৯. উপাহনৱগ্গো

২৩১. উপাহনজাতকং (২-৯-১)

১৬১. যথাপি কীতা পুৰিসস্সুপাহনা, সুখস্স অত্থায দুখং উদব্বহে;

ঘম্মাভিতত্তা থলসা পপীড়িতা, তস্সেৱ পাদে পুৰিসস্স খাদৰে.

১৬২. এৱমেৱ যো দুক্কুলীনো অনৰিযো, তম্মাক [তম্হাক (সী.), তুম্হাক (স্যা. পী.)] ৱিজ্জঞ্চ সুতঞ্চ আদিয;

তমেৱ সো তত্থ সুতেন খাদতি, অনৰিযো ৱুচ্চতি দুপাহনূপমোতি [পানদূপমোতি (সী. পী.)].

উপাহনজাতকং পঠমং.

২৩২. ৱীণাগুণজাতকং (২-৯-২)

১৬৩. একচিন্তিতো যমত্থো, বালো অপৰিণাযকো;

ন হি খুজ্জেন ৱামেন, ভোতি সঙ্গন্তুমৰহসি.

১৬৪. পুৰিসূসভং মঞ্ঞমানা, অহং খুজ্জমকামযিং;

সোযং সংকুটিতো সেতি, ছিন্নতন্তি যথা ৱিণাতি [থুণাতি (সী.)].

ৱীণাগুণজাতকং দুতিযং.

২৩৩. ৱিকণ্ণজাতকং (২-৯-৩)

১৬৫. কামং যহিং ইচ্ছসি তেন গচ্ছ, ৱিদ্ধোসি মম্মম্হি [মমস্মি (ক.)] ৱিকণ্ণকেন;

হতোসি ভত্তেন সুৱাদিতেন [সৱাদিতেন (সী. স্যা. পী.)], লোলো চ মচ্ছে অনুবন্ধমানো.

১৬৬. এৱম্পি লোকামিসং ওপতন্তো, ৱিহঞ্ঞতী চিত্তৱসানুৱত্তী;

সো হঞ্ঞতি ঞাতিসখান মজ্ঝে, মচ্ছানুগো সোৰিৱ সুংসুমাৰোতি [সুসুমাৰো (ক.)].

ৱিকণ্ণজাতকং ততিযং.

২৩৪. অসিতাভূজাতকং (২-৯-৪)

১৬৭. ত্ৱমেৱ দানিমকৰ [মকৰি (স্যা.), মকৰা (ক. সী.)], যং কামো ব্যগমা তযি;

সোযং অপ্পটিসন্ধিকো, খৰছিন্নংৱ ৰেনুকং [ৰেৰুকং (সী. পী.)].

১৬৮. অত্ৰিচ্ছং [অত্ৰিচ্ছা (সী. স্যা. পী.)] অতিলোভেন, অতিলোভমদেন চ;

এৱং হাযতি অত্থম্হা, অহংৱ অসিতাভুযাতি.

অসিতাভূজাতকং চতুত্থং.

২৩৫. ৱচ্ছনখজাতকং (২-৯-৫)

১৬৯. সুখা ঘৰা ৱচ্ছনখ, সহিৰঞ্ঞা সভোজনা;

যত্থ ভুত্ৱা পিৱিত্ৱা চ, সযেয্যাথ অনুস্সুকো.

১৭০. ঘৰা নানীহমানস্স, ঘৰা নাভণতো মুসা;

ঘৰা নাদিন্নদণ্ডস্স, পৰেসং অনিকুব্বতো [অনিক্ৰুব্বতো (ক.)];

এৱং ছিদ্দং দুৰভিসম্ভৱং [দুৰভিভৱং (সী. পী.)], কো ঘৰং পটিপজ্জতীতি.

ৱচ্ছনখজাতকং পঞ্চমং.

২৩৬. বকজাতকং (২-৯-৬)

১৭১. ভদ্দকো ৱতযং পক্খী, দিজো কুমুদসন্নিভো;

ৱূপসন্তেহি পক্খেহি, মন্দমন্দোৱ ঝাযতি.

১৭২. নাস্স সীলং ৱিজানাথ, অনঞ্ঞায পসংসথ;

অম্হে দিজো ন পালেতি, তেন পক্খী ন ফন্দতীতি.

বকজাতকং ছট্ঠং.

২৩৭. সাকেতজাতকং (২-৯-৭)

১৭৩. কো নু খো ভগৱা হেতু, একচ্চে ইধ পুগ্গলে;

অতীৱ হদযং নিব্বাতি, চিত্তঞ্চাপি পসীদতি.

১৭৪. পুব্বেৱ সন্নিৱাসেন, পচ্চুপ্পন্নহিতেন ৱা;

এৱং তং জাযতে পেমং, উপ্পলংৱ যথোদকেতি.

সাকেতজাতকং সত্তমং.

২৩৮. একপদজাতকং (২-৯-৮)

১৭৫. ইঙ্ঘ একপদং তাত, অনেকত্থপদস্সিতং [পদনিস্সিতং (সী. পী.)];

কিঞ্চি সঙ্গাহিকং ব্ৰূসি, যেনত্থে সাধযেমসে.

১৭৬. দক্খেয্যেকপদং তাত, অনেকত্থপদস্সিতং;

তঞ্চ সীলেন সঞ্ঞুত্তং, খন্তিযা উপপাদিতং;

অলং মিত্তে সুখাপেতুং, অমিত্তানং দুখায চাতি.

একপদজাতকং অট্ঠমং.

২৩৯. হৰিতমণ্ডূকজাতকং (২-৯-৯)

১৭৭. আসীৱিসম্পি মং [আসীৱিসং মমং (সী. পী.)] সন্তং, পৱিট্ঠং কুমিনামুখং;

ৰুচ্চতে হৰিতামাতা, যং মং খাদন্তি মচ্ছকা.

১৭৮. ৱিলুম্পতেৱ পুৰিসো, যাৱস্স উপকপ্পতি;

যদা চঞ্ঞে ৱিলুম্পন্তি, সো ৱিলুত্তো ৱিলুম্পতীতি [ৱিলুপ্পতীতি (?)].

হৰিতমণ্ডূকজাতকং নৱমং.

২৪০. মহাপিঙ্গলজাতকং (২-৯-১০)

১৭৯. সব্বো জনো হিংসিতো পিঙ্গলেন, তস্মিং মতে পচ্চযা [পচ্চযং (সী. স্যা. পী.)] ৱেদযন্তি;

পিযো নু তে আসি অকণ্হনেত্তো, কস্মা নু ত্ৱং ৰোদসি দ্ৱাৰপাল.

১৮০. ন মে পিযো আসি অকণ্হনেত্তো, ভাযামি পচ্চাগমনায তস্স;

ইতো গতো হিংসেয্য মচ্চুৰাজং, সো হিংসিতো আনেয্য পুন ইধ.

১৮১. দড্ঢো ৱাহসহস্সেহি, সিত্তো ঘটসতেহি সো;

পৰিক্খতা চ সা ভূমি, মা ভাযি নাগমিস্সতীতি.

মহাপিঙ্গলজাতকং দসমং.

উপাহনৱগ্গো নৱমো.

তস্সুদ্দানং –

ৱৰুপাহন খুজ্জ ৱিকণ্ণককো, অসিতাভুয পঞ্চমৱচ্ছনখো;

দিজ পেমৱৰুত্তমএকপদং, কুমিনামুখ পিঙ্গলকেন দসাতি.