৫. চূড়কুণালৱগ্গো

৩৪১. কণ্ডৰীজাতকং (৪-৫-১)

১৬১. নৰানমাৰামকৰাসু নাৰিসু, অনেকচিত্তাসু অনিগ্গহাসু চ;

সব্বত্থ নাপীতিকৰাপি [সব্ব’ত্তনা’পীতিকৰাপি (সী. স্যা.)] চে সিযা [সিযুং (স্যা.)], ন ৱিস্সসে তিত্থসমা হি নাৰিযো.

১৬২. যং ৱে [যঞ্চ (স্যা. ক.)] দিস্ৱা কণ্ডৰীকিন্নৰানং [কিন্নৰকিন্নৰীনং (স্যা.), কিন্নৰীকিন্নৰানং (ক.)], সব্বিত্থিযো ন ৰমন্তি অগাৰে;

তং তাদিসং মচ্চং চজিত্ৱা ভৰিযা, অঞ্ঞং দিস্ৱা পুৰিসং পীঠসপ্পিং.

১৬৩. বকস্স চ বাৱৰিকস্স [পাৱাৰিকস্স (সী.)] ৰঞ্ঞো, অচ্চন্তকামানুগতস্স ভৰিযা;

অৱাচৰী [অচ্চাচৰি (স্যা.), অনাচৰি (ক.)] পট্ঠৱসানুগস্স [বদ্ধৱসানুগস্স (সী. স্যা.), পত্তৱসানুগতস্স (ক.)], কং ৱাপি ইত্থী নাতিচৰে তদঞ্ঞং.

১৬৪. পিঙ্গিযানী সব্বলোকিস্সৰস্স, ৰঞ্ঞো পিযা ব্ৰহ্মদত্তস্স ভৰিযা;

অৱাচৰী পট্ঠৱসানুগস্স, তং ৱাপি সা নাজ্ঝগা কামকামিনীতি.

কণ্ডৰীজাতকং [কিন্নৰীজাতকং (ক. সী. ক.), কুণ্ডলিকজাতকং (স্যা.)] পঠমং.

৩৪২. ৱানৰজাতকং (৪-৫-২)

১৬৫. অসক্খিং ৱত অত্তানং, উদ্ধাতুং উদকা থলং;

ন দানাহং পুন তুয্হং, ৱসং গচ্ছামি ৱাৰিজ.

১৬৬. অলমেতেহি অম্বেহি, জম্বূহি পনসেহি চ;

যানি পাৰং সমুদ্দস্স, ৱৰং ময্হং উদুম্বৰো.

১৬৭. যো চ উপ্পতিতং অত্থং, ন খিপ্পমনুবুজ্ঝতি;

অমিত্তৱসমন্ৱেতি, পচ্ছা চ অনুতপ্পতি.

১৬৮. যো চ উপ্পতিতং অত্থং, খিপ্পমেৱ নিবোধতি;

মুচ্চতে সত্তুসম্বাধা, ন চ পচ্ছানুতপ্পতীতি.

ৱানৰজাতকং দুতিযং.

৩৪৩. কুন্তিনীজাতকং (৪-৫-৩)

১৬৯. অৱসিম্হ তৱাগাৰে, নিচ্চং সক্কতপূজিতা;

ত্ৱমেৱ দানিমকৰি, হন্দ ৰাজ ৱজামহং.

১৭০. যো ৱে কতে পটিকতে, কিব্বিসে পটিকিব্বিসে;

এৱং তং সম্মতী ৱেৰং, ৱস কুন্তিনি মাগমা.

১৭১. ন কতস্স চ কত্তা চ, মেত্তি [মেত্তী (পী.), মিত্তী (ক.)] সন্ধীযতে পুন;

হদযং নানুজানাতি, গচ্ছঞ্ঞেৱ ৰথেসভ.

১৭২. কতস্স চেৱ কত্তা চ, মেত্তি সন্ধীযতে পুন;

ধীৰানং নো চ বালানং, ৱস কুন্তিনি মাগমাতি.

কুন্তিনীজাতকং ততিযং.

৩৪৪. অম্বজাতকং (৪-৫-৪)

১৭৩. যো নীলিযং মণ্ডযতি, সণ্ডাসেন ৱিহঞ্ঞতি;

তস্স সা ৱসমন্ৱেতু, যা তে অম্বে অৱাহৰি.

১৭৪. ৱীসং ৱা পঞ্চৱীসং [পণ্ণুৱীসং (ক. সী. পী.)] ৱা, ঊনতিংসং ৱ জাতিযা;

তাদিসা পতি মা লদ্ধা [পতিং মা লদ্ধা (পী.), পতি মা’লত্থ (?)], যা তে অম্বে অৱাহৰি.

১৭৫. দীঘং গচ্ছতু অদ্ধানং, একিকা অভিসাৰিকা;

সঙ্কেতে পতি মা অদ্দ [মা অদ্দস (সী. পী.)], যা তে অম্বে অৱাহৰি.

১৭৬. অলঙ্কতা সুৱসনা, মালিনী চন্দনুস্সদা;

একিকা সযনে সেতু, যা তে অম্বে অৱাহৰীতি.

অম্বজাতকং [অম্বচোৰজাতকং (ক. সী. পী.)] চতুত্থং.

৩৪৫. গজকুম্ভজাতকং (৪-৫-৫)

১৭৭. ৱনং যদগ্গি দহতি, পাৱকো কণ্হৱত্তনী;

কথং কৰোসি পচলক, এৱং দন্ধপৰক্কমো.

১৭৮. বহূনি ৰুক্খছিদ্দানি, পথব্যা ৱিৱৰানি চ;

তানি চে নাভিসম্ভোম, হোতি নো কালপৰিযাযো.

১৭৯. যো দন্ধকালে তৰতি, তৰণীযে চ দন্ধতি;

সুক্খপণ্ণংৱ অক্কম্ম, অত্থং ভঞ্জতি অত্তনো.

১৮০. যো দন্ধকালে দন্ধেতি, তৰণীযে চ তাৰযি;

সসীৱ ৰত্তিং ৱিভজং, তস্সত্থো পৰিপূৰতীতি.

গজকুম্ভজাতকং পঞ্চমং.

৩৪৬. কেসৱজাতকং (৪-৫-৬)

১৮১. মনুস্সিন্দং জহিত্ৱান, সব্বকামসমিদ্ধিনং;

কথং নু ভগৱা কেসী, কপ্পস্স ৰমতি অস্সমে [ৰমতস্সমে (ক.)].

১৮২. সাদূনী [সাধূনি (ক. সী. স্যা. ক.)] ৰমণীযানি, সন্তি ৱক্খা মনোৰমা;

সুভাসিতানি কপ্পস্স, নাৰদ ৰমযন্তি মং.

১৮৩. সালীনং ওদনং ভুঞ্জে, সুচিং মংসূপসেচনং;

কথং সামাকনীৱাৰং, অলোণং ছাদযন্তি তং.

১৮৪. সাদুং ৱা [অসাদুং (পী.)] যদি ৱাসাদুং, অপ্পং ৱা যদি ৱা বহুং;

ৱিস্সত্থো যত্থ ভুঞ্জেয্য, ৱিস্সাসপৰমা ৰসাতি.

কেসৱজাতকং [কেসীজাতকং (ক.)] ছট্ঠং.

৩৪৭. অযকূটজাতকং (৪-৫-৭)

১৮৫. সব্বাযসং কূটমতিপ্পমাণং, পগ্গয্হ যো [সো (পী.)] তিট্ঠসি অন্তলিক্খে;

ৰক্খায মে [মং (সী.)] ত্ৱং ৱিহিতো নুসজ্জ, উদাহু মে চেতযসে [ৱাযমসে (সী. স্যা.)] ৱধায.

১৮৬. দূতো অহং ৰাজিধ ৰক্খসানং, ৱধায তুয্হং পহিতোহমস্মি;

ইন্দো চ তং ৰক্খতি দেৱৰাজা, তেনুত্তমঙ্গং ন তে [ন হি (ক. সী. পী.), তে ন (ক.)] ফালযামি.

১৮৭. সচে চ মং ৰক্খতি দেৱৰাজা, দেৱানমিন্দো মঘৱা সুজম্পতি;

কামং পিসাচা ৱিনদন্তু সব্বে, ন সন্তসে ৰক্খসিযা পজায.

১৮৮. কামং কন্দন্তু [কন্তন্তু (ক.), কণ্ডন্তু (স্যা.)] কুম্ভণ্ডা, সব্বে পংসুপিসাচকা;

নালং পিসাচা যুদ্ধায, মহতী সা ৱিভিংসিকাতি [ৱিভেসিকাতি (স্যা.), ৱিহেসিকাতি (পী.)].

অযকূটজাতকং সত্তমং.

৩৪৮. অৰঞ্ঞজাতকং (৪-৫-৮)

১৮৯. অৰঞ্ঞা গামমাগম্ম, কিংসীলং কিংৱতং অহং;

পুৰিসং তাত সেৱেয্যং, তং মে অক্খাহি পুচ্ছিতো.

১৯০. যো তং ৱিস্সাসযে তাত, ৱিস্সাসঞ্চ খমেয্য তে;

সুস্সূসী চ তিতিক্খী চ, তং ভজেহি ইতো [তং ভজেয্যাসিতো (ক.)] গতো.

১৯১. যস্স কাযেন ৱাচায, মনসা নত্থি দুক্কটং;

উৰসীৱ পতিট্ঠায, তং ভজেহি ইতো গতো.

১৯২. হলিদ্দিৰাগং কপিচিত্তং, পুৰিসং ৰাগৱিৰাগিনং;

তাদিসং তাত মা সেৱি, নিম্মনুস্সম্পি চে সিযাতি.

অৰঞ্ঞজাতকং অট্ঠমং.

৩৪৯. সন্ধিভেদজাতকং (৪-৫-৯)

১৯৩. নেৱ ইত্থীসু সামঞ্ঞং, নাপি ভক্খেসু সাৰথি;

অথস্স সন্ধিভেদস্স, পস্স যাৱ সুচিন্তিতং.

১৯৪. অসি তিক্খোৱ মংসম্হি, পেসুঞ্ঞং পৰিৱত্ততি;

যত্থূসভঞ্চ সীহঞ্চ, ভক্খযন্তি মিগাধমা.

১৯৫. ইমং সো সযনং সেতি, যমিমং [যযিমং (সী. পী.), যিমং (ক.)] পস্সসি সাৰথি;

যো ৱাচং সন্ধিভেদস্স, পিসুণস্স নিবোধতি.

১৯৬. তে জনা সুখমেধন্তি, নৰা সগ্গগতাৰিৱ;

যে ৱাচং সন্ধিভেদস্স, নাৱবোধন্তি সাৰথীতি.

সন্ধিভেদজাতকং নৱমং.

৩৫০. দেৱতাপঞ্হজাতকং (৪-৫-১০)

১৯৭. হন্তি হত্থেহি পাদেহি, মুখঞ্চ পৰিসুম্ভতি;

স ৱে ৰাজ পিযো হোতি, কং তেন ত্ৱাভিপস্সসি [মভিপস্সসি (সী.)].

১৯৮. অক্কোসতি যথাকামং, আগমঞ্চস্স ইচ্ছতি;

স ৱে ৰাজ পিযো হোতি, কং তেন ত্ৱাভিপস্সসি.

১৯৯. অব্ভক্খাতি অভূতেন, অলিকেনাভিসাৰযে;

স ৱে ৰাজ পিযো হোতি, কং তেন ত্ৱাভিপস্সসি.

২০০. হৰং অন্নঞ্চ পানঞ্চ, ৱত্থসেনাসনানি চ;

অঞ্ঞদত্থুহৰা সন্তা, তে ৱে ৰাজ পিযা হোন্তি;

কং তেন ত্ৱাভিপস্সসীতি.

দেৱতাপঞ্হজাতকং দসমং.

চূড়কুণালৱগ্গো পঞ্চমো.

তস্সুদ্দানং –

নৰানং অসক্খিৱসিম্হৱৰো, নীলিযমগ্গিৱৰঞ্চ পুন;

পুন ৰসাযসকূটৱৰো, তথাৰঞ্ঞ সাৰথি হন্তি দসাতি.

অথ ৱগ্গুদ্দানং –

কালিঙ্গং [ৱিৱৰং (বহূসু)] পুচিমন্দঞ্চ, কুটিদূসক কোকিলা [কুটিদূসং বহুভাণকং (বহূসু)];

চূড়কুণালৱগ্গো সো, পঞ্চমো সুপ্পকাসিতোতি.

চতুক্কনিপাতং নিট্ঠিতং.