৫৪৭. ৱেস্সন্তৰজাতকং (১০)

দসৱৰকথা

১৬৫৫. ‘‘ফুস্সতী [ফুসতি (সী. পী.)] ৱৰৱণ্ণাভে, ৱৰস্সু দসধা ৱৰে;

পথব্যা চাৰুপুব্বঙ্গি, যং তুয্হং মনসো পিযং’’.

১৬৫৬. ‘‘দেৱৰাজ নমো ত্যত্থু, কিং পাপং পকতং মযা;

ৰম্মা চাৱেসি মং ঠানা, ৱাতোৱ ধৰণীৰুহং’’.

১৬৫৭. ‘‘ন চেৱ তে কতং পাপং, ন চ মে ত্ৱমসি অপ্পিযা;

পুঞ্ঞঞ্চ তে পৰিক্খীণং, যেন তেৱং ৱদামহং.

১৬৫৮. ‘‘সন্তিকে মৰণং তুয্হং, ৱিনাভাৱো ভৱিস্সতি;

পটিগণ্হাহি মে এতে, ৱৰে দস পৱেচ্ছতো’’.

১৬৫৯. ‘‘ৱৰং চে মে অদো সক্ক, সব্বভূতানমিস্সৰ;

সিৱিৰাজস্স ভদ্দন্তে, তত্থ অস্সং নিৱেসনে.

১৬৬০. ‘‘নীলনেত্তা নীলভমু, নিলক্খী চ যথা মিগী;

ফুস্সতী নাম নামেন, তত্থপস্সং পুৰিন্দদ.

১৬৬১. ‘‘পুত্তং লভেথ ৱৰদং, যাচযোগং [যাচযোগিং (ক.)] অমচ্ছৰিং;

পূজিতং পটিৰাজূহি, কিত্তিমন্তং যসস্সিনং.

১৬৬২. ‘‘গব্ভং মে ধাৰযন্তিযা, মজ্ঝিমঙ্গং অনুন্নতং;

কুচ্ছি অনুন্নতো অস্স, চাপংৱ লিখিতং সমং.

১৬৬৩. ‘‘থনা মে নপ্পপতেয্যুং, পলিতা ন সন্তু ৱাসৱ;

কাযে ৰজো ন লিম্পেথ, ৱজ্ঝঞ্চাপি পমোচযে.

১৬৬৪. ‘‘মযূৰকোঞ্চাভিৰুদে, নাৰিৱৰগণাযুতে;

খুজ্জচেলাপকাকিণ্ণে, সূদমাগধৱণ্ণিতে.

১৬৬৫. ‘‘চিত্ৰগ্গড়েৰুঘুসিতে, সুৰামংসপবোধনে;

সিৱিৰাজস্স ভদ্দন্তে, তত্থস্সং মহেসী পিযা’’.

১৬৬৬. ‘‘যে তে দস ৱৰা দিন্না, মযা সব্বঙ্গসোভনে;

সিৱিৰাজস্স ৱিজিতে, সব্বে তে লচ্ছসী ৱৰে.

১৬৬৭. ‘‘ইদং ৱত্ৱান মঘৱা, দেৱৰাজা সুজম্পতি;

ফুস্সতিযা ৱৰং দত্ৱা, অনুমোদিত্থ ৱাসৱো.

দসৱৰকথা নাম.

হেমৱন্তং

১৬৬৮. ‘‘পৰূড়্হকচ্ছনখলোমা, পঙ্কদন্তা ৰজস্সিৰা;

পগ্গয্হ দক্খিণং বাহুং, কিং মং যাচন্তি ব্ৰাহ্মণা’’.

১৬৬৯. ‘‘ৰতনং দেৱ যাচাম, সিৱীনং ৰট্ঠৱড্ঢনং;

দদাহি পৱৰং নাগং, ঈসাদন্তং উৰূড়্হৱং’’.

১৬৭০. ‘‘দদামি ন ৱিকম্পামি, যং মং যাচন্তি ব্ৰাহ্মণা;

পভিন্নং কুঞ্জৰং দন্তিং, ওপৱয্হং গজুত্তমং’’.

১৬৭১. ‘‘হত্থিক্খন্ধতো ওৰুয্হ, ৰাজা চাগাধিমানসো;

ব্ৰাহ্মণানং অদা দানং, সিৱীনং ৰট্ঠৱড্ঢনো’’.

১৬৭২. ‘‘তদাসি যং ভিংসনকং, তদাসি লোমহংসনং;

হত্থিনাগে পদিন্নম্হি, মেদনী সম্পকম্পথ.

১৬৭৩. ‘‘তদাসি যং ভিংসনকং, তদাসি লোমহংসনং;

হত্থিনাগে পদিন্নম্হি, খুব্ভিত্থ নগৰং তদা.

১৬৭৪. ‘‘সমাকুলং পুৰং আসি, ঘোসো চ ৱিপুলো মহা;

হত্থিনাগে পদিন্নম্হি, সিৱীনং ৰট্ঠৱড্ঢনে’’.

১৬৭৫. ‘‘উগ্গা চ ৰাজপুত্তা চ, ৱেসিযানা চ ব্ৰাহ্মণা;

হত্থাৰোহা অনীকট্ঠা, ৰথিকা পত্তিকাৰকা.

১৬৭৬. ‘‘কেৱলো চাপি নিগমো, সিৱযো চ সমাগতা;

দিস্ৱা নাগং নীযমানং, তে ৰঞ্ঞো পটিৱেদযুং.

১৬৭৭. ‘‘ৱিধমং দেৱ তে ৰট্ঠং, পুত্তো ৱেস্সন্তৰো তৱ;

কথং নো হত্থিনং দজ্জা, নাগং ৰট্ঠস্স পূজিতং.

১৬৭৮. ‘‘কথং নো কুঞ্জৰং দজ্জা, ঈসাদন্তং উৰূড়্হৱং;

খেত্তঞ্ঞুং সব্বযুদ্ধানং, সব্বসেতং গজুত্তমং.

১৬৭৯. ‘‘পণ্ডুকম্বলসঞ্ছন্নং, পভিন্নং সত্তুমদ্দনং;

দন্তিং সৱাড়বীজনিং, সেতং কেলাসসাদিসং.

১৬৮০. ‘‘সসেতচ্ছত্তং সউপাধেয্যং, সাথব্বনং সহত্থিপং;

অগ্গযানং ৰাজৱাহিং, ব্ৰাহ্মণানং অদা গজং [ধনং (সী. পী.), দানং (স্যা.)].

১৬৮১. ‘‘অন্নং পানঞ্চ যো [সো (সী. স্যা. ক.)] দজ্জা, ৱত্থসেনাসনানি চ;

এতং খো দানং পতিৰূপং, এতং খো ব্ৰাহ্মণাৰহং.

১৬৮২. ‘‘অযং তে ৱংসৰাজা নো, সিৱীনং ৰট্ঠৱড্ঢনো [ৰট্ঠৱড্ঢনং (সী.), ৰট্ঠৱড্ঢন (পী.)];

কথং ৱেস্সন্তৰো পুত্তো, গজং ভাজেতি সঞ্জয.

১৬৮৩. ‘‘সচে ত্ৱং ন কৰিস্সসি, সিৱীনং ৱচনং ইদং;

মঞ্ঞে তং সহ পুত্তেন, সিৱী হত্থে কৰিস্সৰে’’.

১৬৮৪. ‘‘কামং জনপদো মাসি, ৰট্ঠঞ্চাপি ৱিনস্সতু;

নাহং সিৱীনং ৱচনা, ৰাজপুত্তং অদূসকং;

পব্বাজেয্যং সকা ৰট্ঠা, পুত্তো হি মম ওৰসো.

১৬৮৫. ‘‘কামং জনপদো মাসি, ৰট্ঠঞ্চাপি ৱিনস্সতু;

নাহং সিৱীনং ৱচনা, ৰাজপুত্তং অদূসকং;

পব্বাজেয্যং সকা ৰট্ঠা, পুত্তো হি মম অত্ৰজো.

১৬৮৬. ‘‘ন চাহং তস্মিং দুব্ভেয্যং, অৰিযসীলৱতো হি সো;

অসিলোকোপি মে অস্স, পাপঞ্চ পসৱে বহুং;

কথং ৱেস্সন্তৰং পুত্তং, সত্থেন ঘাতযামসে’’.

১৬৮৭. ‘‘মা নং দণ্ডেন সত্থেন, ন হি সো বন্ধনাৰহো;

পব্বাজেহি চ নং ৰট্ঠা, ৱঙ্কে ৱসতু পব্বতে’’.

১৬৮৮. ‘‘এসো চে সিৱীনং ছন্দো, ছন্দং ন পনুদামসে;

ইমং সো ৱসতু ৰত্তিং, কামে চ পৰিভুঞ্জতু.

১৬৮৯. ‘‘ততো ৰত্যা ৱিৱসানে, সূৰিযস্সুগ্গমনং পতি [সূৰিযুগ্গমনে সতি (ক.)];

সমগ্গা সিৱযো হুত্ৱা, ৰট্ঠা পব্বাজযন্তু নং’’.

১৬৯০. ‘‘উট্ঠেহি কত্তে তৰমানো, গন্ত্ৱা ৱেস্সন্তৰং ৱদ;

সিৱযো দেৱ তে কুদ্ধা, নেগমা চ সমাগতা.

১৬৯১. ‘‘উগ্গা চ ৰাজপুত্তা চ, ৱেসিযানা চ ব্ৰাহ্মণা;

হত্থাৰোহা অনীকট্ঠা, ৰথিকা পত্তিকাৰকা;

কেৱলো চাপি নিগমো, সিৱযো চ সমাগতা.

১৬৯২. ‘‘অস্মা ৰত্যা ৱিৱসানে, সূৰিযস্সুগ্গমনং পতি;

সমগ্গা সিৱযো হুত্ৱা, ৰট্ঠা পব্বাজযন্তি তং.

১৬৯৩. ‘‘স কত্তা তৰমানোৱ, সিৱিৰাজেন পেসিতো;

আমুত্তহত্থাভৰণা, সুৱত্থো চন্দনভূসিতো.

১৬৯৪. ‘‘সীসং ন্হাতো উদকে সো, আমুত্তমণিকুণ্ডলো;

উপাগমি পুৰং ৰম্মং, ৱেস্সন্তৰনিৱেসনং.

১৬৯৫. ‘‘তত্থদ্দস কুমাৰং সো, ৰমমানং সকে পুৰে;

পৰিকিণ্ণং অমচ্চেহি, তিদসানংৱ ৱাসৱং.

১৬৯৬. ‘‘সো তত্থ গন্ত্ৱা তৰমানো, কত্তা ৱেস্সন্তৰংব্ৰৱি;

দুক্খং তে ৱেদযিস্সামি, মা মে কুজ্ঝি ৰথেসভ.

১৬৯৭. ‘‘ৱন্দিত্ৱা ৰোদমানো সো, কত্তা ৰাজানমব্ৰৱি;

ভত্তা মেসি মহাৰাজ, সব্বকামৰসাহৰো.

১৬৯৮. ‘‘দুক্খং তে ৱেদযিস্সামি, তত্থ অস্সাসযন্তু মং;

সিৱযো দেৱ তে কুদ্ধা, নেগমা চ সমাগতা.

১৬৯৯. ‘‘উগ্গা চ ৰাজপুত্তা চ, ৱেসিযানা চ ব্ৰাহ্মণা;

হত্থাৰোহা অনীকট্ঠা, ৰথিকা পত্তিকাৰকা;

কেৱলো চাপি নিগমো, সিৱযো চ সমাগতা.

১৭০০. ‘‘অস্মা ৰত্যা ৱিৱসানে, সূৰিযস্সুগ্গমনং পতি;

সমগ্গা সিৱযো হুত্ৱা, ৰট্ঠা পব্বাজযন্তি তং’’.

১৭০১. ‘‘কিস্মিং মে সিৱযো কুদ্ধা, নাহং পস্সামি দুক্কটং;

তং মে কত্তে ৱিযাচিক্খ, কস্মা পব্বাজযন্তি মং’’.

১৭০২. ‘‘উগ্গা চ ৰাজপুত্তা চ, ৱেসিযানা চ ব্ৰাহ্মণা;

হত্থাৰোহা অনীকট্ঠা, ৰথিকা পত্তিকাৰকা;

নাগদানেন খিয্যন্তি, তস্মা পব্বাজযন্তি তং’’.

১৭০৩. ‘‘হদযং চক্খুম্পহং দজ্জং, কিং মে বাহিৰকং ধনং;

হিৰঞ্ঞং ৱা সুৱণ্ণং ৱা, মুত্তা ৱেড়ুৰিযা মণি.

১৭০৪. ‘‘দক্খিণং ৱাপহং বাহুং, দিস্ৱা যাচকমাগতে;

দদেয্যং ন ৱিকম্পেয্যং, দানে মে ৰমতে মনো.

১৭০৫. ‘‘কামং মং সিৱযো সব্বে, পব্বাজেন্তু হনন্তু ৱা;

নেৱ দানা ৱিৰমিস্সং, কামং ছিন্দন্তু সত্তধা’’.

১৭০৬. ‘‘এৱং তং সিৱযো আহু, নেগমা চ সমাগতা;

কোন্তিমাৰায তীৰেন, গিৰিমাৰঞ্জৰং পতি;

যেন পব্বাজিতা যন্তি, তেন গচ্ছতু সুব্বতো’’.

১৭০৭. ‘‘সোহং তেন গমিস্সামি, যেন গচ্ছন্তি দূসকা;

ৰত্তিন্দিৱং মে খমথ, যাৱ দানং দদামহং’’.

১৭০৮. ‘‘আমন্তযিত্থ ৰাজানং, মদ্দিং সব্বঙ্গসোভনং;

যং তে কিঞ্চি মযা দিন্নং, ধনং ধঞ্ঞঞ্চ ৱিজ্জতি.

১৭০৯. ‘‘হিৰঞ্ঞং ৱা সুৱণ্ণং ৱা, মুত্তা ৱেড়ুৰিযা বহূ;

সব্বং তং নিদহেয্যাসি, যঞ্চ তে পেত্তিকং ধনং.

১৭১০. ‘‘তমব্ৰৱি ৰাজপুত্তী, মদ্দী সব্বঙ্গসোভনা;

কুহিং দেৱ নিদহামি, তং মে অক্খাহি পুচ্ছিতো’’.

১৭১১. ‘‘সীলৱন্তেসু দজ্জাসি, দানং মদ্দি যথাৰহং;

ন হি দানা পৰং অত্থি, পতিট্ঠা সব্বপাণিনং.

১৭১২. ‘‘পুত্তেসু মদ্দি দযেসি, সস্সুযা সসুৰম্হি চ;

যো চ তং ভত্তা মঞ্ঞেয্য, সক্কচ্চং তং উপট্ঠহে.

১৭১৩. ‘‘নো চে তং ভত্তা মঞ্ঞেয্য, মযা ৱিপ্পৱসেন তে;

অঞ্ঞং ভত্তাৰং পৰিযেস, মা কিসিত্থো [মা কিলিত্থ (সী. পী.)] মযা ৱিনা’’.

১৭১৪. ‘‘অহঞ্হি ৱনং গচ্ছামি, ঘোৰং ৱাড়মিগাযুতং;

সংসযো জীৱিতং ময্হং, এককস্স ব্ৰহাৱনে’’.

১৭১৫. ‘‘তমব্ৰৱি ৰাজপুত্তী, মদ্দী সব্বঙ্গসোভনা;

‘‘অভুম্মে কথং নু ভণসি, পাপকং ৱত ভাসসি.

১৭১৬. ‘‘নেস ধম্মো মহাৰাজ, যং ত্ৱং গচ্ছেয্য এককো;

অহম্পি তেন গচ্ছামি, যেন গচ্ছসি খত্তিয.

১৭১৭. ‘‘মৰণং ৱা তযা সদ্ধিং, জীৱিতং ৱা তযা ৱিনা;

তদেৱ মৰণং সেয্যো, যং চে জীৱে তযা ৱিনা.

১৭১৮. ‘‘অগ্গিং উজ্জালযিত্ৱান [নিজ্জালযিত্ৱান (সী. পী.)], একজালসমাহিতং;

তত্থ মে [তত্থেৱ (স্যা. ক.)] মৰণং সেয্যো, যং চে জীৱে তযা ৱিনা.

১৭১৯. ‘‘যথা আৰঞ্ঞকং নাগং, দন্তিং অন্ৱেতি হত্থিনী;

জেস্সন্তং গিৰিদুগ্গেসু, সমেসু ৱিসমেসু চ.

১৭২০. ‘‘এৱং তং অনুগচ্ছামি, পুত্তে আদায পচ্ছতো;

সুভৰা তে ভৱিস্সামি, ন তে হেস্সামি দুব্ভৰা.

১৭২১. ‘‘ইমে কুমাৰে পস্সন্তো, মঞ্জুকে পিযভাণিনে;

আসীনে [আসনে (ক.)] ৱনগুম্বস্মিং, ন ৰজ্জস্স সৰিস্সসি.

১৭২২. ‘‘ইমে কুমাৰে পস্সন্তো, মঞ্জুকে পিযভাণিনে;

কীড়ন্তে ৱনগুম্বস্মিং, ন ৰজ্জস্স সৰিস্সসি.

১৭২৩. ‘‘ইমে কুমাৰে পস্সন্তো, মঞ্জুকে পিযভাণিনে;

অস্সমে ৰমণীযম্হি, ন ৰজ্জস্স সৰিস্সসি.

১৭২৪. ‘‘ইমে কুমাৰে পস্সন্তো, মঞ্জুকে পিযভাণিনে;