৫৪৩. ভূৰিদত্তজাতকং (৬)

৭৮৪. ‘‘যং কিঞ্চি ৰতনং অত্থি, ধতৰট্ঠনিৱেসনে;

সব্বানি তে উপযন্তু, ধীতৰং দেহি ৰাজিনো’’.

৭৮৫. ‘‘ন নো ৱিৱাহো নাগেহি, কতপুব্বো কুদাচনং;

তং ৱিৱাহং অসংযুত্তং, কথং অম্হে কৰোমসে’’.

৭৮৬. ‘‘জীৱিতং নূন তে চত্তং, ৰট্ঠং ৱা মনুজাধিপ;

ন হি নাগে কুপিতম্হি, চিৰং জীৱন্তি তাদিসা.

৭৮৭. ‘‘যো ত্ৱং দেৱ মনুস্সোসি, ইদ্ধিমন্তং অনিদ্ধিমা;

ৱৰুণস্স নিযং পুত্তং, যামুনং অতিমঞ্ঞসি’’.

৭৮৮. ‘‘নাতিমঞ্ঞামি ৰাজানং, ধতৰট্ঠং যসস্সিনং;

ধতৰট্ঠো হি নাগানং, বহূনমপি ইস্সৰো.

৭৮৯. ‘‘অহি মহানুভাৱোপি, ন মে ধীতৰমাৰহো;

খত্তিযো চ ৱিদেহানং, অভিজাতা সমুদ্দজা’’.

৭৯০. ‘‘কম্বলস্সতৰা উট্ঠেন্তু, সব্বে নাগে নিৱেদয;

বাৰাণসিং পৱজ্জন্তু, মা চ কঞ্চি [কিঞ্চি (সী. পী. ক.)] ৱিহেঠযুং’’.

৭৯১. ‘‘নিৱেসনেসু সোব্ভেসু, ৰথিযা চচ্চৰেসু চ;

ৰুক্খগ্গেসু চ লম্বন্তু, ৱিততা তোৰণেসু চ.

৭৯২. ‘‘অহম্পি সব্বসেতেন, মহতা সুমহং পুৰং;

পৰিক্খিপিস্সং ভোগেহি, কাসীনং জনযং ভযং’’.

৭৯৩. তস্স তং ৱচনং সুত্ৱা, উৰগানেকৱণ্ণিনো;

বাৰাণসিং পৱজ্জিংসু, ন চ কঞ্চি ৱিহেঠযুং.

৭৯৪. নিৱেসনেসু সোব্ভেসু, ৰথিযা চচ্চৰেসু চ;

ৰুক্খগ্গেসু চ লম্বিংসু, ৱিততা তোৰণেসু চ.

৭৯৫. তেসু দিস্ৱান লম্বন্তে, পুথূ কন্দিংসু নাৰিযো;

নাগে সোণ্ডিকতে দিস্ৱা, পস্সসন্তে মুহুং মুহুং.

৭৯৬. বাৰাণসী পব্যধিতা, আতুৰা সমপজ্জথ;

বাহা পগ্গয্হ পক্কন্দুং, ‘‘ধীতৰং দেহি ৰাজিনো’’.

৭৯৭. ‘‘পুপ্ফাভিহাৰস্স ৱনস্স মজ্ঝে, কো লোহিতক্খো ৱিততন্তৰংসো;

কা কম্বুকাযূৰধৰা সুৱত্থা, তিট্ঠন্তি নাৰিযো দস ৱন্দমানা.

৭৯৮. ‘‘কো ত্ৱং ব্ৰহাবাহু ৱনস্স মজ্ঝে, ৱিৰোচসি ঘতসিত্তোৱ অগ্গি;

মহেসক্খো অঞ্ঞতৰোসি যক্খো, উদাহু নাগোসি মহানুভাৱো’’.

৭৯৯. ‘‘নাগোহমস্মি ইদ্ধিমা, তেজস্সী [তেজসী (সী. স্যা. পী. ক.)] দুৰতিক্কমো;

ডংসেয্যং তেজসা কুদ্ধো, ফীতং জনপদং অপি.

৮০০. ‘‘সমুদ্দজা হি মে মাতা, ধতৰট্ঠো চ মে পিতা;

সুদস্সনকনিট্ঠোস্মি, ভূৰিদত্তোতি মং ৱিদূ’’.

৮০১. ‘‘যং গম্ভীৰং সদাৱট্টং, ৰহদং ভিস্মং পেক্খসি;

এস দিব্যো মমাৱাসো, অনেকসতপোৰিসো.

৮০২. ‘‘মযূৰকোঞ্চাভিৰুদং, নীলোদং ৱনমজ্ঝতো;

যমুনং পৱিস মা ভীতো, খেমং ৱত্তৱতং [ৱত্তৱতিং (স্যা. ক.)] সিৱং’’.

৮০৩. ‘‘তত্থ পত্তো সানুচৰো, সহ পুত্তেন ব্ৰাহ্মণ;

পূজিতো ময্হং কামেহি, সুখং ব্ৰাহ্মণ ৱচ্ছসি’’.

৮০৪. ‘‘সমা সমন্তপৰিতো, পহূততগৰা [বহুকা তগ্গৰা (সী. স্যা. পী.)] মহী;

ইন্দগোপকসঞ্ছন্না, সোভতি হৰিতুত্তমা.

৮০৫. ‘‘ৰম্মানি ৱনচেত্যানি, ৰম্মা হংসূপকূজিতা;

ওপুপ্ফাপদ্মা তিট্ঠন্তি, পোক্খৰঞ্ঞো [পোক্খৰঞ্ঞা (স্যা. পী.)] সুনিম্মিতা.

৮০৬. ‘‘অট্ঠংসা সুকতা থম্ভা, সব্বে ৱেড়ুৰিযামযা;

সহস্সথম্ভা পাসাদা, পূৰা কঞ্ঞাহি জোতৰে.

৮০৭. ‘‘ৱিমানং উপপন্নোসি, দিব্যং পুঞ্ঞেহি অত্তনো;

অসম্বাধং সিৱং ৰম্মং, অচ্চন্তসুখসংহিতং.

৮০৮. ‘‘মঞ্ঞে সহস্সনেত্তস্স, ৱিমানং নাভিকঙ্খসি;

ইদ্ধী হি ত্যাযং ৱিপুলা, সক্কস্সেৱ জুতীমতো’’.

৮০৯. ‘‘মনসাপি ন পত্তব্বো, আনুভাৱো জুতীমতো;

পৰিচাৰযমানানং, সইন্দানং [ইন্দানং (স্যা. ক.)] ৱসৱত্তিনং’’.

৮১০. ‘‘তং ৱিমানং অভিজ্ঝায, অমৰানং সুখেসিনং;

উপোসথং উপৱসন্তো, সেমি ৱম্মিকমুদ্ধনি’’.

৮১১. ‘‘অহঞ্চ মিগমেসানো, সপুত্তো পাৱিসিং ৱনং;

তং মং মতং ৱা জীৱং ৱা, নাভিৱেদেন্তি ঞাতকা.

৮১২. ‘‘আমন্তযে ভূৰিদত্তং, কাসিপুত্তং যসস্সিনং;

তযা নো সমনুঞ্ঞাতা, অপি পস্সেমু ঞাতকে’’.

৮১৩. ‘‘এসো হি ৱত মে ছন্দো, যং ৱসেসি মমন্তিকে;

ন হি এতাদিসা কামা, সুলভা হোন্তি মানুসে.

৮১৪. ‘‘সচে ত্ৱং নিচ্ছসে ৱত্থুং, মম কামেহি পূজিতো;

মযা ত্ৱং সমনুঞ্ঞাতো, সোত্থিং পস্সাহি ঞাতকে’’.

৮১৫. ‘‘ধাৰযিমং মণিং দিব্যং, পসুং পুত্তে চ ৱিন্দতি;

অৰোগো সুখিতো হোতি [হোহি (স্যা.)], গচ্ছেৱাদায ব্ৰাহ্মণ’’.

৮১৬. ‘‘কুসলং পটিনন্দামি, ভূৰিদত্ত ৱচো তৱ;

পব্বজিস্সামি জিণ্ণোস্মি, ন কামে অভিপত্থযে’’.

৮১৭. ‘‘ব্ৰহ্মচৰিযস্স চে ভঙ্গো, হোতি ভোগেহি কাৰিযং;

অৱিকম্পমানো এয্যাসি, বহুং দস্সামি তে ধনং’’.

৮১৮. ‘‘কুসলং পটিনন্দামি, ভূৰিদত্ত ৱচো তৱ;

পুনপি আগমিস্সামি, সচে অত্থো ভৱিস্সতি’’.

৮১৯. ‘‘ইদং ৱত্ৱা ভূৰিদত্তো, পেসেসি চতুৰো জনে;

এথ গচ্ছথ উট্ঠেথ, খিপ্পং পাপেথ ব্ৰাহ্মণং.

৮২০. তস্স তং ৱচনং সুত্ৱা, উট্ঠায চতুৰো জনা;

পেসিতা ভূৰিদত্তেন, খিপ্পং পাপেসু ব্ৰাহ্মণং.

৮২১. ‘‘মণিং পগ্গয্হ মঙ্গল্যং, সাধুৱিত্তং [সাধুচিত্তং (পী.)] মনোৰমং;

সেলং ব্যঞ্জনসম্পন্নং, কো ইমং মণিমজ্ঝগা’’.

৮২২. ‘‘লোহিতক্খসহস্সাহি, সমন্তা পৰিৱাৰিতং;

অজ্জ কালং পথং [পদং (সী. পী.)] গচ্ছং, অজ্ঝগাহং মণিং ইমং’’.

৮২৩. ‘‘সুপচিণ্ণো অযং সেলো, অচ্চিতো মহিতো [মানিতো (ক.)] সদা;

সুধাৰিতো সুনিক্খিত্তো, সব্বত্থমভিসাধযে.

৮২৪. ‘‘উপচাৰৱিপন্নস্স, নিক্খেপে ধাৰণায ৱা;

অযং সেলো ৱিনাসায, পৰিচিণ্ণো অযোনিসো.

৮২৫. ‘‘ন ইমং অকুসলো [কুসলং (ক.)] দিব্যং, মণিং ধাৰেতুমাৰহো;

পটিপজ্জ সতং নিক্খং, দেহিমং ৰতনং মম’’.

৮২৬. ‘‘ন চ ম্যাযং মণী কেয্যো, গোহি [কেহি (ক.)] ৱা ৰতনেহি ৱা;

সেলো ব্যঞ্জনসম্পন্নো, নেৱ কেয্যো মণী মম’’.

৮২৭. ‘‘নো চে তযা মণী কেয্যো, গোহি [কেহি (ক.)] ৱা ৰতনেহি ৱা;

অথ কেন মণী কেয্যো, তং মে অক্খাহি পুচ্ছিতো’’.

৮২৮. ‘‘যো মে সংসে মহানাগং, তেজস্সিং দুৰতিক্কমং;

তস্স দজ্জং ইমং সেলং, জলন্তমিৱ তেজসা’’.

৮২৯. ‘‘কো নু ব্ৰাহ্মণৱণ্ণেন, সুপণ্ণো পততং ৱৰো;

নাগং জিগীসমন্ৱেসি, অন্ৱেসং ভক্খমত্তনো.

৮৩০. ‘‘নাহং দিজাধিপো হোমি, ন দিট্ঠো গৰুড়ো মযা;

আসীৱিসেন ৱিত্তোতি [ৱিত্তোস্মি (স্যা. ক.)], ৱজ্জো ব্ৰাহ্মণ মং ৱিদূ’’.

৮৩১. ‘‘কিং নু তুয্হং বলং অত্থি, কিং সিপ্পং ৱিজ্জতে তৱ;

কিস্মিং ৱা ত্ৱং পৰত্থদ্ধো, উৰগং নাপচাযসি’’.

৮৩২. ‘‘আৰঞ্ঞিকস্স ইসিনো, চিৰৰত্তং তপস্সিনো;

সুপণ্ণো কোসিযস্সক্খা, ৱিসৱিজ্জং অনুত্তৰং.

৮৩৩. ‘‘তং ভাৱিতত্তঞ্ঞতৰং, সম্মন্তং পব্বতন্তৰে;

সক্কচ্চং তং উপট্ঠাসিং, ৰত্তিন্দিৱমতন্দিতো.

৮৩৪. ‘‘সো তদা পৰিচিণ্ণো মে, ৱত্তৱা ব্ৰহ্মচৰিযৱা;

দিব্বং পাতুকৰী মন্তং, কামসা ভগৱা মম.

৮৩৫. ‘‘ত্যাহং মন্তে পৰত্থদ্ধো, নাহং ভাযামি ভোগিনং;

আচৰিযো ৱিসঘাতানং, অলম্পানোতি [আলম্বানোতি (সী. পী.), আলম্বাযনোতি (স্যা.)] মং ৱিদূ’’.

৮৩৬. ‘‘গণ্হামসে মণিং তাত, সোমদত্ত ৱিজানহি;

মা দণ্ডেন সিৰিং পত্তং, কামসা পজহিম্হসে’’.

৮৩৭. ‘‘সকং নিৱেসনং পত্তং, যো তং ব্ৰাহ্মণ পূজযি;

এৱং কল্যাণকাৰিস্স, কিং মোহা দুব্ভিমিচ্ছসি’’.

৮৩৮. ‘‘সচে ত্ৱং [সচে হি (সী. পী. ক.)] ধনকামোসি, ভূৰিদত্তো পদস্সতি [ভূৰিদত্তং পদিস্সসি (ক.)];

তমেৱ গন্ত্ৱা যাচস্সু, বহুং দস্সতি তে ধনং’’.

৮৩৯. ‘‘হত্থগতং পত্তগতং, নিকিণ্ণং খাদিতুং ৱৰং;

মা নো সন্দিট্ঠিকো অত্থো, সোমদত্ত উপচ্চগা’’.

৮৪০. ‘‘পচ্চতি নিৰযে ঘোৰে, মহিস্সমপি ৱিৱৰতি [মহিস্সমৱ দীযতি (সী. পী.), মহিমস্স ৱিন্দ্ৰীযতি (স্যা.)];

মিত্তদুব্ভী হিতচ্চাগী, জীৱৰেৱাপি সুস্সতি [জীৱৰে চাপি সুস্সৰে (সী. পী.)].

৮৪১. ‘‘সচে ত্ৱং [সচে হি (সী. পী. ক.)] ধনকামোসি, ভূৰিদত্তো পদস্সতি;

মঞ্ঞে অত্তকতং ৱেৰং, নচিৰং ৱেদযিস্সসি’’.

৮৪২. ‘‘মহাযঞ্ঞং যজিত্ৱান, এৱং সুজ্ঝন্তি ব্ৰাহ্মণা;

মহাযঞ্ঞং যজিস্সাম, এৱং মোক্খাম পাপকা’’.

৮৪৩. ‘‘হন্দ দানি অপাযামি, নাহং অজ্জ তযা সহ;

পদম্পেকং [পদমেকং (স্যা. ক.)] ন গচ্ছেয্যং, এৱং কিব্বিসকাৰিনা’’.

৮৪৪. ‘‘ইদং ৱত্ৱান পিতৰং, সোমদত্তো বহুস্সুতো;

উজ্ঝাপেত্ৱান ভূতানি, তম্হা ঠানা অপক্কমি.

৮৪৫. ‘‘গণ্হাহেতং মহানাগং, আহৰেতং মণিং মম;

ইন্দগোপকৱণ্ণাভো, যস্স লোহিতকো সিৰো.

৮৪৬. ‘‘কপ্পাসপিচুৰাসীৱ, এসো কাযো পদিস্সতি [কায’স্স দিস্সতি (সী. পী.)];

ৱম্মিকগ্গগতো সেতি, তং ত্ৱং গণ্হাহি ব্ৰাহ্মণ’’.

৮৪৭. ‘‘অথোসধেহি দিব্বেহি, জপ্পং মন্তপদানি চ;

এৱং তং অসক্খি সত্থুং [সট্ঠুং (সী. পী.), যুট্ঠুং (স্যা.), সুত্তুং (ক.)], কত্ৱা পৰিত্তমত্তনো’’.

৮৪৮. ‘‘মমং দিস্ৱান আযন্তং, সব্বকামসমিদ্ধিনং;

ইন্দ্ৰিযানি অহট্ঠানি, সাৱং [সামং (সী. পী.)] জাতং মুখং তৱ.

৮৪৯. ‘‘পদ্মং যথা হত্থগতং, পাণিনা পৰিমদ্দিতং;

সাৱং জাতং [যন্তং (ক.)] মুখং তুয্হং, মমং দিস্ৱান এদিসং.

৮৫০. ‘‘কচ্চি নু তে নাভিসসি [তে নাভিসযি (সী.), তে নাভিস্সসি (স্যা.)], কচ্চি তে অত্থি ৱেদনা;

যেন সাৱং মুখং তুয্হং, মমং দিস্ৱান আগতং’’.

৮৫১. ‘‘সুপিনং তাত অদ্দক্খিং, ইতো মাসং অধোগতং;

দক্খিণং ৱিয মে বাহুং, ছেত্ৱা ৰুহিৰমক্খিতং;

পুৰিসো আদায পক্কামি, মম ৰোদন্তিযা সতি.

৮৫২. ‘‘যতোহং [যতো তং (সী.)] সুপিনমদ্দক্খিং, সুদস্সন ৱিজানহি;

ততো দিৱা ৱা ৰত্তিং ৱা, সুখং মে নোপলব্ভতি’’.

৮৫৩. ‘‘যং পুব্বে পৰিৱাৰিংসু [পৰিচাৰিংসু (সী. পী.)], কঞ্ঞা ৰুচিৰৱিগ্গহা;

হেমজালপটিচ্ছন্না, ভূৰিদত্তো ন দিস্সতি.

৮৫৪. ‘‘যং পুব্বে পৰিৱাৰিংসু [পৰিচাৰিংসু (সী. পী.)], নেত্তিংসৱৰধাৰিনো;

কণিকাৰাৱ সম্ফুল্লা, ভূৰিদত্তো ন দিস্সতি.

৮৫৫. ‘‘হন্দ দানি গমিস্সাম, ভূৰিদত্তনিৱেসনং;

ধম্মট্ঠং সীলসম্পন্নং, পস্সাম তৱ ভাতৰং’’.

৮৫৬. ‘‘তঞ্চ দিস্ৱান আযন্তিং, ভূৰিদত্তস্স মাতৰং;

বাহা পগ্গয্হ পক্কন্দুং, ভূৰিদত্তস্স নাৰিযো.

৮৫৭. ‘‘পুত্তং তেয্যে ন জানাম, ইতো মাসং অধোগতং;

মতং ৱা যদি ৱা জীৱং, ভূৰিদত্তং যসস্সিনং’’.