৬. ছক্কনিপাতো

১. অৱাৰিযৱগ্গো

৩৭৬. অৱাৰিযজাতকং (৬-১-১)

১. মাসু কুজ্ঝ ভূমিপতি, মাসু কুজ্ঝ ৰথেসভ;

কুদ্ধং অপ্পটিকুজ্ঝন্তো, ৰাজা ৰট্ঠস্স পূজিতো.

২. গামে ৱা যদি ৱাৰঞ্ঞে, নিন্নে ৱা যদি ৱা থলে;

সব্বত্থ অনুসাসামি, মাসু কুজ্ঝ [মাস্সু কুজ্ঝি (সী. পী.)] ৰথেসভ.

৩. অৱাৰিযপিতা নাম, অহু গঙ্গায নাৱিকো;

পুব্বে জনং তাৰেত্ৱান, পচ্ছা যাচতি ৱেতনং;

তেনস্স ভণ্ডনং হোতি, ন চ ভোগেহি ৱড্ঢতি.

৪. অতিণ্ণংযেৱ যাচস্সু, অপাৰং তাত নাৱিক;

অঞ্ঞো হি তিণ্ণস্স মনো, অঞ্ঞো হোতি পাৰেসিনো [তৰেসিনো (সী. পী.), তিৰেসিনো (স্যা.)].

৫. গামে ৱা যদি ৱাৰঞ্ঞে, নিন্নে ৱা যদি ৱা থলে;

সব্বত্থ অনুসাসামি, মাসু কুজ্ঝিত্থ নাৱিক.

৬. যাযেৱানুসাসনিযা, ৰাজা গামৱৰং অদা;

তাযেৱানুসাসনিযা, নাৱিকো পহৰী মুখং.

৭. ভত্তং ভিন্নং হতা ভৰিযা, গব্ভো চ পতিতো ছমা;

মিগোৱ জাতৰূপেন, ন তেনত্থং অবন্ধি সূতি [অৱড্ঢিতুন্তি (সী. স্যা.), অৱড্ঢি সূতি (?)].

অৱাৰিযজাতকং পঠমং.

৩৭৭. সেতকেতুজাতকং (৬-১-২)

৮. মা তাত কুজ্ঝি ন হি সাধু কোধো, বহুম্পি তে অদিট্ঠমস্সুতঞ্চ;

মাতা পিতা দিসতা [দিসা তাত (স্যা.), দিসা তা (পী.)] সেতকেতু, আচৰিযমাহু দিসতং পসত্থা.

৯. অগাৰিনো অন্নদপানৱত্থদা [অন্নপানৱত্থদা (স্যা. ক.)], অৱ্হাযিকা তম্পি দিসং ৱদন্তি;

এসা দিসা পৰমা সেতকেতু, যং পত্ৱা দুক্খী সুখিনো ভৱন্তি.

১০. খৰাজিনা জটিলা পঙ্কদন্তা, দুম্মক্খৰূপা [দুমুক্খৰূপা (সী. স্যা.), দুম্মুক্খৰূপা (পী. ক.)] যেমে জপ্পন্তি মন্তে;

কচ্চি নু তে মানুসকে পযোগে, ইদং ৱিদূ পৰিমুত্তা অপাযা.

১১. পাপানি কম্মানি কত্ৱান ৰাজ, বহুস্সুতো চে ন [বহুস্সুতো নেৱ (সী. স্যা.)] চৰেয্য ধম্মং;

সহস্সৱেদোপি ন তং পটিচ্চ, দুক্খা পমুঞ্চে চৰণং অপত্ৱা.

১২. সহস্সৱেদোপি ন তং পটিচ্চ, দুক্খা পমুঞ্চে চৰণং অপত্ৱা;

মঞ্ঞামি ৱেদা অফলা ভৱন্তি, সসংযমং চৰণমেৱ [চৰণঞ্ঞেৱ (সী. স্যা. পী.)] সচ্চং.

১৩. ন হেৱ ৱেদা অফলা ভৱন্তি, সসংযমং চৰণমেৱ সচ্চং;

কিত্তিঞ্হি পপ্পোতি অধিচ্চ ৱেদে, সন্তিং পুণেতি [সন্তং পুনে’তি (সী. পী.)] চৰণেন দন্তোতি.

সেতকেতুজাতকং দুতিযং.

৩৭৮. দৰীমুখজাতকং (৬-১-৩)

১৪. পঙ্কো চ কামা পলিপো চ কামা, ভযঞ্চ মেতং তিমূলং পৱুত্তং;

ৰজো চ ধূমো চ মযা পকাসিতা, হিত্ৱা তুৱং পব্বজ ব্ৰহ্মদত্ত.

১৫. গধিতো [গথিতো (সী.)] চ ৰত্তো চ অধিমুচ্ছিতো চ, কামেস্ৱহং ব্ৰাহ্মণ ভিংসৰূপং;

তং নুস্সহে জীৱিকত্থো পহাতুং, কাহামি পুঞ্ঞানি অনপ্পকানি.

১৬. যো অত্থকামস্স হিতানুকম্পিনো, ওৱজ্জমানো ন কৰোতি সাসনং;

ইদমেৱ সেয্যো ইতি মঞ্ঞমানো, পুনপ্পুনং গব্ভমুপেতি মন্দো.

১৭. সো ঘোৰৰূপং নিৰযং উপেতি, সুভাসুভং মুত্তকৰীসপূৰং;

সত্তা সকাযে ন জহন্তি গিদ্ধা, যে হোন্তি কামেসু অৱীতৰাগা.

১৮. মীড়্হেন লিত্তা ৰুহিৰেন মক্খিতা, সেম্হেন লিত্তা উপনিক্খমন্তি;

যং যঞ্হি কাযেন ফুসন্তি তাৱদে, সব্বং অসাতং দুখমেৱ কেৱলং.

১৯. দিস্ৱা ৱদামি ন হি অঞ্ঞতো সৱং, পুব্বেনিৱাসং বহুকং সৰামি;

চিত্ৰাহি গাথাহি সুভাসিতাহি, দৰীমুখো নিজ্ঝাপযি সুমেধন্তি.

দৰীমুখজাতকং ততিযং.

৩৭৯. নেৰুজাতকং (৬-১-৪)

২০. কাকোলা কাকসঙ্ঘা চ, মযঞ্চ পততং ৱৰা [ৱৰ (ক.) মযন্তিপদস্স হি ৱিসেসনং];

সব্বেৱ সদিসা হোম, ইমং আগম্ম পব্বতং.

২১. ইধ সীহা চ ব্যগ্ঘা চ, সিঙ্গালা চ মিগাধমা;

সব্বেৱ সদিসা হোন্তি, অযং কো নাম পব্বতো.

২২. ইমং নেৰূতি [নেৰুন্তি (সী. স্যা.)] জানন্তি, মনুস্সা পব্বতুত্তমং;

ইধ ৱণ্ণেন সম্পন্না, ৱসন্তি সব্বপাণিনো.

২৩. অমাননা যত্থ সিযা, সন্তানং ৱা ৱিমাননা;

হীনসম্মাননা ৱাপি, ন তত্থ ৱসতিং ৱসে [ৱসতী ৱসে (স্যা.), ৱস দিৱসে (পী.)].

২৪. যত্থালসো চ দক্খো চ, সূৰো ভীৰু চ পূজিযা;

ন তত্থ সন্তো ৱসন্তি, অৱিসেসকৰে নৰে [নগে (সী. স্যা. পী.)].

২৫. নাযং নেৰু ৱিভজতি, হীনউক্কট্ঠমজ্ঝিমে;

অৱিসেসকৰো নেৰু, হন্দ নেৰুং জহামসেতি.

নেৰুজাতকং চতুত্থং.

৩৮০. আসঙ্কজাতকং (৬-১-৫)

২৬. আসাৱতী নাম লতা, জাতা চিত্তলতাৱনে;

তস্সা ৱস্সসহস্সেন, একং নিব্বত্ততে ফলং.

২৭. তং দেৱা পযিৰুপাসন্তি, তাৱ দূৰফলং সতিং;

আসীসেৱ [আসিংসেৱ (সী. স্যা. পী.)] তুৱং ৰাজ, আসা ফলৱতী সুখা.

২৮. আসীসতেৱ [আসিংসেথেৱ (সী. স্যা. পী.)] সো পক্খী, আসীসতেৱ [আসিংসেথেৱ (সী. স্যা. পী.)] সো দিজো;

তস্স চাসা [তস্সেৱাসা (স্যা.)] সমিজ্ঝতি, তাৱ দূৰগতা সতী;

আসীসেৱ তুৱং ৰাজ, আসা ফলৱতী সুখা.

২৯. সম্পেসি খো মং ৱাচায, ন চ সম্পেসি [সংসেসি (ক.)] কম্মুনা;

মালা সেৰেয্যকস্সেৱ, ৱণ্ণৱন্তা অগন্ধিকা.

৩০. অফলং মধুৰং ৱাচং, যো মিত্তেসু পকুব্বতি;

অদদং অৱিস্সজং ভোগং, সন্ধি তেনস্স জীৰতি.

৩১. যঞ্হি কযিৰা তঞ্হি ৱদে, যং ন কযিৰা ন তং ৱদে;

অকৰোন্তং ভাসমানং, পৰিজানন্তি পণ্ডিতা.

৩২. বলঞ্চ ৱত মে খীণং, পাথেয্যঞ্চ ন ৱিজ্জতি;

সঙ্কে পাণূপৰোধায, হন্দ দানি ৱজামহং.

৩৩. এতদেৱ হি মে নামং, যং নামস্মি ৰথেসভ;

আগমেহি মহাৰাজ, পিতৰং আমন্তযামহন্তি.

আসঙ্কজাতকং পঞ্চমং.

৩৮১. মিগালোপজাতকং (৬-১-৬)

৩৪. ন মে ৰুচ্চি মিগালোপ, যস্স তে তাদিসী গতী;

অতুচ্চং তাত পতসি, অভূমিং তাত সেৱসি.

৩৫. চতুক্কণ্ণংৱ কেদাৰং, যদা তে পথৱী সিযা;

ততো তাত নিৱত্তস্সু, মাস্সু এত্তো পৰং গমি.

৩৬. সন্তি অঞ্ঞেপি সকুণা, পত্তযানা ৱিহঙ্গমা;

অক্খিত্তা ৱাতৱেগেন, নট্ঠা তে সস্সতীসমা.

৩৭. অকত্ৱা অপনন্দস্স [অপৰণ্ণস্স (সী. স্যা. পী.)], পিতু ৱুদ্ধস্স সাসনং;

কালৱাতে অতিক্কম্ম, ৱেৰম্ভানং ৱসং অগা [গতো (সী.)].

৩৮. তস্স পুত্তা চ দাৰা চ, যে চঞ্ঞে অনুজীৱিনো;

সব্বে ব্যসনমাপাদুং, অনোৱাদকৰে দিজে.

৩৯. এৱম্পি ইধ ৱুদ্ধানং, যো ৱাক্যং নাৱবুজ্ঝতি;

অতিসীমচৰো [অতিসীমং চৰো (সী. স্যা. ক.)] দিত্তো, গিজ্ঝোৱাতীতসাসনো;

সব্বে ব্যসনং পপ্পোন্তি, অকত্ৱা বুদ্ধসাসনন্তি.

মিগালোপজাতকং ছট্ঠং.

৩৮২. সিৰিকাড়কণ্ণিজাতকং (৬-১-৭)

৪০. কা নু কাড়েন ৱণ্ণেন, ন চাপি [ন চাসি (সী.)] পিযদস্সনা;

কা ৱা ত্ৱং কস্স ৱা ধীতা, কথং জানেমু তং মযং.

৪১. মহাৰাজস্সহং ধীতা, ৱিৰূপক্খস্স চণ্ডিযা;

অহং কাড়ী অলক্খিকা, কাড়কণ্ণীতি মং ৱিদূ;

ওকাসং যাচিতো দেহি, ৱসেমু তৱ সন্তিকে.

৪২. কিংসীলে কিংসমাচাৰে, পুৰিসে নিৱিসসে তুৱং;

পুট্ঠা মে কাড়ি অক্খাহি, কথং [যথা (সী. পী.)] জানেমু তং মযং.

৪৩. মক্খী পড়াসী সাৰম্ভী, ইস্সুকী মচ্ছৰী সঠো;

সো ময্হং পুৰিসো কন্তো, লদ্ধং যস্স ৱিনস্সতি.

৪৪. কোধনো উপনাহী চ, পিসুণো চ ৱিভেদকো;

কণ্ডকৱাচো [অণ্ডকৱাচো (ক. সী. পী.)] ফৰুসো, সো মে কন্ততৰো ততো.

৪৫. অজ্জ সুৱেতি পুৰিসো, সদত্থং নাৱবুজ্ঝতি;

ওৱজ্জমানো কুপ্পতি, সেয্যং সো অতিমঞ্ঞতি.

৪৬. দৱপ্পলুদ্ধো [দেৱপ্পলুদ্ধো (ক.), দৱপ্পলদ্ধো (পী.)] পুৰিসো, সব্বমিত্তেহি ধংসতি;

সো ময্হং পুৰিসো কন্তো, তস্মিং হোমি অনামযা.

৪৭. অপেহি এত্তো ত্ৱং কাড়ি, নেতং অম্হেসু ৱিজ্জতি;

অঞ্ঞং জনপদং গচ্ছ, নিগমে ৰাজধানিযো.

৪৮. অহম্পি খো তং [চেতং (সী.)] জানামি, নেতং তুম্হেসু ৱিজ্জতি;

সন্তি লোকে অলক্খিকা, সঙ্ঘৰন্তি বহুং ধনং;

অহং দেৱো চ মে ভাতা, উভো নং ৱিধমামসে.

৪৯. কা নু দিব্বেন ৱণ্ণেন, পথব্যা সুপতিট্ঠিতা;

কা ৱা ত্ৱং কস্স ৱা ধীতা, কথং জানেমু তং মযং.

৫০. মহাৰাজস্সহং ধীতা, ধতৰট্ঠস্স সিৰীমতো [ধতৰট্ঠসিৰীমতো (স্যা. ক.)];

অহং সিৰী চ লক্খী চ, ভূৰিপঞ্ঞাতি মং ৱিদূ;

ওকাসং যাচিতো দেহি, ৱসেমু তৱ সন্তিকে.

৫১. কিংসীলে কিংসমাচাৰে, পুৰিসে নিৱিসসে তুৱং;

পুট্ঠা মে লক্খি অক্খাহি, কথং [যথা (সী. পী.)] জানেমু তং মযং.

৫২. যো চাপি সীতে অথৱাপি উণ্হে, ৱাতাতপে ডংসসৰীসপে চ;

খুধং [খুদ্দং (স্যা. ক.), খুদং (পী.)] পিপাসং অভিভুয্য সব্বং, ৰত্তিন্তিৱং যো সততং নিযুত্তো;

কালাগতঞ্চ ন হাপেতি অত্থং, সো মে মনাপো নিৱিসে চ তম্হি.

৫৩. অক্কোধনো মিত্তৱা চাগৱা চ, সীলূপপন্নো অসঠোজুভূতো [অসঠো উজ্জুভূতো (পী.)];

সঙ্গাহকো সখিলো সণ্হৱাচো, মহত্তপত্তোপি নিৱাতৱুত্তি;

তস্মিংহং [তস্মাহং (সী. পী.)] পোসে ৱিপুলা ভৱামি, ঊমি সমুদ্দস্স যথাপি ৱণ্ণং.

৫৪. যো চাপি মিত্তে অথৱা অমিত্তে, সেট্ঠে সৰিক্খে অথ ৱাপি হীনে;

অত্থং চৰন্তং অথৱা অনত্থং, আৱী ৰহো সঙ্গহমেৱ ৱত্তে [ৱত্তো (স্যা. ক.)].

ৱাচং ন ৱজ্জা ফৰুসং কদাচি, মতস্স জীৱস্স চ তস্স হোমি.

৫৫. এতেসং যো অঞ্ঞতৰং লভিত্ৱা, কন্তা সিৰী [কন্তসিৰিং (কত্থচি), কন্তং সিৰিং (স্যা.) অট্ঠকথাযং দুতিযততিযপাঠন্তৰানি] মজ্জতি অপ্পপঞ্ঞো;

তং দিত্তৰূপং ৱিসমং চৰন্তং, কৰীসঠানংৱ [কৰীসজাতং ৱ (সী. স্যা.)] ৱিৱজ্জযামি.

৫৬. অত্তনা কুৰুতে লক্খিং, অলক্খিং কুৰুতত্তনা;

ন হি লক্খিং অলক্খিং ৱা, অঞ্ঞো অঞ্ঞস্স কাৰকোতি.

সিৰিকাড়কণ্ণিজাতকং সত্তমং.

৩৮৩. কুক্কুটজাতকং (৬-১-৮)

৫৭. সুচিত্তপত্তছদন, তম্বচূড় ৱিহঙ্গম;

ওৰোহ দুমসাখায, মুধা ভৰিযা ভৱামি তে.

৫৮. চতুপ্পদী ত্ৱং কল্যাণি, দ্ৱিপদাহং মনোৰমে;

মিগী পক্খী অসঞ্ঞুত্তা, অঞ্ঞং পৰিযেস সামিকং.

৫৯. কোমাৰিকা তে হেস্সামি, মঞ্জুকা পিযভাণিনী;

ৱিন্দ মং অৰিযেন ৱেদেন, সাৱয মং যদিচ্ছসি.

৬০. কুণপাদিনি লোহিতপে, চোৰি কুক্কুটপোথিনি;

ন ত্ৱং অৰিযেন ৱেদেন, মমং ভত্তাৰমিচ্ছসি.

৬১. এৱম্পি চতুৰা [চাতুৰা (স্যা. ক.)] নাৰী, দিস্ৱান সধনং [পৱৰং (সী. স্যা. পী.)] নৰং;

নেন্তি সণ্হাহি ৱাচাহি, বিড়াৰী ৱিয কুক্কুটং.

৬২. যো চ উপ্পতিতং অত্থং, ন খিপ্পমনুবুজ্ঝতি;

অমিত্তৱসমন্ৱেতি, পচ্ছা চ অনুতপ্পতি.