৫৪০. সুৱণ্ণসামজাতকং (৩)

২৯৬. ‘‘কো নু মং উসুনা ৱিজ্ঝি, পমত্তং উদহাৰকং [হাৰিকং (স্যা.), হাৰিযং (ক.)];

খত্তিযো ব্ৰাহ্মণো ৱেস্সো, কো মং ৱিদ্ধা নিলীযসি.

২৯৭. ‘‘ন মে মংসানি খজ্জানি, চম্মেনত্থো ন ৱিজ্জতি;

অথ কেন নু ৱণ্ণেন, ৱিদ্ধেয্যং মং অমঞ্ঞথ.

২৯৮. ‘‘কো ৱা ত্ৱং কস্স ৱা পুত্তো, কথং জানেমু তং মযং;

পুট্ঠো মে সম্ম অক্খাহি, কিং মং ৱিদ্ধা নিলীযসি’’.

২৯৯. ‘‘ৰাজাহমস্মি কাসীনং, পীড়িযক্খোতি মং ৱিদূ;

লোভা ৰট্ঠং পহিত্ৱান, মিগমেসং চৰামহং.

৩০০. ‘‘ইস্সত্থে চস্মি কুসলো, দড়্হধম্মোতি ৱিস্সুতো;

নাগোপি মে ন মুচ্চেয্য, আগতো উসুপাতনং.

৩০১. ‘‘কো ৱা ত্ৱং কস্স ৱা পুত্তো [ত্ৱং চ কস্স ৱা পুত্তোসি (সী. পী.)], কথং জানেমু তং মযং;

পিতুনো অত্তনো চাপি, নামগোত্তং পৱেদয’’.

৩০২. ‘‘নেসাদপুত্তো ভদ্দন্তে, সামো ইতি মং ঞাতযো;

আমন্তযিংসু জীৱন্তং, স্ৱজ্জেৱাহং গতো [স্ৱাজ্জেৱঙ্গতো (স্যা.), স্ৱজ্জেৱঙ্গতে (ক.)] সযে.

৩০৩. ‘‘ৱিদ্ধোস্মি পুথুসল্লেন, সৱিসেন যথা মিগো;

সকম্হি লোহিতে ৰাজ, পস্স সেমি পৰিপ্লুতো.

৩০৪. ‘‘পটিৱামগতং [পটিধম্ম গতং (সী. পী.)] সল্লং, পস্স ধিম্হামি [ৱিহাম্হি (সী. পী.)] লোহিতং;

আতুৰো ত্যানুপুচ্ছামি, কিং মং ৱিদ্ধা নিলীযসি.

৩০৫. ‘‘অজিনম্হি হঞ্ঞতে দীপি, নাগো দন্তেহি হঞ্ঞতে;

অথ কেন নু ৱণ্ণেন, ৱিদ্ধেয্যং মং অমঞ্ঞথ’’.

৩০৬. ‘‘মিগো উপট্ঠিতো আসি, আগতো উসুপাতনং;

তং দিস্ৱা উব্বিজী সাম, তেন কোধো মমাৱিসি’’.

৩০৭. ‘‘যতো সৰামি অত্তানং, যতো পত্তোস্মি ৱিঞ্ঞুতং;

ন মং মিগা উত্তসন্তি, অৰঞ্ঞে সাপদানিপি.

৩০৮. ‘‘যতো নিধিং পৰিহৰিং, যতো পত্তোস্মি যোব্বনং;

ন মং মিগা উত্তসন্তি, অৰঞ্ঞে সাপদানিপি.

৩০৯. ‘‘ভীৰূ কিম্পুৰিসা ৰাজ, পব্বতে গন্ধমাদনে;

সম্মোদমানা গচ্ছাম, পব্বতানি ৱনানি চ.

৩১০. (‘‘ন মং মিগা উত্তসন্তি, অৰঞ্ঞে সাপদানিপি;) [( ) নত্থি সী. স্যা. পী. পোত্থকেসু]

অথ কেন নু ৱণ্ণেন, উত্ৰাসন্তি মিগা মমং’’ [উত্ৰাসে সো মিগো মমং (সী. পী.)].

৩১১. ‘‘ন তং তস [ন তদ্দসা (সী. পী.)] মিগো সাম, কিং তাহং অলিকং ভণে;

কোধলোভাভিভূতাহং, উসুং তে তং অৱস্সজিং [অৱিস্সজিং (স্যা.)].

৩১২. ‘‘কুতো নু সাম আগম্ম, কস্স ৱা পহিতো তুৱং;

উদহাৰো নদিং গচ্ছ, আগতো মিগসম্মতং’’.

৩১৩. ‘‘অন্ধা মাতাপিতা ময্হং, তে ভৰামি ব্ৰহাৱনে;

তেসাহং উদকাহাৰো, আগতো মিগসম্মতং.

৩১৪. ‘‘অত্থি নেসং উসামত্তং, অথ সাহস্স জীৱিতং;

উদকস্স অলাভেন, মঞ্ঞে অন্ধা মৰিস্সৰে.

৩১৫. ‘‘ন মে ইদং তথা দুক্খং, লব্ভা হি পুমুনা ইদং;

যঞ্চ অম্মং ন পস্সামি, তং মে দুক্খতৰং ইতো.

৩১৬. ‘‘ন মে ইদং তথা দুক্খং, লব্ভা হি পুমুনা ইদং;

যঞ্চ তাতং ন পস্সামি, তং মে দুক্খতৰং ইতো.

৩১৭. ‘‘সা নূন কপণা অম্মা, চিৰৰত্তায ৰুচ্ছতি [ৰুচ্চতি (ক.)];

অড্ঢৰত্তেৱ ৰত্তে ৱা, নদীৱ অৱসুচ্ছতি [অৱসুস্সতি (স্যা.)].

৩১৮. ‘‘সো নূন কপণো তাতো, চিৰৰত্তায ৰুচ্ছতি [ৰুচ্চতি (ক.)];

অড্ঢৰত্তেৱ ৰত্তে ৱা, নদীৱ অৱসুচ্ছতি [অৱসুস্সতি (স্যা.)].

৩১৯. ‘‘উট্ঠানপাদচৰিযায [পাৰিচৰিযায (সী. পী.)], পাদসম্বাহনস্স চ;

সাম তাত ৱিলপন্তা, হিণ্ডিস্সন্তি ব্ৰহাৱনে.

৩২০. ‘‘ইদম্পি দুতিযং সল্লং, কম্পেতি হদযং মমং;

যঞ্চ অন্ধে ন পস্সামি, মঞ্ঞে হিস্সামি [যঞ্চ হেস্সামি (সী. পী.), তং মেং হিস্সামি (ক.)] জীৱিতং’’.

৩২১. ‘‘মা বাড়্হং পৰিদেৱেসি, সাম কল্যাণদস্সন;

অহং কম্মকৰো হুত্ৱা, ভৰিস্সং তে ব্ৰহাৱনে.

৩২২. ‘‘ইস্সত্থে চস্মি কুসলো, দড়্হধম্মোতি ৱিস্সুতো;

অহং কম্মকৰো হুত্ৱা, ভৰিস্সং তে ব্ৰহাৱনে.

৩২৩. ‘‘মিগানং [মগানং (ক.)] ৱিঘাসমন্ৱেসং, ৱনমূলফলানি চ;

অহং কম্মকৰো হুত্ৱা, ভৰিস্সং তে ব্ৰহাৱনে.

৩২৪. ‘‘কতমং তং ৱনং সাম, যত্থ মাতাপিতা তৱ;

অহং তে তথা ভৰিস্সং, যথা তে অভৰী তুৱং’’.

৩২৫. ‘‘অযং একপদী ৰাজ, যোযং উস্সীসকে মম;

ইতো গন্ত্ৱা অড্ঢকোসং, তত্থ নেসং অগাৰকং;

যত্থ মাতাপিতা ময্হং, তে ভৰস্সু ইতো গতো.

৩২৬. ‘‘নমো তে কাসিৰাজত্থু, নমো তে কাসিৱড্ঢন;

অন্ধা মাতাপিতা ময্হং, তে ভৰস্সু ব্ৰহাৱনে.

৩২৭. ‘‘অঞ্জলিং তে পগ্গণ্হামি, কাসিৰাজ নমত্থু তে;

মাতৰং পিতৰং ময্হং, ৱুত্তো ৱজ্জাসি ৱন্দনং’’.

৩২৮. ‘‘ইদং ৱত্ৱান সো সামো, যুৱা কল্যাণদস্সনো;

মুচ্ছিতো ৱিসৱেগেন, ৱিসঞ্ঞী সমপজ্জথ.

৩২৯. ‘‘স ৰাজা পৰিদেৱেসি, বহুং কাৰুঞ্ঞসঞ্হিতং;

অজৰামৰোহং আসিং, অজ্জেতং ঞামি [অজ্জহঞ্ঞামি (ক.)] নো পুৰে;

সামং কালঙ্কতং দিস্ৱা, নত্থি মচ্চুস্স নাগমো.

৩৩০. ‘‘যস্সু মং পটিমন্তেতি, সৱিসেন সমপ্পিতো;

স্ৱজ্জেৱং গতে কালে, ন কিঞ্চি মভিভাসতি.

৩৩১. ‘‘নিৰযং নূন গচ্ছামি, এত্থ মে নত্থি সংসযো;

তদা হি পকতং পাপং, চিৰৰত্তায কিব্বিসং.

৩৩২. ‘‘ভৱন্তি তস্স ৱত্তাৰো, গামে কিব্বিসকাৰকো;

অৰঞ্ঞে নিম্মনুস্সম্হি, কো মং ৱত্তুমৰহতি.

৩৩৩. ‘‘সাৰযন্তি হি কম্মানি, গামে সংগচ্ছ মাণৱা;

অৰঞ্ঞে নিম্মনুস্সম্হি, কো নু মং সাৰযিস্সতি’’.

৩৩৪. ‘‘সা দেৱতা অন্তৰহিতা, পব্বতে গন্ধমাদনে;

ৰঞ্ঞোৱ অনুকম্পায, ইমা গাথা অভাসথ.

৩৩৫. ‘‘আগুং কিৰ মহাৰাজ, অকৰি [অকৰা (সী.)] কম্ম দুক্কটং;

অদূসকা পিতাপুত্তা, তযো একূসুনা হতা.

৩৩৬. ‘‘এহি তং অনুসিক্খামি, যথা তে সুগতী সিযা;

ধম্মেনন্ধে ৱনে পোস, মঞ্ঞেহং সুগতী তযা.

৩৩৭. ‘‘স ৰাজা পৰিদেৱিত্ৱা, বহুং কাৰুঞ্ঞসঞ্হিতং;

উদককুম্ভমাদায, পক্কামি দক্খিণামুখো.

৩৩৮. ‘‘কস্স নু এসো পদসদ্দো, মনুস্সস্সেৱ আগতো;

নেসো সামস্স নিগ্ঘোসো, কো নু ত্ৱমসি মাৰিস.

৩৩৯. ‘‘সন্তঞ্হি সামো ৱজতি, সন্তং পাদানি নেযতি [উত্তহি (সী.)];

নেসো সামস্স নিগ্ঘোসো, কো নু ত্ৱমসি মাৰিস’’.

৩৪০. ‘‘ৰাজাহমস্মি কাসীনং, পীড়িযক্খোতি মং ৱিদূ;

লোভা ৰট্ঠং পহিত্ৱান, মিগমেসং চৰামহং.

৩৪১. ‘‘ইস্সত্থে চস্মি কুসলো, দড়্হধম্মোতি ৱিস্সুতো;

নাগোপি মে ন মুচ্চেয্য, আগতো উসুপাতনং’’.

৩৪২. ‘‘স্ৱাগতং তে মহাৰাজ, অথো তে অদুৰাগতং;

ইস্সৰোসি অনুপ্পত্তো, যং ইধত্থি পৱেদয.

৩৪৩. ‘‘তিন্দুকানি পিযালানি, মধুকে কাসুমাৰিযো;

ফলানি খুদ্দকপ্পানি, ভুঞ্জ ৰাজ ৱৰং ৱৰং.

৩৪৪. ‘‘ইদম্পি পানীযং সীতং, আভতং গিৰিগব্ভৰা;

ততো পিৱ মহাৰাজ, সচে ত্ৱং অভিকঙ্খসি’’.

৩৪৫. ‘‘নালং অন্ধা ৱনে দট্ঠুং, কো নু ৱো ফলমাহৰি;

অনন্ধস্সেৱযং সম্মা, নিৱাপো ময্হ খাযতি’’.

৩৪৬. ‘‘দহৰো যুৱা নাতিব্ৰহা, সামো কল্যাণদস্সনো;

দীঘস্স কেসা অসিতা, অথো সূনগ্গ [সোনগ্গ (ক.)] ৱেল্লিতা.

৩৪৭. ‘‘সো হৱে ফলমাহৰিত্ৱা, ইতো আদায [আদা (সী. পী.)] কমণ্ডলুং;

নদিং গতো উদহাৰো, মঞ্ঞে ন দূৰমাগতো’’.

৩৪৮. ‘‘অহং তং অৱধিং সামং, যো তুয্হং পৰিচাৰকো;

যং কুমাৰং পৱেদেথ, সামং কল্যাণদস্সনং.

৩৪৯. ‘‘দীঘস্স কেসা অসিতা, অথো সূনগ্গৱেল্লিতা;

তেসু লোহিতলিত্তেসু, সেতি সামো মযা হতো’’.

৩৫০. ‘‘কেন দুকূলমন্তেসি, হতো সামোতি ৱাদিনা;

হতো সামোতি সুত্ৱান, হদযং মে পৱেধতি.

৩৫১. ‘‘অস্সত্থস্সেৱ তৰুণং, পৱাড়ং মালুতেৰিতং;

হতো সামোতি সুত্ৱান, হদযং মে পৱেধতি’’.

৩৫২. ‘‘পাৰিকে কাসিৰাজাযং, সো সামং মিগসম্মতে;

কোধসা উসুনা ৱিজ্ঝি, তস্স মা পাপমিচ্ছিম্হা’’.

৩৫৩. ‘‘কিচ্ছা লদ্ধো পিযো পুত্তো, যো অন্ধে অভৰী ৱনে;

তং একপুত্তং ঘাতিম্হি, কথং চিত্তং ন কোপযে’’.

৩৫৪. ‘‘কিচ্ছা লদ্ধো পিযো পুত্তো, যো অন্ধে অভৰী ৱনে;

তং একপুত্তং ঘাতিম্হি, অক্কোধং আহু পণ্ডিতা’’.

৩৫৫. ‘‘মা বাড়্হং পৰিদেৱেথ, হতো সামোতি ৱাদিনা;

অহং কম্মকৰো হুত্ৱা, ভৰিস্সামি ব্ৰহাৱনে.

৩৫৬. ‘‘ইস্সত্থে চস্মি কুসলো, দড়্হধম্মোতি ৱিস্সুতো;

অহং কম্মকৰো হুত্ৱা, ভৰিস্সামি ব্ৰহাৱনে.

৩৫৭. ‘‘মিগানং ৱিঘাসমন্ৱেসং, ৱনমূলফলানি চ;

অহং কম্মকৰো হুত্ৱা, ভৰিস্সামি ব্ৰহাৱনে’’.

৩৫৮. ‘‘নেস ধম্মো মহাৰাজ, নেতং অম্হেসু কপ্পতি;

ৰাজা ত্ৱমসি অম্হাকং, পাদে ৱন্দাম তে মযং’’.

৩৫৯. ‘‘ধম্মং নেসাদ ভণথ, কতা অপচিতী তযা;

পিতা ত্ৱমসি [ত্ৱমহি (?)] অম্হাকং, মাতা ত্ৱমসি পাৰিকে’’.

৩৬০. ‘‘নমো তে কাসিৰাজত্থু, নমো তে কাসিৱড্ঢন;

অঞ্জলিং তে পগ্গণ্হাম, যাৱ সামানুপাপয.

৩৬১. ‘‘তস্স পাদে সমজ্জন্তা [পৱট্টন্তা (পী.)], মুখঞ্চ ভুজদস্সনং;

সংসুম্ভমানা অত্তানং, কালমাগমযামসে’’.

৩৬২. ‘‘ব্ৰহা ৱাড়মিগাকিণ্ণং, আকাসন্তংৱ দিস্সতি;

যত্থ সামো হতো সেতি, চন্দোৱ পতিতো ছমা.

৩৬৩. ‘‘ব্ৰহা ৱাড়মিগাকিণ্ণং, আকাসন্তংৱ দিস্সতি;

যত্থ সামো হতো সেতি, সূৰিযোৱ পতিতো ছমা.

৩৬৪. ‘‘ব্ৰহা ৱাড়মিগাকিণ্ণং, আকাসন্তংৱ দিস্সতি;

যত্থ সামো হতো সেতি, পংসুনা পতিকুন্তিতো [কুণ্ঠিতো (সী. স্যা. পী.) এৱমুপৰিপি].

৩৬৫. ‘‘ব্ৰহা ৱাড়মিগাকিণ্ণং, আকাসন্তংৱ দিস্সতি;

যত্থ সামো হতো সেতি, ইধেৱ ৱসথস্সমে’’.

৩৬৬. ‘‘যদি তত্থ সহস্সানি, সতানি নিযুতানি [নহুতানি (সী. স্যা. পী.)] চ;

নেৱম্হাকং ভযং কোচি, ৱনে ৱাড়েসু ৱিজ্জতি’’.

৩৬৭. ‘‘ততো অন্ধানমাদায, কাসিৰাজা ব্ৰহাৱনে;

হত্থে গহেত্ৱা পক্কামি, যত্থ সামো হতো অহু.

৩৬৮. ‘‘দিস্ৱান পতিতং সামং, পুত্তকং পংসুকুন্থিতং;

অপৱিদ্ধং ব্ৰহাৰঞ্ঞে, চন্দংৱ পতিতং ছমা.

৩৬৯. ‘‘দিস্ৱান পতিতং সামং, পুত্তকং পংসুকুন্থিতং;