৫৪১. নিমিজাতকং (৪)

৪২১. ‘‘অচ্ছেৰং ৱত লোকস্মিং, উপ্পজ্জন্তি ৱিচক্খণা;

যদা অহু নিমিৰাজা, পণ্ডিতো কুসলত্থিকো.

৪২২. ‘‘ৰাজা সব্বৱিদেহানং, অদা দানং অৰিন্দমো;

তস্স তং দদতো দানং, সঙ্কপ্পো উদপজ্জথ;

দানং ৱা ব্ৰহ্মচৰিযং ৱা, কতমং সু মহপ্ফলং.

৪২৩. তস্স সঙ্কপ্পমঞ্ঞায, মঘৱা দেৱকুঞ্জৰো;

সহস্সনেত্তো পাতুৰহু, ৱণ্ণেন ৱিহনং [নিহনং (সী. পী.), ৱিহতং (স্যা. ক.)] তমং.

৪২৪. সলোমহট্ঠো মনুজিন্দো, ৱাসৱং অৱচা নিমি;

‘‘দেৱতা নুসি গন্ধব্বো, অদু সক্কো পুৰিন্দদো.

৪২৫. ‘‘ন চ মে তাদিসো ৱণ্ণো, দিট্ঠো ৱা যদি ৱা সুতো;

[নত্থি সী. পী. পোত্থকেসু] আচিক্খ মে ত্ৱং ভদ্দন্তে, কথং জানেমু তং মযং’’ [নত্থি সী. পী. পোত্থকেসু].

৪২৬. সলোমহট্ঠং ঞত্ৱান, ৱাসৱো অৱচা নিমিং;

‘‘সক্কোহমস্মি দেৱিন্দো, আগতোস্মি তৱন্তিকে;

অলোমহট্ঠো মনুজিন্দ, পুচ্ছ পঞ্হং যমিচ্ছসি’’.

৪২৭. সো চ তেন কতোকাসো, ৱাসৱং অৱচা নিমি;

‘‘পুচ্ছামি তং মহাৰাজ [মহাবাহু (সী. পী.), দেৱৰাজ (ক.)], সব্বভূতানমিস্সৰ;

দানং ৱা ব্ৰহ্মচৰিযং ৱা, কতমং সু মহপ্ফলং’’.

৪২৮. সো পুট্ঠো নৰদেৱেন, ৱাসৱো অৱচা নিমিং;

‘‘ৱিপাকং ব্ৰহ্মচৰিযস্স, জানং অক্খাসিজানতো.

৪২৯. ‘‘হীনেন ব্ৰহ্মচৰিযেন, খত্তিযে উপপজ্জতি;

মজ্ঝিমেন চ দেৱত্তং, উত্তমেন ৱিসুজ্ঝতি.

৪৩০. ‘‘ন হেতে সুলভা কাযা, যাচযোগেন কেনচি;

যে কাযে উপপজ্জন্তি, অনাগাৰা তপস্সিনো.

৪৩১. ‘‘দুদীপো [দুতিপো (ক.)] সাগৰো সেলো, মুজকিন্দো [মুচলিন্দো (সী. স্যা. পী.), মুজকিন্তো (ক.)] ভগীৰসো;

উসিন্দৰো [উসীনৰো (সী. পী.)] কস্সপো চ [অট্ঠকো চ (সী. পী.), অত্থকো চ (স্যা.)], অসকো চ পুথুজ্জনো.

৪৩২. ‘‘এতে চঞ্ঞে চ ৰাজানো, খত্তিযা ব্ৰাহ্মণা বহূ;

পুথুযঞ্ঞং যজিত্ৱান, পেতত্তং [পেতং তে (সী. পী.)] নাতিৱত্তিসুং.

৪৩৩. ‘‘অথ যীমে [অদ্ধা ইমে (সী. পী.), অদ্ধাযিমে (স্যা.)] অৱত্তিংসু, অনাগাৰা তপস্সিনো;

সত্তিসযো যামহনু, সোমযামো [সোমযাগো (সী. স্যা. পী.)] মনোজৱো.

৪৩৪. ‘‘সমুদ্দো মাঘো ভৰতো চ, ইসি কালপুৰক্খতো [কালিকৰিক্খিযো (সী. পী.)];

অঙ্গীৰসো কস্সপো চ, কিসৱচ্ছো অকত্তি [অকিত্তি (সী. পী.), অকন্তি (স্যা.)] চ.

৪৩৫. ‘‘উত্তৰেন নদী সীদা, গম্ভীৰা দুৰতিক্কমা;

নড়গ্গিৱণ্ণা জোতন্তি, সদা কঞ্চনপব্বতা.

৪৩৬. ‘‘পৰূড়্হকচ্ছা তগৰা, ৰূড়্হকচ্ছা ৱনা নগা;

তত্ৰাসুং দসসহস্সা, পোৰাণা ইসযো পুৰে.

৪৩৭. ‘‘অহং সেট্ঠোস্মি দানেন, সংযমেন দমেন চ;

অনুত্তৰং ৱতং কত্ৱা, পকিৰচাৰী সমাহিতে.

৪৩৮. ‘‘জাতিমন্তং অজচ্চঞ্চ, অহং উজুগতং নৰং;

অতিৱেলং নমস্সিস্সং, কম্মবন্ধূ হি মাণৱা [মাতিযা (সী. পী.)].

৪৩৯. ‘‘সব্বে ৱণ্ণা অধম্মট্ঠা, পতন্তি নিৰযং অধো;

সব্বে ৱণ্ণা ৱিসুজ্ঝন্তি, চৰিত্ৱা ধম্মমুত্তমং’’.

৪৪০. ইদং ৱত্ৱান মঘৱা, দেৱৰাজা সুজম্পতি;

ৱেদেহমনুসাসিত্ৱা, সগ্গকাযং অপক্কমি.

৪৪১. ‘‘ইমং ভোন্তো নিসামেথ, যাৱন্তেত্থ সমাগতা;

ধম্মিকানং মনুস্সানং, ৱণ্ণং উচ্চাৱচং বহুং.

৪৪২. ‘‘যথা অযং নিমিৰাজা, পণ্ডিতো কুসলত্থিকো;

ৰাজা সব্বৱিদেহানং, অদা দানং অৰিন্দমো.

৪৪৩. ‘‘তস্স তং দদতো দানং, সঙ্কপ্পো উদপজ্জথ;

দানং ৱা ব্ৰহ্মচৰিযং ৱা, কতমং সু মহপ্ফলং’’.

৪৪৪. অব্ভুতো ৱত লোকস্মিং, উপ্পজ্জি লোমহংসনো;

দিব্বো ৰথো পাতুৰহু, ৱেদেহস্স যসস্সিনো.

৪৪৫. দেৱপুত্তো মহিদ্ধিকো, মাতলি দেৱসাৰথি;

নিমন্তযিত্থ ৰাজানং, ৱেদেহং মিথিলগ্গহং.

৪৪৬. ‘‘এহিমং ৰথমাৰুয্হ, ৰাজসেট্ঠ দিসম্পতি;

দেৱা দস্সনকামা তে, তাৱতিংসা সইন্দকা;

সৰমানা হি তে দেৱা, সুধম্মাযং সমচ্ছৰে’’.

৪৪৭. ততো ৰাজা তৰমানো, ৱেদেহো মিথিলগ্গহো;

আসনা ৱুট্ঠহিত্ৱান, পমুখো ৰথমাৰুহি.

৪৪৮. অভিৰূড়্হং ৰথং দিব্বং, মাতলি এতদব্ৰৱি;

‘‘কেন তং নেমি মগ্গেন, ৰাজসেট্ঠ দিসম্পতি;

যেন ৱা পাপকম্মন্তা, পুঞ্ঞকম্মা চ যে নৰা’’.

৪৪৯. ‘‘উভযেনেৱ মং নেহি, মাতলি দেৱসাৰথি;

যেন ৱা পাপকম্মন্তা, পুঞ্ঞকম্মা চ যে নৰা’’.

৪৫০. ‘‘কেন তং পঠমং নেমি, ৰাজসেট্ঠ দিসম্পতি;

যেন ৱা পাপকম্মন্তা, পুঞ্ঞকম্মা চ যে নৰা’’.

৪৫১. ‘‘নিৰযে [নিৰিযং (স্যা. ক.)] তাৱ পস্সামি, আৱাসে [আৱাসং (স্যা. ক.)] পাপকম্মিনং;

ঠানানি লুদ্দকম্মানং, দুস্সীলানঞ্চ যা গতি’’.

৪৫২. দস্সেসি মাতলি ৰঞ্ঞো, দুগ্গং ৱেতৰণিং নদিং;

কুথিতং খাৰসংযুত্তং, তত্তং অগ্গিসিখূপমং [অগ্গিসমোদকং (ক.)].

৪৫৩. নিমী হৱে মাতলিমজ্ঝভাসথ [মাতলিমজ্ঝভাসি (স্যা.)], দিস্ৱা জনং পতমানং ৱিদুগ্গে;

‘‘ভযঞ্হি মং ৱিন্দতি সূত দিস্ৱা, পুচ্ছামি তং মাতলি দেৱসাৰথি;

ইমে নু মচ্চা কিমকংসু পাপং, যেমে জনা ৱেতৰণিং পতন্তি’’.

৪৫৪. তস্স পুট্ঠো ৱিযাকাসি, মাতলি দেৱসাৰথি;

ৱিপাকং পাপকম্মানং, জানং অক্খাসিজানতো.

৪৫৫. ‘‘যে দুব্বলে বলৱন্তা জীৱলোকে, হিংসন্তি ৰোসন্তি সুপাপধম্মা;

তে লুদ্দকম্মা পসৱেত্ৱ পাপং, তেমে জনা ৱেতৰণিং পতন্তি’’.

৪৫৬. ‘‘সামা চ সোণা সবলা চ গিজ্ঝা, কাকোলসঙ্ঘা অদন্তি [অদেন্তি (সী. স্যা. পী.) এৱমুপৰিপি] ভেৰৱা;

ভযঞ্হি মং ৱিন্দতি সূত দিস্ৱা, পুচ্ছামি তং মাতলি দেৱসাৰথি;

ইমে নু মচ্চা কিমকংসু পাপং, যেমে জনে কাকোলসঙ্ঘা অদন্তি’’.

৪৫৭. তস্স পুট্ঠো ৱিযাকাসি, মাতলি দেৱসাৰথি;

ৱিপাকং পাপকম্মানং, জানং অক্খাসিজানতো.

৪৫৮. ‘‘যে কেচিমে মচ্ছৰিনো কদৰিযা, পৰিভাসকা সমণব্ৰাহ্মণানং;

হিংসন্তি ৰোসন্তি সুপাপধম্মা, তে লুদ্দকম্মা পসৱেত্ৱ পাপং;

তেমে জনে কাকোলসঙ্ঘা অদন্তি’’.

৪৫৯. ‘‘সজোতিভূতা পথৱিং কমন্তি, তত্তেহি খন্ধেহি চ পোথযন্তি;

ভযঞ্হি মং ৱিন্দতি সূত দিস্ৱা, পুচ্ছামি তং মাতলি দেৱসাৰথি;

ইমে নু মচ্চা কিমকংসু পাপং, যেমে জনা খন্ধহতা সযন্তি’’.

৪৬০. তস্স পুট্ঠো ৱিযাকাসি, মাতলি দেৱসাৰথি;

ৱিপাকং পাপকম্মানং, জানং অক্খাসিজানতো.

৪৬১. ‘‘যে জীৱলোকস্মি সুপাপধম্মিনো, নৰঞ্চ নাৰিঞ্চ অপাপধম্মং;

হিংসন্তি ৰোসন্তি সুপাপধম্মা [সুপাপধম্মিনো (ক.)], তে লুদ্দকম্মা পসৱেত্ৱ পাপং;

তেমে জনা খন্ধহতা সযন্তি’’.

৪৬২. ‘‘অঙ্গাৰকাসুং অপৰে ফুণন্তি [থুনন্তি (সী. স্যা.), ফুনন্তি (পী.)], নৰা ৰুদন্তা পৰিদড্ঢগত্তা;

ভযঞ্হি মং ৱিদন্তি সূত দিস্ৱা, পুচ্ছামি তং মাতলি দেৱসাৰথি;

ইমে নু মচ্চা কিমকংসু পাপং, যেমে জনা অঙ্গাৰকাসুং ফুণন্তি’’.

৪৬৩. তস্স পুট্ঠো ৱিযাকাসি, মাতলি দেৱসাৰথি;

ৱিপাকং পাপকম্মানং, জানং অক্খাসিজানতো.

৪৬৪. ‘‘যে কেচি পূগায ধনস্স [পূগাযতনস্স (সী. পী.)] হেতু, সক্খিং কৰিত্ৱা ইণং জাপযন্তি;

তে জাপযিত্ৱা জনতং জনিন্দ, তে লুদ্দকম্মা পসৱেত্ৱ পাপং;

তেমে জনা অঙ্গাৰকাসুং ফুণন্তি’’.

৪৬৫. ‘‘সজোতিভূতা জলিতা পদিত্তা, পদিস্সতি মহতী লোহকুম্ভী;

ভযঞ্হি মং ৱিন্দতি সূত দিস্ৱা, পুচ্ছামি তং মাতলি দেৱসাৰথি;

ইমে নু মচ্চা কিমকংসু পাপং, যেমে জনা অৱংসিৰা লোহকুম্ভিং পতন্তি’’.

৪৬৬. তস্স পুট্ঠো ৱিযাকাসি, মাতলি দেৱসাৰথি;

ৱিপাকং পাপকম্মানং, জানং অক্খাসিজানতো.

৪৬৭. ‘‘যে সীলৱন্তং [সীলৱং (পী.)] সমণং ব্ৰাহ্মণং ৱা, হিংসন্তি ৰোসন্তি সুপাপধম্মা;

তে লুদ্দকম্মা পসৱেত্ৱ পাপং, তেমে জনা অৱংসিৰা লোহকুম্ভিং পতন্তি’’.

৪৬৮. ‘‘লুঞ্চন্তি গীৱং অথ ৱেঠযিত্ৱা [অৱিৱেঠযিত্ৱা (ক.)], উণ্হোদকস্মিং পকিলেদযিত্ৱা [পকিলেদযিত্ৱা (সী. পী.)];

ভযঞ্হি মং ৱিন্দতি সূত দিস্ৱা, পুচ্ছামি তং মাতলি দেৱসাৰথি;

ইমে নু মচ্চা কিমকংসু পাপং, যেমে জনা লুত্তসিৰা সযন্তি’’.

৪৬৯. তস্স পুট্ঠো ৱিযাকাসি, মাতলি দেৱসাৰথি;

ৱিপাকং পাপকম্মানং, জানং অক্খাসিজানতো.

৪৭০. ‘‘যে জীৱলোকস্মি সুপাপধম্মিনো, পক্খী গহেত্ৱান ৱিহেঠযন্তি তে;

ৱিহেঠযিত্ৱা সকুণং জনিন্দ, তে লুদ্দকামা পসৱেত্ৱ পাপং;

তেমে জনা লুত্তসিৰা সযন্তি.

৪৭১. ‘‘পহূততোযা অনিগাধকূলা [অনিখাতকূলা (সী. স্যা. পী.)], নদী অযং সন্দতি সুপ্পতিত্থা;

ঘম্মাভিতত্তা মনুজা পিৱন্তি, পীতঞ্চ [পিৱতং চ (সী. স্যা. পী. ক.)] তেসং ভুস হোতি পানি.

৪৭২. ‘‘ভযঞ্হি মং ৱিন্দতি সূত দিস্ৱা, পুচ্ছামি তং মাতলি দেৱসাৰথি;

ইমে নু মচ্চা কিমকংসু পাপং, পীতঞ্চ তেসং ভুস হোতি পানি’’.

৪৭৩. তস্স পুট্ঠো ৱিযাকাসি, মাতলি দেৱসাৰথি;

ৱিপাকং পাপকম্মানং, জানং অক্খাসিজানতো.

৪৭৪. ‘‘যে সুদ্ধধঞ্ঞং পলাসেন মিস্সং, অসুদ্ধকম্মা কযিনো দদন্তি;

ঘম্মাভিতত্তান পিপাসিতানং, পীতঞ্চ তেসং ভুস হোতি পানি’’.

৪৭৫. ‘‘উসূহি সত্তীহি চ তোমৰেহি, দুভযানি পস্সানি তুদন্তি কন্দতং;

ভযঞ্হি মং ৱিন্দতি সূত দিস্ৱা, পুচ্ছামি তং মাতলি দেৱসাৰথি;

ইমে নু মচ্চা কিমকংসু পাপং, যেমে জনা সত্তিহতা সযন্তি’’.

৪৭৬. তস্স পুট্ঠো ৱিযাকাসি, মাতলি দেৱসাৰথি;

ৱিপাকং পাপকম্মানং, জানং অক্খাসিজানতো.

৪৭৭. ‘‘যে জীৱলোকস্মি অসাধুকম্মিনো, অদিন্নমাদায কৰোন্তি জীৱিকং;

ধঞ্ঞং ধনং ৰজতং জাতৰূপং, অজেড়কঞ্চাপি পসুং মহিংসং [মহীসং (সী. পী.)];

তে লুদ্দকম্মা পসৱেত্ৱ পাপং, তেমে জনা সত্তিহতা সযন্তি’’.

৪৭৮. ‘‘গীৱায বদ্ধা কিস্স ইমে পুনেকে, অঞ্ঞে ৱিকন্তা [ৱিকত্তা (সী. পী.)] বিলকতা সযন্তি [পুনেকে (সী. পী.)];

ভযঞ্হি মং ৱিন্দতি সূত দিস্ৱা, পুচ্ছামি তং মাতলি দেৱসাৰথি;

ইমে নু মচ্চা কিমকংসু পাপং, যেমে জনা বিলকতা সযন্তি’’.

৪৭৯. তস্স পুট্ঠো ৱিযাকাসি, মাতলি দেৱসাৰথি;

ৱিপাকং পাপকম্মানং, জানং অক্খাসিজানতো.

৪৮০. ‘‘ওৰব্ভিকা সূকৰিকা চ মচ্ছিকা, পসুং মহিংসঞ্চ অজেড়কঞ্চ;

হন্ত্ৱান সূনেসু পসাৰযিংসু, তে লুদ্দকম্মা পসৱেত্ৱ পাপং;

তেমে জনা বিলকতা সযন্তি.

৪৮১. ‘‘ৰহদো অযং মুত্তকৰীসপূৰো, দুগ্গন্ধৰূপো অসুচি পূতি ৱাতি;

খুদাপৰেতা মনুজা অদন্তি, ভযঞ্হি মং ৱিন্দতি সূত দিস্ৱা;

পুচ্ছামি তং মাতলি দেৱসাৰথি, ইমে নু মচ্চা কিমকংসু পাপং;

যেমে জনা মুত্তকৰীসভক্খা’’.

৪৮২. তস্স পুট্ঠো ৱিযাকাসি, মাতলি দেৱসাৰথি;

ৱিপাকং পাপকম্মানং, জানং অক্খাসিজানতো.

৪৮৩. ‘‘যে কেচিমে কাৰণিকা ৱিৰোসকা, পৰেসং হিংসায সদা নিৱিট্ঠা;

তে লুদ্দকম্মা পসৱেত্ৱ পাপং, মিত্তদ্দুনো মীড়্হমদন্তি বালা.

৪৮৪. ‘‘ৰহদো অযং লোহিতপুব্বপূৰো, দুগ্গন্ধৰূপো অসুচি পূতি ৱাতি;

ঘম্মাভিতত্তা মনুজা পিৱন্তি, ভযঞ্হি মং ৱিন্দতি সূত দিস্ৱা;