৫৪৫. মহানাৰদকস্সপজাতকং (৮)

১১৫৩. ‘‘অহু ৰাজা ৱিদেহানং, অঙ্গতি [অঙ্গাতি (সী.) এৱমুপৰিপি] নাম খত্তিযো;

পহূতযোগ্গো ধনিমা, অনন্তবলপোৰিসো.

১১৫৪. সো চ পন্নৰসিং [পন্নৰসে (স্যা. ক.)] ৰত্তিং, পুৰিমযামে অনাগতে;

চাতুমাসা [চাতুমস্স (সী. পী.)] কোমুদিযা, অমচ্চে সন্নিপাতযি.

১১৫৫. ‘‘পণ্ডিতে সুতসম্পন্নে, মিতপুব্বে [মিহিতপুব্বে (সী. পী.)] ৱিচক্খণে;

ৱিজযঞ্চ সুনামঞ্চ, সেনাপতিং অলাতকং.

১১৫৬. ‘‘তমনুপুচ্ছি ৱেদেহো, ‘‘পচ্চেকং ব্ৰূথ সং ৰুচিং;

চাতুমাসা কোমুদজ্জ, জুণ্হং ব্যপহতং [ব্যপগতং (সী. পী.)] তমং;

কাযজ্জ ৰতিযা ৰত্তিং, ৱিহৰেমু ইমং উতুং’’.

১১৫৭. ‘‘ততো সেনাপতি ৰঞ্ঞো, অলাতো এতদব্ৰৱি;

‘‘হট্ঠং যোগ্গং বলং সব্বং, সেনং সন্নাহযামসে.

১১৫৮. ‘‘নিয্যাম দেৱ যুদ্ধায, অনন্তবলপোৰিসা;

যে তে ৱসং ন আযন্তি, ৱসং উপনযামসে [উপনিয্যামসে (ক.)];

এসা ময্হং সকা দিট্ঠি, অজিতং ওজিনামসে.

১১৫৯. অলাতস্স ৱচো সুত্ৱা, সুনামো এতদব্ৰৱি;

‘‘সব্বে তুয্হং মহাৰাজ, অমিত্তা ৱসমাগতা.

১১৬০. ‘‘নিক্খিত্তসত্থা পচ্চত্থা, নিৱাতমনুৱত্তৰে;

উত্তমো উস্সৱো অজ্জ, ন যুদ্ধং মম ৰুচ্চতি.

১১৬১. ‘‘অন্নপানঞ্চ খজ্জঞ্চ, খিপ্পং অভিহৰন্তু তে;

ৰমস্সু দেৱ কামেহি, নচ্চগীতে সুৱাদিতে’’.

১১৬২. সুনামস্স ৱচো সুত্ৱা, ৱিজযো এতদব্ৰৱি;

‘‘সব্বে কামা মহাৰাজ, নিচ্চং তৱ মুপট্ঠিতা.

১১৬৩. ‘‘ন হেতে দুল্লভা দেৱ, তৱ কামেহি মোদিতুং;

সদাপি কামা সুলভা, নেতং চিত্তমতং [চিত্তং মতী (ক.)] মম.

১১৬৪. ‘‘সমণং ব্ৰাহ্মণং ৱাপি, উপাসেমু বহুস্সুতং;

যো নজ্জ ৱিনযে কঙ্খং, অত্থধম্মৱিদূ ইসে’’.

১১৬৫. ৱিজযস্স ৱচো সুত্ৱা, ৰাজা অঙ্গতি মব্ৰৱি;

‘‘যথা ৱিজযো ভণতি, ময্হম্পেতংৱ ৰুচ্চতি.

১১৬৬. ‘‘সমণং ব্ৰাহ্মণং ৱাপি, উপাসেমু বহুস্সুতং;

যো নজ্জ ৱিনযে কঙ্খং, অত্থধম্মৱিদূ ইসে.

১১৬৭. ‘‘সব্বেৱ সন্তা কৰোথ মতিং, কং উপাসেমু পণ্ডিতং;

যো [কো (সী. পী.)] নজ্জ ৱিনযে কঙ্খং, অত্থধম্মৱিদূ ইসে’’.

১১৬৮. ‘‘ৱেদেহস্স ৱচো সুত্ৱা, অলাতো এতদব্ৰৱি;

‘‘অত্থাযং মিগদাযস্মিং, অচেলো ধীৰসম্মতো.

১১৬৯. ‘‘গুণো কস্সপগোত্তাযং, সুতো চিত্ৰকথী গণী;

তং দেৱ [তদেৱ (ক.)] পযিৰুপাসেমু [পযিৰুপাসয (সী. পী.)], সো নো কঙ্খং ৱিনেস্সতি’’.

১১৭০. ‘‘অলাতস্স ৱচো সুত্ৱা, ৰাজা চোদেসি সাৰথিং;

‘‘মিগদাযং গমিস্সাম, যুত্তং যানং ইধানয’’.

১১৭১. তস্স যানং অযোজেসুং, দন্তং ৰূপিযপক্খৰং [ৰূপিযুপক্খৰং (ক.)];

সুক্কমট্ঠপৰিৱাৰং, পণ্ডৰং দোসিনামুখং.

১১৭২. ‘‘তত্ৰাসুং কুমুদাযুত্তা, চত্তাৰো সিন্ধৱা হযা;

অনিলূপমসমুপ্পাতা [অনিলূপমসমুপ্পাদা (ক.)], সুদন্তা সোণ্ণমালিনো.

১১৭৩. ‘‘সেতচ্ছত্তং সেতৰথো, সেতস্সা সেতবীজনী;

ৱেদেহো সহমচ্চেহি, নিয্যং চন্দোৱ সোভতি.

১১৭৪. ‘‘তমনুযাযিংসু বহৱো, ইন্দিখগ্গধৰা [ইন্দখগ্গধৰা (সী.), ইট্ঠিখগ্গধৰা (পী.)] বলী;

অস্সপিট্ঠিগতা ৱীৰা, নৰা নৰৱৰাধিপং.

১১৭৫. সো মুহুত্তংৱ যাযিত্ৱা, যানা ওৰুয্হ খত্তিযো;

ৱেদেহো সহমচ্চেহি, পত্তী গুণমুপাগমি.

১১৭৬. যেপি তত্থ তদা আসুং, ব্ৰাহ্মণিব্ভা সমাগতা;

ন তে অপনযী ৰাজা, অকতং ভূমিমাগতে.

১১৭৭. ‘‘ততো সো মুদুকা ভিসিযা, মুদুচিত্তকসন্থতে [মুদুচিত্তকড়ন্দকে (সী. পী.)];

মুদুপচ্চত্থতে ৰাজা, একমন্তং উপাৱিসি.

১১৭৮. ‘‘নিসজ্জ ৰাজা সম্মোদি, কথং সাৰণিযং ততো;

‘‘কচ্চি যাপনিযং ভন্তে, ৱাতানমৱিযগ্গতা [ৱাতানমৱিসগ্গতা (সী. পী.), ৱাতানমৱিযত্ততা (স্যা.)].

১১৭৯. ‘‘কচ্চি অকসিৰা ৱুত্তি, লভসি [লব্ভতি (সী. পী.)] পিণ্ডযাপনং [পিণ্ডিযাপনং (স্যা. ক.)];

অপাবাধো চসি কচ্চি, চক্খুং ন পৰিহাযতি’’.

১১৮০. তং গুণো পটিসম্মোদি, ৱেদেহং ৱিনযে ৰতং;

‘‘যাপনীযং মহাৰাজ, সব্বমেতং তদূভযং.

১১৮১. ‘‘কচ্চি তুয্হম্পি ৱেদেহ, পচ্চন্তা ন বলীযৰে;

কচ্চি অৰোগং যোগ্গং তে, কচ্চি ৱহতি ৱাহনং;

কচ্চি তে ব্যাধযো নত্থি, সৰীৰস্সুপতাপিযা’’ [সৰীৰস্সুপতাপিকা (সী. পী.), সৰীৰস্সুপতাপনা (?)].

১১৮২. পটিসম্মোদিতো ৰাজা, ততো পুচ্ছি অনন্তৰা;

অত্থং ধম্মঞ্চ ঞাযঞ্চ, ধম্মকামো ৰথেসভো.

১১৮৩. ‘‘কথং ধম্মং চৰে মচ্চো, মাতাপিতূসু কস্সপ;

কথং চৰে আচৰিযে, পুত্তদাৰে কথং চৰে.

১১৮৪. ‘‘কথং চৰেয্য ৱুড্ঢেসু, কথং সমণব্ৰাহ্মণে;

কথঞ্চ বলকাযস্মিং, কথং জনপদে চৰে.

১১৮৫. ‘‘কথং ধম্মং চৰিত্ৱান, মচ্চা গচ্ছন্তি [পেচ্চ গচ্ছতি (সী. স্যা. পী.)] সুগ্গতিং;

কথঞ্চেকে অধম্মট্ঠা, পতন্তি নিৰযং অথো’’.

১১৮৬. ‘‘ৱেদেহস্স ৱচো সুত্ৱা, কস্সপো এতদব্ৰৱি;

‘‘‘সুণোহি মে মহাৰাজ, সচ্চং অৱিতথং পদং.

১১৮৭. ‘‘‘নত্থি ধম্মচৰিতস্স [ধম্মস্স চিণ্ণস্স (সী.)], ফলং কল্যাণপাপকং;

নত্থি দেৱ পৰো লোকো, কো ততো হি ইধাগতো.

১১৮৮. ‘‘‘নত্থি দেৱ পিতৰো ৱা, কুতো মাতা কুতো পিতা;

নত্থি আচৰিযো নাম, অদন্তং কো দমেস্সতি.

১১৮৯. ‘‘‘সমতুল্যানি ভূতানি, নত্থি জেট্ঠাপচাযিকা;

নত্থি বলং ৱীৰিযং ৱা, কুতো উট্ঠানপোৰিসং;

নিযতানি হি ভূতানি, যথা গোটৱিসো তথা.

১১৯০. ‘‘‘লদ্ধেয্যং লভতে মচ্চো, তত্থ দানফলং কুতো;

নত্থি দানফলং দেৱ, অৱসো দেৱৱীৰিযো.

১১৯১. ‘‘‘বালেহি দানং পঞ্ঞত্তং, পণ্ডিতেহি পটিচ্ছিতং;

অৱসা দেন্তি ধীৰানং, বালা পণ্ডিতমানিনো.

১১৯২. ‘‘‘সত্তিমে সস্সতা কাযা, অচ্ছেজ্জা অৱিকোপিনো;

তেজো পথৱী আপো চ, ৱাযো সুখং দুখঞ্চিমে;

জীৱে চ সত্তিমে কাযা, যেসং ছেত্তা ন ৱিজ্জতি.

১১৯৩. ‘‘‘নত্থি হন্তা ৱ ছেত্তা ৱা, হঞ্ঞে যেৱাপি [হঞ্ঞৰে ৱাপি (সী. স্যা. পী.)] কোচি নং;

অন্তৰেনেৱ কাযানং, সত্থানি ৱীতিৱত্তৰে.

১১৯৪. ‘‘‘যো চাপি [যোপাযং (সী. পী.), যো চাযং (স্যা. ক.)] সিৰমাদায, পৰেসং নিসিতাসিনা;

ন সো ছিন্দতি তে কাযে, তত্থ পাপফলং কুতো.

১১৯৫. ‘‘‘চুল্লাসীতিমহাকপ্পে, সব্বে সুজ্ঝন্তি সংসৰং;

অনাগতে তম্হি কালে, সঞ্ঞতোপি ন সুজ্ঝতি.

১১৯৬. ‘‘‘চৰিত্ৱাপি বহুং ভদ্ৰং, নেৱ সুজ্ঝন্তিনাগতে;

পাপঞ্চেপি বহুং কত্ৱা, তং খণং নাতিৱত্তৰে.

১১৯৭. ‘‘‘অনুপুব্বেন নো সুদ্ধি, কপ্পানং চুল্লসীতিযা;

নিযতিং নাতিৱত্তাম, ৱেলন্তমিৱ সাগৰো’’’.

১১৯৮. কস্সপস্স ৱচো সুত্ৱা, অলাতো এতদব্ৰৱি;

‘‘যথা ভদন্তো ভণতি, ময্হম্পেতংৱ ৰুচ্চতি.

১১৯৯. ‘‘অহম্পি পুৰিমং জাতিং, সৰে সংসৰিতত্তনো;

পিঙ্গলো নামহং আসিং, লুদ্দো গোঘাতকো পুৰে.

১২০০. ‘‘বাৰাণসিযং ফীতাযং, বহুং পাপং কতং মযা;

বহূ মযা হতা পাণা, মহিংসা সূকৰা অজা.

১২০১. ‘‘ততো চুতো ইধ জাতো, ইদ্ধে সেনাপতীকুলে;

নত্থি নূন ফলং পাপং, যোহং [পাপে সোহং (সী. পী.)] ন নিৰযং গতো.

১২০২. অথেত্থ বীজকো নাম, দাসো আসি পটচ্চৰী [পড়চ্চৰী (সী. পী.), পটজ্জৰী (ক.)];

উপোসথং উপৱসন্তো, গুণসন্তিকুপাগমি.

১২০৩. কস্সপস্স ৱচো সুত্ৱা, অলাতস্স চ ভাসিতং;

পস্সসন্তো মুহুং উণ্হং, ৰুদং অস্সূনি ৱত্তযি.

১২০৪. তমনুপুচ্ছি ৱেদেহো, ‘‘কিমত্থং সম্ম ৰোদসি;

কিং তে সুতং ৱা দিট্ঠং ৱা, কিং মং ৱেদেসি ৱেদনং’’.

১২০৫. ৱেদেহস্স ৱচো সুত্ৱা, বীজকো এতদব্ৰৱি;

‘‘নত্থি মে ৱেদনা দুক্খা, মহাৰাজ সুণোহি মে.

১২০৬. ‘‘অহম্পি পুৰিমং জাতিং, সৰামি সুখমত্তনো;

সাকেতাহং পুৰে আসিং, ভাৱসেট্ঠি গুণে ৰতো.

১২০৭. ‘‘সম্মতো ব্ৰাহ্মণিব্ভানং, সংৱিভাগৰতো সুচি;

ন চাপি পাপকং কম্মং, সৰামি কতমত্তনো.

১২০৮. ‘‘ততো চুতাহং ৱেদেহ, ইধ জাতো দুৰিত্থিযা;

গব্ভম্হি কুম্ভদাসিযা, যতো জাতো সুদুগ্গতো.

১২০৯. ‘‘এৱম্পি দুগ্গতো সন্তো, সমচৰিযং অধিট্ঠিতো;

উপড্ঢভাগং ভত্তস্স, দদামি যো মে ইচ্ছতি.

১২১০. ‘‘চাতুদ্দসিং পঞ্চদসিং, সদা উপৱসামহং;

ন চাপি [ন অহং (ক.)] ভূতে হিংসামি, থেয্যঞ্চাপি ৱিৱজ্জযিং.

১২১১. ‘‘সব্বমেৱ হি নূনেতং, সুচিণ্ণং ভৱতি নিপ্ফলং;

নিৰত্থং মঞ্ঞিদং সীলং, অলাতো ভাসতী যথা.

১২১২. ‘‘কলিমেৱ নূন গণ্হামি, অসিপ্পো ধুত্তকো যথা;

কটং অলাতো গণ্হাতি, কিতৱোসিক্খিতো যথা.

১২১৩. ‘‘দ্ৱাৰং নপ্পটিপস্সামি, যেন গচ্ছামি সুগ্গতিং;

তস্মা ৰাজ পৰোদামি, সুত্ৱা কস্সপভাসিতং’’.

১২১৪. বীজকস্স ৱচো সুত্ৱা, ৰাজা অঙ্গতি মব্ৰৱি;

‘‘নত্থি দ্ৱাৰং সুগতিযা, নিযতিং [নিযতং (স্যা.)] কঙ্খ বীজক.

১২১৫. ‘‘সুখং ৱা যদি ৱা দুক্খং, নিযতিযা কিৰ লব্ভতি;

সংসাৰসুদ্ধি সব্বেসং, মা তুৰিত্থো [তুৰিতো (স্যা.)] অনাগতে.

১২১৬. ‘‘অহম্পি পুব্বে কল্যাণো, ব্ৰাহ্মণিব্ভেসু ব্যাৱটো [ৱাৱটো (ক.)];

ৱোহাৰমনুসাসন্তো, ৰতিহীনো তদন্তৰা’’.

১২১৭. ‘‘পুনপি ভন্তে দক্খেমু, সঙ্গতি চে ভৱিস্সতি’’;

ইদং ৱত্ৱান ৱেদেহো, পচ্চগা সনিৱেসনং.

১২১৮. ততো ৰত্যা ৱিৱসানে, উপট্ঠানম্হি অঙ্গতি;

অমচ্চে সন্নিপাতেত্ৱা, ইদং ৱচনমব্ৰৱি.

১২১৯. ‘‘চন্দকে মে ৱিমানস্মিং, সদা কামে ৱিধেন্তু মে;

মা উপগচ্ছুং অত্থেসু, গুয্হপ্পকাসিযেসু চ.

১২২০. ‘‘ৱিজযো চ সুনামো চ, সেনাপতি অলাতকো;

এতে অত্থে নিসীদন্তু, ৱোহাৰকুসলা তযো’’.

১২২১. ইদং ৱত্ৱান ৱেদেহো, কামেৱ বহুমঞ্ঞথ;

ন চাপি ব্ৰাহ্মণিব্ভেসু, অত্থে কিস্মিঞ্চি ব্যাৱটো.

১২২২. ততো দ্ৱেসত্তৰত্তস্স, ৱেদেহস্সত্ৰজা পিযা;

ৰাজকঞ্ঞা ৰুচা [ৰুজা (সী. পী.) এৱমুপৰিপি] নাম, ধাতিমাতৰমব্ৰৱি.

১২২৩. ‘অলঙ্কৰোথ মং খিপ্পং, সখিযো চালঙ্কৰোন্তু [চ কৰোন্তু (সী. পী.)] মে;

সুৱে পন্নৰসো দিব্যো, গচ্ছং ইস্সৰসন্তিকে’ [পিতুস্স সন্তিকে (স্যা.)].

১২২৪. তস্সা মাল্যং অভিহৰিংসু, চন্দনঞ্চ মহাৰহং;

মণিসঙ্খমুত্তাৰতনং, নানাৰত্তে চ অম্বৰে.