৫. ৰুহকৱগ্গো

১৯১. ৰুহকজাতকং (২-৫-১)

৮১. অপি [অম্ভো (স্যা. ক. সী.)] ৰুহক ছিন্নাপি, জিযা সন্ধীযতে পুন;

সন্ধীযস্সু পুৰাণিযা, মা কোধস্স ৱসং গমি.

৮২. ৱিজ্জমানেসু ৱাকেসু [ৱিজ্জমানাসু মৰুৱাসু (সী.), ৱিজ্জমানাসু মৰূদ্ৱাসু (পী.)], ৱিজ্জমানেসু কাৰিসু;

অঞ্ঞং জিযং কৰিস্সামি, অলঞ্ঞেৱ পুৰাণিযাতি.

ৰুহকজাতকং পঠমং.

১৯২. সিৰিকাড়কণ্ণিজাতকং (২-৫-২)

৮৩. ইত্থী সিযা ৰূপৱতী, সা চ সীলৱতী সিযা;

পুৰিসো তং ন ইচ্ছেয্য, সদ্দহাসি মহোসধ.

৮৪. সদ্দহামি মহাৰাজ, পুৰিসো দুব্ভগো সিযা;

সিৰী চ কাড়কণ্ণী চ, ন সমেন্তি কুদাচনন্তি.

সিৰিকাড়কণ্ণিজাতকং দুতিযং.

১৯৩. চূড়পদুমজাতকং (২-৫-৩)

৮৫. অযমেৱ সা অহমপি [অহম্পি (সী. স্যা. পী.), অহস্মি (ক.)] সো অনঞ্ঞো, অযমেৱ সো হত্থচ্ছিন্নো অনঞ্ঞো;

যমাহ ‘‘কোমাৰপতী মম’’ন্তি, ৱজ্ঝিত্থিযো নত্থি ইত্থীসু সচ্চং.

৮৬. ইমঞ্চ জম্মং মুসলেন হন্ত্ৱা, লুদ্দং ছৱং পৰদাৰূপসেৱিং;

ইমিস্সা চ নং পাপপতিব্বতায, জীৱন্তিযা ছিন্দথ কণ্ণনাসন্তি.

চূড়পদুমজাতকং ততিযং.

১৯৪. মণিচোৰজাতকং (২-৫-৪)

৮৭. ন সন্তি দেৱা পৱসন্তি নূন, ন হি নূন সন্তি ইধ লোকপালা;

সহসা কৰোন্তানমসঞ্ঞতানং, ন হি নূন সন্তী পটিসেধিতাৰো.

৮৮. অকালে ৱস্সতী তস্স, কালে তস্স ন ৱস্সতি;

সগ্গা চ চৱতি ঠানা, ননু সো তাৱতা হতোতি.

মণিচোৰজাতকং চতুত্থং.

১৯৫. পব্বতূপত্থৰজাতকং (২-৫-৫)

৮৯. পব্বতূপত্থৰে [পব্বতপত্থৰে (সী. স্যা. পী.)] ৰম্মে, জাতা পোক্খৰণী সিৱা;

তং সিঙ্গালো অপাপাযি [অপাপাসি (সী. স্যা. পী.)], জানং সীহেন ৰক্খিতং.

৯০. পিৱন্তি চে [পিৱন্তি ৱে (সী.), পিৱন্তিৱ (পী.), পিৱন্তেৱ (?)] মহাৰাজ, সাপদানি মহানদিং;

ন তেন অনদী হোতি, খমস্সু যদি তে পিযাতি.

পব্বতূপত্থৰ [পব্বতপত্থৰ (সী. স্যা. পী.)] জাতকং পঞ্চমং.

১৯৬. ৱলাহকস্সজাতকং (২-৫-৬)

৯১. যে ন কাহন্তি ওৱাদং, নৰা বুদ্ধেন দেসিতং;

ব্যসনং তে গমিস্সন্তি, ৰক্খসীহিৱ ৱাণিজা.

৯২. যে চ কাহন্তি ওৱাদং, নৰা বুদ্ধেন দেসিতং;

সোত্থিং পাৰং গমিস্সন্তি, ৱলাহেনেৱ [ৱালাহেনেৱ (সী. পী.)] ৱাণিজাতি.

ৱলাহকস্স [ৱালাহস্স (সী. পী.)] জাতকং ছট্ঠং.

১৯৭. মিত্তামিত্তজাতকং (২-৫-৭)

৯৩. ন নং উম্হযতে দিস্ৱা, ন চ নং পটিনন্দতি;

চক্খূনি চস্স ন দদাতি, পটিলোমঞ্চ ৱত্ততি.

৯৪. এতে ভৱন্তি আকাৰা, অমিত্তস্মিং পতিট্ঠিতা;

যেহি অমিত্তং জানেয্য, দিস্ৱা সুত্ৱা চ পণ্ডিতোতি.

মিত্তামিত্তজাতকং সত্তমং.

১৯৮. ৰাধজাতকং (২-৫-৮)

৯৫. পৱাসা আগতো তাত, ইদানি নচিৰাগতো;

কচ্চিন্নু তাত তে মাতা, ন অঞ্ঞমুপসেৱতি.

৯৬. ন খো পনেতং সুভণং, গিৰং সচ্চুপসংহিতং;

সযেথ পোট্ঠপাদোৱ, মুম্মুৰে [মুম্মুৰে (স্যা.), মং পুৰে (ক.) মুম্মুৰসদ্দো থুসগ্গিম্হি কুক্কুড়ে চ ৱত্ততীতি সক্কতাভিধানেসু] উপকূথিতোতি [উপকূসিতোতি (সী. স্যা. পী.), উপকূলিতো (ক.)].

ৰাধজাতকং অট্ঠমং.

১৯৯. গহপতিজাতকং (২-৫-৯)

৯৭. উভযং মে ন খমতি, উভযং মে ন ৰুচ্চতি;

যাচাযং কোট্ঠমোতিণ্ণা, নাদ্দসং ইতি ভাসতি.

৯৮. তং তং গামপতি ব্ৰূমি, কদৰে অপ্পস্মি জীৱিতে;

দ্ৱে মাসে সঙ্গৰং কত্ৱা [কাৰং কত্ৱান (সী. পী.), সংকৰং কত্ৱা (ক.)], মংসং জৰগ্গৱং কিসং;

অপ্পত্তকালে চোদেসি, তম্পি ময্হং ন ৰুচ্চতীতি.

গহপতিজাতকং নৱমং.

২০০. সাধুসীলজাতকং (২-৫-১০)

৯৯. সৰীৰদব্যং ৱুড্ঢব্যং [ৱদ্ধব্যং (সী. পী.)], সোজচ্চং সাধুসীলিযং;

ব্ৰাহ্মণং তেৱ পুচ্ছাম, কন্নু তেসং ৱনিম্হসে [ৱণিম্হসে (সী. পী.)].

১০০. অত্থো অত্থি সৰীৰস্মিং, ৱুড্ঢব্যস্স নমো কৰে;

অত্থো অত্থি সুজাতস্মিং, সীলং অস্মাক ৰুচ্চতীতি.

সাধুসীলজাতকং দসমং.

ৰুহকৱগ্গো পঞ্চমো.

তস্সুদ্দানং –

অপিৰুহক ৰূপৱতী মুসলো, পৱসন্তি সপঞ্চমপোক্খৰণী;

অথ মুত্তিমৱাণিজ উম্হযতে, চিৰআগত কোট্ঠ সৰীৰ দসাতি.