৫৩৫. সুধাভোজনজাতকং (৩)

১৯২. ‘‘নেৱ কিণামি নপি ৱিক্কিণামি, ন চাপি মে সন্নিচযো চ অত্থি [ইধত্থি (স্যা.)];

সুকিচ্ছৰূপং ৱতিদং পৰিত্তং, পত্থোদনো নালমযং দুৱিন্নং’’.

১৯৩. ‘‘অপ্পম্হা অপ্পকং দজ্জা, অনুমজ্ঝতো মজ্ঝকং;

বহুম্হা বহুকং দজ্জা, অদানং নুপপজ্জতি [ন উপপজ্জতি (সী. পী.)].

১৯৪. ‘‘তং তং ৱদামি কোসিয, দেহি দানানি ভুঞ্জ চ;

অৰিযমগ্গং সমাৰূহ [অৰিযং মগ্গং সমাৰুহ (সী. পী.)], নেকাসী লভতে সুখং’’.

১৯৫. ‘‘মোঘঞ্চস্স হুতং হোতি, মোঘঞ্চাপি সমীহিতং;

অতিথিস্মিং যো নিসিন্নস্মিং, একো ভুঞ্জতি ভোজনং.

১৯৬. ‘‘তং তং ৱদামি কোসিয, দেহি দানানি ভুঞ্জ চ;

অৰিযমগ্গং সমাৰূহ, নেকাসী লভতে সুখং’’.

১৯৭. ‘‘সচ্চঞ্চস্স হুতং হোতি, সচ্চঞ্চাপি সমীহিতং;

অতিথিস্মিং যো নিসিন্নস্মিং, নেকো ভুঞ্জতি ভোজনং.

১৯৮. ‘‘তং তং ৱদামি কোসিয, দেহি দানানি ভুঞ্জ চ;

অৰিযমগ্গং সমাৰূহ, নেকাসী লভতে সুখং’’.

১৯৯. ‘‘সৰঞ্চ জুহতি পোসো, বহুকায গযায চ;

দোণে তিম্বৰুতিত্থস্মিং, সীঘসোতে মহাৱহে.

২০০. ‘‘অত্ৰ চস্স হুতং হোতি, অত্ৰ চস্স সমীহিতং;

অতিথিস্মিং যো নিসিন্নস্মিং, নেকো ভুঞ্জতি ভোজনং.

২০১. ‘‘তং তং ৱদামি কোসিয, দেহি দানানি ভুঞ্জ চ;

অৰিযমগ্গং সমাৰূহ, নেকাসী লভতে সুখং’’.

২০২. ‘‘বড়িসঞ্হি সো নিগিলতি [নিগ্গিলতি (সী. পী.)], দীঘসুত্তং সবন্ধনং;

অতিথিস্মিং যো নিসিন্নস্মিং, একো ভুঞ্জতি ভোজনং.

২০৩. ‘‘তং তং ৱদামি কোসিয, দেহি দানানি ভুঞ্জ চ;

অৰিযমগ্গং সমাৰূহ, নেকাসী লভতে সুখং’’.

২০৪. ‘‘উড়াৰৱণ্ণা ৱত ব্ৰাহ্মণা ইমে, অযঞ্চ ৱো সুনখো কিস্স হেতু;

উচ্চাৱচং ৱণ্ণনিভং ৱিকুব্বতি, অক্খাথ নো ব্ৰাহ্মণা কে নু তুম্হে’’.

২০৫. ‘‘চন্দো চ সূৰিযো চ [সূৰিযো চ (ক.)] উভো ইধাগতা, অযং পন মাতলি দেৱসাৰথি;

সক্কোহমস্মি তিদসানমিন্দো, এসো চ খো পঞ্চসিখোতি ৱুচ্চতি.

২০৬. ‘‘পাণিস্সৰা মুদিঙ্গা চ [মুতিঙ্গা চ (সী. স্যা. পী.)], মুৰজালম্বৰানি চ;

সুত্তমেনং পবোধেন্তি, পটিবুদ্ধো চ নন্দতি’’.

২০৭. ‘‘যে কেচিমে মচ্ছৰিনো কদৰিযা, পৰিভাসকা সমণব্ৰাহ্মণানং;

ইধেৱ নিক্খিপ্প সৰীৰদেহং, কাযস্স ভেদা নিৰযং ৱজন্তি’’.

২০৮. ‘‘যে কেচিমে সুগ্গতিমাসমানা [সুগ্গতিমাসসানা (সী. পী.), সুগ্গতাসিসমানা (ক.)], ধম্মে ঠিতা সংযমে সংৱিভাগে;

ইধেৱ নিক্খিপ্প সৰীৰদেহং, কাযস্স ভেদা সুগতিং ৱজন্তি’’.

২০৯. ‘‘ত্ৱং নোসি ঞাতি পুৰিমাসু জাতিসু, সো মচ্ছৰী ৰোসকো [কোসিযো (স্যা. ক.)] পাপধম্মো;

তৱেৱ অত্থায ইধাগতম্হা, মা পাপধম্মো নিৰযং গমিত্থ’’ [অপত্থ (ক. সী. স্যা. পী.)].

২১০. ‘‘অদ্ধা হি মং ৱো হিতকামা, যং মং সমনুসাসথ;

সোহং তথা কৰিস্সামি, সব্বং ৱুত্তং হিতেসিভি.

২১১. ‘‘এসাহমজ্জেৱ উপাৰমামি, ন চাপিহং [ন চাপহং (সী. পী.)] কিঞ্চি কৰেয্য পাপং;

ন চাপি মে কিঞ্চি অদেয্যমত্থি, ন চাপিদত্ৱা উদকং পিৱামি [উদকম্পহং পিবে (সী.)].

২১২. ‘‘এৱঞ্চ মে দদতো সব্বকালং [সব্বকালে (ক.)], ভোগা ইমে ৱাসৱ খীযিস্সন্তি;

ততো অহং পব্বজিস্সামি সক্ক, হিত্ৱান কামানি যথোধিকানি’’.

২১৩. ‘‘নগুত্তমে গিৰিৱৰে গন্ধমাদনে, মোদন্তি তা দেৱৱৰাভিপালিতা;

অথাগমা ইসিৱৰো সব্বলোকগূ, সুপুপ্ফিতং দুমৱৰসাখমাদিয.

২১৪. ‘‘সুচিং সুগন্ধং তিদসেহি সক্কতং, পুপ্ফুত্তমং অমৰৱৰেহি সেৱিতং;

অলদ্ধ মচ্চেহি ৱ দানৱেহি ৱা, অঞ্ঞত্ৰ দেৱেহি তদাৰহং হিদং [হিতং (স্যা.)].

২১৫. ‘‘ততো চতস্সো কনকত্তচূপমা, উট্ঠায নাৰিযো পমদাধিপা মুনিং;

আসা চ সদ্ধা চ সিৰী ততো হিৰী, ইচ্চব্ৰৱুং নাৰদদেৱ ব্ৰাহ্মণং.

২১৬. ‘‘সচে অনুদ্দিট্ঠং তযা মহামুনি, পুপ্ফং ইমং পাৰিছত্তস্স ব্ৰহ্মে;

দদাহি নো সব্বা গতি তে ইজ্ঝতু, তুৱম্পি নো হোহি যথেৱ ৱাসৱো.

২১৭. ‘‘তং যাচমানাভিসমেক্খ নাৰদো, ইচ্চব্ৰৱী সংকলহং উদীৰযি;

ন ময্হমত্থত্থি ইমেহি কোচি নং, যাযেৱ ৱো সেয্যসি সা পিড়ন্ধথ’’ [পিড়য্হথ (সী. পী.)].

২১৮. ‘‘ত্ৱং নোত্তমেৱাভিসমেক্খ নাৰদ, যস্সিচ্ছসি তস্সা অনুপ্পৱেচ্ছসু;

যস্সা হি নো নাৰদ ত্ৱং পদস্সসি, সাযেৱ নো হেহিতি সেট্ঠসম্মতা’’.

২১৯. ‘‘অকল্লমেতং ৱচনং সুগত্তে, কো ব্ৰাহ্মণো সংকলহং উদীৰযে;

গন্ত্ৱান ভূতাধিপমেৱ পুচ্ছথ, সচে ন জানাথ ইধুত্তমাধমং’’.

২২০. ‘‘তা নাৰদেন পৰমপ্পকোপিতা, উদীৰিতা ৱণ্ণমদেন মত্তা;

সকাসে [সকাসং (ক.)] গন্ত্ৱান সহস্সচক্খুনো, পুচ্ছিংসু ভূতাধিপং কা নু সেয্যসি’’.

২২১. ‘‘তা দিস্ৱা আযত্তমনা পুৰিন্দদো, ইচ্চব্ৰৱী দেৱৱৰো কতঞ্জলী;

সব্বাৱ ৱো হোথ সুগত্তে সাদিসী, কো নেৱ ভদ্দে কলহং উদীৰযি’’.

২২২. ‘‘যো সব্বলোকচ্চৰিতো [সব্বলোকং চৰকো (সী. স্যা. পী.)] মহামুনি, ধম্মে ঠিতো নাৰদো [নাৰদ (স্যা.)] সচ্চনিক্কমো;

সো নোব্ৰৱি [ব্ৰৱী (সী. স্যা. পী.)] গিৰিৱৰে গন্ধমাদনে, গন্ত্ৱান ভূতাধিপমেৱ পুচ্ছথ;

সচে ন জানাথ ইধুত্তমাধমং’’.

২২৩. ‘‘অসু [অসূ (স্যা.)] ব্ৰহাৰঞ্ঞচৰো মহামুনি, নাদত্ৱা ভত্তং ৱৰগত্তে ভুঞ্জতি;

ৱিচেয্য দানানি দদাতি কোসিযো, যস্সা হি সো দস্সতি সাৱ সেয্যসি’’.

২২৪. ‘‘অসূ হি যো সম্মতি দক্খিণং দিসং, গঙ্গায তীৰে হিমৱন্তপস্সনি [হিমৱন্তপস্মনি (সী. পী. ক.)];

স কোসিযো দুল্লভপানভোজনো, তস্স সুধং পাপয দেৱসাৰথি’’.

২২৫. ‘‘স [সো (স্যা.)] মাতলী দেৱৱৰেন পেসিতো, সহস্সযুত্তং অভিৰুয্হ সন্দনং;

সুখিপ্পমেৱ [স খিপ্পমেৱ (সী. পী.)] উপগম্ম অস্সমং, অদিস্সমানো মুনিনো সুধং অদা’’.

২২৬. ‘‘উদগ্গিহুত্তং উপতিট্ঠতো হি মে, পভঙ্কৰং লোকতমোনুদুত্তমং;

সব্বানি ভূতানি অধিচ্চ [অতিচ্চ (সী. পী.)] ৱাসৱো, কো নেৱ মে পাণিসু কিং সুধোদহি.

২২৭. ‘‘সঙ্খূপমং সেতমতুল্যদস্সনং, সুচিং সুগন্ধং পিযৰূপমব্ভুতং;

অদিট্ঠপুব্বং মম জাতু চক্খুভি [জাতচক্খুহি (সী. পী.)], কা দেৱতা পাণিসু কিং সুধোদহি’’.

২২৮. ‘‘অহং মহিন্দেন মহেসি পেসিতো, সুধাভিহাসিং তুৰিতো মহামুনি;

জানাসি মং মাতলি দেৱসাৰথি, ভুঞ্জস্সু ভত্তুত্তম মাভিৱাৰযি [মা ৱিচাৰযি (সী. পী.)].

২২৯. ‘‘ভুত্তা চ সা দ্ৱাদস হন্তি পাপকে, খুদং পিপাসং অৰতিং দৰক্লমং [দৰথং কিলং (স্যা.), দৰথক্খমং (ক.)];

কোধূপনাহঞ্চ ৱিৱাদপেসুণং, সীতুণ্হতন্দিঞ্চ ৰসুত্তমং ইদং’’.

২৩০. ‘‘ন কপ্পতী মাতলি ময্হ ভুঞ্জিতুং, পুব্বে অদত্ৱা ইতি মে ৱতুত্তমং;

ন চাপি একাস্নমৰীযপূজিতং [একাসনং অৰিযপূজিতং (সী. পী.)], অসংৱিভাগী চ সুখং ন ৱিন্দতি’’.

২৩১. ‘‘থীঘাতকা যে চিমে পাৰদাৰিকা, মিত্তদ্দুনো যে চ সপন্তি সুব্বতে;

সব্বে চ তে মচ্ছৰিপঞ্চমাধমা, তস্মা অদত্ৱা উদকম্পি নাস্নিযে [নাস্মিযে (সী. পী.)].

২৩২. ‘‘সো হিত্থিযা ৱা পুৰিসস্স ৱা পন, দস্সামি দানং ৱিদুসম্পৱণ্ণিতং;

সদ্ধা ৱদঞ্ঞূ ইধ ৱীতমচ্ছৰা, ভৱন্তি হেতে সুচিসচ্চসম্মতা’’ [সম্মসম্মতা (সী.)].

২৩৩. ‘‘অতো মতা [মুতা (সী. পী.)] দেৱৱৰেন পেসিতা, কঞ্ঞা চতস্সো কনকত্তচূপমা;

আসা চ সদ্ধা চ সিৰী ততো হিৰী [সিৰী হিৰী ততো (পী.)], তং অস্সমং আগমু [আগমুং (সী. পী. ক.)] যত্থ কোসিযো.

২৩৪. ‘‘তা দিস্ৱা সব্বো পৰমপ্পমোদিতো [সব্বা পৰমপ্পমোদিতা (স্যা.)], সুভেন ৱণ্ণেন সিখাৰিৱগ্গিনো;

কঞ্ঞা চতস্সো চতুৰো চতুদ্দিসা, ইচ্চব্ৰৱী মাতলিনো চ সম্মুখা.

২৩৫. ‘‘পুৰিমং দিসং কা ত্ৱং পভাসি দেৱতে, অলঙ্কতা তাৰৱৰাৱ ওসধী;

পুচ্ছামি তং কঞ্চনৱেল্লিৱিগ্গহে, আচিক্খ মে ত্ৱং কতমাসি দেৱতা.

২৩৬. ‘‘সিৰাহ দেৱীমনুজেভি [মনুজেসু (সী. স্যা. পী.)] পূজিতা, অপাপসত্তূপনিসেৱিনী সদা;

সুধাৱিৱাদেন তৱন্তিমাগতা, তং মং সুধায ৱৰপঞ্ঞ ভাজয.

২৩৭. ‘‘যস্সাহমিচ্ছামি সুধং [সুখং (পী.)] মহামুনি, সো [স (সী. পী.)] সব্বকামেহি নৰো পমোদতি;

সিৰীতি মং জানহি জূহতুত্তম, তং মং সুধায ৱৰপঞ্ঞ ভাজয’’.

২৩৮. ‘‘সিপ্পেন ৱিজ্জাচৰণেন বুদ্ধিযা, নৰা উপেতা পগুণা সকম্মুনা [সকম্মনা (সী. পী.)];

তযা ৱিহীনা ন লভন্তি কিঞ্চনং [কিঞ্চিনং (ক.)], তযিদং ন সাধু যদিদং তযা কতং.

২৩৯. ‘‘পস্সামি পোসং অলসং মহগ্ঘসং, সুদুক্কুলীনম্পি অৰূপিমং নৰং;

তযানুগুত্তো সিৰি জাতিমামপি [জাতিমং অপি (সী.)], পেসেতি দাসং ৱিয ভোগৱা সুখী.

২৪০. ‘‘তং তং অসচ্চং অৱিভজ্জসেৱিনিং, জানামি মূড়্হং ৱিদুৰানুপাতিনিং;

ন তাদিসী অৰহতি আসনূদকং, কুতো সুধা গচ্ছ ন ময্হ ৰুচ্চসি’’.

২৪১. ‘‘কা সুক্কদাঠা পটিমুক্ককুণ্ডলা, চিত্তঙ্গদা কম্বুৱিমট্ঠধাৰিনী;

ওসিত্তৱণ্ণং পৰিদয্হ সোভসি, কুসগ্গিৰত্তং অপিড়য্হ মঞ্জৰিং.

২৪২. ‘‘মিগীৱ ভন্তা সৰচাপধাৰিনা, ৱিৰাধিতা মন্দমিৱ উদিক্খসি;

কো তে দুতীযো ইধ মন্দলোচনে, ন ভাযসি একিকা কাননে ৱনে’’.

২৪৩. ‘‘ন মে দুতীযো ইধ মত্থি কোসিয, মসক্কসাৰপ্পভৱম্হি দেৱতা;

আসা সুধাসায তৱন্তিমাগতা, তং মং সুধায ৱৰপঞ্ঞ ভাজয’’.

২৪৪. ‘‘আসায যন্তি ৱাণিজা ধনেসিনো, নাৱং সমাৰুয্হ পৰেন্তি অণ্ণৱে;

তে তত্থ সীদন্তি অথোপি একদা, জীনাধনা এন্তি ৱিনট্ঠপাভতা.

২৪৫. ‘‘আসায খেত্তানি কসন্তি কস্সকা, ৱপন্তি বীজানি কৰোন্তুপাযসো;

ঈতীনিপাতেন অৱুট্ঠিতায [অৱুট্ঠিকায (সী. পী.)] ৱা, ন কিঞ্চি ৱিন্দন্তি ততো ফলাগমং.

২৪৬. ‘‘অথত্তকাৰানি কৰোন্তি ভত্তুসু, আসং পুৰক্খত্ৱা নৰা সুখেসিনো;

তে ভত্তুৰত্থা অতিগাড়্হিতা পুন, দিসা পনস্সন্তি অলদ্ধ কিঞ্চনং.

২৪৭. ‘‘হিত্ৱান [জহিত্ৱ (সী. স্যা. পী.)] ধঞ্ঞঞ্চ ধনঞ্চ ঞাতকে, আসায সগ্গাধিমনা সুখেসিনো;

তপন্তি লূখম্পি তপং চিৰন্তৰং, কুমগ্গমাৰুয্হ [কুম্মগ্গমাৰুয্হ (সী. স্যা. পী.)] পৰেন্তি দুগ্গতিং.

২৪৮. ‘‘আসা ৱিসংৱাদিকসম্মতা ইমে, আসে সুধাসং [সুধায (স্যা পী. ক.)] ৱিনযস্সু অত্তনি;

ন তাদিসী অৰহতি আসনূদকং, কুতো সুধা গচ্ছ ন ময্হ ৰুচ্চসি’’.

২৪৯. ‘‘দদ্দল্লমানা যসসা যসস্সিনী, জিঘঞ্ঞনামৱ্হযনং দিসং পতি;

পুচ্ছামি তং কঞ্চনৱেল্লিৱিগ্গহে, আচিক্খ মে ত্ৱং কতমাসি দেৱতা’’.

২৫০. ‘‘সদ্ধাহ দেৱীমনুজেহি [দেৱীমনুজেসু (সী. স্যা. পী.)] পূজিতা, অপাপসত্তূপনিসেৱিনী সদা;

সুধাৱিৱাদেন তৱন্তিমাগতা, তং মং সুধায ৱৰপঞ্ঞ ভাজয’’.

২৫১. ‘‘দানং দমং চাগমথোপি সংযমং, আদায সদ্ধায কৰোন্তি হেকদা;

থেয্যং মুসা কূটমথোপি পেসুণং, কৰোন্তি হেকে পুন ৱিচ্চুতা তযা.

২৫২. ‘‘ভৰিযাসু পোসো সদিসীসু পেক্খৱা [পেখৱা (পী.)], সীলূপপন্নাসু পতিব্বতাসুপি;

ৱিনেত্ৱান [ৱিনেত্ৱা (সী. স্যা. পী.)] ছন্দং কুলিত্থিযাসুপি [কুলধীতিযাসুপি (সী. পী.)], কৰোতি সদ্ধং পুন [পন (সী. পী.)] কুম্ভদাসিযা.

২৫৩. ‘‘ত্ৱমেৱ সদ্ধে পৰদাৰসেৱিনী, পাপং কৰোসি কুসলম্পি ৰিঞ্চসি;

ন তাদিসী অৰহতি আসনূদকং, কুতো সুধা গচ্ছ ন ময্হ ৰুচ্চসি’’.

২৫৪. ‘‘জিঘঞ্ঞৰত্তিং অৰুণস্মিমূহতে, যা দিস্সতি উত্তমৰূপৱণ্ণিনী;

তথূপমা মং পটিভাসি দেৱতে, আচিক্খ মে ত্ৱং কতমাসি অচ্ছৰা.

২৫৫. ‘‘কালা নিদাঘেৰিৱ অগ্গিজাৰিৱ [অগ্গজাতিৱ (সী.), অগ্গিজাতিৱ (পী.)], অনিলেৰিতা লোহিতপত্তমালিনী;

কা তিট্ঠসি মন্দমিগাৱলোকযং [মন্দমিৱাৱলোকযং (সী. পী.)], ভাসেসমানাৱ গিৰং ন মুঞ্চসি’’.

২৫৬. ‘‘হিৰাহ দেৱীমনুজেহি পূজিতা, অপাপসত্তূপনিসেৱিনী সদা;

সুধাৱিৱাদেন তৱন্তিমাগতা, সাহং ন সক্কোমি সুধম্পি যাচিতুং;

কোপীনৰূপা ৱিয যাচনিত্থিযা’’.

২৫৭. ‘‘ধম্মেন ঞাযেন সুগত্তে লচ্ছসি, এসো হি ধম্মো ন হি যাচনা সুধা;

তং তং অযাচন্তিমহং নিমন্তযে, সুধায যঞ্চিচ্ছসি তম্পি দম্মি তে.

২৫৮. ‘‘সা ত্ৱং মযা অজ্জ সকম্হি অস্সমে, নিমন্তিতা কঞ্চনৱেল্লিৱিগ্গহে;

তুৱঞ্হি মে সব্বৰসেহি পূজিযা, তং পূজযিত্ৱান সুধম্পি অস্নিযে’’.

২৫৯. ‘‘সা কোসিযেনানুমতা জুতীমতা, অদ্ধা হিৰি ৰম্মং পাৱিসি যস্সমং;

উদকৱন্তং [উদঞ্ঞৱন্তং (সী. পী.)] ফলমৰিযপূজিতং, অপাপসত্তূপনিসেৱিতং সদা.

২৬০. ‘‘ৰুক্খগ্গহানা বহুকেত্থ পুপ্ফিতা, অম্বা পিযালা পনসা চ কিংসুকা;

সোভঞ্জনা লোদ্দমথোপি পদ্মকা, কেকা চ ভঙ্গা তিলকা সুপুপ্ফিতা.

২৬১. ‘‘সালা কৰেৰী বহুকেত্থ জম্বুযো, অস্সত্থনিগ্ৰোধমধুকৱেতসা [ৱেদিসা (ক.)];

উদ্দালকা পাটলি সিন্দুৱাৰকা [সিন্দুৱাৰিতা (বহূসু)], মনুঞ্ঞগন্ধা মুচলিন্দকেতকা.

২৬২. ‘‘হৰেণুকা ৱেড়ুকা কেণু [ৱেণু (সী. পী.)] তিন্দুকা, সামাকনীৱাৰমথোপি চীনকা;

মোচা কদলী বহুকেত্থ সালিযো, পৱীহযো আভূজিনো চ [আভুজিনোপি (সী. স্যা.)] তণ্ডুলা.

২৬৩. ‘‘তস্সেৱুত্তৰপস্সেন [তস্স চ উত্তৰে পস্সে (সী. পী.), তস্স চ উত্তৰপস্সেন (স্যা.)], জাতা পোক্খৰণী সিৱা;

অকক্কসা অপব্ভাৰা, সাধু অপ্পটিগন্ধিকা.

২৬৪. ‘‘তত্থ মচ্ছা সন্নিৰতা, খেমিনো বহুভোজনা;

সিঙ্গূ সৱঙ্কা সংকুলা [সকুলা (সী. স্যা. পী.)], সতৱঙ্কা চ ৰোহিতা;

আড়িগগ্গৰকাকিণ্ণা, পাঠীনা কাকমচ্ছকা.