৫২৭. উম্মাদন্তীজাতকং (২)

৫৭. ‘‘নিৱেসনং কস্স নুদং সুনন্দ, পাকাৰেন পণ্ডুমযেন গুত্তং;

কা দিস্সতি অগ্গিসিখাৱ দূৰে, ৱেহাযসং [ৱেহাসযং (সী. পী.)] পব্বতগ্গেৱ অচ্চি.

৫৮. ‘‘ধীতা ন্ৱযং [নযং (সী. পী.), ন্ৱাযং (স্যা.)] কস্স সুনন্দ হোতি, সুণিসা ন্ৱযং [নযং (সী. পী.), ন্ৱাযং (স্যা.)] কস্স অথোপি ভৰিযা;

অক্খাহি মে খিপ্পমিধেৱ পুট্ঠো, অৱাৱটা যদি ৱা অত্থি ভত্তা’’.

৫৯. ‘‘অহঞ্হি জানামি জনিন্দ এতং, মত্যা চ পেত্যা চ অথোপি অস্সা;

তৱেৱ সো পুৰিসো ভূমিপাল, ৰত্তিন্দিৱং অপ্পমত্তো তৱত্থে.

৬০. ‘‘ইদ্ধো চ ফীতো চ সুৱড্ঢিতো [সুবাড়্হিকো (পী.)] চ, অমচ্চো চ তে অঞ্ঞতৰো জনিন্দ;

তস্সেসা ভৰিযাভিপাৰকস্স [অহিপাৰকস্স (সী. পী.), অভিপাদকস্স (ক.)], উম্মাদন্তী [উম্মাদন্তীতি (ক.)] নামধেয্যেন ৰাজ’’.

৬১. ‘‘অম্ভো অম্ভো নামমিদং ইমিস্সা, মত্যা চ পেত্যা চ কতং সুসাধু;

তদা [তথা (সী. স্যা. পী.)] হি ময্হং অৱলোকযন্তী, উম্মত্তকং উম্মদন্তী অকাসি’’.

৬২. ‘‘যা পুণ্ণমাসে [পুণ্ণমাযে (ক.)] মিগমন্দলোচনা, উপাৱিসি পুণ্ডৰীকত্তচঙ্গী;

দ্ৱে পুণ্ণমাযো তদহূ অমঞ্ঞহং, দিস্ৱান পাৰাৱতৰত্তৱাসিনিং.

৬৩. ‘‘অড়াৰপম্হেহি সুভেহি ৱগ্গুভি, পলোভযন্তী মং যদা উদিক্খতি;

ৱিজম্ভমানা হৰতেৱ মে মনো, জাতা ৱনে কিম্পুৰিসীৱ পব্বতে.

৬৪. ‘‘তদা হি ব্ৰহতী সামা, আমুত্তমণিকুণ্ডলা;

একচ্চৱসনা নাৰী, মিগী ভন্তাৱুদিক্খতি.

৬৫. ‘‘কদাস্সু মং তম্বনখা সুলোমা, বাহামুদূ চন্দনসাৰলিত্তা;

ৱট্টঙ্গুলী সন্নতধীৰকুত্তিযা, নাৰী উপঞ্ঞিস্সতি সীসতো সুভা.

৬৬. ‘‘কদাস্সু মং কঞ্চনজালুৰচ্ছদা, ধীতা তিৰীটিস্স ৱিলগ্গমজ্ঝা;

মুদূহি বাহাহি পলিস্সজিস্সতি, ব্ৰহাৱনে জাতদুমংৱ মালুৱা.

৬৭. ‘‘কদাস্সু [কদাস্সু মং (স্যা. ক.)] লাখাৰসৰত্তসুচ্ছৱী, বিন্দুত্থনী পুণ্ডৰীকত্তচঙ্গী;

মুখং মুখেন উপনামযিস্সতি, সোণ্ডোৱ সোণ্ডস্স সুৰায থালং.

৬৮. ‘‘যদাদ্দসং [যথাদ্দসং (পী.)] তং তিট্ঠন্তিং, সব্বভদ্দং [সব্বগত্তং (সী. স্যা. পী.)] মনোৰমং;

ততো সকস্স চিত্তস্স, নাৱবোধামি কঞ্চিনং [কিঞ্চিনং (ক.), কিঞ্চনং (পী.)].

৬৯. ‘‘উম্মাদন্তিমহং দট্ঠা [দিট্ঠা (সী. স্যা. পী. ক.)], আমুত্তমণিকুণ্ডলং;

ন সুপামি দিৱাৰত্তিং, সহস্সংৱ পৰাজিতো.

৭০. ‘‘সক্কো চে [চ (সী. পী.)] মে ৱৰং দজ্জা, সো চ লব্ভেথ মে ৱৰো;

একৰত্তং দ্ৱিৰত্তং [দিৰত্তং (পী.)] ৱা, ভৱেয্যং অভিপাৰকো;

উম্মাদন্ত্যা ৰমিত্ৱান, সিৱিৰাজা ততো সিযং’’ [সিযা (স্যা. পী.)].

৭১. ‘‘ভূতানি মে ভূতপতী নমস্সতো, আগম্ম যক্খো ইদমেতদব্ৰৱি;

ৰঞ্ঞো মনো উম্মদন্ত্যা নিৱিট্ঠো, দদামি তে তং পৰিচাৰযস্সু’’.

৭২. ‘‘পুঞ্ঞা ৱিধংসে অমৰো ন চম্হি, জনো চ মে পাপমিদঞ্চ [পাপমিদন্তি (সী. পী.)] জঞ্ঞা;

ভুসো চ ত্যস্স মনসো ৱিঘাতো, দত্ৱা পিযং উম্মদন্তিং অদট্ঠা’’.

৭৩. ‘‘জনিন্দ নাঞ্ঞত্ৰ তযা মযা ৱা, সব্বাপি কম্মস্স কতস্স জঞ্ঞা;

যং তে মযা উম্মদন্তী পদিন্না, ভুসেহি ৰাজা ৱনথং সজাহি’’.

৭৪. ‘‘যো পাপকং কম্ম কৰং মনুস্সো, সো মঞ্ঞতি মাযিদ [মাযিধ (ক.)] মঞ্ঞিংসু অঞ্ঞে;

পস্সন্তি ভূতানি কৰোন্তমেতং, যুত্তা চ যে হোন্তি নৰা পথব্যা.

৭৫. ‘‘অঞ্ঞো নু তে কোচি [কোধ (পী.)] নৰো পথব্যা, সদ্ধেয্য [সদ্দহেয্য (সী.)] লোকস্মি ন মে পিযাতি;

ভুসো চ ত্যস্স মনসো ৱিঘাতো, দত্ৱা পিযং উম্মদন্তিং অদট্ঠা’’.

৭৬. ‘‘অদ্ধা পিযা ময্হ জনিন্দ এসা, ন সা মমং অপ্পিযা ভূমিপাল;

গচ্ছেৱ ত্ৱং উম্মদন্তিং ভদন্তে, সীহোৱ সেলস্স গুহং উপেতি’’.

৭৭. ‘‘ন পীড়িতা অত্তদুখেন ধীৰা, সুখপ্ফলং কম্ম পৰিচ্চজন্তি;

সম্মোহিতা ৱাপি সুখেন মত্তা, ন পাপকম্মঞ্চ [পাপকং কম্ম (পী.)] সমাচৰন্তি’’.

৭৮. ‘‘তুৱঞ্হি মাতা চ পিতা চ ময্হং, ভত্তা পতী পোসকো দেৱতা চ;

দাসো অহং তুয্হ সপুত্তদাৰো, যথাসুখং সামি [সিব্ব (সী.), সীৱি (স্যা.)] কৰোহি কামং’’.

৭৯. ‘‘যো ইস্সৰোম্হীতি কৰোতি পাপং, কত্ৱা চ সো নুত্তসতে [নুত্তপতে (পী.)] পৰেসং;

ন তেন সো জীৱতি দীঘমাযু [দীঘমাযুং (সী. স্যা.)], দেৱাপি পাপেন সমেক্খৰে নং.

৮০. ‘‘অঞ্ঞাতকং সামিকেহী পদিন্নং, ধম্মে ঠিতা যে পটিচ্ছন্তি দানং;

পটিচ্ছকা দাযকা চাপি তত্থ, সুখপ্ফলঞ্ঞেৱ কৰোন্তি কম্মং’’.

৮১. ‘‘অঞ্ঞো নু তে কোচি নৰো পথব্যা, সদ্ধেয্য লোকস্মি ন মে পিযাতি;

ভুসো চ ত্যস্স মনসো ৱিঘাতো, দত্ৱা পিযং উম্মদন্তিং অদট্ঠা’’.

৮২. ‘‘অদ্ধা পিযা ময্হ জনিন্দ এসা, ন সা মমং অপ্পিযা ভূমিপাল;

যং তে মযা উম্মদন্তী পদিন্না, ভুসেহি ৰাজা ৱনথং সজাহি’’.

৮৩. ‘‘যো অত্তদুক্খেন পৰস্স দুক্খং, সুখেন ৱা অত্তসুখং দহাতি;

যথেৱিদং ময্হ তথা পৰেসং, যো [সো (পী.)] এৱং জানাতি [পজানাতি (ক.)] স ৱেদি ধম্মং.

৮৪. ‘‘অঞ্ঞো নু তে কোচি নৰো পথব্যা, সদ্ধেয্য লোকস্মি ন মে পিযাতি;

ভুসো চ ত্যস্স মনসো ৱিঘাতো, দত্ৱা পিযং উম্মদন্তিং অদট্ঠা’’.

৮৫. ‘‘জনিন্দ জানাসি পিযা মমেসা, ন সা মমং অপ্পিযা ভূমিপাল;

পিযেন তে দম্মি পিযং জনিন্দ, পিযদাযিনো দেৱ পিযং লভন্তি’’.

৮৬. ‘‘সো নূনাহং ৱধিস্সামি, অত্তানং কামহেতুকং;

ন হি ধম্মং অধম্মেন, অহং ৱধিতুমুস্সহে’’.

৮৭. ‘‘সচে তুৱং ময্হ সতিং [সন্তি (ক.)] জনিন্দ, ন কামযাসি নৰৱীৰ সেট্ঠ;

চজামি নং সব্বজনস্স সিব্যা [সিব্ব (সী. পী.), মজ্ঝে (স্যা.)], মযা পমুত্তং ততো অৱ্হযেসি [অৱ্হযাসি (ক.)] নং’’.

৮৮. ‘‘অদূসিযং চে অভিপাৰক ত্ৱং, চজাসি কত্তে অহিতায ত্যস্স;

মহা চ তে উপৱাদোপি অস্স, ন চাপি ত্যস্স নগৰম্হি পক্খো’’.

৮৯. ‘‘অহং সহিস্সং উপৱাদমেতং, নিন্দং পসংসং গৰহঞ্চ সব্বং;

মমেতমাগচ্ছতু ভূমিপাল, যথাসুখং সিৱি [সিব্ব (সী. পী.)] কৰোহি কামং’’.

৯০. ‘‘যো নেৱ নিন্দং ন পনপ্পসংসং, আদিযতি গৰহং নোপি পূজং;

সিৰী চ লক্খী চ অপেতি তম্হা, আপো সুৱুট্ঠীৱ যথা থলম্হা’’.

৯১. ‘‘যং কিঞ্চি দুক্খঞ্চ সুখঞ্চ এত্তো, ধম্মাতিসাৰঞ্চ মনোৱিঘাতং;

উৰসা অহং পচ্চুত্তৰিস্সামি [পটিচ্ছিস্সামি (সী. স্যা.), পচ্চুপদিস্সামি (পী.)] সব্বং, পথৱী যথা থাৱৰানং তসানং’’.

৯২. ‘‘ধম্মাতিসাৰঞ্চ মনোৱিঘাতং, দুক্খঞ্চ নিচ্ছামি অহং পৰেসং;

একোৱিমং হাৰযিস্সামি ভাৰং, ধম্মে ঠিতো কিঞ্চি অহাপযন্তো’’.

৯৩. ‘‘সগ্গূপগং পুঞ্ঞকম্মং জনিন্দ, মা মে তুৱং অন্তৰাযং অকাসি;

দদামি তে উম্মদন্তিং পসন্নো, ৰাজাৱ যঞ্ঞে ধনং ব্ৰাহ্মণানং’’.

৯৪. ‘‘অদ্ধা তুৱং কত্তে হিতেসি ময্হং, সখা মমং উম্মদন্তী তুৱঞ্চ;

নিন্দেয্যু দেৱা পিতৰো চ সব্বে, পাপঞ্চ পস্সং অভিসম্পৰাযং’’.

৯৫. ‘‘ন হেতধম্মং সিৱিৰাজ ৱজ্জুং, সনেগমা জানপদা চ সব্বে;

যং তে মযা উম্মদন্তী পদিন্না, ভুসেহি ৰাজা ৱনথং সজাহি’’.

৯৬. ‘‘অদ্ধা তুৱং কত্তে হিতেসি ময্হং, সখা মমং উম্মদন্তী তুৱঞ্চ;

সতঞ্চ ধম্মানি সুকিত্তিতানি, সমুদ্দৱেলাৱ দুৰচ্চযানি’’.

৯৭. ‘‘আহুনেয্যো মেসি হিতানুকম্পী, ধাতা ৱিধাতা চসি কামপালো;

তযী হুতা ৰাজ মহপ্ফলা হি [মহপ্ফলা হি মে (পী.)], কামেন মে উম্মদন্তিং পটিচ্ছ’’.

৯৮. ‘‘অদ্ধা হি সব্বং অভিপাৰক ত্ৱং, ধম্মং অচাৰী মম কত্তুপুত্ত;

অঞ্ঞো নু তে কো ইধ সোত্থিকত্তা, দ্ৱিপদো নৰো অৰুণে জীৱলোকে’’.

৯৯. ‘‘তুৱং নু সেট্ঠো ত্ৱমনুত্তৰোসি, ত্ৱং ধম্মগূ [ধম্মগুত্তো (সী.)] ধম্মৱিদূ সুমেধো;

সো ধম্মগুত্তো চিৰমেৱ জীৱ, ধম্মঞ্চ মে দেসয ধম্মপাল’’.

১০০. ‘‘তদিঙ্ঘ অভিপাৰক, সুণোহি ৱচনং মম;

ধম্মং তে দেসযিস্সামি, সতং আসেৱিতং অহং.

১০১. ‘‘সাধু ধম্মৰুচি ৰাজা, সাধু পঞ্ঞাণৱা নৰো;

সাধু মিত্তানমদ্দুব্ভো, পাপস্সাকৰণং সুখং.

১০২. ‘‘অক্কোধনস্স ৱিজিতে, ঠিতধম্মস্স ৰাজিনো;

সুখং মনুস্সা আসেথ, সীতচ্ছাযায সঙ্ঘৰে.

১০৩. ‘‘ন চাহমেতং অভিৰোচযামি, কম্মং অসমেক্খকতং অসাধু;

যে ৱাপি ঞত্ৱান সযং কৰোন্তি, উপমা ইমা ময্হং তুৱং সুণোহি.

১০৪. ‘‘গৱং চে তৰমানানং, জিম্হং গচ্ছতি পুঙ্গৱো;

সব্বা তা জিম্হং গচ্ছন্তি, নেত্তে জিম্হং গতে সতি.

১০৫. ‘‘এৱমেৱ [এৱমেৱং (পী.)] মনুস্সেসু, যো হোতি সেট্ঠসম্মতো;

সো চে অধম্মং চৰতি, পগেৱ ইতৰা পজা;

সব্বং ৰট্ঠং দুখং সেতি, ৰাজা চে হোতি অধম্মিকো.

১০৬. ‘‘গৱং চে তৰমানানং, উজুং গচ্ছতি পুঙ্গৱো;

সব্বা গাৱী উজুং যন্তি, নেত্তে উজুং গতে সতি.

১০৭. ‘‘এৱমেৱ মনুস্সেসু, যো হোতি সেট্ঠসম্মতো;

সো সচে ধম্মং চৰতি, পগেৱ ইতৰা পজা;

সব্বং ৰট্ঠং সুখং সেতি, ৰাজা চে হোতি ধম্মিকো.

১০৮. ‘‘ন চাপাহং অধম্মেন, অমৰত্তমভিপত্থযে;

ইমং ৱা পথৱিং সব্বং, ৱিজেতুং অভিপাৰক.

১০৯. ‘‘যঞ্হি কিঞ্চি মনুস্সেসু, ৰতনং ইধ ৱিজ্জতি;

গাৱো দাসো হিৰঞ্ঞঞ্চ, ৱত্থিযং হৰিচন্দনং.

১১০. ‘‘অস্সিত্থিযো [অস্সিত্থিযো চ (সী.)] ৰতনং মণিকঞ্চ, যঞ্চাপি মে চন্দসূৰিযা অভিপালযন্তি;

ন তস্স হেতু ৱিসমং চৰেয্যং, মজ্ঝে সিৱীনং উসভোম্হি জাতো.

১১১. ‘‘নেতা হিতা [নেতাভি তা (সী.)] উগ্গতো ৰট্ঠপালো, ধম্মং সিৱীনং অপচাযমানো;

সো ধম্মমেৱানুৱিচিন্তযন্তো, তস্মা সকে চিত্তৱসে ন ৱত্তো’’.

১১২. ‘‘অদ্ধা তুৱং মহাৰাজ, নিচ্চং অব্যসনং সিৱং;

কৰিস্সসি চিৰং ৰজ্জং, পঞ্ঞা হি তৱ তাদিসী.

১১৩. ‘‘এতং তে অনুমোদাম, যং ধম্মং নপ্পমজ্জসি;

ধম্মং পমজ্জ খত্তিযো, ৰট্ঠা [ঠানা (সী.)] চৱতি ইস্সৰো.

১১৪. ‘‘ধম্মং চৰ মহাৰাজ, মাতাপিতূসু খত্তিয;

ইধ ধম্মং চৰিত্ৱান, ৰাজ সগ্গং গমিস্সসি.

১১৫. ‘‘ধম্মং চৰ মহাৰাজ, পুত্তদাৰেসু খত্তিয…পে….

১১৬. ‘‘ধম্মং চৰ মহাৰাজ, মিত্তামচ্চেসু খত্তিয…পে….

১১৭. ‘‘ধম্মং চৰ মহাৰাজ, ৱাহনেসু বলেসু চ…পে….

১১৮. ‘‘ধম্মং চৰ মহাৰাজ, গামেসু নিগমেসু চ…পে….

১১৯. ‘‘ধম্মং চৰ মহাৰাজ, ৰট্ঠেসু জনপদেসু চ…পে….

১২০. ‘‘ধম্মং চৰ মহাৰাজ, সমণব্ৰাহ্মণেসু চ…পে….

১২১. ‘‘ধম্মং চৰ মহাৰাজ, মিগপক্খীসু খত্তিয…পে….

১২২. ‘‘ধম্মং চৰ মহাৰাজ, ধম্মো চিণ্ণো সুখাৱহো;

ইধ ধম্মং চৰিত্ৱান, ৰাজ সগ্গং গমিস্সসি.

১২৩. ‘‘ধম্মং চৰ মহাৰাজ, সইন্দা দেৱা সব্ৰহ্মকা;

সুচিণ্ণেন দিৱং পত্তা, মা ধম্মং ৰাজ পামদো’’তি.

উম্মাদন্তীজাতকং দুতিযং.