৪. অসদিসৱগ্গো

১৮১. অসদিসজাতকং (২-৪-১)

৬১. ধনুগ্গহো অসদিসো, ৰাজপুত্তো মহব্বলো;

দূৰেপাতী অক্খণৱেধী, মহাকাযপ্পদালনো.

৬২. সব্বামিত্তে ৰণং কত্ৱা, ন চ কঞ্চি ৱিহেঠযি;

ভাতৰং সোত্থিং কত্ৱান, সংযমং অজ্ঝুপাগমীতি.

অসদিসজাতকং পঠমং.

১৮২. সঙ্গামাৱচৰজাতকং (২-৪-২)

৬৩. সঙ্গামাৱচৰো সূৰো, বলৱা ইতি ৱিস্সুতো;

কিং নু তোৰণমাসজ্জ, পটিক্কমসি কুঞ্জৰ.

৬৪. ওমদ্দ খিপ্পং পলিঘং, এসিকানি চ অব্বহ [উব্বহ (স্যা.), অব্ভুহ (ক.)];

তোৰণানি চ মদ্দিত্ৱা, খিপ্পং পৱিস কুঞ্জৰাতি.

সঙ্গামাৱচৰজাতকং দুতিযং.

১৮৩. ৱালোদকজাতকং (২-৪-৩)

৬৫. ৱালোদকং অপ্পৰসং নিহীনং, পিত্ৱা [পীত্ৱা (সী. পী.)] মদো জাযতি গদ্ৰভানং;

ইমঞ্চ পিত্ৱান ৰসং পণীতং, মদো ন সঞ্জাযতি সিন্ধৱানং.

৬৬. অপ্পং পিৱিত্ৱান নিহীনজচ্চো, সো মজ্জতী তেন জনিন্দ পুট্ঠো [ফুট্ঠো (সী. স্যা.), মুট্ঠো (ক.)];

ধোৰয্হসীলী চ কুলম্হি জাতো, ন মজ্জতী অগ্গৰসং পিৱিত্ৱাতি.

ৱালোদকজাতকং ততিযং.

১৮৪. গিৰিদত্তজাতকং (২-৪-৪)

৬৭. দূসিতো গিৰিদত্তেন [গিৰিদন্তেন (পী.)], হযো সামস্স পণ্ডৱো;

পোৰাণং পকতিং হিত্ৱা, তস্সেৱানুৱিধিয্যতি [নুৱিধীযতি (সী. পী.)].

৬৮. সচে চ তনুজো পোসো, সিখৰাকাৰ [সিঙ্গাৰাকাৰ (স্যা.)] কপ্পিতো;

আননে নং [তং (সী. স্যা. পী.)] গহেত্ৱান, মণ্ডলে পৰিৱত্তযে;

খিপ্পমেৱ পহন্ত্ৱান, তস্সেৱানুৱিধিয্যতীতি.

গিৰিদত্তজাতকং চতুত্থং.

১৮৫. অনভিৰতিজাতকং (২-৪-৫)

৬৯. যথোদকে আৱিলে অপ্পসন্নে, ন পস্সতি সিপ্পিকসম্বুকঞ্চ;

সক্খৰং ৱালুকং মচ্ছগুম্বং, এৱং আৱিলম্হি [আৱিলে হি (সী.)] চিত্তে;

ন পস্সতি অত্তদত্থং পৰত্থং.

৭০. যথোদকে অচ্ছে ৱিপ্পসন্নে, সো পস্সতি সিপ্পিকসম্বুকঞ্চ;

সক্খৰং ৱালুকং মচ্ছগুম্বং, এৱং অনাৱিলম্হি চিত্তে;

সো পস্সতি অত্তদত্থং পৰত্থন্তি.

অনভিৰতিজাতকং পঞ্চমং.

১৮৬. দধিৱাহনজাতকং (২-৪-৬)

৭১. ৱণ্ণগন্ধৰসূপেতো, অম্বোযং অহুৱা পুৰে;

তমেৱ পূজং লভমানো, কেনম্বো কটুকপ্ফলো.

৭২. পুচিমন্দপৰিৱাৰো, অম্বো তে দধিৱাহন;

মূলং মূলেন সংসট্ঠং, সাখা সাখা [সাখং (স্যা. ক.)] নিসেৱৰে [নিৱীসৰে (ক.)];

অসাতসন্নিৱাসেন, তেনম্বো কটুকপ্ফলোতি.

দধিৱাহনজাতকং ছট্ঠং.

১৮৭. চতুমট্ঠজাতকং (২-৪-৭)

৭৩. উচ্চে ৱিটভিমাৰুয্হ, মন্তযৱ্হো ৰহোগতা;

নীচে ওৰুয্হ মন্তৱ্হো, মিগৰাজাপি সোস্সতি.

৭৪. যং সুৱণ্ণো সুৱণ্ণেন [যং সুপণ্ণো সুপণ্ণেন (সী. স্যা. পী.)], দেৱো দেৱেন মন্তযে;

কিং তেত্থ চতুমট্ঠস্স, বিলং পৱিস জম্বুকাতি.

চতুমট্ঠজাতকং সত্তমং.

১৮৮. সীহকোত্থুজাতকং (২-৪-৮)

৭৫. সীহঙ্গুলী সীহনখো, সীহপাদপতিট্ঠিতো;

সো সীহো সীহসঙ্ঘম্হি, একো নদতি অঞ্ঞথা.

৭৬. মা ত্ৱং নদি ৰাজপুত্ত, অপ্পসদ্দো ৱনে ৱস;

সৰেন খো [মা (ক.)] তং জানেয্যুং, ন হি তে পেত্তিকো সৰোতি.

সীহকোত্থুজাতকং অট্ঠমং.

১৮৯. সীহচম্মজাতকং (২-৪-৯)

৭৭. নেতং সীহস্স নদিতং, ন ব্যগ্ঘস্স ন [ব্যগ্ঘস্স ন চ (ক.)] দীপিনো;

পাৰুতো সীহচম্মেন, জম্মো নদতি গদ্ৰভো.

৭৮. চিৰম্পি খো তং খাদেয্য, গদ্ৰভো হৰিতং যৱং;

পাৰুতো সীহচম্মেন, ৰৱমানোৱ দূসযীতি.

সীহচম্মজাতকং নৱমং.

১৯০. সীলানিসংসজাতকং (২-৪-১০)

৭৯. পস্স সদ্ধায সীলস্স, চাগস্স চ অযং ফলং;

নাগো নাৱায ৱণ্ণেন, সদ্ধং ৱহতুপাসকং.

৮০. সব্ভিৰেৱ সমাসেথ, সব্ভি কুব্বেথ সন্থৱং;

সতঞ্হি সন্নিৱাসেন, সোত্থিং গচ্ছতি ন্হাপিতোতি.

সীলানিসংসজাতকং দসমং.

অসদিসৱগ্গো চতুত্থো.

তস্সুদ্দানং –

ধনুগ্গহ কুঞ্জৰ অপ্পৰসো, গিৰিদত্তমনাৱিলচিত্তৱৰং;

দধিৱাহন জম্বূক সীহনখো, হৰিতযৱ নাগৱৰেন দসাতি.