২. খৰপুত্তৱগ্গো

৩৮৬. খৰপুত্তজাতকং (৬-২-১)

৭৬. সচ্চং কিৰেৱমাহংসু, ৱস্তং [ভস্তং (সী. পী.), কলকং (স্যা.), গৰং (ক.)] বালোতি পণ্ডিতা;

পস্স বালো ৰহোকম্মং, আৱিকুব্বং ন বুজ্ঝতি.

৭৭. ত্ৱং খোপি [ত্ৱং নু খো (সী. স্যা.), ত্ৱঞ্চ খো (পী.)] সম্ম বালোসি, খৰপুত্ত ৱিজানহি;

ৰজ্জুযা হি [ৰজ্জুযাসি (পী.)] পৰিক্খিত্তো, ৱঙ্কোট্ঠো ওহিতোমুখো.

৭৮. অপৰম্পি সম্ম তে বাল্যং [অযম্পি সম্ম তে বালো (ক.)], যো মুত্তো ন পলাযসি;

সো চ বালতৰো সম্ম, যং ত্ৱং ৱহসি সেনকং.

৭৯. যং নু সম্ম অহং বালো, অজৰাজ ৱিজানহি;

অথ কেন সেনকো বালো, তং মে অক্খাহি পুচ্ছিতো.

৮০. উত্তমত্থং লভিত্ৱান, ভৰিযায যো পদস্সতি [ভযিযা যো পদস্সতি (পী.), ভযিযা ন ভৱিস্সতি (ক.)];

তেন জহিস্সতত্তানং, সা চেৱস্স ন হেস্সতি.

৮১. ন ৱে পিযম্মেতি [ন পিযমেতি (ক.), ন পিযমেদন্তি (কত্থচি)] জনিন্দ তাদিসো, অত্তং নিৰংকত্ৱা পিযানি সেৱতি [সেৱযে (?)];

অত্তাৱ সেয্যো পৰমা চ সেয্যো, লব্ভা পিযা ওচিতত্থেন পচ্ছাতি.

খৰপুত্তজাতকং পঠমং.

৩৮৭. সূচিজাতকং (৬-২-২)

৮২. অকক্কসং অফৰুসং, খৰধোতং সুপাসিযং;

সুখুমং তিখিণগ্গঞ্চ, কো সূচিং কেতুমিচ্ছতি.

৮৩. সুমজ্জঞ্চ সুপাসঞ্চ, অনুপুব্বং [অনুপুব্ব (সী. স্যা.)] সুৱট্টিতং;

ঘনঘাতিমং পটিথদ্ধং, কো সূচিং কেতুমিচ্ছতি.

৮৪. ইতো দানি পতাযন্তি, সূচিযো বড়িসানি চ;

কোযং কম্মাৰগামস্মিং, সূচিং ৱিক্কেতুমিচ্ছতি.

৮৫. ইতো সত্থানি গচ্ছন্তি, কম্মন্তা ৱিৱিধা পুথূ;

কোযং কম্মাৰগামস্মিং, সূচিং ৱিক্কেতুমিচ্ছতি [মৰহতি (সী. স্যা. পী.)].

৮৬. সূচিং কম্মাৰগামস্মিং, ৱিক্কেতব্বা পজানতা;

আচৰিযাৱ জানন্তি [আচৰিযা সঞ্জানন্তি (ক.), আচৰিযা পজানন্তি (স্যা.), আচৰিযাৱ সঞ্জানন্তি (পী.)], কম্মং সুকতদুক্কটং [দুক্কতং (সী. পী.)].

৮৭. ইমং চে [ইমঞ্চ (সী. স্যা. পী.)] তে পিতা ভদ্দে, সূচিং জঞ্ঞা মযা কতং;

তযা চ মং নিমন্তেয্য, যঞ্চত্থঞ্ঞং ঘৰে ধনন্তি.

সূচিজাতকং দুতিযং.

৩৮৮. তুণ্ডিলজাতকং (৬-২-৩)

৮৮. নৱছন্নকে [নৱছন্দকে (সী. পী.), নৱচ্ছদ্দকে (স্যা.)] দানি [দোণি (ক.), দানং, দানে (কত্থচি)] দিয্যতি, পুণ্ণাযং দোণি সুৱামিনী ঠিতা;

বহুকে জনে পাসপাণিকে, নো চ খো মে পটিভাতি ভুঞ্জিতুং.

৮৯. তসসি ভমসি লেণমিচ্ছসি, অত্তাণোসি কুহিং গমিস্সসি;

অপ্পোস্সুক্কো ভুঞ্জ তুণ্ডিল, মংসত্থায হি পোসিতাম্হসে [পোসিযামসে (সী. স্যা. পী.)].

৯০. ওগহ ৰহদং অকদ্দমং, সব্বং সেদমলং পৱাহয;

গণ্হাহি নৱং ৱিলেপনং, যস্স গন্ধো ন কদাচি ছিজ্জতি.

৯১. কতমো ৰহদো অকদ্দমো, কিংসু সেদমলন্তি ৱুচ্চতি;

কতমঞ্চ নৱং ৱিলেপনং, যস্স গন্ধো ন কদাচি ছিজ্জতি.

৯২. ধম্মো ৰহদো অকদ্দমো, পাপং সেদমলন্তি ৱুচ্চতি;

সীলঞ্চ নৱং ৱিলেপনং, তস্স গন্ধো ন কদাচি ছিজ্জতি.

৯৩. নন্দন্তি সৰীৰঘাতিনো, ন চ নন্দন্তি সৰীৰধাৰিনো;

পুণ্ণায চ পুণ্ণমাসিযা, ৰমমানাৱ জহন্তি জীৱিতন্তি.

তুণ্ডিলজাতকং ততিযং.

৩৮৯. সুৱণ্ণকক্কটজাতকং (৬-২-৪)

৯৪. সিঙ্গীমিগো আযতচক্খুনেত্তো, অট্ঠিত্তচো ৱাৰিসযো অলোমো;

তেনাভিভূতো কপণং ৰুদামি, হৰে সখা কিস্স নু মং জহাসি.

৯৫. সো পস্সসন্তো মহতা ফণেন, ভুজঙ্গমো কক্কটমজ্ঝপত্তো;

সখা সখাৰং পৰিতাযমানো, ভুজঙ্গমং কক্কটকো গহেসি.

৯৬. ন ৱাযসং নো পন কণ্হসপ্পং, ঘাসত্থিকো কক্কটকো অদেয্য;

পুচ্ছামি তং আযতচক্খুনেত্ত, অথ কিস্স হেতুম্হ উভো গহীতা.

৯৭. অযং পুৰিসো মম অত্থকামো, যো মং গহেত্ৱান দকায নেতি;

তস্মিং মতে দুক্খমনপ্পকং মে, অহঞ্চ এসো চ উভো ন হোম.

৯৮. মমঞ্চ দিস্ৱান পৱদ্ধকাযং, সব্বো জনো হিংসিতুমেৱ মিচ্ছে;

সাদুঞ্চ থূলঞ্চ মুদুঞ্চ মংসং, কাকাপি মং দিস্ৱান [দিস্ৱ (সী. পী.)] ৱিহেঠযেয্যুং.

৯৯. সচেতস্স হেতুম্হ উভো গহীতা, উট্ঠাতু পোসো ৱিসমাৱমামি [ৱিসমাচমামি (সী. পী. ক.)];

মমঞ্চ কাকঞ্চ পমুঞ্চ খিপ্পং, পুৰে ৱিসং গাড়্হমুপেতি মচ্চং.

১০০. সপ্পং পমোক্খামি ন তাৱ কাকং, পটিবন্ধকো [পটিবদ্ধকো (সী. পী.)] হোহিতি [হোতি হি (স্যা.)] তাৱ কাকো;

পুৰিসঞ্চ দিস্ৱান সুখিং অৰোগং, কাকং পমোক্খামি যথেৱ সপ্পং.

১০১. কাকো তদা দেৱদত্তো অহোসি, মাৰো পন কণ্হসপ্পো অহোসি;

আনন্দভদ্দো কক্কটকো অহোসি, অহং তদা ব্ৰাহ্মণো হোমি সত্থাতি [তত্থাতি (সী. পী.)].

সুৱণ্ণকক্কটজাতকং চতুত্থং.

৩৯০. ময্হকজাতকং (৬-২-৫)

১০২. সকুণো ময্হকো নাম, গিৰিসানুদৰীচৰো;

পক্কং পিপ্ফলিমাৰুয্হ, ময্হং ময্হন্তি কন্দতি.

১০৩. তস্সেৱং ৱিলপন্তস্স, দিজসঙ্ঘা সমাগতা;

ভুত্ৱান পিপ্ফলিং যন্তি, ৱিলপত্ৱেৱ সো দিজো.

১০৪. এৱমেৱ ইধেকচ্চো, সঙ্ঘৰিত্ৱা বহুং ধনং;

নেৱত্তনো ন ঞাতীনং, যথোধিং পটিপজ্জতি.

১০৫. ন সো অচ্ছাদনং ভত্তং, ন মালং ন ৱিলেপনং;

অনুভোতি [নানুভোতি (স্যা. ক.)] সকিং কিঞ্চি, ন সঙ্গণ্হাতি ঞাতকে.

১০৬. তস্সেৱং ৱিলপন্তস্স, ময্হং ময্হন্তি ৰক্খতো;

ৰাজানো অথ ৱা চোৰা, দাযদা যে ৱ [যে চ (স্যা. ক.)] অপ্পিযা;

ধনমাদায গচ্ছন্তি, ৱিলপত্ৱেৱ সো নৰো.

১০৭. ধীৰো [ধীৰো চ (সী.)] ভোগে অধিগম্ম, সঙ্গণ্হাতি চ ঞাতকে;

তেন সো কিত্তিং পপ্পোতি, পেচ্চ সগ্গে পমোদতীতি [সগ্গে চ মোদতীতি (সী. পী.)].

ময্হকজাতকং পঞ্চমং.

৩৯১. ৱিজ্জাধৰজাতকং (৬-২-৬)

১০৮. দুব্বণ্ণৰূপং তুৱমৰিযৱণ্ণী, পুৰক্খত্ৱা [পুৰক্খিত্ৱা (স্যা. ক.)] পঞ্জলিকো নমস্সসি;

সেয্যো নু তে সো উদৱা [উদাহু (স্যা. ক.)] সৰিক্খো, নামং পৰস্সত্তনো চাপি ব্ৰূহি.

১০৯. ন নামগোত্তং গণ্হন্তি ৰাজ, সম্মগ্গতানুজ্জুগতান [সমগ্গতানুজ্জুগতান (স্যা.), সমুগ্গতানুজ্জুগতান (ক.)] দেৱা;

অহঞ্চ তে নামধেয্যং ৱদামি, সক্কোহমস্মী তিদসানমিন্দো.

১১০. যো দিস্ৱা ভিক্খুং চৰণূপপন্নং, পুৰক্খত্ৱা পঞ্জলিকো নমস্সতি;

পুচ্ছামি তং দেৱৰাজেতমত্থং, ইতো চুতো কিং লভতে সুখং সো.

১১১. যো দিস্ৱা ভিক্খুং চৰণূপপন্নং, পুৰক্খত্ৱা পঞ্জলিকো নমস্সতি;

দিট্ঠেৱ ধম্মে লভতে পসংসং, সগ্গঞ্চ সো যাতি সৰীৰভেদা.

১১২. লক্খী ৱত মে উদপাদি অজ্জ, যং ৱাসৱং ভূতপতিদ্দসাম;

ভিক্খুঞ্চ দিস্ৱান তুৱঞ্চ সক্ক, কাহামি পুঞ্ঞানি অনপ্পকানি.

১১৩. অদ্ধা হৱে সেৱিতব্বা সপঞ্ঞা, বহুস্সুতা যে বহুঠানচিন্তিনো;

ভিক্খুঞ্চ দিস্ৱান মমঞ্চ ৰাজ, কৰোহি পুঞ্ঞানি অনপ্পকানি.

১১৪. অক্কোধনো নিচ্চপসন্নচিত্তো, সব্বাতিথীযাচযোগো ভৱিত্ৱা;

নিহচ্চ মানং অভিৱাদযিস্সং, সুত্ৱান দেৱিন্দ সুভাসিতানীতি.

ৱিজ্জাধৰ [ধজৱিহেঠক (সী. পী.), পব্বজিতৱিহেঠক (স্যা.)] জাতকং ছট্ঠং.

৩৯২. সিঙ্ঘপুপ্ফজাতকং (৬-২-৭)

১১৫. যমেতং [যমেকং (পী.)] ৱাৰিজং পুপ্ফং, অদিন্নং উপসিঙ্ঘসি;

একঙ্গমেতং থেয্যানং, গন্ধথেনোসি মাৰিস.

১১৬. ন হৰামি ন ভঞ্জামি, আৰা সিঙ্ঘামি ৱাৰিজং;

অথ কেন নু ৱণ্ণেন, গন্ধথেনোতি ৱুচ্চতি.

১১৭. যোযং ভিসানি খণতি, পুণ্ডৰীকানি ভঞ্জতি;

এৱং আকিণ্ণকম্মন্তো, কস্মা এসো ন ৱুচ্চতি.

১১৮. আকিণ্ণলুদ্দো পুৰিসো, ধাতিচেলংৱ মক্খিতো;

তস্মিং মে ৱচনং নত্থি, তঞ্চাৰহামি ৱত্তৱে.

১১৯. অনঙ্গণস্স পোসস্স, নিচ্চং সুচিগৱেসিনো;

ৱালগ্গমত্তং পাপস্স, অব্ভামত্তংৱ খাযতি.

১২০. অদ্ধা মং যক্খ জানাসি, অথো মং অনুকম্পসি;

পুনপি যক্খ ৱজ্জাসি, যদা পস্সসি এদিসং.

১২১. নেৱ তং উপজীৱামি, নপি তে ভতকাম্হসে [ভতকম্হসে (সী. পী.), ভতিকম্হসে (স্যা.)];

ত্ৱমেৱ ভিক্খু জানেয্য, যেন গচ্ছেয্য সুগ্গতিন্তি.

সিঙ্ঘপুপ্ফ [ভিসপুপ্ফ (সী. পী.), উপসিঙ্ঘপুপ্ফ (স্যা.)] জাতকং সত্তমং.

৩৯৩. ৱিঘাসাদজাতকং (৬-২-৮)

১২২. সুসুখং ৱত জীৱন্তি, যে জনা ৱিঘাসাদিনো;

দিট্ঠেৱ ধম্মে পাসংসা, সম্পৰাযে চ সুগ্গতী.

১২৩. সুকস্স [সুৱস্স (সী. স্যা. পী.)] ভাসমানস্স, ন নিসামেথ পণ্ডিতা;

ইদং সুণাথ সোদৰিযা, অম্হেৱাযং পসংসতি.

১২৪. নাহং তুম্হে পসংসামি, কুণপাদা সুণাথ মে;

উচ্ছিট্ঠভোজিনো [ভোজনা (ক.)] তুম্হে, ন তুম্হে ৱিঘাসাদিনো.

১২৫. সত্তৱস্সা পব্বজিতা, মেজ্ঝাৰঞ্ঞে [মজ্ঝেৰঞ্ঞে (ক.)] সিখণ্ডিনো;

ৱিঘাসেনেৱ যাপেন্তা, মযং চে ভোতো গাৰয্হা;

কে নু ভোতো পসংসিযা.

১২৬. তুম্হে সীহানং ব্যগ্ঘানং, ৱাড়ানঞ্চাৱসিট্ঠকং;

উচ্ছিট্ঠেনেৱ যাপেন্তা, মঞ্ঞিৱ্হো ৱিঘাসাদিনো.

১২৭. যে ব্ৰাহ্মণস্স সমণস্স, অঞ্ঞস্স ৱা [অঞ্ঞস্স চ (সী. স্যা.), অঞ্ঞস্সেৱ (পী.)] ৱনিব্বিনো [ৱণিব্বিনো (সী. স্যা.)];

দত্ৱাৱ [দত্ৱান (পী. ক.)] সেসং ভুঞ্জন্তি, তে জনা ৱিঘাসাদিনোতি.

ৱিঘাসাদজাতকং অট্ঠমং.

৩৯৪. ৱট্টকজাতকং (৬-২-৯)

১২৮. পণীতং ভুঞ্জসে ভত্তং, সপ্পিতেলঞ্চ মাতুল;

অথ কেন নু ৱণ্ণেন, কিসো ত্ৱমসি ৱাযস.

১২৯. অমিত্তমজ্ঝে ৱসতো, তেসু আমিসমেসতো;

নিচ্চং উব্বিগ্গহদযস্স, কুতো কাকস্স দড়্হিযং.

১৩০. নিচ্চং উব্বেগিনো [উব্বিগ্গিনো (স্যা. ক.), উব্বেধিনো (সী.)] কাকা, ধঙ্কা পাপেন কম্মুনা;

লদ্ধো পিণ্ডো ন পীণেতি, কিসো তেনস্মি ৱট্টক.

১৩১. লূখানি তিণবীজানি, অপ্পস্নেহানি ভুঞ্জসি;

অথ কেন নু ৱণ্ণেন, থূলো ত্ৱমসি ৱট্টক.

১৩২. অপ্পিচ্ছা অপ্পচিন্তায, অদূৰগমনেন চ;

লদ্ধালদ্ধেন যাপেন্তো, থূলো তেনস্মি ৱাযস.

১৩৩. অপ্পিচ্ছস্স হি পোসস্স, অপ্পচিন্তসুখস্স [অপ্পচিন্তিসুখস্স (সী. স্যা. পী.)] চ;

সুসঙ্গহিতমানস্স [সুসঙ্গহিতপমাণস্স (সী. স্যা. পী.)], ৱুত্তী সুসমুদানযাতি.

ৱট্টকজাতকং নৱমং.

৩৯৫. পাৰাৱতজাতকং (৬-২-১০)

১৩৪. চিৰস্সং ৱত পস্সামি, সহাযং মণিধাৰিনং;

সুকতা [সুকতায (সী. পী.)] মস্সুকুত্তিযা, সোভতে ৱত মে সখা.

১৩৫. পৰূড়্হকচ্ছনখলোমো, অহং কম্মেসু ব্যাৱটো;

চিৰস্সং ন্হাপিতং লদ্ধা, লোমং তং অজ্জং হাৰযিং [অপহাৰযিং (সী. পী.)].

১৩৬. যং নু লোমং অহাৰেসি, দুল্লভং লদ্ধ কপ্পকং;

অথ কিঞ্চৰহি তে সম্ম, কণ্ঠে কিণিকিণাযতি [ইদং কণ্ঠে কিণাযতি (ক.), কণ্ঠে কিংনিকিলাযতি (স্যা.)].

১৩৭. মনুস্সসুখুমালানং, মণি কণ্ঠেসু লম্বতি;

তেসাহং অনুসিক্খামি, মা ত্ৱং মঞ্ঞি দৱা কতং.

১৩৮. সচেপিমং পিহযসি, মস্সুকুত্তিং সুকাৰিতং;

কাৰযিস্সামি তে সম্ম, মণিঞ্চাপি দদামি তে.

১৩৯. ত্ৱঞ্ঞেৱ মণিনা ছন্নো, সুকতায চ মস্সুযা;

আমন্ত খো তং গচ্ছামি, পিযং মে তৱ দস্সনন্তি.