা নং ৱিযাকৰে.

৫১. সচে হি সচ্চং ভণসি, হোহি ৰাজ যথা পুৰে;

মুসা চে ভাসসে ৰাজ, ভিয্যো পৱিস চেতিয.

৫২. জিৱ্হা তস্স ন ভৱতি, মচ্ছস্সেৱ দিসম্পতি;

যো জানং পুচ্ছিতো পঞ্হং, অঞ্ঞথা নং ৱিযাকৰে.

৫৩. সচে হি সচ্চং ভণসি, হোহি ৰাজ যথা পুৰে;

মুসা চে ভাসসে ৰাজ, ভিয্যো পৱিস চেতিয.

৫৪. থিযোৱ তস্স জাযন্তি [থিযো তস্স পজাযন্তি (ক.)], ন পুমা জাযৰে কুলে;

যো জানং পুচ্ছিতো পঞ্হং, অঞ্ঞথা নং ৱিযাকৰে.

৫৫. সচে হি সচ্চং ভণসি, হোহি ৰাজ যথা পুৰে;

মুসা চে ভাসসে ৰাজ, ভিয্যো পৱিস চেতিয.

৫৬. পুত্তা তস্স ন ভৱন্তি, পক্কমন্তি দিসোদিসং;

যো জানং পুচ্ছিতো পঞ্হং, অঞ্ঞথা নং ৱিযাকৰে.

৫৭. সচে হি সচ্চং ভণসি, হোহি ৰাজ যথা পুৰে;

মুসা চে ভাসসে ৰাজ, ভিয্যো পৱিস চেতিয.

৫৮. স ৰাজা ইসিনা সত্তো, অন্তলিক্খচৰো পুৰে;

পাৱেক্খি পথৱিং চেচ্চো, হীনত্তো পত্ৱ পৰিযাযং [অত্তপৰিযাযং (সী. স্যা.), পত্তপৰিযাযং (ক. সী. নিয্য)].

৫৯. তস্মা হি ছন্দাগমনং, নপ্পসংসন্তি পণ্ডিতা;

অদুট্ঠচিত্তো ভাসেয্য, গিৰং সচ্চূপসংহিতন্তি.

চেতিযজাতকং ছট্ঠং.