৫৩৯. মহাজনকজাতকং (২)

১২৩. ‘‘কোযং মজ্ঝে সমুদ্দস্মিং, অপস্সং তীৰমাযুহে;

কং [কিং (স্যা. ক.)] ত্ৱং অত্থৱসং ঞত্ৱা, এৱং ৱাযমসে ভুসং’’.

১২৪. ‘‘নিসম্ম ৱত্তং লোকস্স, ৱাযামস্স চ দেৱতে;

তস্মা মজ্ঝে সমুদ্দস্মিং, অপস্সং তীৰমাযুহে’’.

১২৫. ‘‘গম্ভীৰে অপ্পমেয্যস্মিং, তীৰং যস্স ন দিস্সতি;

মোঘো তে পুৰিসৱাযামো, অপ্পত্ৱাৱ মৰিস্সসি’’.

১২৬. ‘‘অনণো ঞাতিনং হোতি, দেৱানং পিতুনঞ্চ [পিতুনো চ (সী. পী.)] সো;

কৰং পুৰিসকিচ্চানি, ন চ পচ্ছানুতপ্পতি’’.

১২৭. ‘‘অপাৰণেয্যং যং কম্মং, অফলং কিলমথুদ্দযং;

তত্থ কো ৱাযমেনত্থো, মচ্চু যস্সাভিনিপ্পতং’’ [যস্সাভিনিপ্ফতং (স্যা.)].

১২৮. ‘‘অপাৰণেয্যমচ্চন্তং, যো ৱিদিত্ৱান দেৱতে;

ন ৰক্খে অত্তনো পাণং, জঞ্ঞা সো যদি হাপযে.

১২৯. ‘‘অধিপ্পাযফলং একে, অস্মিং লোকস্মি দেৱতে;

পযোজযন্তি কম্মানি, তানি ইজ্ঝন্তি ৱা ন ৱা.

১৩০. ‘‘সন্দিট্ঠিকং কম্মফলং, ননু পস্সসি দেৱতে;

সন্না অঞ্ঞে তৰামহং, তঞ্চ পস্সামি সন্তিকে.

১৩১. ‘‘সো অহং ৱাযমিস্সামি, যথাসত্তি যথাবলং;

গচ্ছং পাৰং সমুদ্দস্স, কস্সং [কাসং (সী. পী.)] পুৰিসকাৰিযং’’.

১৩২. ‘‘যো ত্ৱং এৱং গতে ওঘে, অপ্পমেয্যে মহণ্ণৱে;

ধম্মৱাযামসম্পন্নো, কম্মুনা নাৱসীদসি;

সো ত্ৱং তত্থেৱ গচ্ছাহি, যত্থ তে নিৰতো মনো’’.

১৩৩. ‘‘আসীসেথেৱ [আসিংসেথেৱ (সী. স্যা. পী.)] পুৰিসো, ন নিব্বিন্দেয্য পণ্ডিতো;

পস্সামি ৱোহং অত্তানং, যথা ইচ্ছিং তথা অহু.

১৩৪. ‘‘আসীসেথেৱ পুৰিসো, ন নিব্বিন্দেয্য পণ্ডিতো;

পস্সামি ৱোহং অত্তানং, উদকা থলমুব্ভতং.

১৩৫. ‘‘ৱাযমেথেৱ পুৰিসো, ন নিব্বিন্দেয্য পণ্ডিতো;

পস্সামি ৱোহং অত্তানং, যথা ইচ্ছিং তথা অহু.

১৩৬. ‘‘ৱাযমেথেৱ পুৰিসো, ন নিব্বিন্দেয্য পণ্ডিতো;

পস্সামি ৱোহং অত্তানং, উদকা থলমুব্ভতং.

১৩৭. ‘‘দুক্খূপনীতোপি নৰো সপঞ্ঞো, আসং ন ছিন্দেয্য সুখাগমায;

বহূ হি ফস্সা অহিতা হিতা চ, অৱিতক্কিতা মচ্চুমুপব্বজন্তি [মচ্চুমুপ্পজ্জন্তি (স্যা.)].

১৩৮. ‘‘অচিন্তিতম্পি ভৱতি, চিন্তিতম্পি ৱিনস্সতি;

ন হি চিন্তামযা ভোগা, ইত্থিযা পুৰিসস্স ৱা’’.

১৩৯. ‘‘অপোৰাণং [অপুৰাণং (সী. পী.)] ৱত ভো ৰাজা, সব্বভুম্মো দিসম্পতি;

নাজ্জ নচ্চে [ন চ নচ্চে (ক.)] নিসামেতি, ন গীতে কুৰুতে মনো.

১৪০. ‘‘ন মিগে [মগে (ক.)] নপি উয্যানে, নপি হংসে উদিক্খতি;

মূগোৱ তুণ্হিমাসীনো, ন অত্থমনুসাসতি’’.

১৪১. ‘‘সুখকামা ৰহোসীলা, ৱধবন্ধা উপাৰতা [উপাৰুতা (স্যা. ক.)];

কস্স [কেসং (সী. পী.)] নু অজ্জ আৰামে, দহৰা ৱুদ্ধা চ অচ্ছৰে.

১৪২. ‘‘অতিক্কন্তৱনথা ধীৰা, নমো তেসং মহেসিনং;

যে উস্সুকম্হি লোকম্হি, ৱিহৰন্তি মনুস্সুকা.

১৪৩. ‘‘তে ছেত্ৱা মচ্চুনো জালং, ততং [তন্তং (সী. স্যা. পী.), তং তং (ক.)] মাযাৱিনো দড়ং;

ছিন্নালযত্তা [সন্তালযন্তা (স্যা. ক.)] গচ্ছন্তি, কো তেসং গতিমাপযে’’ [নেসং গতি পাপযে (ক.)].

১৪৪. ‘‘কদাহং মিথিলং [মিধিলং (ক.)] ফীতং, ৱিভত্তং ভাগসো মিতং;

পহায পব্বজিস্সামি, তং কুদাস্সু [কদাস্সু (সী. পী.), কদাসু (স্যা.)] ভৱিস্সতি.

১৪৫. ‘‘কদাহং মিথিলং ফীতং, ৱিসালং সব্বতোপভং;