২. পুচিমন্দৱগ্গো

৩১১. পুচিমন্দজাতকং (৪-২-১)

৪১. উট্ঠেহি চোৰ কিং সেসি, কো অত্থো সুপনেন [সুপিতেন (সী.), সুপিনেন (পী. ক.)] তে;

মা তং গহেসুং [গণ্হেয্যুং (ক.)] ৰাজানো, গামে কিব্বিসকাৰকং.

৪২. যং নু [নূন (স্যা.)] চোৰং গহেস্সন্তি, গামে কিব্বিসকাৰকং;

কিং তত্থ পুচিমন্দস্স, ৱনে জাতস্স তিট্ঠতো.

৪৩. ন ত্ৱং অস্সত্থ জানাসি, মম চোৰস্স চন্তৰং;

চোৰং গহেত্ৱা ৰাজানো, গামে কিব্বিসকাৰকং;

অপ্পেন্তি [অচ্চেন্তি (স্যা.)] নিম্বসূলস্মিং, তস্মিং মে সঙ্কতে মনো.

৪৪. সঙ্কেয্য সঙ্কিতব্বানি, ৰক্খেয্যানাগতং ভযং;

অনাগতভযা ধীৰো, উভো লোকে অৱেক্খতীতি.

পুচিমন্দজাতকং পঠমং.

৩১২. কস্সপমন্দিযজাতকং (৪-২-২)

৪৫. অপি কস্সপ মন্দিযা, যুৱা সপতি হন্তি [সম্পটিহন্তি (ক.)] ৱা;

সব্বং তং খমতে ধীৰো, পণ্ডিতো তং তিতিক্খতি.

৪৬. সচেপি সন্তো ৱিৱদন্তি, খিপ্পং সন্ধীযৰে পুন;

বালা পত্তাৱ ভিজ্জন্তি, ন তে সমথমজ্ঝগূ.

৪৭. এতে ভিয্যো সমাযন্তি, সন্ধি তেসং ন জীৰতি;

যো চাধিপন্নং জানাতি, যো চ জানাতি দেসনং.

৪৮. এসো হি উত্তৰিতৰো, ভাৰৱহো ধুৰদ্ধৰো;

যো পৰেসাধিপন্নানং, সযং সন্ধাতুমৰহতীতি.

কস্সপমন্দিযজাতকং দুতিযং.

৩১৩. খন্তীৱাদীজাতকং (৪-২-৩)

৪৯. যো তে হত্থে চ পাদে চ, কণ্ণনাসঞ্চ ছেদযি;

তস্স কুজ্ঝ মহাৱীৰ, মা ৰট্ঠং ৱিনসা [ৱিনস্স (ক. সী. স্যা. ক.)] ইদং.

৫০. যো মে হত্থে চ পাদে চ, কণ্ণনাসঞ্চ ছেদযি;

চিৰং জীৱতু সো ৰাজা, ন হি কুজ্ঝন্তি মাদিসা.

৫১. অহূ অতীতমদ্ধানং [অহু অতীতমদ্ধানে (স্যা. পী. ক.)], সমণো খন্তিদীপনো;

তং খন্তিযাযেৱ ঠিতং, কাসিৰাজা অছেদযি.

৫২. তস্স কম্ম [কম্মস্স (সী. পী.)] ফৰুসস্স, ৱিপাকো কটুকো অহু;

যং কাসিৰাজা ৱেদেসি, নিৰযম্হি সমপ্পিতোতি.

খন্তীৱাদীজাতকং ততিযং.

৩১৪. লোহকুম্ভিজাতকং (৪-২-৪)

৫৩. দুজ্জীৱিতমজীৱিম্হ, যে সন্তে [যেসং নো (স্যা. ক.)] ন দদম্হসে;

ৱিজ্জমানেসু ভোগেসু, দীপং নাকম্হ অত্তনো.

৫৪. সট্ঠি [সট্ঠিং (স্যা.)] ৱস্সসহস্সানি, পৰিপুণ্ণানি সব্বসো;

নিৰযে পচ্চমানানং, কদা অন্তো ভৱিস্সতি.

৫৫. নত্থি অন্তো কুতো অন্তো, ন অন্তো পটিদিস্সতি;

তদা হি পকতং পাপং, মম তুয্হঞ্চ মাৰিসা [মাৰিস (সী. স্যা. পী.)].

৫৬. সোহং নূন ইতো গন্ত্ৱা, যোনিং লদ্ধান মানুসিং;

ৱদঞ্ঞূ সীলসম্পন্নো, কাহামি কুসলং বহুন্তি.

লোহকুম্ভিজাতকং চতুত্থং.

৩১৫. সব্বমংসলাভজাতকং (৪-২-৫)

৫৭. ফৰুসা ৱত তে ৱাচা, মংসং [সম্ম (পী. ক.)] যাচনকো অসি [চসি (পী.)];

কিলোমসদিসী [কিলোমস্স সদিসা (পী.)] ৱাচা, কিলোমং সম্ম দম্মি তে.

৫৮. অঙ্গমেতং মনুস্সানং, ভাতা লোকে পৱুচ্চতি;

অঙ্গস্স সদিসী ৱাচা [অঙ্গস্সদিসী তে ৱাচা (ক.)], অঙ্গং সম্ম দদামি তে.

৫৯. তাতাতি পুত্তো ৱদমানো, কম্পেতি [সম্মেতি (ক.)] হদযং পিতু;

হদযস্স সদিসী [হদযস্সদিসী (ক.)] ৱাচা, হদযং সম্ম দম্মি তে.

৬০. যস্স গামে সখা নত্থি, যথাৰঞ্ঞং তথেৱ তং;

সব্বস্স সদিসী ৱাচা, সব্বং সম্ম দদামি তেতি.

সব্বমংসলাভজাতকং [মংসজাতকং (সী. স্যা. পী.)] পঞ্চমং.

৩১৬. সসপণ্ডিতজাতকং (৪-২-৬)

৬১. সত্ত মে ৰোহিতা মচ্ছা, উদকা থলমুব্ভতা;

ইদং ব্ৰাহ্মণ মে অত্থি, এতং ভুত্ৱা ৱনে ৱস.

৬২. দুস্স মে খেত্তপালস্স, ৰত্তিভত্তং অপাভতং;

মংসসূলা চ দ্ৱে গোধা, একঞ্চ দধিৱাৰকং;

ইদং ব্ৰাহ্মণ মে অত্থি, এতং ভুত্ৱা ৱনে ৱস.

৬৩. অম্বপক্কং দকং [অম্বপক্কোদকং (সী. পী.)] সীতং, সীতচ্ছাযা মনোৰমা [সীতচ্ছাযং মনোৰমং (সী. স্যা. পী.)];

ইদং ব্ৰাহ্মণ মে অত্থি, এতং ভুত্ৱা ৱনে ৱস.

৬৪. ন সসস্স তিলা অত্থি, ন মুগ্গা নপি তণ্ডুলা;

ইমিনা অগ্গিনা পক্কং, মমং [মংসং (ক.)] ভুত্ৱা ৱনে ৱসাতি.

সসপণ্ডিতজাতকং ছট্ঠং.

৩১৭. মতৰোদনজাতকং (৪-২-৭)

৬৫. মতং মতং এৱ [মতমতমেৱ (সী. স্যা. পী.)] ৰোদথ, ন হি তং ৰোদথ যো মৰিস্সতি;

সব্বেপি [সব্বেৱ (সী. স্যা. পী.)] সৰীৰধাৰিনো, অনুপুব্বেন জহন্তি জীৱিতং.

৬৬. দেৱমনুস্সা চতুপ্পদা, পক্খিগণা উৰগা চ ভোগিনো;

সম্হি [যম্হি (স্যা.), অস্মিং (পী. ক.)] সৰীৰে অনিস্সৰা, ৰমমানাৱ জহন্তি জীৱিতং.

৬৭. এৱং চলিতং অসণ্ঠিতং, সুখদুক্খং মনুজেস্ৱপেক্খিয;

কন্দিতৰুদিতং নিৰত্থকং, কিং ৱো সোকগণাভিকীৰৰে.

৬৮. ধুত্তা চ সোণ্ডা [ধুত্তা সোণ্ডা (সী.), ধুত্তা সোণ্ডা চ (স্যা.)] অকতা, বালা সূৰা অযোগিনো [বালা সূৰা ৱীৰা অযোগিনো (পী.)];

ধীৰং মঞ্ঞন্তি বালোতি, যে ধম্মস্স অকোৱিদাতি.

মতৰোদনজাতকং সত্তমং.

৩১৮. কণৱেৰজাতকং (৪-২-৮)

৬৯. যং তং ৱসন্তসমযে, কণৱেৰেসু ভাণুসু;

সামং বাহায পীড়েসি, সা তং আৰোগ্যমব্ৰৱি.

৭০. অম্ভো ন কিৰ সদ্ধেয্যং, যং ৱাতো পব্বতং ৱহে;

পব্বতঞ্চে ৱহে ৱাতো, সব্বম্পি পথৱিং ৱহে;

যত্থ সামা কালকতা [কালঙ্কতা (ক.)], সা মং আৰোগ্যমব্ৰৱি.

৭১. ন চেৱ সা কালকতা, ন চ সা অঞ্ঞমিচ্ছতি;

একভত্তিকিনী [একভত্তা কিৰ (সী. স্যা.), একভত্তকিনী (পী.)] সামা, তমেৱ অভিকঙ্খতি.

৭২. অসন্থুতং মং চিৰসন্থুতেন [অসন্ধতং মং চিৰসন্ধতেন (ক.)], নিমীনি সামা অধুৱং ধুৱেন;

মযাপি সামা নিমিনেয্য অঞ্ঞং, ইতো অহং দূৰতৰং গমিস্সন্তি.

কণৱেৰজাতকং অট্ঠমং.

৩১৯. তিত্তিৰজাতকং (৪-২-৯)

৭৩. সুসুখং ৱত জীৱামি, লভামি চেৱ ভুঞ্জিতুং;

পৰিপন্থেৱ তিট্ঠামি, কা নু ভন্তে গতী মম.

৭৪. মনো চে তে নপ্পণমতি, পক্খি পাপস্স কম্মুনো;

অব্যাৱটস্স ভদ্ৰস্স, ন পাপমুপলিম্পতি.

৭৫. ঞাতকো নো নিসিন্নোতি, বহু আগচ্ছতে জনো;

পটিচ্চ কম্মং ফুসতি, তস্মিং মে সঙ্কতে মনো.

৭৬. ন পটিচ্চ কম্মং ফুসতি, মনো চে নপ্পদুস্সতি;

অপ্পোস্সুক্কস্স ভদ্ৰস্স, ন পাপমুপলিম্পতীতি.

তিত্তিৰজাতকং নৱমং.

৩২০. সুচ্চজজাতকং (৪-২-১০)

৭৭. সুচ্চজং ৱত নচ্চজি, ৱাচায অদদং গিৰিং;

কিং হিতস্স চজন্তস্স, ৱাচায অদদ পব্বতং.

৭৮. যঞ্হি কযিৰা তঞ্হি ৱদে, যং ন কযিৰা ন তং ৱদে;

অকৰোন্তং ভাসমানং, পৰিজানন্তি পণ্ডিতা.

৭৯. ৰাজপুত্ত নমো ত্যত্থু, সচ্চে ধম্মে ঠিতো চসি;

যস্স তে ব্যসনং পত্তো, সচ্চস্মিং ৰমতে মনো.

৮০. যা দলিদ্দী দলিদ্দস্স, অড্ঢা অড্ঢস্স কিত্তিম [কিত্তিমা (সী. স্যা. পী.)];

সা হিস্স পৰমা ভৰিযা, সহিৰঞ্ঞস্স ইত্থিযোতি.

সুচ্চজজাতকং দসমং.

পুচিমন্দৱগ্গো দুতিযো.

তস্সুদ্দানং –

অথ চোৰ সকস্সপ খন্তীৱৰো, দুজ্জীৱিততা চ ৱৰা ফৰুসা;

অথ সস মতঞ্চ ৱসন্ত সুখং, সুচ্চজংৱতনচ্চজিনা চ দসাতি.