৭. বীৰণথম্ভৱগ্গো

২১১. সোমদত্তজাতকং (২-৭-১)

১২১. অকাসি যোগ্গং ধুৱমপ্পমত্তো, সংৱচ্ছৰং বীৰণথম্ভকস্মিং;

ব্যাকাসি সঞ্ঞং পৰিসং ৱিগয্হ, ন নিয্যমো তাযতি অপ্পপঞ্ঞং.

১২২. দ্ৱযং যাচনকো তাত, সোমদত্ত নিগচ্ছতি;

অলাভং ধনলাভং ৱা, এৱং ধম্মা হি যাচনাতি.

সোমদত্তজাতকং পঠমং.

২১২. উচ্ছিট্ঠভত্তজাতকং (২-৭-২)

১২৩. অঞ্ঞো উপৰিমো ৱণ্ণো, অঞ্ঞো ৱণ্ণো চ হেট্ঠিমো;

ব্ৰাহ্মণী ত্ৱেৱ পুচ্ছামি, কিং হেট্ঠা কিঞ্চ উপ্পৰি.

১২৪. অহং নটোস্মি ভদ্দন্তে, ভিক্খকোস্মি ইধাগতো;

অযঞ্হি কোট্ঠমোতিণ্ণো, অযং সো যং [ত্ৱং (ক.)] গৱেসসীতি.

উচ্ছিট্ঠভত্তজাতকং দুতিযং.

২১৩. ভৰুজাতকং (২-৭-৩)

১২৫. ইসীনমন্তৰং কত্ৱা, ভৰুৰাজাতি [কুৰুৰাজাতি (ক.)] মে সুতং;

উচ্ছিন্নো সহ ৰট্ঠেহি [ৰট্ঠেন (সী. পী.)], সৰাজা ৱিভৱঙ্গতো.

১২৬. তস্মা হি ছন্দাগমনং, নপ্পসংসন্তি পণ্ডিতা;

অদুট্ঠচিত্তো ভাসেয্য, গিৰং সচ্চুপসংহিতন্তি.

ভৰুজাতকং [কুৰুৰাতকং (ক.)] ততিযং.

২১৪. পুণ্ণনদীজাতকং (২-৭-৪)

১২৭. পুণ্ণং নদিং যেন চ পেয্যমাহু, জাতং যৱং যেন চ গুয্হমাহু;

দূৰং গতং যেন চ অৱ্হযন্তি, সো ত্যাগতো [ত্যাভতো (স্যা. ক.) পহেড়িগাথাভাৱো মনসি কাতব্বো] হন্দ চ ভুঞ্জ ব্ৰাহ্মণ.

১২৮. যতো মং সৰতী ৰাজা, ৱাযসম্পি পহেতৱে;

হংসা কোঞ্চা মযূৰা চ [হংসকোঞ্চমযূৰানং (ক. অট্ঠ. পাঠন্তৰং)], অসতীযেৱ পাপিযাতি.

পুণ্ণনদীজাতকং চতুত্থং.

২১৫. কচ্ছপজাতকং (২-৭-৫)

১২৯. অৱধী ৱত অত্তানং, কচ্ছপো ব্যাহৰং গিৰং [কচ্ছপোৱ পব্যাহৰং (স্যা.), কচ্ছপো সো পব্যাহৰং (ক.)];

সুগ্গহীতস্মিং কট্ঠস্মিং, ৱাচায সকিযাৱধি.

১৩০. এতম্পি দিস্ৱা নৰৱীৰিযসেট্ঠ, ৱাচং পমুঞ্চে কুসলং নাতিৱেলং;

পস্সসি বহুভাণেন, কচ্ছপং ব্যসনং গতন্তি.

কচ্ছপজাতকং পঞ্চমং.

২১৬. মচ্ছজাতকং (২-৭-৬)

১৩১. ন মাযমগ্গি তপতি, ন সূলো সাধুতচ্ছিতো;

যঞ্চ মং মঞ্ঞতে মচ্ছী, অঞ্ঞং সো ৰতিযা গতো.

১৩২. সো মং দহতি ৰাগগ্গি, চিত্তং চূপতপেতি মং;

জালিনো মুঞ্চথাযিৰা মং, ন কামে হঞ্ঞতে ক্ৱচীতি.

মচ্ছজাতকং ছট্ঠং.

২১৭. সেগ্গুজাতকং (২-৭-৭)

১৩৩. সব্বো লোকো অত্তমনো অহোসি, অকোৱিদা গামধম্মস্স সেগ্গু;

কোমাৰি কো নাম [কোমাৰিকা নাম (ক.), কোমাৰিকো নাম (স্যা. পী.)] তৱজ্জ ধম্মো, যং ত্ৱং গহিতা পৱনে পৰোদসি.

১৩৪. যো দুক্খফুট্ঠায ভৱেয্য তাণং, সো মে পিতা দুব্ভি ৱনে কৰোতি;

সা কস্স কন্দামি ৱনস্স মজ্ঝে, যো তাযিতা সো সহসং কৰোতীতি.

সেগ্গুজাতকং সত্তমং.

২১৮. কূটৱাণিজজাতকং (২-৭-৮)

১৩৫. সঠস্স সাঠেয্যমিদং সুচিন্তিতং, পচ্চোড্ডিতং পটিকূটস্স কূটং;

ফালঞ্চে খাদেয্যুং [অদেয্যুং (সী. পী.)] মূসিকা, কস্মা কুমাৰং কুললা ন [নো (সী. স্যা. পী.)] হৰেয্যুং.

১৩৬. কূটস্স হি সন্তি [সন্তীধ (ক.)] কূটকূটা, ভৱতি [ভৱন্তি (ক.)] চাপি নিকতিনো নিকত্যা;

দেহি পুত্তনট্ঠ ফালনট্ঠস্স ফালং, মা তে পুত্তমহাসি ফালনট্ঠোতি.

কূটৱাণিজজাতকং অট্ঠমং.

২১৯. গৰহিতজাতকং (২-৭-৯)

১৩৭. হিৰঞ্ঞং মে সুৱণ্ণং মে, এসা ৰত্তিং দিৱা কথা;

দুম্মেধানং মনুস্সানং, অৰিযধম্মং অপস্সতং.

১৩৮. দ্ৱে দ্ৱে গহপতযো গেহে, একো তত্থ অমস্সুকো;

লম্বত্থনো ৱেণিকতো, অথো অঙ্কিতকণ্ণকো;

কীতো ধনেন বহুনা, সো তং ৱিতুদতে জনন্তি.

গৰহিতজাতকং নৱমং.

২২০. ধম্মধজজাতকং (২-৭-১০)

১৩৯. সুখং জীৱিতৰূপোসি, ৰট্ঠা ৱিৱনমাগতো;

সো এককো ৰুক্খমূলে [অৰঞ্ঞস্মিং (সী. স্যা. পী.)], কপণো ৱিয ঝাযসি.

১৪০. সুখং জীৱিতৰূপোস্মি, ৰট্ঠা ৱিৱনমাগতো;

সো এককো ৰুক্খমূলে, কপণো ৱিয ঝাযামি;

সতং ধম্মং অনুস্সৰংতি.

ধম্মধজজাতকং দসমং.

বীৰণথম্ভৱগ্গো সত্তমো.

তস্সুদ্দানং –

অথ বীৰণথম্ভৱৰো চ নটো, ভৰুৰাজৱৰুত্তমপুণ্ণনদী;

বহুভাণি অগ্গিপৱনে মূসিকা, সহলম্বত্থনো কপণেন দসাতি.