৩. কল্যাণৱগ্গো

১৭১. কল্যাণধম্মজাতকং (২-৩-১)

৪১. কল্যাণধম্মোতি যদা জনিন্দ, লোকে সমঞ্ঞং অনুপাপুণাতি;

তস্মা ন হিয্যেথ [হীযেথ (সী.)] নৰো সপঞ্ঞো, হিৰিযাপি সন্তো ধুৰমাদিযন্তি.

৪২. সাযং সমঞ্ঞা ইধ মজ্জ পত্তা, কল্যাণধম্মোতি জনিন্দ লোকে;

তাহং সমেক্খং ইধ পব্বজিস্সং, ন হি মত্থি ছন্দো ইধ কামভোগেতি.

কল্যাণধম্মজাতকং পঠমং.

১৭২. দদ্দৰজাতকং (২-৩-২)

৪৩. কো নু সদ্দেন মহতা, অভিনাদেতি দদ্দৰং;

তং সীহা নপ্পটিনদন্তি [কিং সীহা নপ্পটিনদন্তি (সী. পী.), ন সীহা পটিনদন্তি (ক.)], কো নামেসো মিগাধিভূ.

৪৪. অধমো মিগজাতানং, সিঙ্গালো তাত ৱস্সতি;

জাতিমস্স জিগুচ্ছন্তা, তুণ্হী সীহা সমচ্ছৰেতি.

দদ্দৰজাতকং দুতিযং.

১৭৩. মক্কটজাতকং (২-৩-৩)

৪৫. তাত মাণৱকো এসো, তালমূলং অপস্সিতো;

অগাৰকঞ্চিদং অত্থি, হন্দ দেমস্সগাৰকং.

৪৬. মা খো ত্ৱং তাত পক্কোসি, দূসেয্য নো অগাৰকং;

নেতাদিসং মুখং হোতি, ব্ৰাহ্মণস্স সুসীলিনোতি.

মক্কটজাতকং ততিযং.

১৭৪. দুব্ভিযমক্কটজাতকং (২-৩-৪)

৪৭. অদম্হ তে ৱাৰি পহূতৰূপং, ঘম্মাভিতত্তস্স পিপাসিতস্স;

সো দানি পিত্ৱান [পীত্ৱান (সী. পী.)] কিৰিঙ্কৰোসি [কিকিংকৰোসি (সী. স্যা. পী.)], অসঙ্গমো পাপজনেন সেয্যো.

৪৮. কো তে সুতো ৱা দিট্ঠো ৱা, সীলৱা নাম মক্কটো;

ইদানি খো তং ওহচ্ছং [ঊহচ্চ (সী. পী.), ওহচ্চং (স্যা.), উহজ্জং (ক.)], এসা অস্মাক ধম্মতাতি.

দুব্ভিযমক্কটজাতকং চতুত্থং.

১৭৫. আদিচ্চুপট্ঠানজাতকং (২-৩-৫)

৪৯. সব্বেসু কিৰ ভূতেসু, সন্তি সীলসমাহিতা;

পস্স সাখামিগং জম্মং, আদিচ্চমুপতিট্ঠতি.

৫০. নাস্স সীলং ৱিজানাথ, অনঞ্ঞায পসংসথ;

অগ্গিহুত্তঞ্চ উহন্নং [ঊহন্তং (সী.), ঊহনং (স্যা.), ঊহন্তি (পী.), উহদং (ক.)], দ্ৱে চ ভিন্না কমণ্ডলূতি.

আদিচ্চুপট্ঠানজাতকং পঞ্চমং.

১৭৬. কড়াযমুট্ঠিজাতকং (২-৩-৬)

৫১. বালো ৱতাযং দুমসাখগোচৰো, পঞ্ঞা জনিন্দ নযিমস্স ৱিজ্জতি;

কড়াযমুট্ঠিং [কলাযমুট্ঠিং (সী. পী.)] অৱকিৰিয কেৱলং, একং কড়াযং পতিতং গৱেসতি.

৫২. এৱমেৱ মযং ৰাজ, যে চঞ্ঞে অতিলোভিনো;

অপ্পেন বহুং জিয্যাম, কড়াযেনেৱ ৱানৰোতি.

কড়াযমুট্ঠিজাতকং ছট্ঠং.

১৭৭. তিন্দুকজাতকং (২-৩-৭)

৫৩. ধনুহত্থকলাপেহি, নেত্তিং সৱৰধাৰিভি;

সমন্তা পৰিকিণ্ণম্হ, কথং মোক্খো ভৱিস্সতি.

৫৪. অপ্পেৱ বহুকিচ্চানং, অত্থো জাযেথ কোচি নং;

অত্থি ৰুক্খস্স অচ্ছিন্নং, খজ্জথঞ্ঞেৱ তিন্দুকন্তি.

তিন্দুকজাতকং সত্তমং.

১৭৮. কচ্ছপজাতকং (২-৩-৮)

৫৫. জনিত্তং মে ভৱিত্তং মে, ইতি পঙ্কে অৱস্সযিং;

তং মং পঙ্কো অজ্ঝভৱি, যথা দুব্বলকং তথা;

তং তং ৱদামি ভগ্গৱ, সুণোহি ৱচনং মম.

৫৬. গামে ৱা যদি ৱা ৰঞ্ঞে, সুখং যত্ৰাধিগচ্ছতি;

তং জনিত্তং ভৱিত্তঞ্চ, পুৰিসস্স পজানতো;

যম্হি জীৱে তম্হি গচ্ছে, ন নিকেতহতো সিযাতি.

কচ্ছপজাতকং অট্ঠমং.

১৭৯. সতধম্মজাতকং (২-৩-৯)

৫৭. তঞ্চ অপ্পঞ্চ উচ্ছিট্ঠং, তঞ্চ কিচ্ছেন নো অদা;

সোহং ব্ৰাহ্মণজাতিকো, যং ভুত্তং তম্পি উগ্গতং.

৫৮. এৱং ধম্মং নিৰংকত্ৱা [নিৰাকত্ৱা (?) নি + আ + কৰ + ত্ৱা], যো অধম্মেন জীৱতি;

সতধম্মোৱ লাভেন, লদ্ধেনপি ন নন্দতীতি.

সতধম্মজাতকং নৱমং.

১৮০. দুদ্দদজাতকং (২-৩-১০)

৫৯. দুদ্দদং দদমানানং, দুক্কৰং কম্ম কুব্বতং;

অসন্তো নানুকুব্বন্তি, সতং ধম্মো দুৰন্নযো.

৬০. তস্মা সতঞ্চ অসতং, নানা হোতি ইতো গতি;

অসন্তো নিৰযং যন্তি, সন্তো সগ্গপৰাযণাতি [পৰাযনা (স্যা. ক.)].

দুদ্দদজাতকং দসমং.

কল্যাণৱগ্গো ততিযো.

তস্সুদ্দানং –

সুসমঞ্ঞমিগাধিভূ মাণৱকো, ৱাৰিপহূতৰূপাদিচ্চুপট্ঠানা;

সকড়াযসতিন্দুকপঙ্ক পুন, সতধম্ম সুদুদ্দদকেন দসাতি.