২. দুকনিপাতো

১. দড়্হৱগ্গো

১৫১. ৰাজোৱাদজাতকং (২-১-১)

১. দড়্হং দড়্হস্স খিপতি, বল্লিকো [মল্লিকো (সী. পী.)] মুদুনা মুদুং;

সাধুম্পি সাধুনা জেতি, অসাধুম্পি অসাধুনা;

এতাদিসো অযং ৰাজা, মগ্গা উয্যাহি সাৰথি.

২. অক্কোধেন জিনে কোধং, অসাধুং সাধুনা জিনে;

জিনে কদৰিযং দানেন, সচ্চেনালিকৱাদিনং;

এতাদিসো অযং ৰাজা, মগ্গা উয্যাহি সাৰথীতি.

ৰাজোৱাদজাতকং পঠমং.

১৫২. অসমেক্খিতকম্মন্তং, তুৰিতাভিনিপাতিনং.

সানি কম্মানি তপ্পেন্তি, উণ্হংৱজ্ঝোহিতং মুখে.

৪. সীহো চ সীহনাদেন, দদ্দৰং অভিনাদযি;

সুত্ৱা সীহস্স নিগ্ঘোসং, সিঙ্গালো [সিগালো (সী. স্যা. পী.)] দদ্দৰে ৱসং;

ভীতো সন্তাসমাপাদি, হদযঞ্চস্স অপ্ফলীতি.

সিঙ্গালজাতকং [সিগালজাতকং (সী. স্যা. পী.)] দুতিযং.

১৫৩. সূকৰজাতকং (২-১-৩)

৫. চতুপ্পদো অহং সম্ম, ত্ৱম্পি সম্ম চতুপ্পদো;

এহি সম্ম [সীহ (সী. পী.)] নিৱত্তস্সু, কিং নু ভীতো পলাযসি.

৬. অসুচি পূতিলোমোসি, দুগ্গন্ধো ৱাসি সূকৰ;

সচে যুজ্ঝিতুকামোসি, জযং সম্ম দদামি তেতি.

সূকৰজাতকং ততিযং.

১৫৪. উৰগজাতক (২-১-৪)

৭. ইধূৰগানং পৱৰো পৱিট্ঠো, সেলস্স ৱণ্ণেন পমোক্খমিচ্ছং;

ব্ৰহ্মঞ্চ ৱণ্ণং [ৱক্কং (ক.)] অপচাযমানো, বুভুক্খিতো নো ৱিতৰামি [ৱিসহামি (ক. সি. স্যা. পী.)] ভোত্তুং.

৮. সো ব্ৰহ্মগুত্তো চিৰমেৱ জীৱ, দিব্যা চ তে পাতুভৱন্তু ভক্খা;

যো ব্ৰহ্মৱণ্ণং অপচাযমানো, বুভুক্খিতো নো ৱিতৰাসি [সব্বত্থপি সমানং] ভোত্তুন্তি.

উৰগজাতকং চতুত্থং.

১৫৫. ভগ্গজাতকং (২-১-৫)

৯. জীৱ ৱস্সসতং ভগ্গ [গগ্গ (সী. পী.)], অপৰানি চ ৱীসতিং [ৱীসতি (স্যা. ক.)];

মা মং পিসাচা খাদন্তু, জীৱ ত্ৱং সৰদো সতং.

১০. ত্ৱম্পি ৱস্সসতং জীৱ, অপৰানি চ ৱীসতিং;

ৱিসং পিসাচা খাদন্তু, জীৱ ত্ৱং সৰদো সতন্তি.

ভগ্গজাতকং পঞ্চমং.

১৫৬. অলীনচিত্তজাতকং (২-১-৬)

১১. অলীনচিত্তং নিস্সায, পহট্ঠা মহতী চমূ;

কোসলং সেনাসন্তুট্ঠং, জীৱগ্গাহং অগাহযি.

১২. এৱং নিস্সযসম্পন্নো, ভিক্খু আৰদ্ধৱীৰিযো;

ভাৱযং কুসলং ধম্মং, যোগক্খেমস্স পত্তিযা;

পাপুণে অনুপুব্বেন, সব্বসংযোজনক্খযন্তি.

অলীনচিত্তজাতকং ছট্ঠং.

১৫৭. গুণজাতকং (২-১-৭)

১৩. যেন কামং পণামেতি, ধম্মো বলৱতং মিগী;

উন্নদন্তী ৱিজানাহি, জাতং সৰণতো ভযং.

১৪. অপি চেপি দুব্বলো মিত্তো, মিত্তধম্মেসু তিট্ঠতি;

সো ঞাতকো চ বন্ধু চ, সো মিত্তো সো চ মে সখা;

দাঠিনি মাতিমঞ্ঞিত্থো [মঞ্ঞিৱো (স্যা.), মঞ্ঞৱ্হো (ক.)], সিঙ্গালো মম পাণদোতি.

গুণজাতকং সত্তমং.

১৫৮. সুহনুজাতকং (২-১-৮)

১৫. নযিদং ৱিসমসীলেন, সোণেন সুহনূ সহ;

সুহনূপি তাদিসোযেৱ, যো সোণস্স সগোচৰো.

১৬. পক্খন্দিনা পগব্ভেন, নিচ্চং সন্দানখাদিনা;

সমেতি পাপং পাপেন, সমেতি অসতা অসন্তি.

সুহনুজাতকং অট্ঠমং.

১৫৯. মোৰজাতকং (২-১-৯)

১৭. উদেতযং চক্খুমা একৰাজা, হৰিস্সৱণ্ণো পথৱিপ্পভাসো [পঠৱিপ্পভাসো (সী. স্যা. পী.)];

তং তং নমস্সামি হৰিস্সৱণ্ণং পথৱিপ্পভাসং, তযাজ্জ গুত্তা ৱিহৰেমু দিৱসং.

যে ব্ৰাহ্মণা ৱেদগূ সব্বধম্মে, তে মে নমো তে চ মং পালযন্তু;

নমত্থু বুদ্ধানং [বুদ্ধান (?)] নমত্থু বোধিযা, নমো ৱিমুত্তানং [ৱিমুত্তান (?)] নমো ৱিমুত্তিযা;

ইমং সো পৰিত্তং কত্ৱা, মোৰো চৰতি এসনা.

১৮. অপেতযং চক্খুমা একৰাজা, হৰিস্সৱণ্ণো পথৱিপ্পভাসো;

তং তং নম্মস্সামি হৰিস্সৱণ্ণং পথৱিপ্পভাসং, তযাজ্জ গুত্তা ৱিহৰেমু ৰত্তিং.

যে ব্ৰাহ্মণা ৱেদগূ সব্বধম্মে, তে মে নমো তে চ মং পালযন্তু;

নমত্থু বুদ্ধানং নমত্থু বোধিযা, নমো ৱিমুত্তানং নমো ৱিমুত্তিযা;

ইমং সো পৰিত্তং কত্ৱা, মোৰো ৱাসমকপ্পযীতি.

মোৰজাতকং নৱমং.

১৬০. ৱিনীলজাতকং (২-১-১০)

১৯. এৱমেৱ নূন [নু (ক.)] ৰাজানং, ৱেদেহং মিথিলগ্গহং;

অস্সা ৱহন্তি আজঞ্ঞা, যথা হংসা ৱিনীলকং.

২০. ৱিনীল দুগ্গং ভজসি, অভূমিং তাত সেৱসি;

গামন্তকানি [গামন্তিকানি (সী.), গামন্তৰানি (ক.)] সেৱস্সু, এতং মাতালযং তৱাতি.

ৱিনীলজাতকং দসমং.

দড়্হৱগ্গো পঠমো.

তস্সুদ্দানং –

ৱৰবল্লিক দদ্দৰ সূকৰকো, উৰগূত্তম পঞ্চমভগ্গৱৰো;

মহতীচমু যাৱ সিঙ্গালৱৰো, সুহনুত্তম মোৰ ৱিনীলং দসাতি.

২. সন্থৱৱগ্গো

১৬১. ইন্দসমানগোত্তজাতকং (২-২-১)

২১. ন সন্থৱং [সন্ধৱং (ক.)] কাপুৰিসেন কযিৰা, অৰিযো অনৰিযেন পজানমত্থং;

চিৰানুৱুত্থোপি কৰোতি পাপং, গজো যথা ইন্দসমানগোত্তং.

২২. যং ত্ৱেৱ জঞ্ঞা সদিসো মমন্তি, সীলেন পঞ্ঞায সুতেন চাপি;

তেনেৱ মেত্তিং কযিৰাথ সদ্ধিং, সুখো হৱে সপ্পুৰিসেন সঙ্গমোতি.

ইন্দসমানগোত্তজাতকং পঠমং.

১৬২. সন্থৱজাতকং (২-২-২)

২৩. ন সন্থৱস্মা পৰমত্থি পাপিযো, যো সন্থৱো [সন্ধৱো (ক.)] কাপুৰিসেন হোতি;

সন্তপ্পিতো সপ্পিনা পাযসেন [পাযাসেন (ক.)], কিচ্ছাকতং পণ্ণকুটিং অদয্হি [অদড্ঢহি (সী. স্যা.), অদট্ঠহি (পী.), অদদ্দহি (?)].

২৪. ন সন্থৱস্মা পৰমত্থি সেয্যো, যো সন্থৱো সপ্পুৰিসেন হোতি;

সীহস্স ব্যগ্ঘস্স চ দীপিনো চ, সামা মুখং লেহতি সন্থৱেনাতি.

সন্থৱজাতকং দুতিযং.

১৬৩. সুসীমজাতকং (২-২-৩)

২৫. কাড়া মিগা সেতদন্তা তৱীমে [তৱ ইমে (সী. স্যা. পী.)], পৰোসতং হেমজালাভিছন্না [হেমজালাভিসঞ্ছন্না (সী.)];

তে তে দদামীতি সুসীম ব্ৰূসি, অনুস্সৰং পেত্তিপিতামহানং.

২৬. কাড়া মিগা সেতদন্তা মমীমে [মম ইমে (সী. পী.)], পৰোসতং হেমজালাভিচ্ছন্না;

তে তে দদামীতি ৱদামি মাণৱ, অনুস্সৰং পেত্তিপিতামহানন্তি.

সুসীমজাতকং ততিযং.

১৬৪. গিজ্ঝজাতকং (২-২-৪)

২৭. যং নু গিজ্ঝো যোজনসতং, কুণপানি অৱেক্খতি;

কস্মা জালঞ্চ পাসঞ্চ, আসজ্জাপি ন বুজ্ঝসি.

২৮. যদা পৰাভৱো হোতি, পোসো জীৱিতসঙ্খযে;

অথ জালঞ্চ পাসঞ্চ, আসজ্জাপি ন বুজ্ঝতীতি.

গিজ্ঝজাতকং চতুত্থং.

১৬৫. নকুলজাতকং (২-২-৫)

২৯. সন্ধিং কত্ৱা অমিত্তেন, অণ্ডজেন জলাবুজ;

ৱিৱৰিয দাঠং সেসি [সযসি (সী. স্যা. পী.)], কুতো তে ভযমাগতং.

৩০. সঙ্কেথেৱ [সঙ্কতেৱ (ক.)] অমিত্তস্মিং, মিত্তস্মিম্পি ন ৱিস্সসে;

অভযা ভযমুপ্পন্নং, অপি মূলানি কন্ততীতি [মূলং নিকন্ততীতি (সী.)].

নকুলজাতকং পঞ্চমং.

১৬৬. উপসাড়কজাতকং (২-২-৬)

৩১. উপসাড়কনামানি [উপসাড়্হকনামানং (সী. স্যা. পী.)], সহস্সানি চতুদ্দস;

অস্মিং পদেসে দড্ঢানি, নত্থি লোকে অনামতং.

৩২. যম্হি সচ্চঞ্চ ধম্মো চ, অহিংসা সংযমো দমো;

এতং অৰিযা সেৱন্তি, এতং লোকে অনামতন্তি.

উপসাড়কজাতকং ছট্ঠং.

১৬৭. সমিদ্ধিজাতকং (২-২-৭)

৩৩. অভুত্ৱা ভিক্খসি ভিক্খু, ন হি ভুত্ৱান ভিক্খসি;

ভুত্ৱান ভিক্খু ভিক্খস্সু, মা তং কালো উপচ্চগা.

৩৪. কালং ৱোহং ন জানামি, ছন্নো কালো ন দিস্সতি;

তস্মা অভুত্ৱা ভিক্খামি, মা মং কালো উপচ্চগাতি.

সমিদ্ধিজাতকং সত্তমং.

১৬৮. সকুণগ্ঘিজাতকং (২-২-৮)

৩৫. সেনো বলসা পতমানো, লাপং গোচৰঠাযিনং;

সহসা অজ্ঝপ্পত্তোৱ, মৰণং তেনুপাগমি.

৩৬. সোহং নযেন সম্পন্নো, পেত্তিকে গোচৰে ৰতো;

অপেতসত্তু মোদামি, সম্পস্সং অত্থমত্তনোতি.

সকুণগ্ঘিজাতকং অট্ঠমং.

১৬৯. অৰকজাতকং (২-২-৯)

৩৭. যো ৱে মেত্তেন চিত্তেন, সব্বলোকানুকম্পতি;

উদ্ধং অধো চ তিৰিযং, অপ্পমাণেন সব্বসো.

৩৮. অপ্পমাণং হিতং চিত্তং, পৰিপুণ্ণং সুভাৱিতং;

যং পমাণকতং কম্মং, ন তং তত্ৰাৱসিস্সতীতি.

অৰকজাতকং নৱমং.

১৭০. ককণ্টকজাতকং (২-২-১০)

৩৯. নাযং পুৰে উণ্ণমতি [উন্নমতি (স্যা.)], তোৰণগ্গে ককণ্টকো;

মহোসধ ৱিজানাহি, কেন থদ্ধো ককণ্টকো.

৪০. অলদ্ধপুব্বং লদ্ধান, অড্ঢমাসং ককণ্টকো;

অতিমঞ্ঞতি ৰাজানং, ৱেদেহং মিথিলগ্গহন্তি.

ককণ্টকজাতকং দসমং.

সন্থৱৱগ্গো দুতিযো.

তস্সুদ্দানং –

অথ ইন্দসমান সপণ্ণকুটি, সুসিমুত্তম গিজ্ঝ জলাবুজকো;

উপসাড়ক ভিক্খু সলাপৱৰো, অথ মেত্তৱৰো দসপুণ্ণমতীতি.

৩. কল্যাণৱগ্গো

১৭১. কল্যাণধম্মজাতকং (২-৩-১)

৪১. কল্যাণধম্মোতি যদা জনিন্দ, লোকে সমঞ্ঞং অনুপাপুণাতি;

তস্মা ন হিয্যেথ [হীযেথ (সী.)] নৰো সপঞ্ঞো, হিৰিযাপি সন্তো ধুৰমাদিযন্তি.

৪২. সাযং সমঞ্ঞা ইধ মজ্জ পত্তা, কল্যাণধম্মোতি জনিন্দ লোকে;

তাহং সমেক্খং ইধ পব্বজিস্সং, ন হি মত্থি ছন্দো ইধ কামভোগেতি.

কল্যাণধম্মজাতকং পঠমং.

১৭২. দদ্দৰজাতকং (২-৩-২)

৪৩. কো নু সদ্দেন মহতা, অভিনাদেতি দদ্দৰং;