৩৯৩. ৱিঘাসাদজাতকং (৬-২-৮)

১২২. সুসুখং ৱত জীৱন্তি, যে জনা ৱিঘাসাদিনো;

দিট্ঠেৱ ধম্মে পাসংসা, সম্পৰাযে চ সুগ্গতী.

১২৩. সুকস্স [সুৱস্স (সী. স্যা. পী.)] ভাসমানস্স, ন নিসামেথ পণ্ডিতা;

ইদং সুণাথ সোদৰিযা, অম্হেৱাযং পসংসতি.

১২৪. নাহং তুম্হে পসংসামি, কুণপাদা সুণাথ মে;

উচ্ছিট্ঠভোজিনো [ভোজনা (ক.)] তুম্হে, ন তুম্হে ৱিঘাসাদিনো.

১২৫. সত্তৱস্সা পব্বজিতা, মেজ্ঝাৰঞ্ঞে [মজ্ঝেৰঞ্ঞে (ক.)] সিখণ্ডিনো;

ৱিঘাসেনেৱ যাপেন্তা, মযং চে ভোতো গাৰয্হা;

কে নু ভোতো পসংসিযা.

১২৬. তুম্হে সীহানং ব্যগ্ঘানং, ৱাড়ানঞ্চাৱসিট্ঠকং;

উচ্ছিট্ঠেনেৱ যাপেন্তা, মঞ্ঞিৱ্হো ৱিঘাসাদিনো.

১২৭. যে ব্ৰাহ্মণস্স সমণস্স, অঞ্ঞস্স ৱা [অঞ্ঞস্স চ (সী. স্যা.), অঞ্ঞস্সেৱ (পী.)] ৱনিব্বিনো [ৱণিব্বিনো (সী. স্যা.)];

দত্ৱাৱ [দত্ৱান (পী. ক.)] সেসং ভুঞ্জন্তি, তে জনা ৱিঘাসাদিনোতি.

ৱিঘাসাদজাতকং অট্ঠমং.