৮. কাসাৱৱগ্গো

২২১. কাসাৱজাতকং (২-৮-১)

১৪১. অনিক্কসাৱো কাসাৱং, যো ৱত্থং পৰিদহিস্সতি [পৰিদহেস্সতি (সী. পী.)];

অপেতো দমসচ্চেন, ন সো কাসাৱমৰহতি.

১৪২. যো চ ৱন্তকসাৱস্স, সীলেসু সুসমাহিতো;

উপেতো দমসচ্চেন, স ৱে কাসাৱমৰহতীতি.

কাসাৱজাতকং পঠমং.

২২২. চূড়নন্দিযজাতকং (২-৮-২)

১৪৩. ইদং তদাচৰিযৱচো, পাৰাসৰিযো যদব্ৰৱি [পোৰাণাচৰিযোব্ৰৱি (ক.)];

মাসু ত্ৱং অকৰি [অকৰা (সী. পী.)] পাপং, যং ত্ৱং পচ্ছা কতং তপে.

১৪৪. যানি কৰোতি পুৰিসো, তানি অত্তনি পস্সতি;

কল্যাণকাৰী কল্যাণং, পাপকাৰী চ পাপকং;

যাদিসং ৱপতে বীজং, তাদিসং হৰতে ফলন্তি.

চূড়নন্দিযজাতকং দুতিযং.

২২৩. পুটভত্তজাতকং (২-৮-৩)

১৪৫. নমে নমন্তস্স ভজে ভজন্তং, কিচ্চানুকুব্বস্স কৰেয্য কিচ্চং;

নানত্থকামস্স কৰেয্য অত্থং, অসম্ভজন্তম্পি ন সম্ভজেয্য.

১৪৬. চজে চজন্তং ৱনথং ন কযিৰা, অপেতচিত্তেন ন সম্ভজেয্য;

দিজো দুমং খীণফলন্তি ঞত্ৱা, অঞ্ঞং সমেক্খেয্য মহা হি লোকোতি.

পুটভত্তজাতকং ততিযং.

২২৪. কুম্ভিলজাতকং (২-৮-৪)

১৪৭. যস্সেতে চতুৰো ধম্মা, ৱানৰিন্দ যথা তৱ;

সচ্চং ধম্মো ধিতি চাগো, দিট্ঠং সো অতিৱত্ততি.

১৪৮. যস্স চেতে ন ৱিজ্জন্তি, গুণা পৰমভদ্দকা;

সচ্চং ধম্মো ধিতি চাগো, দিট্ঠং সো নাতিৱত্ততীতি.

কুম্ভিলজাতকং চতুত্থং.

২২৫. খন্তিৱণ্ণজাতকং (২-৮-৫)

১৪৯. অত্থি মে পুৰিসো দেৱ, সব্বকিচ্চেসু ব্যাৱটো [ৱাৱটো (ক.)];

তস্স চেকোপৰাধত্থি, তত্থ ত্ৱং কিন্তি মঞ্ঞসি.

১৫০. অম্হাকম্পত্থি পুৰিসো, এদিসো ইধ ৱিজ্জতি;

দুল্লভো অঙ্গসম্পন্নো, খন্তিৰস্মাক ৰুচ্চতীতি.

খন্তিৱণ্ণজাতকং পঞ্চমং.

২২৬. কোসিযজাতকং (২-৮-৬)

১৫১. কালে নিক্খমনা সাধু, নাকালে সাধু নিক্খমো;

অকালেন হি নিক্খম্ম, এককম্পি বহুজ্জনো;

ন কিঞ্চি অত্থং জোতেতি, ধঙ্কসেনাৱ কোসিযং.

১৫২. ধীৰো চ ৱিধিৱিধানঞ্ঞূ, পৰেসং ৱিৱৰানুগূ;

সব্বামিত্তে ৱসীকত্ৱা, কোসিযোৱ সুখী সিযাতি.

কোসিযজাতকং ছট্ঠং.

২২৭. গূথপাণজাতকং (২-৮-৭)

১৫৩. সূৰো সূৰেন সঙ্গম্ম, ৱিক্কন্তেন পহাৰিনা;

এহি নাগ নিৱত্তস্সু, কিং নু ভীতো পলাযসি;

পস্সন্তু অঙ্গমগধা, মম তুয্হঞ্চ ৱিক্কমং.

১৫৪. ন তং পাদা ৱধিস্সামি, ন দন্তেহি ন সোণ্ডিযা;

মীড়্হেন তং ৱধিস্সামি, পূতি হঞ্ঞতু পূতিনাতি.

গূথপাণজাতকং সত্তমং.

২২৮. কামনীতজাতকং (২-৮-৮)

১৫৫. তযো গিৰিং অন্তৰং কামযামি, পঞ্চালা কুৰুযো কেককে চ [কুৰযো কেকযে চ (সী.)];

ততুত্তৰিং [তদুত্তৰিং (ক.)] ব্ৰাহ্মণ কামযামি, তিকিচ্ছ মং ব্ৰাহ্মণ কামনীতং.

১৫৬. কণ্হাহিদট্ঠস্স কৰোন্তি হেকে, অমনুস্সপৱিট্ঠস্স [অমনুস্সৱদ্ধস্স (সী. পী.), অমনুস্সৱিট্ঠস্স (স্যা.)] কৰোন্তি পণ্ডিতা;

ন কামনীতস্স কৰোতি কোচি, ওক্কন্তসুক্কস্স হি কা তিকিচ্ছাতি.

কামনীতজাতকং অট্ঠমং.

২২৯. পলাযিতজাতকং (২-৮-৯)

১৫৭. গজগ্গমেঘেহি হযগ্গমালিভি, ৰথূমিজাতেহি সৰাভিৱস্সেভি [সৰাভিৱস্সভি (স্যা. সী. অট্ঠ.), সৰাভিৱস্সিভি (?)];

থৰুগ্গহাৱট্ট [ধনুগ্গহাৱট্ট (ক.)] দড়্হপ্পহাৰিভি, পৰিৱাৰিতা তক্কসিলা সমন্ততো.

১৫৮. [অভিধাৱথা চ পতথা চ, ৱিৱিধৱিনদিতা চ দন্তিভি; ৱত্ততজ্জ তুমুলো ঘোসো, যথা ৱিজ্জুতা জলধৰস্স গজ্জতোতি; (সী. পী. ক.)] অভিধাৱথ চূপধাৱথ চ [অভিধাৱথা চুপ্পতথা চ (স্যা.)], ৱিৱিধা ৱিনাদিতা [ৱিনাদিতত্থ (ক.)] ৱদন্তিভি;

ৱত্ততজ্জ তুমুলো ঘোসো যথা, ৱিজ্জুলতা জলধৰস্স গজ্জতোতি [অভিধাৱথা চ পতথা চ, ৱিৱিধৱিনদিতা চ দন্তিভি; ৱত্ততজ্জ তুমুলো ঘোসো, যথা ৱিজ্জুতা জলধৰস্স গজ্জতোতি; (সী. পী. ক.)].

পলাযিতজাতকং নৱমং.

২৩০. দুতিযপলাযিতজাতকং (২-৮-১০)

১৫৯. ধজমপৰিমিতং অনন্তপাৰং, দুপ্পসহংধঙ্কেহি সাগৰংৱ [সাগৰমিৱ (সী. স্যা. পী.)];

গিৰিমিৱঅনিলেন দুপ্পসয্হো [দুপ্পসহো (সী. পী. ক.)], দুপ্পসহো অহমজ্জতাদিসেন.

১৬০. মা বালিযং ৱিলপি [ৱিপ্পলপি (বহূসু)] ন হিস্স তাদিসং, ৱিডয্হসে [ৱিড়য্হসে (সী. পী.)] ন হি লভসে নিসেধকং;

আসজ্জসি গজমিৱ একচাৰিনং, যো তং পদা নড়মিৱ পোথযিস্সতীতি.

দুতিযপলাযিতজাতকং দসমং.

কাসাৱৱগ্গো অট্ঠমো.

তস্সুদ্দানং –

ৱৰৱত্থৱচো দুমখীণফলং, চতুৰোধম্মৱৰং পুৰিসুত্তম;

ধঙ্কমগধা চ তযোগিৰিনাম, গজগ্গৱৰো ধজৱৰেন দসাতি.