১৯. সট্ঠিনিপাতো

৫২৯. সোণকজাতকং (১)

১. ‘‘তস্স সুত্ৱা সতং দম্মি, সহস্সং দিট্ঠ [দট্ঠু (সী. পী.)] সোণকং;

কো মে সোণকমক্খাতি, সহাযং পংসুকীড়িতং’’.

২. ‘‘অথব্ৰৱী মাণৱকো, দহৰো পঞ্চচূড়কো;

ময্হং সুত্ৱা সতং দেহি, সহস্সং দিট্ঠ [দট্ঠু (সী. পী.)] সোণকং;

অহং তে সোণকক্খিস্সং [অহং সোণকমক্খিস্সং (সী. পী.), অহং তে সোণকমক্খিস্সং (স্যা.)], সহাযং পংসুকীড়িতং’’.

৩. ‘‘কতমস্মিং [কতৰস্মিং (সী. স্যা. পী.)] সো জনপদে, ৰট্ঠেসু নিগমেসু চ;

কত্থ সোণকমদ্দক্খি [কত্থ তে সোণকো দিট্ঠো (সী. পী.)], তং মে অক্খাহি পুচ্ছিতো’’.

৪. ‘‘তৱেৱ দেৱ ৱিজিতে, তৱেৱুয্যানভূমিযা;

উজুৱংসা মহাসালা, নীলোভাসা মনোৰমা.

৫. ‘‘তিট্ঠন্তি মেঘসমানা, ৰম্মা অঞ্ঞোঞ্ঞনিস্সিতা;

তেসং মূলম্হি [মূলস্মিং (সী. পী.), মূলস্মি (স্যা.)] সোণকো, ঝাযতী অনুপাদনো [অনুপাদিনো (স্যা.), অনুপাদানো (পী.)];

উপাদানেসু লোকেসু, ডয্হমানেসু নিব্বুতো.

৬. ‘‘ততো চ ৰাজা পাযাসি, সেনায চতুৰঙ্গিযা;

কাৰাপেত্ৱা সমং মগ্গং, অগমা যেন সোণকো.

৭. ‘‘উয্যানভূমিং গন্ত্ৱান, ৱিচৰন্তো ব্ৰহাৱনে;

আসীনং সোণকং দক্খি, ডয্হমানেসু নিব্বুতং’’.

৮. ‘‘কপণো ৱতযং ভিক্খু, মুণ্ডো সঙ্ঘাটিপাৰুতো;

অমাতিকো অপিতিকো, ৰুক্খমূলস্মি ঝাযতি’’.

৯. ‘‘ইমং ৱাক্যং নিসামেত্ৱা, সোণকো এতদব্ৰৱি;

‘ন ৰাজ কপণো হোতি, ধম্মং কাযেন ফস্সযং [ফুসযং (ক.)].

১০. ‘যো চ [যোধ (সী. স্যা.)] ধম্মং নিৰংকত্ৱা [নিৰাকত্ৱা (?)], অধম্মমনুৱত্ততি;

স ৰাজ কপণো হোতি, পাপো পাপপৰাযনো’’’.

১১. ‘‘‘অৰিন্দমোতি মে নামং, কাসিৰাজাতি মং ৱিদূ;

কচ্চি ভোতো সুখস্সেয্যা [সুখা সেয্যা (পী.), সুখসেয্যো (ক.)], ইধ পত্তস্স সোণক’’’.

১২. ‘‘সদাপি ভদ্ৰমধনস্স, অনাগাৰস্স ভিক্খুনো;

ন তেসং কোট্ঠে ওপেন্তি, ন কুম্ভিং ন খড়োপিযং [ন কুম্ভে ন কড়োপিযা (স্যা. পী.)];

পৰনিট্ঠিতমেসানা, তেন যাপেন্তি সুব্বতা.

১৩. ‘‘দুতিযম্পি ভদ্ৰমধনস্স, অনাগাৰস্স ভিক্খুনো;

অনৱজ্জপিণ্ডো [অনৱজ্জো পিণ্ডা (পী.)] ভোত্তব্বো, ন চ কোচূপৰোধতি.

১৪. ‘‘ততিযম্পি ভদ্ৰমধনস্স, অনাগাৰস্স ভিক্খুনো;

নিব্বুতো পিণ্ডো ভোত্তব্বো, ন চ কোচূপৰোধতি.

১৫. ‘‘চতুত্থম্পি [চতুত্থং (পী.)] ভদ্ৰমধনস্স, অনাগাৰস্স ভিক্খুনো;

মুত্তস্স ৰট্ঠে চৰতো, সঙ্গো যস্স ন ৱিজ্জতি.

১৬. ‘‘পঞ্চমম্পি [পঞ্চমং (পী.)] ভদ্ৰমধনস্স, অনাগাৰস্স ভিক্খুনো;

নগৰম্হি ডয্হমানম্হি, নাস্স কিঞ্চি অডয্হথ.

১৭. ‘‘ছট্ঠম্পি [ছট্ঠং (পী.)] ভদ্ৰমধনস্স, অনাগাৰস্স ভিক্খুনো;

ৰট্ঠে ৱিলুম্পমানম্হি [ৱিলুপ্পমানম্হি (ক.)], নাস্স কিঞ্চি অহীৰথ [অহাৰথ (সী. স্যা.)].

১৮. ‘‘সত্তমম্পি [সত্তমং (পী.)] ভদ্ৰমধনস্স, অনাগাৰস্স ভিক্খুনো;

চোৰেহি ৰক্খিতং মগ্গং, যে চঞ্ঞে পৰিপন্থিকা;

পত্তচীৱৰমাদায, সোত্থিং গচ্ছতি সুব্বতো.

১৯. ‘‘অট্ঠমম্পি [অট্ঠমং (পী.)] ভদ্ৰমধনস্স, অনাগাৰস্স ভিক্খুনো;

যং যং দিসং পক্কমতি, অনপেক্খোৱ গচ্ছতি’’.

২০. ‘‘বহূপি ভদ্ৰা [বহূনি সমণভদ্ৰানি (সী.), বহূপি ভদ্ৰকা এতে (পী.)] এতেসং, যো ত্ৱং ভিক্খু পসংসসি;

অহঞ্চ গিদ্ধো কামেসু, কথং কাহামি সোণক.

২১. ‘‘পিযা মে মানুসা কামা, অথো দিব্যাপি মে পিযা;

অথ কেন নু ৱণ্ণেন, উভো লোকে লভামসে’’.

২২. ‘‘কামে গিদ্ধা [কামেসু গিদ্ধা (সী. পী.)] কামৰতা, কামেসু অধিমুচ্ছিতা;

নৰা পাপানি কত্ৱান, উপপজ্জন্তি দুগ্গতিং.

২৩. ‘‘যে চ কামে পহন্ত্ৱান [পহত্ৱান (সী. পী.)], নিক্খন্তা অকুতোভযা;

একোদিভাৱাধিগতা, ন তে গচ্ছন্তি দুগ্গতিং.

২৪. ‘‘উপমং তে কৰিস্সামি, তং সুণোহি অৰিন্দম;

উপমায মিধেকচ্চে [পিধেকচ্চে (সী. পী.)], অত্থং জানন্তি পণ্ডিতা.

২৫. ‘‘গঙ্গায কুণপং দিস্ৱা, ৱুয্হমানং মহণ্ণৱে;

ৱাযসো সমচিন্তেসি, অপ্পপঞ্ঞো অচেতসো.

২৬. ‘‘‘যানঞ্চ ৱতিদং লদ্ধং, ভক্খো চাযং অনপ্পকো’;

তত্থ ৰত্তিং তত্থ দিৱা, তত্থেৱ নিৰতো মনো.

২৭. ‘‘খাদং নাগস্স মংসানি, পিৱং ভাগীৰথোদকং [ভাগিৰসোদকং (সী. স্যা. পী. ক.)];

সম্পস্সং ৱনচেত্যানি, ন পলেত্থ [পলেত্ৱা (ক.)] ৱিহঙ্গমো.

২৮. ‘‘তঞ্চ [তংৱ (পী.)] ওতৰণী গঙ্গা, পমত্তং কুণপে ৰতং;

সমুদ্দং অজ্ঝগাহাসি [অজ্ঝগাহযি (পী.)], অগতী যত্থ পক্খিনং.

২৯. ‘‘সো চ ভক্খপৰিক্খীণো, উদপত্ৱা [উপ্পতিত্ৱা (সী. স্যা.), উদাপত্ৱা (পী.)] ৱিহঙ্গমো.

ন পচ্ছতো ন পুৰতো, নুত্তৰং নোপি দক্খিণং.

৩০. ‘‘দীপং সো নজ্ঝগাগঞ্ছি [ন অজ্ঝগঞ্ছি (সী.), ন অজ্ঝগচ্ছি (পী.)], অগতী যত্থ পক্খিনং;

সো চ তত্থেৱ পাপত্থ, যথা দুব্বলকো তথা.

৩১. ‘‘তঞ্চ সামুদ্দিকা মচ্ছা, কুম্ভীলা মকৰা সুসূ;

পসয্হকাৰা খাদিংসু, ফন্দমানং ৱিপক্খকং [ৱিপক্খিনং (সী. পী.), ৱিপক্খিকং (স্যা.)].

৩২. ‘‘এৱমেৱ তুৱং ৰাজ, যে চঞ্ঞে কামভোগিনো;

গিদ্ধা চে ন ৱমিস্সন্তি, কাকপঞ্ঞাৱ [কাকপঞ্ঞায (সী. স্যা. পী.)] তে ৱিদূ.

৩৩. ‘‘এসা তে উপমা ৰাজ, অত্থসন্দস্সনী কতা;

ত্ৱঞ্চ পঞ্ঞাযসে তেন, যদি কাহসি ৱা ন ৱা.

৩৪. ‘‘একৱাচম্পি দ্ৱিৱাচং, ভণেয্য অনুকম্পকো;

ততুত্তৰিং ন ভাসেয্য, দাসোৱয্যস্স [দাসো অয্যস্স (সী.), দাসো অযিৰস্স (পী.)] সন্তিকে’’.

৩৫. ‘‘ইদং ৱত্ৱান পক্কামি, সোণকো অমিতবুদ্ধিমা [সোণকো’মিতবুদ্ধিমা (?)];

ৱেহাসে অন্তলিক্খস্মিং, অনুসাসিত্ৱান খত্তিযং’’.

৩৬. ‘‘কো নুমে ৰাজকত্তাৰো, সুদ্দা ৱেয্যত্তমাগতা [সূতা ৱেয্যত্তিমাগতা (সী. স্যা. পী.)];

ৰজ্জং নিয্যাদযিস্সামি, নাহং ৰজ্জেন মত্থিকো.

৩৭. ‘‘অজ্জেৱ পব্বজিস্সামি, কো জঞ্ঞা মৰণং সুৱে;

মাহং কাকোৱ দুম্মেধো, কামানং ৱসমন্ৱগং’’ [ৱসমন্নগা (পী.)].

৩৮. ‘‘অত্থি তে দহৰো পুত্তো, দীঘাৱু ৰট্ঠৱড্ঢনো;

তং ৰজ্জে অভিসিঞ্চস্সু, সো নো ৰাজা ভৱিস্সতি’’.

৩৯. ‘‘খিপ্পং কুমাৰমানেথ, দীঘাৱুং ৰট্ঠৱড্ঢনং;

তং ৰজ্জে অভিসিঞ্চিস্সং, সো ৱো ৰাজা ভৱিস্সতি’’.

৪০. ‘‘ততো কুমাৰমানেসুং, দীঘাৱুং ৰট্ঠৱড্ঢনং;

তং দিস্ৱা আলপী ৰাজা, একপুত্তং মনোৰমং.

৪১. ‘‘সট্ঠি গামসহস্সানি, পৰিপুণ্ণানি সব্বসো;

তে পুত্ত পটিপজ্জস্সু, ৰজ্জং নিয্যাদযামি তে.

৪২. ‘‘অজ্জেৱ পব্বজিস্সামি, কো জঞ্ঞা মৰণং সুৱে;

মাহং কাকোৱ দুম্মেধো, কামানং ৱসমন্ৱগং [ৱসমন্নগা (পী.)].

৪৩. ‘‘সট্ঠি নাগসহস্সানি, সব্বালঙ্কাৰভূসিতা;

সুৱণ্ণকচ্ছা মাতঙ্গা, হেমকপ্পনৱাসসা.

৪৪. ‘‘আৰূড়্হা গামণীযেহি, তোমৰঙ্কুসপাণিভি;

তে পুত্ত পটিপজ্জস্সু, ৰজ্জং নিয্যাদযামি তে.

৪৫. ‘‘অজ্জেৱ পব্বজিস্সামি, কো জঞ্ঞা মৰণং সুৱে;

মাহং কাকোৱ দুম্মেধো, কামানং ৱসমন্ৱগং.

৪৬. ‘‘সট্ঠি অস্সসহস্সানি, সব্বালঙ্কাৰভূসিতা;

আজানীযাৱ জাতিযা, সিন্ধৱা সীঘৱাহিনো.

৪৭. ‘‘আৰূড়্হা গামণীযেহি, ইল্লিযাচাপধাৰিভি [ইন্দিযাচাপধাৰিভি (ক.)];

তে পুত্ত পটিপজ্জস্সু, ৰজ্জং নিয্যাদযামি তে.

৪৮. ‘‘অজ্জেৱ পব্বজিস্সামি, কো জঞ্ঞা মৰণং সুৱে;

মাহং কাকোৱ দুম্মেধো, কামানং ৱসমন্ৱগং.

৪৯. ‘‘সট্ঠি ৰথসহস্সানি, সন্নদ্ধা উস্সিতদ্ধজা;

দীপা অথোপি ৱেয্যগ্ঘা, সব্বালঙ্কাৰভূসিতা.

৫০. ‘‘আৰূড়্হা গামণীযেহি, চাপহত্থেহি ৱম্মিভি;

তে পুত্ত পটিপজ্জস্সু, ৰজ্জং নিয্যাদযামি তে.

৫১. ‘‘অজ্জেৱ পব্বজিস্সামি, কো জঞ্ঞা মৰণং সুৱে;

মাহং কাকোৱ দুম্মেধো, কামানং ৱসমন্ৱগং.

৫২. ‘‘সট্ঠি ধেনুসহস্সানি, ৰোহঞ্ঞা পুঙ্গৱূসভা;

তা পুত্ত পটিপজ্জস্সু, ৰজ্জং নিয্যাদযামি তে.

৫৩. ‘‘অজ্জেৱ পব্বজিস্সামি, কো জঞ্ঞা মৰণং সুৱে;

মাহং কাকোৱ দুম্মেধো, কামানং ৱসমন্ৱগং.

৫৪. ‘‘সোড়সিত্থিসহস্সানি, সব্বালঙ্কাৰভূসিতা;

ৱিচিত্ৰৱত্থাভৰণা, আমুত্তমণিকুণ্ডলা;

তা পুত্ত পটিপজ্জস্সু, ৰজ্জং নিয্যাদযামি তে.

৫৫. ‘‘অজ্জেৱ পব্বজিস্সামি, কো জঞ্ঞা মৰণং সুৱে;

মাহং কাকোৱ দুম্মেধো, কামানং ৱসমন্ৱগং’’.

৫৬. ‘‘দহৰস্সেৱ মে তাত, মাতা মতাতি মে সুতং;

তযা ৱিনা অহং তাত, জীৱিতুম্পি ন উস্সহে.

৫৭. ‘‘যথা আৰঞ্ঞকং নাগং, পোতো অন্ৱেতি পচ্ছতো;

জেস্সন্তং গিৰিদুগ্গেসু, সমেসু ৱিসমেসু চ.

৫৮. ‘‘এৱং তং অনুগচ্ছামি, পুত্তমাদায [পত্তমাদায (পী.)] পচ্ছতো;

সুভৰো তে ভৱিস্সামি, ন তে হেস্সামি দুব্ভৰো’’.

৫৯. ‘‘যথা সামুদ্দিকং নাৱং, ৱাণিজানং ধনেসিনং;

ৱোহাৰো তত্থ গণ্হেয্য, ৱাণিজা ব্যসনী [ব্যসনং (ক.)] সিযা.

৬০. ‘‘এৱমেৱাযং পুত্তকলি [পুত্তক (স্যা.)], অন্তৰাযকৰো মম [মমং (পী.)];

ইমং কুমাৰং পাপেথ, পাসাদং ৰতিৱড্ঢনং.

৬১. ‘‘তত্থ কম্বুসহত্থাযো, যথা সক্কংৱ অচ্ছৰা;

তা নং তত্থ ৰমেস্সন্তি [ৰমিস্সন্তি (স্যা. ক.)], তাহি চেসো [মেসো (পী.)] ৰমিস্সতি.

৬২. ‘‘ততো কুমাৰং পাপেসুং, পাসাদং ৰতিৱড্ঢনং;

তং দিস্ৱা অৱচুং কঞ্ঞা, দীঘাৱুং ৰট্ঠৱড্ঢনং.

৬৩. ‘‘দেৱতা নুসি গন্ধব্বো, অদু [আদু (সী. পী.)] সক্কো পুৰিন্দদো;

কো ৱা ত্ৱং কস্স ৱা পুত্তো, কথং জানেমু তং মযং’’.

৬৪. ‘‘নম্হি দেৱো ন গন্ধব্বো, নাপি [নম্হি (ক.)] সক্কো পুৰিন্দদো;

কাসিৰঞ্ঞো অহং পুত্তো, দীঘাৱু ৰট্ঠৱড্ঢনো;

মমং [মম (পী.)] ভৰথ ভদ্দং ৱো [ভদ্দন্তে (ক.)], অহং ভত্তা ভৱামি ৱো’’.

৬৫. ‘‘তং তত্থ অৱচুং কঞ্ঞা, দীঘাৱুং ৰট্ঠৱড্ঢনং;

‘কুহিং ৰাজা অনুপ্পত্তো, ইতো ৰাজা কুহিং গতো’’’.

৬৬. ‘‘পঙ্কং ৰাজা অতিক্কন্তো, থলে ৰাজা পতিট্ঠিতো;

অকণ্টকং অগহনং, পটিপন্নো মহাপথং.

৬৭. ‘‘অহঞ্চ পটিপন্নোস্মি, মগ্গং দুগ্গতিগামিনং;

সকণ্টকং সগহনং, যেন গচ্ছন্তি দুগ্গতিং’’.

৬৮. ‘‘তস্স তে স্ৱাগতং ৰাজ, সীহস্সেৱ গিৰিব্বজং;

অনুসাস মহাৰাজ, ত্ৱং নো সব্বাসমিস্সৰো’’তি.

সোণকজাতকং পঠমং.

৫৩০. সংকিচ্চজাতকং (২)

৬৯. ‘‘দিস্ৱা নিসিন্নং ৰাজানং, ব্ৰহ্মদত্তং ৰথেসভং;

অথস্স পটিৱেদেসি, যস্সাসি অনুকম্পকো.

৭০. ‘‘সংকিচ্চাযং অনুপ্পত্তো, ইসীনং সাধুসম্মতো;

তৰমানৰূপো নিয্যাহি, খিপ্পং পস্স মহেসিনং.