৩. কুটিদূসকৱগ্গো

৩২১. কুটিদূসকজাতকং (৪-৩-১)

৮১. মনুস্সস্সেৱ তে সীসং, হত্থপাদা চ ৱানৰ;

অথ কেন নু ৱণ্ণেন, অগাৰং তে ন ৱিজ্জতি.

৮২. মনুস্সস্সেৱ মে সীসং, হত্থপাদা চ সিঙ্গিল [সিঙ্গাল (ক.), পিঙ্গল (টীকা)];

যাহু সেট্ঠা মনুস্সেসু, সা মে পঞ্ঞা ন ৱিজ্জতি.

৮৩. অনৱট্ঠিতচিত্তস্স, লহুচিত্তস্স দুব্ভিনো [দূভিনো (পী.)];

নিচ্চং অদ্ধুৱসীলস্স, সুখভাৱো [সুচিভাৱো (সী.), সুখভাগো (?)] ন ৱিজ্জতি.

৮৪. সো কৰস্সু আনুভাৱং, ৱীতিৱত্তস্সু সীলিযং;

সীতৱাতপৰিত্তাণং, কৰস্সু কুটৱং [কুটিকং (সী. স্যা.)] কপীতি.

কুটিদূসক [সিঙ্গালসকুণ (ক.)] জাতকং পঠমং.

৩২২. দুদ্দুভজাতকং (৪-৩-২)

৮৫. দুদ্দুভাযতি [দদ্দভাযতি (সী. পী.)] ভদ্দন্তে, যস্মিং দেসে ৱসামহং;

অহম্পেতং ন জানামি, কিমেতং দুদ্দুভাযতি.

৮৬. বেলুৱং পতিতং সুত্ৱা, দুদ্দুভন্তি [দদ্দভন্তি (সী.)] সসো জৱি;

সসস্স ৱচনং সুত্ৱা, সন্তত্তা মিগৱাহিনী.

৮৭. অপ্পত্ৱা পদৱিঞ্ঞাণং, পৰঘোসানুসাৰিনো;

পনাদপৰমা বালা, তে হোন্তি পৰপত্তিযা.

৮৮. যে চ সীলেন সম্পন্না, পঞ্ঞাযূপসমে ৰতা;

আৰকা ৱিৰতা ধীৰা, ন হোন্তি পৰপত্তিযাতি.

দুদ্দুভজাতকং [দদ্দভজাতকং (সী. পী.)] দুতিযং.

৩২৩. ব্ৰহ্মদত্তজাতকং (৪-৩-৩)

৮৯. দ্ৱযং যাচনকো ৰাজ, ব্ৰহ্মদত্ত নিগচ্ছতি;

অলাভং ধনলাভং ৱা, এৱং ধম্মা হি যাচনা.

৯০. যাচনং ৰোদনং আহু, পঞ্চালানং ৰথেসভ;

যো যাচনং পচ্চক্খাতি, তমাহু পটিৰোদনং.

৯১. মা মদ্দসংসু ৰোদন্তং, পঞ্চালা সুসমাগতা;

তুৱং ৱা পটিৰোদন্তং, তস্মা ইচ্ছামহং ৰহো.

৯২. দদামি তে ব্ৰাহ্মণ ৰোহিণীনং, গৱং সহস্সং সহ পুঙ্গৱেন;

অৰিযো হি অৰিযস্স কথং ন দজ্জা [দজ্জে (সী.), দজ্জং (?)], সুত্ৱান গাথা তৱ ধম্মযুত্তাতি.

ব্ৰহ্মদত্তজাতকং ততিযং.

৩২৪. চম্মসাটকজাতকং (৪-৩-৪)

৯৩. কল্যাণৰূপো ৱতযং চতুপ্পদো, সুভদ্দকো চেৱ সুপেসলো চ;

যো ব্ৰাহ্মণং জাতিমন্তূপপন্নং, অপচাযতি মেণ্ডৱৰো যসস্সী.

৯৪. মা ব্ৰাহ্মণ ইত্তৰদস্সনেন, ৱিস্সাসমাপজ্জি চতুপ্পদস্স;

দড়্হপ্পহাৰং অভিকঙ্খমানো [অভিকত্তুকামো (স্যা.)], অৱসক্কতী দস্সতি সুপ্পহাৰং.

৯৫. ঊৰুট্ঠি [ঊৰট্ঠি (সী.)] ভগ্গং পৱট্টিতো [পতিতো (সী. স্যা.)] খাৰিভাৰো, সব্বঞ্চ ভণ্ডং ব্ৰাহ্মণস্স [ব্ৰাহ্মণস্সীধ (ক. সী. পী.), ব্ৰাহ্মণস্সেৱ (ক. সী. স্যা. ক.)] ভিন্নং;

উভোপি বাহা পগ্গয্হ [পগ্গয্যেৱ (স্যা.), পগ্গহীয (?)] কন্দতি [বাহা পগ্গয্য কন্দতি (পী. ক.)], অভিধাৱথ হঞ্ঞতে ব্ৰহ্মচাৰী.

৯৬. এৱং সো নিহতো সেতি, যো অপূজং পসংসতি [নমস্সতি (পী.)];

যথাহমজ্জ পহতো, হতো মেণ্ডেন দুম্মতীতি.

চম্মসাটকজাতকং চতুত্থং.

৩২৫. গোধৰাজজাতকং (৪-৩-৫)

৯৭. সমণং তং মঞ্ঞমানো, উপগচ্ছিমসঞ্ঞতং;

সো মং দণ্ডেন পাহাসি, যথা অস্সমণো তথা.

৯৮. কিং তে জটাহি দুম্মেধ, কিং তে অজিনসাটিযা;

অব্ভন্তৰং তে গহনং, বাহিৰং পৰিমজ্জসি.

৯৯. এহি গোধ নিৱত্তস্সু, ভুঞ্জ সালীনমোদনং;

তেলং লোণঞ্চ মে অত্থি, পহূতং ময্হ পিপ্ফলি.

১০০. এস ভিয্যো পৱেক্খামি, ৱম্মিকং সতপোৰিসং;

তেলং লোণঞ্চ কিত্তেসি [কিন্তেসি (স্যা. পী.)], অহিতং ময্হ পিপ্ফলীতি.

গোধৰাজজাতকং পঞ্চমং.

৩২৬. কক্কাৰুজাতকং (৪-৩-৬)

১০১. কাযেন যো নাৱহৰে, ৱাচায ন মুসা ভণে;

যসো লদ্ধা ন মজ্জেয্য, স ৱে কক্কাৰুমৰহতি.

১০২. ধম্মেন ৱিত্তমেসেয্য, ন নিকত্যা ধনং হৰে;

ভোগে লদ্ধা ন মজ্জেয্য, স ৱে কক্কাৰুমৰহতি.

১০৩. যস্স চিত্তং অহালিদ্দং, সদ্ধা চ অৱিৰাগিনী;

একো সাদুং ন ভুঞ্জেয্য, স ৱে কক্কাৰুমৰহতি.

১০৪. সম্মুখা ৱা তিৰোক্খা ৱা [পৰোক্খা ৱা (পী.), পৰম্মুখা (ক.)], যো সন্তে ন পৰিভাসতি;

যথাৱাদী তথাকাৰী, স ৱে কক্কাৰুমৰহতীতি.

কক্কাৰুজাতকং ছট্ঠং.

৩২৭. কাকৱতীজাতকং (৪-৩-৭)

১০৫. ৱাতি চাযং [ৱাযং (ক.)] ততো গন্ধো, যত্থ মে ৱসতী পিযা;

দূৰে ইতো হি কাকৱতী [কাকাতী (সী.), কাকাতি (স্যা. পী.)], যত্থ মে নিৰতো মনো.

১০৬. কথং সমুদ্দমতৰী, কথং অতৰি কেপুকং [কেবুকং (সী. পী.)];

কথং সত্ত সমুদ্দানি, কথং সিম্বলিমাৰুহি.

১০৭. তযা সমুদ্দমতৰিং, তযা অতৰি কেপুকং [কেবুকং (সী. পী.)];

তযা সত্ত সমুদ্দানি, তযা সিম্বলিমাৰুহিং.

১০৮. ধিৰত্থুমং মহাকাযং, ধিৰত্থুমং অচেতনং;

যত্থ জাযাযহং জাৰং, আৱহামি ৱহামি চাতি.

কাকৱতীজাতকং সত্তমং.

৩২৮. অননুসোচিযজাতকং (৪-৩-৮)

১০৯. বহূনং ৱিজ্জতী ভোতী, তেহি মে কিং ভৱিস্সতি;

তস্মা এতং ন সোচামি, পিযং সম্মিল্লহাসিনিং.

১১০. তং তং চে অনুসোচেয্য, যং যং তস্স ন ৱিজ্জতি;

অত্তানমনুসোচেয্য, সদা মচ্চুৱসং পতং.

১১১. ন হেৱ ঠিতং নাসীনং, ন সযানং ন পদ্ধগুং [পত্থগুং (স্যা.)];

যাৱ ব্যাতি নিমিসতি, তত্ৰাপি ৰসতী [সৰতী (সী. স্যা. পী.)] ৱযো.

১১২. তত্থত্তনি ৱতপ্পদ্ধে [ৱত পন্থে (স্যা.), ৱত বন্ধে (ক.) ৱত + প-অদ্ধে = ৱতপ্পদ্ধে], ৱিনাভাৱে অসংসযে;

ভূতং সেসং দযিতব্বং, ৱীতং অননুসোচিযন্তি [চৱিতং নানুসোচিযন্তি (স্যা.), মতন্তং নানুসোচিযং (ক.)].

অননুসোচিযজাতকং অট্ঠমং.

৩২৯. কাড়বাহুজাতকং (৪-৩-৯)

১১৩. যং অন্নপানস্স পুৰে লভাম, তং দানি সাখমিগমেৱ গচ্ছতি;

গচ্ছাম দানি ৱনমেৱ ৰাধ, অসক্কতা চস্ম ধনঞ্জযায [ধনঞ্চযায (ক.)].

১১৪. লাভো অলাভো যসো অযসো চ, নিন্দা পসংসা চ সুখঞ্চ দুক্খং;

এতে অনিচ্চা মনুজেসু ধম্মা, মা সোচি কিং সোচসি পোট্ঠপাদ.

১১৫. অদ্ধা তুৱং পণ্ডিতকোসি ৰাধ, জানাসি অত্থানি অনাগতানি;

কথং নু সাখামিগং দক্খিসাম [দক্খিযাম (ক.), দক্খাম (স্যা.)], নিদ্ধাৱিতং [নিদ্ধাপিতং (সী. স্যা.), নিব্বাপিতং (পী.), নিচ্ছদং (ক.)] ৰাজকুলতোৱ জম্মং.

১১৬. চালেতি কণ্ণং ভকুটিং কৰোতি, মুহুং মুহুং ভাযযতে [ভাযতে (স্যা.), ভাযাপতে (ক.)] কুমাৰে;

সযমেৱ তং কাহতি কাড়বাহু, যেনাৰকা ঠস্সতি অন্নপানাতি.

কাড়বাহুজাতকং নৱমং.

৩৩০. সীলৱীমংসজাতকং (৪-৩-১০)

১১৭. সীলং কিৰেৱ কল্যাণং, সীলং লোকে অনুত্তৰং;

পস্স ঘোৰৱিসো নাগো, সীলৱাতি ন হঞ্ঞতি.

১১৮. যাৱদেৱস্সহূ কিঞ্চি, তাৱদেৱ অখাদিসুং;

সঙ্গম্ম কুললা লোকে, ন হিংসন্তি অকিঞ্চনং.

১১৯. সুখং নিৰাসা সুপতি, আসা ফলৱতী সুখা;

আসং নিৰাসং কত্ৱান, সুখং সুপতি পিঙ্গলা.

১২০. ন সমাধিপৰো অত্থি, অস্মিং লোকে পৰম্হি চ;

ন পৰং নাপি অত্তানং, ৱিহিংসতি সমাহিতোতি.

সীলৱীমংসজাতকং দসমং.

কুটিদূসকৱগ্গো ততিযো.

তস্সুদ্দানং –

সমনুস্স -সদুদ্দুভ-যাচনকো, অথ মেণ্ডৱৰুত্তম-গোধৱৰো;

অথ কাযসকেপুক ভোতীৱৰো, অথ ৰাধসুসীলৱৰেন দসাতি.