৫৩০. সংকিচ্চজাতকং (২)

৬৯. ‘‘দিস্ৱা নিসিন্নং ৰাজানং, ব্ৰহ্মদত্তং ৰথেসভং;

অথস্স পটিৱেদেসি, যস্সাসি অনুকম্পকো.

৭০. ‘‘সংকিচ্চাযং অনুপ্পত্তো, ইসীনং সাধুসম্মতো;

তৰমানৰূপো নিয্যাহি, খিপ্পং পস্স মহেসিনং.

৭১. ‘‘ততো চ ৰাজা তৰমানো, যুত্তমাৰুয্হ সন্দনং;

মিত্তামচ্চপৰিব্যূড়্হো [পৰিব্বূড়্হো (সী. পী.)], অগমাসি ৰথেসভো.

৭২. ‘‘নিক্খিপ্প পঞ্চ ককুধানি, কাসীনং ৰট্ঠৱড্ঢনো;

ৱাড়বীজনি [ৱা ড়ৱীজনী (সী. পী.)] মুণ্হীসং, খগ্গং ছত্তঞ্চুপাহনং;

৭৩. ‘‘ওৰুয্হ ৰাজা যানম্হা, ঠপযিত্ৱা পটিচ্ছদং;

আসীনং দাযপস্সস্মিং, সংকিচ্চমুপসঙ্কমি.

৭৪. ‘‘উপসঙ্কমিত্ৱা সো ৰাজা, সম্মোদি ইসিনা সহ;

তং কথং ৱীতিসাৰেত্ৱা, একমন্তং উপাৱিসি.

৭৫. ‘‘একমন্তং নিসিন্নোৱ, অথ কালং অমঞ্ঞথ;

ততো পাপানি কম্মানি, পুচ্ছিতুং পটিপজ্জথ.

৭৬. ‘‘ইসিং পুচ্ছাম [পুচ্ছামি (সী. পী.)] সংকিচ্চং, ইসীনং সাধুসম্মতং;

আসীনং দাযপস্সস্মিং, ইসিসঙ্ঘপুৰক্খতং [পুৰক্খিতং (ক.)].

৭৭. ‘‘কং গতিং পেচ্চ গচ্ছন্তি, নৰা ধম্মাতিচাৰিনো;

অতিচিণ্ণো মযা ধম্মো, তং মে অক্খাহি পুচ্ছিতো.

৭৮. ‘‘ইসী অৱচ সংকিচ্চো, কাসীনং ৰট্ঠৱড্ঢনং;

আসীনং দাযপস্সস্মিং, মহাৰাজ সুণোহি মে.

৭৯. ‘‘উপ্পথেন ৱজন্তস্স, যো মগ্গমনুসাসতি;

তস্স চে ৱচনং কযিৰা, নাস্স মগ্গেয্য কণ্টকো.

৮০. ‘‘অধম্মং পটিপন্নস্স, যো ধম্মমনুসাসতি;

তস্স চে ৱচনং কযিৰা, ন সো গচ্ছেয্য দুগ্গতিং.

৮১. ‘‘ধম্মো পথো মহাৰাজ, অধম্মো পন উপ্পথো;

অধম্মো নিৰযং নেতি, ধম্মো পাপেতি সুগ্গতিং.

৮২. ‘‘অধম্মচাৰিনো ৰাজ, নৰা ৱিসমজীৱিনো;

যং গতিং পেচ্চ গচ্ছন্তি, নিৰযে তে সুণোহি মে.

৮৩. ‘‘সঞ্জীৱো কাড়সুত্তো চ, সঙ্ঘাতো [সঙ্খাটো (স্যা. ক.)] দ্ৱে চ ৰোৰুৱা;

অথাপৰো মহাৱীচি, তাপনো [তপনো (সী. পী.)] চ পতাপনো.

৮৪. ‘‘ইচ্চেতে অট্ঠ নিৰযা, অক্খাতা দুৰতিক্কমা;

আকিণ্ণা লুদ্দকম্মেহি, পচ্চেকা সোড়সুস্সদা.

৮৫. ‘‘কদৰিযতাপনা [কদৰিযতপনা (সী. পী.)] ঘোৰা, অচ্চিমন্তো [অচ্চিমন্তা (পী.)] মহব্ভযা;

লোমহংসনৰূপা চ, ভেস্মা পটিভযা দুখা.

৮৬. ‘‘চতুক্কণ্ণা চতুদ্ৱাৰা, ৱিভত্তা ভাগসো মিতা;

অযোপাকাৰপৰিযন্তা, অযসা পটিকুজ্জিতা.

৮৭. ‘‘তেসং অযোমযা ভূমি, জলিতা তেজসা যুতা;

সমন্তা যোজনসতং, ফুটা [ফৰিত্ৱা (অ. নি. ৩.৩৬; পে. ৱ. ৭১)] তিট্ঠন্তি সব্বদা.

৮৮. ‘‘এতে পতন্তি নিৰযে, উদ্ধংপাদা অৱংসিৰা;

ইসীনং অতিৱত্তাৰো, সঞ্ঞতানং তপস্সিনং.

৮৯. ‘‘তে ভূনহুনো পচ্চন্তি, মচ্ছা বিলকতা যথা;

সংৱচ্ছৰে অসঙ্খেয্যে, নৰা কিব্বিসকাৰিনো.

৯০. ‘‘ডয্হমানেন গত্তেন, নিচ্চং সন্তৰবাহিৰং;

নিৰযা নাধিগচ্ছন্তি, দ্ৱাৰং নিক্খমনেসিনো.

৯১. ‘‘পুৰত্থিমেন ধাৱন্তি, ততো ধাৱন্তি পচ্ছতো;

উত্তৰেনপি ধাৱন্তি, ততো ধাৱন্তি দক্খিণং;

যং যঞ্হি দ্ৱাৰং গচ্ছন্তি, তং তদেৱ পিধীযৰে [পিথিয্যতি (সী.), পিথিয্যৰে (স্যা.), পিথীযৰে (পী.)].

৯২. ‘‘বহূনি ৱস্সসহস্সানি, জনা নিৰযগামিনো;

বাহা পগ্গয্হ কন্দন্তি, পত্ৱা দুক্খং অনপ্পকং.

৯৩. ‘‘আসীৱিসংৱ কুপিতং, তেজস্সিং দুৰতিক্কমং;

ন সাধুৰূপে আসীদে, সঞ্ঞতানং তপস্সিনং.

৯৪. ‘‘অতিকাযো মহিস্সাসো, অজ্জুনো কেককাধিপো;

সহস্সবাহু উচ্ছিন্নো, ইসিমাসজ্জ গোতমং.

৯৫. ‘‘অৰজং ৰজসা ৱচ্ছং, কিসং অৱকিৰিয দণ্ডকী;

তালোৱ মূলতো [সমূলো (ক.)] ছিন্নো, স ৰাজা ৱিভৱঙ্গতো.

৯৬. ‘‘উপহচ্চ মনং মজ্ঝো [মেজ্ঝো (ক.)], মাতঙ্গস্মিং যসস্সিনে;

সপাৰিসজ্জো উচ্ছিন্নো, মজ্ঝাৰঞ্ঞং তদা অহু.

৯৭. ‘‘কণ্হদীপাযনাসজ্জ, ইসিং অন্ধকৱেণ্ডযো [ৱেণ্হুযো (সী. পী.), পিণ্হযো (?)];

অঞ্ঞোঞ্ঞং [অঞ্ঞমঞ্ঞং (সী. পী.)] মুসলা [মুসলে (সী. স্যা. পী.)] হন্ত্ৱা, সম্পত্তা যমসাধনং [যমসাদনং (পী.)].

৯৮. ‘‘অথাযং ইসিনা সত্তো, অন্তলিক্খচৰো পুৰে;

পাৱেক্খি পথৱিং [পঠৱিং (সী. স্যা. পী.)] চেচ্চো, হীনত্তো পত্তপৰিযাযং.

৯৯. ‘‘তস্মা হি ছন্দাগমনং, নপ্পসংসন্তি পণ্ডিতা;

অদুট্ঠচিত্তো ভাসেয্য, গিৰং সচ্চূপসংহিতং.

১০০. ‘‘মনসা চে পদুট্ঠেন, যো নৰো পেক্খতে মুনিং;

ৱিজ্জাচৰণসম্পন্নং, গন্তা সো নিৰযং অধো.

১০১. ‘‘যে ৱুড্ঢে [ৱদ্ধে (ক.)] পৰিভাসন্তি, ফৰুসূপক্কমা জনা;

অনপচ্চা অদাযাদা, তালৱত্থু [তালৱত্থূ (স্যা.), তালাৱত্থু (পী.)] ভৱন্তি তে.

১০২. ‘‘যো চ পব্বজিতং হন্তি, কতকিচ্চং মহেসিনং;

স কাড়সুত্তে নিৰযে, চিৰৰত্তায পচ্চতি.

১০৩. ‘‘যো চ ৰাজা অধম্মট্ঠো, ৰট্ঠৱিদ্ধংসনো মগো [চুতো (সী.)];

তাপযিত্ৱা জনপদং, তাপনে পেচ্চ পচ্চতি.

১০৪. ‘‘সো চ ৱস্সসহস্সানি [ৱস্সসহস্সানং (সী. স্যা.)], সতং দিব্বানি পচ্চতি;

অচ্চিসঙ্ঘপৰেতো সো, দুক্খং ৱেদেতি ৱেদনং.

১০৫. ‘‘তস্স অগ্গিসিখা কাযা, নিচ্ছৰন্তি পভস্সৰা;

তেজোভক্খস্স গত্তানি, লোমেহি চ [লোমগ্গেহি চ (সী. স্যা. পী.)] নখেহি চ.

১০৬. ‘‘ডয্হমানেন গত্তেন, নিচ্চং সন্তৰবাহিৰং;

দুক্খাভিতুন্নো নদতি, নাগো তুত্তট্টিতো [তুত্তদ্দিতো (সী.)] যথা.

১০৭. ‘‘যো লোভা পিতৰং হন্তি, দোসা ৱা পুৰিসাধমো;

স কাড়সুত্তে নিৰযে, চিৰৰত্তায পচ্চতি.

১০৮. ‘‘স তাদিসো পচ্চতি লোহকুম্ভিযং, পক্কঞ্চ সত্তীহি হনন্তি নিত্তচং;

অন্ধং কৰিত্ৱা মুত্তকৰীসভক্খং, খাৰে নিমুজ্জন্তি তথাৱিধং নৰং.

১০৯. ‘‘তত্তং পক্কুথিতমযোগুড়ঞ্চ [পক্কুধিতমযোগুড়ঞ্চ (ক.)], দীঘে চ ফালে চিৰৰত্ততাপিতে;

ৱিক্খম্ভমাদায ৱিবন্ধ [ৱিবদ্ধ (সী.), ৱিভজ্জ (স্যা. পী.)] ৰজ্জুভি, ৱিৱটে মুখে সম্পৱিসন্তি [সংচৱন্তি (সী. স্যা. পী.)] ৰক্খসা.

১১০. ‘‘সামা চ সোণা সবলা চ গিজ্ঝা, কাকোড়সঙ্ঘা চ দিজা অযোমুখা;

সঙ্গম্ম খাদন্তি ৱিপ্ফন্দমানং, জিৱ্হং ৱিভজ্জ ৱিঘাসং সলোহিতং.

১১১. ‘‘তং দড্ঢতালং পৰিভিন্নগত্তং, নিপ্পোথযন্তা অনুৱিচৰন্তি ৰক্খসা;

ৰতী হি নেসং দুখিনো পনীতৰে, এতাদিসস্মিং নিৰযে ৱসন্তি;

যে কেচি লোকে ইধ পেত্তিঘাতিনো.

১১২. ‘‘পুত্তো চ মাতৰং হন্ত্ৱা, ইতো গন্ত্ৱা যমক্খযং;

ভুসমাপজ্জতে দুক্খং, অত্তকম্মফলূপগো.

১১৩. ‘‘অমনুস্সা অতিবলা, হন্তাৰং জনযন্তিযা;

অযোমযেহি ৱাড়েহি [ফালেহি (পী.)], পীড়যন্তি পুনপ্পুনং.

১১৪. ‘‘তমস্সৱং [তং পস্সৱং (সী. স্যা.), তং পস্সুতং (পী.)] সকা গত্তা, ৰুহিৰং [ৰুধিৰং (সী. স্যা.)] অত্তসম্ভৱং;

তম্বলোহৱিলীনংৱ, তত্তং পাযেন্তি মত্তিঘং [মত্তিযং (সী.)].

১১৫. ‘‘জিগুচ্ছং কুণপং পূতিং, দুগ্গন্ধং গূথকদ্দমং;

পুব্বলোহিতসঙ্কাসং, ৰহদমোগয্হ [ৰহদোগ্গয্হ (ক.)] তিট্ঠতি.

১১৬. ‘‘তমেনং কিমযো তত্থ, অতিকাযা অযোমুখা;

ছৱিং ভেত্ৱান [ছেত্ৱান (সী. পী.)] খাদন্তি, সংগিদ্ধা [পগিদ্ধা (সী. স্যা. পী.)] মংসলোহিতে.

১১৭. ‘‘সো চ তং নিৰযং পত্তো, নিমুগ্গো সতপোৰিসং;

পূতিকং কুণপং ৱাতি, সমন্তা সতযোজনং.

১১৮. ‘‘চক্খুমাপি হি চক্খূহি, তেন গন্ধেন জীযতি;

এতাদিসং ব্ৰহ্মদত্ত, মাতুঘো লভতে দুখং.

১১৯. ‘‘খুৰধাৰমনুক্কম্ম, তিক্খং দুৰভিসম্ভৱং;

পতন্তি গব্ভপাতিযো [গব্ভপাতিনিযো (সী. স্যা. পী.)], দুগ্গং ৱেতৰণিং [ৱেত্তৰণিং (স্যা. ক.)] নদিং.

১২০. ‘‘অযোমযা সিম্বলিযো, সোড়সঙ্গুলকণ্টকা;

উভতো অভিলম্বন্তি, দুগ্গং ৱেতৰণিং [ৱেত্তৰণিং (স্যা. ক.)] নদিং.

১২১. ‘‘তে অচ্চিমন্তো তিট্ঠন্তি, অগ্গিক্খন্ধাৱ আৰকা;

আদিত্তা জাতৱেদেন, উদ্ধং যোজনমুগ্গতা.

১২২. ‘‘এতে ৱজন্তি [সজন্তি (সী. পী.), পজ্জন্তি (স্যা.)] নিৰযে, তত্তে তিখিণকণ্টকে;

নাৰিযো চ অতিচাৰা [অতিচাৰিনিযো (সী. স্যা. পী.)], নৰা চ পৰদাৰগূ.

১২৩. ‘‘তে পতন্তি অধোক্খন্ধা, ৱিৱত্তা ৱিহতা পুথূ;

সযন্তি ৱিনিৱিদ্ধঙ্গা, দীঘং জগ্গন্তি সব্বদা [সংৱৰিং (সী. পী.)].

১২৪. ‘‘ততো ৰত্যা ৱিৱসানে [ৱিৱসনে (সী. স্যা. পী.)], মহতিং পব্বতূপমং;

লোহকুম্ভিং পৱজ্জন্তি, তত্তং অগ্গিসমূদকং.

১২৫. ‘‘এৱং দিৱা চ ৰত্তো চ, দুস্সীলা মোহপাৰুতা;

অনুভোন্তি সকং কম্মং, পুব্বে দুক্কটমত্তনো.

১২৬. ‘‘যা চ ভৰিযা ধনক্কীতা, সামিকং অতিমঞ্ঞতি;

সস্সুং ৱা সসুৰং ৱাপি, জেট্ঠং ৱাপি ননন্দৰং [ননন্দনং (স্যা. ক.)].

১২৭. ‘‘তস্সা ৱঙ্কেন জিৱ্হগ্গং, নিব্বহন্তি সবন্ধনং;

স ব্যামমত্তং কিমিনং, জিৱ্হং পস্সতি অত্তনি [অত্তনো (সী. স্যা.)];

ৱিঞ্ঞাপেতুং ন সক্কোতি, তাপনে পেচ্চ পচ্চতি.

১২৮. ‘‘ওৰব্ভিকা সূকৰিকা, মচ্ছিকা মিগবন্ধকা;

চোৰা গোঘাতকা লুদ্দা, অৱণ্ণে ৱণ্ণকাৰকা.

১২৯. ‘‘সত্তীহি লোহকূটেহি, নেত্তিংসেহি উসূহি চ;

হঞ্ঞমানা খাৰনদিং, পপতন্তি [সম্পতন্তি (ক.)] অৱংসিৰা.

১৩০. ‘‘সাযং পাতো কূটকাৰী, অযোকূটেহি হঞ্ঞতি;

ততো ৱন্তং দুৰত্তানং, পৰেসং ভুঞ্জৰে [ভুঞ্জতে (সী. স্যা. পী.)] সদা.

১৩১. ‘‘ধঙ্কা ভেৰণ্ডকা [ভেদণ্ডকা (ক.)] গিজ্ঝা, কাকোড়া চ অযোমুখা;

ৱিপ্ফন্দমানং খাদন্তি, নৰং কিব্বিসকাৰকং [কিব্বিসকাৰিনং (পী.)].

১৩২. ‘‘যে মিগেন মিগং হন্তি, পক্খিং ৱা পন পক্খিনা;

অসন্তো ৰজসা ছন্না, গন্তা [গতা (ক.)] তে নিৰযুস্সদং [নিৰযং অধো (পী.)].

১৩৩. ‘‘সন্তো চ [সন্তোৱ (স্যা.)] উদ্ধং গচ্ছন্তি, সুচিণ্ণেনিধ কম্মুনা;

সুচিণ্ণস্স ফলং পস্স, সইন্দা [সহিন্দা (সী.)] দেৱা সব্ৰহ্মকা.

১৩৪. ‘‘তং তং ব্ৰূমি মহাৰাজ, ধম্মং ৰট্ঠপতী চৰ;

তথা [তথা তথা (সী. স্যা. পী.)] ৰাজ চৰাহি ধম্মং, যথা তং সুচিণ্ণং নানুতপ্পেয্য পচ্ছা’’তি.

সংকিচ্চজাতকং দুতিযং.

সট্ঠিনিপাতং নিট্ঠিতং.