৫৪৪. চন্দকুমাৰজাতকং (৭)

৯৮২. ‘‘ৰাজাসি লুদ্দকম্মো, একৰাজা পুপ্ফৱতীযা;

সো পুচ্ছি ব্ৰহ্মবন্ধুং, খণ্ডহালং পুৰোহিতং মূড়্হং.

৯৮৩. ‘সগ্গান মগ্গমাচিক্খ [সগ্গমগ্গমাচিক্খ (সী. পী.)], ত্ৱংসি ব্ৰাহ্মণ ধম্মৱিনযকুসলো;

যথা ইতো ৱজন্তি সুগতিং, নৰা পুঞ্ঞানি কত্ৱান’.

৯৮৪. ‘অতিদানং দদিত্ৱান, অৱজ্ঝে দেৱ ঘাতেত্ৱা;

এৱং ৱজন্তি সুগতিং, নৰা পুঞ্ঞানি কত্ৱান’.

৯৮৫. ‘কিং পন তং অতিদানং, কে চ অৱজ্ঝা ইমস্মি লোকস্মিং;

এতঞ্চ খো নো অক্খাহি, যজিস্সামি দদামি [যজিস্সাম দদাম (সী. পী.)] দানানি’.

৯৮৬. ‘পুত্তেহি দেৱ যজিতব্বং, মহেসীহি নেগমেহি চ;

উসভেহি আজানিযেহি চতূহি, সব্বচতুক্কেন দেৱ যজিতব্বং’’’.

৯৮৭. ‘‘তং সুত্ৱা অন্তেপুৰে, কুমাৰা মহেসিযো চ হঞ্ঞন্তু;

একো অহোসি নিগ্ঘোসো, ভিস্মা অচ্চুগ্গতো সদ্দো’’.

৯৮৮. ‘‘গচ্ছথ ৱদেথ কুমাৰে, চন্দং সূৰিযঞ্চ ভদ্দসেনঞ্চ;

সূৰঞ্চ ৱামগোত্তঞ্চ, পচুৰা [পসুৰা (সী. পী. ক.)] কিৰ হোথ যঞ্ঞত্থায.

৯৮৯. ‘‘কুমাৰিযোপি ৱদেথ, উপসেনং [উপসেনিং (সী.), উপসেণিং (পী.)] কোকিলঞ্চ মুদিতঞ্চ;

নন্দঞ্চাপি কুমাৰিং, পচুৰা [পসুৰা (সী. পী. ক.)] কিৰ হোথ যঞ্ঞত্থায.

৯৯০. ‘‘ৱিজযম্পি ময্হং মহেসিং, এৰাৱতিং [একপতিং (পী.), এৰাপতিং (ক.)] কেসিনিং সুনন্দঞ্চ;

লক্খণৱৰূপপন্না, পচুৰা কিৰ হোথ যঞ্ঞত্থায.

৯৯১. ‘‘গহপতযো চ ৱদেথ, পুণ্ণমুখং ভদ্দিযং সিঙ্গালঞ্চ;

ৱড্ঢঞ্চাপি গহপতিং, পচুৰা কিৰ হোথ যঞ্ঞত্থায’’.

৯৯২. ‘‘তে তত্থ গহপতযো, অৱোচিসুং সমাগতা পুত্তদাৰপৰিকিণ্ণা;

সব্বেৱ সিখিনো দেৱ কৰোহি, অথ ৱা নো দাসে সাৱেহি’’.

৯৯৩. ‘‘অভযংকৰম্পি মে হত্থিং, নাড়াগিৰিং অচ্চুগ্গতং ৱৰুণদন্তং [নাড়াগিৰিং অচ্চুতং ৱৰুণদন্তং (সী.), ৰাজগিৰিং অচ্চুতৱৰুণদন্তং (পী.)];

আনেথ খো নে খিপ্পং, যঞ্ঞত্থায ভৱিস্সন্তি.

৯৯৪. ‘‘অস্সৰতনম্পি [অস্সতৰম্পি (সী. পী.), অস্সৰতনম্পি মে (স্যা.)] কেসিং, সুৰামুখং পুণ্ণকং ৱিনতকঞ্চ;

আনেথ খো নে খিপ্পং, যঞ্ঞত্থায ভৱিস্সন্তি.

৯৯৫. ‘‘উসভম্পি [উসভম্পি মে (স্যা.)] যূথপতিং অনোজং, নিসভং গৱম্পতিং তেপি ময্হং আনেথ;

সমূহ [সমুপা (সী. পী.), সম্মুখা (স্যা.)] কৰোন্তু সব্বং, যজিস্সামি দদামি দানানি.

৯৯৬. ‘‘সব্বং [সব্বম্পি (স্যা.)] পটিযাদেথ, যঞ্ঞং পন উগ্গতম্হি সূৰিযম্হি;

আণাপেথ চ কুমাৰে [আণাপেথ চন্দকুমাৰে (স্যা. ক.)], অভিৰমন্তু ইমং ৰত্তিং.

৯৯৭. ‘‘সব্বং [সব্বম্পি (স্যা.)] উপট্ঠপেথ, যঞ্ঞং পন উগ্গতম্হি সূৰিযম্হি;

ৱদেথ দানি কুমাৰে, অজ্জ খো [ৱো (পী.)] পচ্ছিমা ৰত্তি’’.

৯৯৮. ‘‘তংতং মাতা অৱচ, ৰোদন্তী আগন্ত্ৱা ৱিমানতো;

যঞ্ঞো কিৰ তে পুত্ত, ভৱিস্সতি চতূহি পুত্তেহি’’.

৯৯৯. ‘‘সব্বেপি ময্হং পুত্তা চত্তা, চন্দস্মিং হঞ্ঞমানস্মিং;

পুত্তেহি যঞ্ঞং যজিত্ৱান, সুগতিং সগ্গং গমিস্সামি’’.

১০০০. ‘‘মা তং [মা (সী. পী.)] পুত্ত সদ্দহেসি, সুগতি কিৰ হোতি পুত্তযঞ্ঞেন;

নিৰযানেসো মগ্গো, নেসো মগ্গো হি সগ্গানং.

১০০১. ‘‘দানানি দেহি কোণ্ডঞ্ঞ, অহিংসা সব্বভূতভব্যানং’’;

এস মগ্গো সুগতিযা, ন চ মগ্গো পুত্তযঞ্ঞেন’’.

১০০২. ‘‘আচৰিযানং ৱচনা, ঘাতেস্সং চন্দঞ্চ সূৰিযঞ্চ;

পুত্তেহি যঞ্ঞং [পুত্তেহি (সী. স্যা. পী.)] যজিত্ৱান দুচ্চজেহি, সুগতিং সগ্গং গমিস্সামি’’.

১০০৩. ‘‘তংতং পিতাপি অৱচ, ৱসৱত্তী ওৰসং সকং পুত্তং;

যঞ্ঞো কিৰ তে পুত্ত, ভৱিস্সতি চতূহি পুত্তেহি’’.

১০০৪. ‘‘সব্বেপি ময্হং পুত্তা চত্তা, চন্দস্মিং হঞ্ঞমানস্মিং;

পুত্তেহি যঞ্ঞং যজিত্ৱান, সুগতিং সগ্গং গমিস্সামি’’.

১০০৫. ‘‘মা তং পুত্ত সদ্দহেসি, সুগতি কিৰ হোতি পুত্তযঞ্ঞেন;

নিৰযানেসো মগ্গো, নেসো মগ্গো হি সগ্গানং.

১০০৬. ‘‘দানানি দেহি কোণ্ডঞ্ঞ, অহিংসা সব্বভূতভব্যানং;

এস মগ্গো সুগতিযা, ন চ মগ্গো পুত্তযঞ্ঞেন’’.

১০০৭. ‘‘আচৰিযানং ৱচনা, ঘাতেস্সং চন্দঞ্চ সূৰিযঞ্চ;

পুত্তেহি যঞ্ঞং যজিত্ৱান দুচ্চজেহি, সুগতিং সগ্গং গমিস্সামি’’.

১০০৮. ‘‘দানানি দেহি কোণ্ডঞ্ঞ, অহিংসা সব্বভূতভব্যানং;

পুত্তপৰিৱুতো তুৱং, ৰট্ঠং জনপদঞ্চ পালেহি’’.

১০০৯. ‘‘মা নো দেৱ অৱধি, দাসে নো দেহি খণ্ডহালস্স;

অপি নিগড়বন্ধকাপি, হত্থী অস্সে চ পালেম.

১০১০. ‘‘মা নো দেৱ অৱধি, দাসে নো দেহি খণ্ডহালস্স;

অপি নিগড়বন্ধকাপি, হত্থিছকণানি উজ্ঝেম.

১০১১. ‘‘মা নো দেৱ অৱধি, দাসে নো দেহি খণ্ডহালস্স;

অপি নিগড়বন্ধকাপি, অস্সছকণানি উজ্ঝেম.

১০১২. ‘‘মা নো দেৱ অৱধি, দাসে নো দেহি খণ্ডহালস্স [ইদং পদং সী. পী. পোত্থকেসু নত্থি];

যস্স হোন্তি তৱ কামা, অপি ৰট্ঠা পব্বাজিতা;

ভিক্খাচৰিযং চৰিস্সাম’’.

১০১৩. ‘‘দুক্খং খো মে জনযথ, ৱিলপন্তা জীৱিতস্স কামা হি;

মুঞ্চেথ [মুঞ্চথ (সী. পী.)] দানি কুমাৰে, অলম্পি মে হোতু পুত্তযঞ্ঞেন’’.

১০১৪. ‘‘পুব্বেৱ খোসি মে ৱুত্তো, দুক্কৰং দুৰভিসম্ভৱঞ্চেতং;

অথ নো উপক্খটস্স যঞ্ঞস্স, কস্মা কৰোসি ৱিক্খেপং.

১০১৫. ‘‘সব্বে ৱজন্তি সুগতিং, যে যজন্তি যেপি যাজেন্তি;

যে চাপি অনুমোদন্তি, যজন্তানং এদিসং মহাযঞ্ঞং’’.

১০১৬. ‘‘অথ কিস্স জনো [চ নো (সী. স্যা. পী.)] পুব্বে, সোত্থানং ব্ৰাহ্মণে অৱাচেসি;

অথ নো অকাৰণস্মা, যঞ্ঞত্থায দেৱ ঘাতেসি.

১০১৭. ‘‘পুব্বেৱ নো দহৰকালে [দহৰকে সমানে (সী. পী.)], ন হনেসি [ন মাৰেসি (সী. পী.)] ন ঘাতেসি;

দহৰম্হা যোব্বনং পত্তা, অদূসকা তাত হঞ্ঞাম.

১০১৮. ‘‘হত্থিগতে অস্সগতে, সন্নদ্ধে পস্স নো মহাৰাজ;

যুদ্ধে ৱা যুজ্ঝমানে ৱা, ন হি মাদিসা সূৰা হোন্তি যঞ্ঞত্থায.

১০১৯. ‘‘পচ্চন্তে ৱাপি কুপিতে, অটৱীসু ৱা মাদিসে নিযোজেন্তি;

অথ নো অকাৰণস্মা, অভূমিযং তাত হঞ্ঞাম.

১০২০. ‘‘যাপি হি তা সকুণিযো, ৱসন্তি তিণঘৰানি কত্ৱান;

তাসম্পি পিযা পুত্তা, অথ নো ত্ৱং দেৱ ঘাতেসি.

১০২১. ‘‘মা তস্স সদ্দহেসি, ন মং খণ্ডহালো ঘাতেয্য;

মমঞ্হি সো ঘাতেত্ৱান, অনন্তৰা তম্পি দেৱ ঘাতেয্য.

১০২২. ‘‘গামৱৰং নিগমৱৰং দদন্তি, ভোগম্পিস্স মহাৰাজ;

অথগ্গপিণ্ডিকাপি, কুলে কুলে হেতে ভুঞ্জন্তি.

১০২৩. ‘‘তেসম্পি তাদিসানং, ইচ্ছন্তি দুব্ভিতুং মহাৰাজ;

যেভুয্যেন এতে, অকতঞ্ঞুনো ব্ৰাহ্মণা দেৱ.

১০২৪. ‘‘মা নো দেৱ অৱধি, দাসে নো দেহি খণ্ডহালস্স;

অপি নিগড়বন্ধকাপি, হত্থী অস্সে চ পালেম.

১০২৫. ‘‘মা নো দেৱ অৱধি, দাসে নো দেহি খণ্ডহালস্স;

অপি নিগড়বন্ধকাপি, হত্থিছকণানি উজ্ঝেম.

১০২৬. ‘‘মা নো দেৱ অৱধি, দাসে নো দেহি খণ্ডহালস্স;

অপি নিগড়বন্ধকাপি, অস্সছকণানি উজ্ঝেম.

১০২৭. ‘‘মা নো দেৱ অৱধি, দাসে নো দেহি খণ্ডহালস্স;

যস্স হোন্তি তৱ কামা, অপি ৰট্ঠা পব্বাজিতা;

ভিক্খাচৰিযং চৰিস্সাম’’.

১০২৮. ‘‘দুক্খং খো মে জনযথ, ৱিলপন্তা জীৱিতস্স কামা হি;

মুঞ্চেথ দানি কুমাৰে, অলম্পি মে হোতু পুত্তযঞ্ঞেন’’.

১০২৯. ‘‘পুব্বেৱ খোসি মে ৱুত্তো, দুক্কৰং দুৰভিসম্ভৱঞ্চেতং;

অথ নো উপক্খটস্স যঞ্ঞস্স, কস্মা কৰোসি ৱিক্খেপং.

১০৩০. ‘‘সব্বে ৱজন্তি সুগতিং, যে যজন্তি যেপি যাজেন্তি;

যে চাপি অনুমোদন্তি, যজন্তানং এদিসং মহাযঞ্ঞং’’.

১০৩১. ‘‘যদি কিৰ যজিত্ৱা পুত্তেহি, দেৱলোকং ইতো চুতা যন্তি;

ব্ৰাহ্মণো তাৱ যজতু, পচ্ছাপি যজসি তুৱং ৰাজা.

১০৩২. ‘‘যদি কিৰ যজিত্ৱা পুত্তেহি, দেৱলোকং ইতো চুতা যন্তি;

এস্ৱেৱ খণ্ডহালো, যজতং সকেহি পুত্তেহি.

১০৩৩. ‘‘এৱং জানন্তো খণ্ডহালো, কিং পুত্তকে ন ঘাতেসি;

সব্বঞ্চ ঞাতিজনং, অত্তানঞ্চ ন ঘাতেসি.

১০৩৪. ‘‘সব্বে ৱজন্তি নিৰযং, যে যজন্তি যেপি যাজেন্তি;

যে চাপি অনুমোদন্তি, যজন্তানং এদিসং মহাযঞ্ঞং.

১০৩৫. [অযং গাথা সী. স্যা. পী. পোত্থকেসু ন দিস্সতি] ‘‘সচে হি সো সুজ্ঝতি যো হনাতি, হতোপি সো সগ্গমুপেতি ঠানং;

ভোৱাদি ভোৱাদিন মাৰযেয্যুং, যে চাপি তেসং অভিসদ্দহেয্যুং’’ [অযং গাথা সী. স্যা. পী. পোত্থকেসু ন দিস্সতি].

১০৩৬. ‘‘কথঞ্চ কিৰ পুত্তকামাযো, গহপতযো ঘৰণিযো চ;

নগৰম্হি ন উপৰৱন্তি ৰাজানং, মা ঘাতযি ওৰসং পুত্তং.

১০৩৭. ‘‘কথঞ্চ কিৰ পুত্তকামাযো, গহপতযো ঘৰণিযো চ;

নগৰম্হি ন উপৰৱন্তি ৰাজানং, মা ঘাতযি অত্ৰজং পুত্তং.

১০৩৮. ‘‘ৰঞ্ঞো চম্হি অত্থকামো, হিতো চ সব্বজনপদস্স [সব্বদা জনপদস্স (সী. পী.)];

ন কোচি অস্স পটিঘং, মযা জানপদো ন পৱেদেতি’’.

১০৩৯. ‘‘গচ্ছথ ৱো ঘৰণিযো, তাতঞ্চ ৱদেথ খণ্ডহালঞ্চ;

মা ঘাতেথ কুমাৰে, অদূসকে সীহসঙ্কাসে.

১০৪০. ‘‘গচ্ছথ ৱো ঘৰণিযো, তাতঞ্চ ৱদেথ খণ্ডহালঞ্চ;

মা ঘাতেথ কুমাৰে, অপেক্খিতে সব্বলোকস্স’’.

১০৪১. ‘‘যং নূনাহং জাযেয্যং, ৰথকাৰকুলেসু ৱা;

পুক্কুসকুলেসু ৱা ৱেস্সেসু ৱা জাযেয্যং;

ন হজ্জ মং ৰাজ যঞ্ঞে [যঞ্ঞত্থায (সী. পী.)] ঘাতেয্য’’.

১০৪২. ‘‘সব্বা সীমন্তিনিযো গচ্ছথ, অয্যস্স খণ্ডহালস্স;

পাদেসু নিপতথ, অপৰাধাহং ন পস্সামি.

১০৪৩. ‘‘সব্বা সীমন্তিনিযো গচ্ছথ, অয্যস্স খণ্ডহালস্স;

পাদেসু নিপতথ, কিন্তে ভন্তে মযং অদূসেম’’.

১০৪৪. ‘‘কপণা [কপণং (সী. পী.)] ৱিলপতি সেলা, দিস্ৱান ভাতৰে [ভাতৰো (সী. স্যা. পী. ক.)] উপনীতত্তে;

যঞ্ঞো কিৰ মে উক্খিপিতো, তাতেন সগ্গকামেন’’.

১০৪৫. ‘‘আৱত্তি পৰিৱত্তি চ, ৱসুলো সম্মুখা ৰঞ্ঞো;

মা নো পিতৰং অৱধি, দহৰম্হা যোব্বনং পত্তা’’.

১০৪৬. ‘‘এসো তে ৱসুল পিতা, সমেহি পিতৰা সহ;

দুক্খং খো মে জনযসি, ৱিলপন্তো অন্তেপুৰস্মিং;

মুঞ্চেথ দানি কুমাৰে, অলম্পি মে হোতু পুত্তযঞ্ঞেন’’.

১০৪৭. ‘‘পুব্বেৱ খোসি মে ৱুত্তো, দুক্কৰং দুৰভিসম্ভৱঞ্চেতং;

অথ নো উপক্খটস্স যঞ্ঞস্স, কস্মা কৰোসি ৱিক্খেপং.

১০৪৮. ‘‘সব্বে ৱজন্তি সুগতিং, যে যজন্তি যেপি যাজেন্তি;

যে চাপি অনুমোদন্তি, যজন্তানং এদিসং মহাযঞ্ঞং’’.

১০৪৯. ‘‘সব্বৰতনস্স যঞ্ঞো উপক্খটো, একৰাজ তৱ পটিযত্তো;

অভিনিক্খমস্সু দেৱ, সগ্গং গতো ত্ৱং পমোদিস্সসি’’.

১০৫০. ‘‘দহৰা সত্তসতা এতা, চন্দকুমাৰস্স ভৰিযাযো;

কেসে পকিৰিত্ৱান [পৰিকিৰিত্ৱান (সী. পী.), ৱিকিৰিত্ৱান (স্যা. ক.)], ৰোদন্তিযো মগ্গমনুযাযিংসু [মগ্গমনুযন্তি (সী. পী.), মগ্গমনুযাযন্তি (স্যা.)].

১০৫১. ‘‘অপৰা পন সোকেন, নিক্খন্তা নন্দনে ৱিয দেৱা;

কেসে পকিৰিত্ৱান [পৰিকিৰিত্ৱান (সী. পী.), ৱিকিৰিত্ৱান (স্যা. ক.)], ৰোদন্তিযো মগ্গমনুযাযিংসু’’ [মগ্গমনুযন্তি (সী. পী.), মগ্গমনুযাযন্তি (স্যা.)].

১০৫২. ‘‘কাসিকসুচিৱত্থধৰা, কুণ্ডলিনো অগলুচন্দনৱিলিত্তা;

নিয্যন্তি চন্দসূৰিযা, যঞ্ঞত্থায একৰাজস্স.

১০৫৩. ‘‘কাসিকসুচিৱত্থধৰা, কুণ্ডলিনো অগলুচন্দনৱিলিত্তা;

নিয্যন্তি চন্দসূৰিযা, মাতু কত্ৱা হদযসোকং.

১০৫৪. ‘‘কাসিকসুচিৱত্থধৰা, কুণ্ডলিনো অগলুচন্দনৱিলিত্তা;