৪. কোকিলৱগ্গো

৩৩১. কোকিলজাতকং (৪-৪-১)

১২১. যো ৱে কালে অসম্পত্তে, অতিৱেলং পভাসতি;

এৱং সো নিহতো সেতি, কোকিলাযিৱ অত্ৰজো.

১২২. ন হি সত্থং সুনিসিতং, ৱিসং হলাহলামিৱ [হলাহলং ইৱ (পী.)];

এৱং নিকট্ঠে [নিক্কড্ঢে (স্যা.), নিকড্ঢে (ক.)] পাতেতি, ৱাচা দুব্ভাসিতা যথা.

১২৩. তস্মা কালে অকালে ৱা [অকালে চ (সী. স্যা.)], ৱাচং ৰক্খেয্য পণ্ডিতো;

নাতিৱেলং পভাসেয্য, অপি অত্তসমম্হি ৱা.

১২৪. যো চ কালে মিতং ভাসে, মতিপুব্বো ৱিচক্খণো;

সব্বে অমিত্তে আদেতি, সুপণ্ণো উৰগামিৱাতি.

কোকিলজাতকং [কোকালিকজাতকং (সব্বত্থ)] পঠমং.

৩৩২. ৰথলট্ঠিজাতকং (৪-৪-২)

১২৫. অপি হন্ত্ৱা হতো ব্ৰূতি, জেত্ৱা জিতোতি ভাসতি;

পুব্বৱক্খাযিনো [পুব্বমক্খাযিনো (সী. স্যা.)] ৰাজ, অঞ্ঞদত্থু [একদত্থু (সী. পী.)] ন সদ্দহে.

১২৬. তস্মা পণ্ডিতজাতিযো, সুণেয্য ইতৰস্সপি;

উভিন্নং ৱচনং সুত্ৱা, যথা ধম্মো তথা কৰে.

১২৭. অলসো গিহী কামভোগী ন সাধু, অসঞ্ঞতো পব্বজিতো ন সাধু;

ৰাজা ন সাধু অনিসম্মকাৰী, যো পণ্ডিতো কোধনো তং ন সাধু.

১২৮. নিসম্ম খত্তিযো কযিৰা, নানিসম্ম দিসম্পতি;

নিসম্মকাৰিনো ৰাজ [ৰঞ্ঞো (সী. স্যা.)], যসো কিত্তি চ ৱড্ঢতীতি.

ৰথলট্ঠিজাতকং দুতিযং.

৩৩৩. পক্কগোধজাতকং (৪-৪-৩)

১২৯. তদেৱ মে ত্ৱং ৱিদিতো, ৱনমজ্ঝে ৰথেসভ;

যস্স তে খগ্গবদ্ধস্স, সন্নদ্ধস্স তিৰীটিনো;

অস্সত্থদুমসাখায, পক্কা গোধা পলাযথ.

১৩০. নমে নমন্তস্স ভজে ভজন্তং, কিচ্চানুকুব্বস্স কৰেয্য কিচ্চং;

নানত্থকামস্স কৰেয্য অত্থং, অসম্ভজন্তম্পি ন সম্ভজেয্য.

১৩১. চজে চজন্তং ৱনথং ন কযিৰা, অপেতচিত্তেন ন সম্ভজেয্য;

দিজো দুমং খীণফলন্তি [ফলংৱ (ক. সী. স্যা. ক.), দুকনিপাতে পুটভত্তজাতকেন সংসন্দেতব্বং] ঞত্ৱা, অঞ্ঞং সমেক্খেয্য মহা হি লোকো.

১৩২. সো তে কৰিস্সামি যথানুভাৱং, কতঞ্ঞুতং খত্তিযে [খত্তিযো (স্যা. ক.)] পেক্খমানো;

সব্বঞ্চ তে ইস্সৰিযং দদামি, যস্সিচ্ছসী তস্স তুৱং দদামীতি.

পক্কগোধজাতকং [গোধজাতকং (সী. স্যা. পী.)] ততিযং.

৩৩৪. ৰাজোৱাদজাতকং (৪-৪-৪)

১৩৩. গৱং চে তৰমানানং, জিম্হং গচ্ছতি পুঙ্গৱো;

সব্বা তা জিম্হং গচ্ছন্তি [সব্বা গাৱী জিম্হং যন্তি (সী. স্যা.)], নেত্তে জিম্হং গতে সতি.

১৩৪. এৱমেৱ মনুস্সেসু, যো হোতি সেট্ঠসম্মতো;

সো চে অধম্মং চৰতি, পগেৱ ইতৰা পজা;

সব্বং ৰট্ঠং দুখং সেতি, ৰাজা চে হোতি অধম্মিকো.

১৩৫. গৱং চে তৰমানানং, উজুং গচ্ছতি পুঙ্গৱো;

সব্বা গাৱী উজুং যন্তি [সব্বা তা উজুং গচ্ছন্তি (পী. অ. নি. ৪.৭০)], নেত্তে উজুং গতে সতি.

১৩৬. এৱমেৱ মনুস্সেসু, যো হোতি সেট্ঠসম্মতো;

সো সচে ধম্মং চৰতি, পগেৱ ইতৰা পজা;

সব্বং ৰট্ঠং সুখং সেতি, ৰাজা চে হোতি ধম্মিকোতি.

ৰাজোৱাদজাতকং চতুত্থং.

৩৩৫. জম্বুকজাতকং (৪-৪-৫)

১৩৭. ব্ৰহা পৱড্ঢকাযো সো, দীঘদাঠো চ জম্বুক;

ন ত্ৱং তত্থ কুলে জাতো, যত্থ গণ্হন্তি কুঞ্জৰং.

১৩৮. অসীহো সীহমানেন, যো অত্তানং ৱিকুব্বতি;

কোত্থূৱ [কুট্ঠূৱ (সী.), কুত্থুৱ (স্যা. পী)] গজমাসজ্জ, সেতি ভূম্যা অনুত্থুনং.

১৩৯. যসস্সিনো উত্তমপুগ্গলস্স, সঞ্জাতখন্ধস্স মহব্বলস্স;

অসমেক্খিয থামবলূপপত্তিং, স সেতি নাগেন হতোযং জম্বুকো.

১৪০. যো চীধ কম্মং কুৰুতে পমায, থামব্বলং অত্তনি সংৱিদিত্ৱা;

জপ্পেন মন্তেন সুভাসিতেন, পৰিক্খৱা সো ৱিপুলং জিনাতীতি.

জম্বুকজাতকং পঞ্চমং.

৩৩৬. ব্ৰহাছত্তজাতকং (৪-৪-৬)

১৪১. তিণং তিণন্তি লপসি, কো নু তে তিণমাহৰি;

কিং নু তে তিণকিচ্চত্থি, তিণমেৱ পভাসসি.

১৪২. ইধাগমা ব্ৰহ্মচাৰী, ব্ৰহা ছত্তো বহুস্সুতো;

সো মে [সো ৱে (ক.)] সব্বং সমাদায, তিণং নিক্খিপ্প গচ্ছতি.

১৪৩. এৱেতং হোতি কত্তব্বং, অপ্পেন বহুমিচ্ছতা;

সব্বং সকস্স আদানং, অনাদানং তিণস্স চ. ( ) [(তিণস্স চাটীসু গতো, তত্থ কা পৰিদেৱনা) (সী. স্যা.) (চাটীসু পক্খিপিত্ৱান, তত্থ কা পৰিদেৱনা) (ক.)]

১৪৪. সীলৱন্তো ন কুব্বন্তি, বালো সীলানি কুব্বতি;

অনিচ্চসীলং দুস্সীল্যং [দুস্সীলং (পী.)], কিং পণ্ডিচ্চং কৰিস্সতীতি.

ব্ৰহাছত্তজাতকং ছট্ঠং.

৩৩৭. পীঠজাতকং (৪-৪-৭)

১৪৫. ন তে পীঠমদাযিম্হা [মদাসিম্হ (পী. ক.)], ন পানং নপি ভোজনং;

ব্ৰহ্মচাৰি খমস্সু মে, এতং পস্সামি অচ্চযং.

১৪৬. নেৱাভিসজ্জামি ন চাপি কুপ্পে, ন চাপি মে অপ্পিযমাসি কিঞ্চি;

অথোপি মে আসি মনোৱিতক্কো, এতাদিসো নূন কুলস্স ধম্মো.

১৪৭. এসস্মাকং কুলে ধম্মো, পিতুপিতামহো সদা;

আসনং উদকং পজ্জং, সব্বেতং নিপদামসে.

১৪৮. এসস্মাকং কুলে ধম্মো, পিতুপিতামহো সদা;

সক্কচ্চং উপতিট্ঠাম, উত্তমং ৱিয ঞাতকন্তি.

পীঠজাতকং সত্তমং.

৩৩৮. থুসজাতকং (৪-৪-৮)

১৪৯. ৱিদিতং থুসং উন্দুৰানং [উন্দূৰানং (ক.)], ৱিদিতং পন তণ্ডুলং;

থুসং থুসং [থুসং থূলং (সী.)] ৱিৱজ্জেত্ৱা, তণ্ডুলং পন খাদৰে.

১৫০. যা মন্তনা অৰঞ্ঞস্মিং, যা চ গামে নিকণ্ণিকা;

যঞ্চেতং ইতি চীতি চ, এতম্পি ৱিদিতং মযা.

১৫১. ধম্মেন কিৰ জাতস্স, পিতা পুত্তস্স মক্কটো;

দহৰস্সেৱ সন্তস্স, দন্তেহি ফলমচ্ছিদা.

১৫২. যমেতং পৰিসপ্পসি [পৰিসব্বেসি (ক.)], অজকাণোৱ সাসপে;

যোপাযং হেট্ঠতো সেতি [সেসি (সী.)], এতম্পি ৱিদিতং মযাতি.

থুসজাতকং অট্ঠমং.

৩৩৯. বাৱেৰুজাতকং (৪-৪-৯)

১৫৩. অদস্সনেন মোৰস্স, সিখিনো মঞ্জুভাণিনো;

কাকং তত্থ অপূজেসুং, মংসেন চ ফলেন চ.

১৫৪. যদা চ সৰসম্পন্নো, মোৰো বাৱেৰুমাগমা;

অথ লাভো চ সক্কাৰো, ৱাযসস্স অহাযথ.

১৫৫. যাৱ নুপ্পজ্জতী বুদ্ধো, ধম্মৰাজা পভঙ্কৰো;

তাৱ অঞ্ঞে অপূজেসুং, পুথূ সমণব্ৰাহ্মণে.

১৫৬. যদা চ সৰসম্পন্নো, বুদ্ধো ধম্মং অদেসযি;

অথ লাভো চ সক্কাৰো, তিত্থিযানং অহাযথাতি.

বাৱেৰুজাতকং নৱমং.

৩৪০. ৱিসয্হজাতকং (৪-৪-১০)

১৫৭. অদাসি দানানি পুৰে ৱিসয্হ, দদতো চ তে খযধম্মো অহোসি;

ইতো পৰং চে ন দদেয্য দানং, তিট্ঠেয্যুং তে সংযমন্তস্স ভোগা.

১৫৮. অনৰিযমৰিযেন সহস্সনেত্ত, সুদুগ্গতেনাপি অকিচ্চমাহু;

মা ৱো ধনং তং অহু দেৱৰাজ [অহুৱা জনিন্দ (ক. সী. স্যা. পী.)], যং ভোগহেতু ৱিজহেমু সদ্ধং.

১৫৯. যেন একো ৰথো যাতি, যাতি তেনাপৰো ৰথো;

পোৰাণং নিহিতং ৱত্তং, ৱত্ততঞ্ঞেৱ [ৱদ্ধং, ৱদ্ধতঞ্ঞেৱ (ক. সী. পী.)] ৱাসৱ.

১৬০. যদি হেস্সতি দস্সাম, অসন্তে কিং দদামসে;

এৱংভূতাপি দস্সাম, মা দানং পমদম্হসেতি.

ৱিসয্হজাতকং দসমং.

কোকিলৱগ্গো [কোকালিকৱগ্গো (ক.)] চতুত্থো.

তস্সুদ্দানং –

অতিৱেলপভাসতি জীতৱৰো, ৱনমজ্ঝ ৰথেসভ জিম্হগমো;

অথ জম্বু তিণাসনপীঠৱৰং, অথ তণ্ডুল মোৰ ৱিসয্হ দসাতি.