২০. সত্ততিনিপাতো

৫৩১. কুসজাতকং (১)

১. ‘‘ইদং তে ৰট্ঠং সধনং সযোগ্গং, সকাযুৰং সব্বকামূপপন্নং;

ইদং তে ৰজ্জং [ৰট্ঠং (ক.)] অনুসাস অম্ম, গচ্ছামহং যত্থ পিযা পভাৱতী’’.

২. ‘‘অনুজ্জুভূতেন হৰং মহন্তং, দিৱা চ ৰত্তো চ নিসীথকালে [নিসীদ কালে (ক.)];

পটিগচ্ছ ত্ৱং খিপ্পং কুসাৱতিং কুস [কুসাৱতিং (স্যা. ক.)], নিচ্ছামি দুব্বণ্ণমহং ৱসন্তং’’.

৩. ‘‘নাহং গমিস্সামি ইতো কুসাৱতিং, পভাৱতী ৱণ্ণপলোভিতো তৱ;

ৰমামি মদ্দস্স নিকেতৰম্মে, হিত্ৱান ৰট্ঠং তৱ দস্সনে ৰতো.

৪. ‘‘পভাৱতী ৱণ্ণপলোভিতো তৱ, সম্মূড়্হৰূপো ৱিচৰামি মেদিনিং [মেদনিং (স্যা. ক.)];

দিসং ন জানামি কুতোম্হি আগতো, তযম্হি মত্তো মিগমন্দলোচনে.

৫. ‘‘সুৱণ্ণচীৰৱসনে, জাতৰূপসুমেখলে;

সুস্সোণি তৱ কামা হি [কামেহি (সী. স্যা. পী.)], নাহং ৰজ্জেন মত্থিকো’’.

৬. ‘‘অব্ভূতি [অব্ভূ হি (সী.), অভূতি (স্যা.), অব্ভু হি (পী.)] তস্স ভো হোতি, যো অনিচ্ছন্তমিচ্ছতি;

অকামং ৰাজ কামেসি [কামেহি (সী. পী.)], অকন্তং কন্তু [অকন্তো কন্ত (সী. স্যা. পী.)] মিচ্ছসি’’.

৭. ‘‘অকামং ৱা সকামং ৱা, যো নৰো লভতে পিযং;

লাভমেত্থ পসংসাম, অলাভো তত্থ পাপকো’’.

৮. ‘‘পাসাণসাৰং খণসি, কণিকাৰস্স দাৰুনা;

ৱাতং জালেন বাধেসি, যো অনিচ্ছন্তমিচ্ছসি’’.

৯. ‘‘পাসাণো নূন তে হদযে, ওহিতো মুদুলক্খণে;

যো তে সাতং ন ৱিন্দামি, তিৰোজনপদাগতো.

১০. ‘‘যদা মং ভকুটিং [ভূকুটিং (সী. পী.)] কত্ৱা, ৰাজপুত্তী উদিক্খতি [ৰাজপুত্তি উদিক্খসি (সী. পী.)];

আড়াৰিকো তদা হোমি, ৰঞ্ঞো মদ্দস্সন্তেপুৰে [মদ্দস্স থীপুৰে (সী. পী.) এৱমুপৰিপি].

১১. ‘‘যদা উম্হযমানা মং, ৰাজপুত্তী উদিক্খতি [ৰাজপুত্তি উদিক্খসি (সী. পী.)];

নাড়াৰিকো তদা হোমি, ৰাজা হোমি তদা কুসো’’.

১২. ‘‘সচে হি ৱচনং সচ্চং, নেমিত্তানং ভৱিস্সতি;

নেৱ মে ত্ৱং পতী অস্স, কামং ছিন্দন্তু সত্তধা’’.

১৩. ‘‘সচে হি ৱচনং সচ্চং, অঞ্ঞেসং যদি ৱা মমং;

নেৱ তুয্হং পতী অত্থি, অঞ্ঞো সীহস্সৰা কুসা’’.

১৪. ‘‘নেক্খং গীৱং তে কাৰেস্সং, পত্ৱা খুজ্জে কুসাৱতিং;

সচে মং নাগনাসূৰূ, ওলোকেয্য পভাৱতী.

১৫. ‘‘নেক্খং গীৱং তে কাৰেস্সং, পত্ৱা খুজ্জে কুসাৱতিং;

সচে মং নাগনাসূৰূ, আলপেয্য পভাৱতী.

১৬. ‘‘নেক্খং গীৱং তে কাৰেস্সং, পত্ৱা খুজ্জে কুসাৱতিং;

সচে মং নাগনাসূৰূ, উম্হাযেয্য পভাৱতী.

১৭. ‘‘নেক্খং গীৱং তে কাৰেস্সং, পত্ৱা খুজ্জে কুসাৱতিং;

সচে মং নাগনাসূৰূ, পম্হাযেয্য পভাৱতী.

১৮. ‘‘নেক্খং গীৱং তে কাৰেস্সং, পত্ৱা খুজ্জে কুসাৱতিং;

সচে মে নাগনাসূৰূ, পাণীহি উপসম্ফুসে’’.

১৯. ‘‘ন হি নূনাযং ৰাজপুত্তী, কুসে সাতম্পি ৱিন্দতি;

আড়াৰিকে ভতে পোসে, ৱেতনেন অনত্থিকে’’.

২০. ‘‘ন হি নূনাযং সা [নূন অযং (সী. স্যা.)] খুজ্জা, লভতি জিৱ্হায ছেদনং;

সুনিসিতেন সত্থেন, এৱং দুব্ভাসিতং ভণং’’.

২১. ‘‘মা নং ৰূপেন পামেসি, আৰোহেন পভাৱতি;

মহাযসোতি কত্ৱান, কৰস্সু ৰুচিৰে পিযং.

২২. ‘‘মা নং ৰূপেন পামেসি, আৰোহেন পভাৱতি;

মহদ্ধনোতি কত্ৱান, কৰস্সু ৰুচিৰে পিযং.

২৩. ‘‘মা নং ৰূপেন পামেসি, আৰোহেন পভাৱতি;

মহব্বলোতি কত্ৱান, কৰস্সু ৰুচিৰে পিযং.

২৪. ‘‘মা নং ৰূপেন পামেসি, আৰোহেন পভাৱতি;

মহাৰট্ঠোতি কত্ৱান, কৰস্সু ৰুচিৰে পিযং.

২৫. ‘‘মা নং ৰূপেন পামেসি, আৰোহেন পভাৱতি;

মহাৰাজাতি কত্ৱান, কৰস্সু ৰুচিৰে পিযং.

২৬. ‘‘মা নং ৰূপেন পামেসি, আৰোহেন পভাৱতি;

সীহস্সৰোতি কত্ৱান, কৰস্সু ৰুচিৰে পিযং.

২৭. ‘‘মা নং ৰূপেন পামেসি, আৰোহেন পভাৱতি;

ৱগ্গুস্সৰোতি কত্ৱান, কৰস্সু ৰুচিৰে পিযং.

২৮. ‘‘মা নং ৰূপেন পামেসি, আৰোহেন পভাৱতি;

বিন্দুস্সৰোতি কত্ৱান, কৰস্সু ৰুচিৰে পিযং.

২৯. ‘‘মা নং ৰূপেন পামেসি, আৰোহেন পভাৱতি;

মঞ্জুস্সৰোতি কত্ৱান, কৰস্সু ৰুচিৰে পিযং.

৩০. ‘‘মা নং ৰূপেন পামেসি, আৰোহেন পভাৱতি;

মধুস্সৰোতি [মধুৰস্সৰোতি (সী.)] কত্ৱান, কৰস্সু ৰুচিৰে পিযং.

৩১. ‘‘মা নং ৰূপেন পামেসি, আৰোহেন পভাৱতি;

সতসিপ্পোতি কত্ৱান, কৰস্সু ৰুচিৰে পিযং.

৩২. ‘‘মা নং ৰূপেন পামেসি, আৰোহেন পভাৱতি;

খত্তিযোতিপি কত্ৱান [কৰিত্ৱান (সী.)], কৰস্সু ৰুচিৰে পিযং.

৩৩. ‘‘মা নং ৰূপেন পামেসি, আৰোহেন পভাৱতি;

কুসৰাজাতি কত্ৱান, কৰস্সু ৰুচিৰে পিযং’’.

৩৪. ‘‘এতে নাগা উপত্থদ্ধা, সব্বে তিট্ঠন্তি ৱম্মিতা [ৱম্মিকা (স্যা.)];

পুৰা মদ্দন্তি পাকাৰং, আনেন্তেতং পভাৱতিং’’.

৩৫. ‘‘সত্ত বিলে [খণ্ডে (সী. পী.)] কৰিত্ৱান, অহমেতং পভাৱতিং;

খত্তিযানং পদস্সামি, যে মং হন্তুং ইধাগতা’’.

৩৬. ‘‘অৱুট্ঠহি ৰাজপুত্তী, সামা কোসেয্যৱাসিনী;

অস্সুপুণ্ণেহি নেত্তেহি, দাসীগণপুৰক্খতা’’.

৩৭. ‘‘তং নূন কক্কূপনিসেৱিতং মুখং, আদাসদন্তাথৰুপচ্চৱেক্খিতং;

সুভং সুনেত্তং ৱিৰজং অনঙ্গণং, ছুদ্ধং ৱনে ঠস্সতি খত্তিযেহি.

৩৮. ‘‘তে নূন মে অসিতে ৱেল্লিতগ্গে, কেসে মুদূ চন্দনসাৰলিত্তে;

সমাকুলে সীৱথিকায মজ্ঝে, পাদেহি গিজ্ঝা পৰিকড্ঢিস্সন্তি [পৰিকড্ঢযন্তি (সী. স্যা. পী.)].

৩৯. ‘‘তা নূন মে তম্বনখা সুলোমা, বাহা মুদূ চন্দনসাৰলিত্তা;

ছিন্না ৱনে উজ্ঝিতা খত্তিযেহি, গয্হ ধঙ্কো [ৱকো (পী.)] গচ্ছতি যেন কামং.

৪০. ‘‘তে নূন তালূপনিভে অলম্বে, নিসেৱিতে কাসিকচন্দনেন;

থনেসু মে লম্বিস্সতি [লম্বহীতি (পী.)] সিঙ্গালো [সিগালো (সী. স্যা. পী.)], মাতূৱ পুত্তো তৰুণো তনূজো.

৪১. ‘‘তং নূন সোণিং পুথুলং সুকোট্টিতং, নিসেৱিতং কঞ্চনমেখলাহি;

ছিন্নং ৱনে খত্তিযেহী অৱত্থং, সিঙ্গালসঙ্ঘা পৰিকড্ঢিস্সন্তি [গয্হা ৱকো গচ্ছতি যেনকামং (পী.)].

৪২. ‘‘সোণা ধঙ্কা [ৱকা (পী.)] সিঙ্গালা চ, যে চঞ্ঞে সন্তি দাঠিনো;

অজৰা নূন হেস্সন্তি, ভক্খযিত্ৱা পভাৱতিং.

৪৩. ‘‘সচে মংসানি হৰিংসু, খত্তিযা দূৰগামিনো;

অট্ঠীনি অম্ম যাচিত্ৱা, অনুপথে দহাথ নং.

৪৪. ‘‘খেত্তানি অম্ম কাৰেত্ৱা, কণিকাৰেত্থ ৰোপয [ৰোপযে (ক.)];

যদা তে পুপ্ফিতা অস্সু, হেমন্তানং হিমচ্চযে;

সৰেয্যাথ মমং [মম (পী.)] অম্ম, এৱংৱণ্ণা পভাৱতী’’.

৪৫. ‘‘তস্সা মাতা উদট্ঠাসি, খত্তিযা দেৱৱণ্ণিনী;

দিস্ৱা অসিঞ্চ সূনঞ্চ, ৰঞ্ঞো মদ্দস্সন্তেপুৰে’’.

৪৬. ‘‘ইমিনা নূন অসিনা, সুসঞ্ঞং তনুমজ্ঝিমং;

ধীতৰং মদ্দ [মম (সী.), মদ্দো (পী.)] হন্ত্ৱান, খত্তিযানং পদস্সসি’’ [পদস্সতি (পী. ক.)].

৪৭. ‘‘ন মে অকাসি ৱচনং, অত্থকামায পুত্তিকে;

সাজ্জ লোহিতসঞ্ছন্না, গচ্ছসি [গঞ্ছিসি (সী. পী.)] যমসাধনং.

৪৮. ‘‘এৱমাপজ্জতী পোসো, পাপিযঞ্চ নিগচ্ছতি;

যো ৱে হিতানং ৱচনং, ন কৰোতি [ন কৰং (সী.)] অত্থদস্সিনং.

৪৯. ‘‘সচে চ অজ্জ [ত্ৱং অম্ম (সী.)] ধাৰেসি [ৱাৰেসি (পী.)], কুমাৰং চাৰুদস্সনং;

কুসেন জাতং খত্তিযং, সুৱণ্ণমণিমেখলং;

পূজিতং [পূজিতা (পী.)] ঞাতিসঙ্ঘেহি, ন গচ্ছসি [গঞ্ছিসি (সী. পী.)] যমক্খযং.

৫০. ‘‘যত্থস্সু ভেৰী নদতি, কুঞ্জৰো চ নিকূজতি [নিকুঞ্জতি (পী.)];

খত্তিযানং কুলে ভদ্দে, কিং নু সুখতৰং ততো.

৫১. ‘‘অস্সো চ সিসতি [অস্সো হসিসতি (সী.), অস্সো হসিযতি (স্যা.), অস্সো চ সিংসতি (পী.)] দ্ৱাৰে, কুমাৰো উপৰোদতি;

খত্তিযানং কুলে ভদ্দে, কিং নু সুখতৰং ততো.

৫২. ‘‘মযূৰকোঞ্চাভিৰুদে, কোকিলাভিনিকূজিতে;

খত্তিযানং কুলে ভদ্দে, কিং নু সুখতৰং ততো’’.

৫৩. ‘‘কহং নু সো সত্তুমদ্দনো, পৰৰট্ঠপ্পমদ্দনো;

কুসো সোড়াৰপঞ্ঞাণো, যো নো দুক্খা পমোচযে’’.

৫৪. ‘‘ইধেৱ সো সত্তুমদ্দনো, পৰৰট্ঠপ্পমদ্দনো;

কুসো সোড়াৰপঞ্ঞাণো, যো তে সব্বে ৱধিস্সতি’’ [যো নো দুক্খা পমোচযে (সী.), সো নো সব্বে ৱধিস্সতি (পী.)].

৫৫. ‘‘উম্মত্তিকা নু ভণসি, অন্ধবালা পভাসসি [আদু বালাৱ ভাসসি (সী. পী.)];

কুসো চে আগতো অস্স, কিং ন [কিন্নু (স্যা. ক.)] জানেমু তং মযং’’.

৫৬. ‘‘এসো আড়াৰিকো পোসো, কুমাৰীপুৰমন্তৰে;

দড়্হং কত্ৱান সংৱেল্লিং, কুম্ভিং ধোৱতি ওণতো’’.

৫৭. ‘‘ৱেণী ত্ৱমসি চণ্ডালী, অদূসি কুলগন্ধিনী;

কথং মদ্দকুলে জাতা, দাসং কযিৰাসি কামুকং’’.

৫৮. ‘‘নম্হি ৱেণী ন চণ্ডালী, ন চম্হি কুলগন্ধিনী;

ওক্কাকপুত্তো ভদ্দন্তে, ত্ৱং নু দাসোতি মঞ্ঞসি’’.

৫৯. ‘‘যো ব্ৰাহ্মণসহস্সানি, সদা ভোজেতি ৱীসতিং;

ওক্কাকপুত্তো ভদ্দন্তে, ত্ৱং নু দাসোতি মঞ্ঞসি’’.

৬০. ‘‘যস্স নাগসহস্সানি, সদা যোজেন্তি ৱীসতিং;

ওক্কাকপুত্তো ভদ্দন্তে, ত্ৱং নু দাসোতি মঞ্ঞসি.

৬১. ‘‘যস্স অস্সসহস্সানি, সদা যোজেন্তি ৱীসতিং;

ওক্কাকপুত্তো ভদ্দন্তে, ত্ৱং নু দাসোতি মঞ্ঞসি.

৬২. ‘‘যস্স ৰথসহস্সানি, সদা যোজেন্তি ৱীসতিং;

ওক্কাকপুত্তো ভদ্দন্তে, ত্ৱং নু দাসোতি মঞ্ঞসি.

[( ) অযং গাথা সী. পী. পোত্থকেসুযেৱ দিস্সতি] (‘‘যস্স উসভসহস্সানি, সদা যোজেন্তি ৱীসতিং;

ওক্কাকপুত্তো ভদ্দন্তে, ত্ৱং নু দাসোতি মঞ্ঞসি) [( ) অযং গাথা সী. পী. পোত্থকেসুযেৱ দিস্সতি].

৬৩. ‘‘যস্স ধেনুসহস্সানি, সদা দুহন্তি ৱীসতিং [দুয্হন্তি ৱীসতি (সী. পী.)];

ওক্কাকপুত্তো ভদ্দন্তে, ত্ৱং নু দাসোতি মঞ্ঞসি’’.

৬৪. ‘‘তগ্ঘ তে দুক্কটং বালে, যং খত্তিযং মহব্বলং;

নাগং মণ্ডূকৱণ্ণেন, ন নং [ন তং (সী. পী.)] অক্খাসিধাগতং’’ [অক্খাসি আগতং (সী.)].

৬৫. ‘‘অপৰাধং মহাৰাজ, ত্ৱং নো খম ৰথেসভ;

যং তং অঞ্ঞাতৱেসেন, নাঞ্ঞাসিম্হা ইধাগতং’’.

৬৬. ‘‘মাদিসস্স ন তং ছন্নং, যোহং আড়াৰিকো ভৱে;

ত্ৱঞ্ঞেৱ মে পসীদস্সু, নত্থি তে দেৱ দুক্কটং’’.

৬৭. ‘‘গচ্ছ বালে খমাপেহি, কুসৰাজং মহব্বলং;

খমাপিতো কুসো ৰাজা [কুসৰাজা (সব্বত্থ)], সো তে দস্সতি জীৱিতং’’.

৬৮. ‘‘পিতুস্স ৱচনং সুত্ৱা, দেৱৱণ্ণী পভাৱতী;

সিৰসা অগ্গহী পাদে, কুসৰাজং মহব্বলং’’.

৬৯. ‘‘যামা ৰত্যো অতিক্কন্তা, তামা দেৱ তযা ৱিনা;

ৱন্দে তে সিৰসা পাদে, মা মে কুজ্ঝং ৰথেসভ.

৭০. ‘‘সব্বং [সচ্চং (সী. স্যা. পী.)] তে পটিজানামি, মহাৰাজ সুণোহি মে;

ন চাপি অপ্পিযং তুয্হং, কৰেয্যামি অহং পুন.

৭১. ‘‘এৱং চে যাচমানায, ৱচনং মে ন কাহসি;

ইদানি মং তাতো হন্ত্ৱা, খত্তিযানং পদস্সতি’’.

৭২. ‘‘এৱং তে যাচমানায, কিং ন কাহামি তে ৱচো;

ৱিকুদ্ধো ত্যস্মি কল্যাণি, মা ত্ৱং ভাযি পভাৱতি.