৫২৫. চূড়সুতসোমজাতকং (৫)

১৯৫. ‘‘আমন্তযামি নিগমং, মিত্তামচ্চে পৰিস্সজে [পাৰিসজ্জে (সী. স্যা.)];

সিৰস্মিং পলিতং জাতং, পব্বজ্জং দানি ৰোচহং’’.

১৯৬. ‘‘অভুম্মে কথং নু ভণসি, সল্লং মে দেৱ উৰসি কপ্পেসি [কম্পেসি (পী.)];

সত্তসতা তে ভৰিযা, কথং নু তে তা ভৱিস্সন্তি’’.

১৯৭. ‘‘পঞ্ঞাযিহিন্তি এতা, দহৰা অঞ্ঞম্পি তা গমিস্সন্তি;

সগ্গঞ্চস্স পত্থযানো, তেন অহং পব্বজিস্সামি’’.

১৯৮. ‘‘দুল্লদ্ধং মে আসি সুতসোম, যস্স তে হোমহং মাতা;

যং মে ৱিলপন্তিযা, অনপেক্খো পব্বজসি দেৱ.

১৯৯. ‘‘দুল্লদ্ধং মে আসি সুতসোম, যং তং অহং ৱিজাযিস্সং;

যং মে ৱিলপন্তিযা, অনপেক্খো পব্বজসি দেৱ’’.

২০০. ‘‘কো নামেসো ধম্মো, সুতসোম কা চ নাম পব্বজ্জা;

যং নো অম্হে জিণ্ণে, অনপেক্খো পব্বজসি দেৱ.

২০১. ‘‘পুত্তাপি তুয্হং বহৱো, দহৰা অপ্পত্তযোব্বনা;

মঞ্জূ তেপি [তে (সী. পী.)] তং অপস্সন্তা, মঞ্ঞে দুক্খং নিগচ্ছন্তি’’.

২০২. ‘‘পুত্তেহি চ মে এতেহি, দহৰেহি অপ্পত্তযোব্বনেহি;

মঞ্জূহি সব্বেহিপি তুম্হেহি, চিৰম্পি ঠত্ৱা ৱিনাসভাৱো’’ [ৱিনাভাৱো (সী. স্যা. পী.)].

২০৩. ‘‘ছিন্নং নু তুয্হং হদযং, অদু তে [আদু (সী. পী.), আদূ (স্যা.)] কৰুণা চ নত্থি অম্হেসু;

যং নো ৱিকন্দন্তিযো [ৱিক্কন্দন্তিযো (সী.)], অনপেক্খো পব্বজসি দেৱ’’.

২০৪. ‘‘ন চ ময্হং ছিন্নং হদযং, অত্থি কৰুণাপি ময্হং তুম্হেসু;

সগ্গঞ্চ পত্থযানো, তেন অহং [তেনাহং (সী. স্যা.), তেনমহং (পী.)] পব্বজিস্সামি’’.

২০৫. ‘‘দুল্লদ্ধং মে আসি, সুতসোম যস্স তে অহং ভৰিযা;

যং মে ৱিলপন্তিযা, অনপেক্খো পব্বজসি দেৱ.

২০৬. ‘‘দুল্লদ্ধং মে আসি, সুতসোম যস্স তে অহং ভৰিযা;

যং মে কুচ্ছিপটিসন্ধিং [মং কুচ্ছিমতিং সন্তিং (পী.)], অনপেক্খো পব্বজসি দেৱ.

২০৭. ‘‘পৰিপক্কো মে গব্ভো, কুচ্ছিগতো যাৱ নং ৱিজাযামি;

মাহং একা ৱিধৱা, পচ্ছা দুক্খানি অদ্দক্খিং’’.

২০৮. ‘‘পৰিপক্কো তে গব্ভো, কুচ্ছিগতো ইঙ্ঘ ত্ৱং [ত্ৱ (সী.), নং (পী.)] ৱিজাযস্সু;

পুত্তং অনোমৱণ্ণং, তং হিত্ৱা পব্বজিস্সামি’’.

২০৯. ‘‘মা ত্ৱং চন্দে ৰুদি, মা সোচি ৱনতিমিৰমত্তক্খি;

আৰোহ ৱৰপাসাদং [চ পাসাদং (পী.)], অনপেক্খো অহং গমিস্সামি’’.

২১০. ‘‘কো তং অম্ম কোপেসি, কিং ৰোদসি পেক্খসি চ মং বাড়্হং;

কং অৱজ্ঝং ঘাতেমি [ঘাতেমি কং অৱজ্ঝং (পী.), তং অৱজ্ঝং ঘাতেমি (ক.)], ঞাতীনং উদিক্খমানানং’’.

২১১. ‘‘ন হি সো সক্কা হন্তুং, ৱিজিতাৱী [জীৱিতাৱী (পী.)] যো মং তাত কোপেসি;

পিতা তে মং তাত অৱচ, অনপেক্খো অহং গমিস্সামি’’.

২১২. ‘‘যোহং পুব্বে নিয্যামি, উয্যানং মত্তকুঞ্জৰে চ যোধেমি;

সুতসোমে পব্বজিতে, কথং নু দানি কৰিস্সামি’’.

২১৩. ‘‘মাতুচ্চ [মাতু চ (সী. স্যা.)] মে ৰুদন্ত্যা [ৰুদত্যা (পী.)], জেট্ঠস্স চ ভাতুনো অকামস্স;

হত্থেপি তে গহেস্সং, ন হি গচ্ছসি [গঞ্ছিসি (পী.)] নো অকামানং’’.

২১৪. ‘‘উট্ঠেহি ত্ৱং ধাতি, ইমং কুমাৰং ৰমেহি অঞ্ঞত্থ;

মা মে পৰিপন্থমকাসি [মকা (সী. পী.)], সগ্গং মম পত্থযানস্স’’.

২১৫. ‘‘যং নূনিমং দদেয্যং [জহেয্যং (পী.)] পভঙ্কৰং, কো নু মে ইমিনাত্থো [কো নু মে ইমিনা অত্থো (সী. স্যা.), কো নু মে নত্থো (পী.)];

সুতসোমে পব্বজিতে, কিং নু মেনং কৰিস্সামি’’.

২১৬. ‘‘কোসো চ তুয্হং ৱিপুলো, কোট্ঠাগাৰঞ্চ তুয্হং পৰিপূৰং;

পথৱী চ তুয্হং ৱিজিতা, ৰমস্সু মা পব্বজি [পব্বজস্সু (সী.), পব্বজ (পী.)] দেৱ’’.

২১৭. ‘‘কোসো চ ময্হং ৱিপুলো, কোট্ঠাগাৰঞ্চ ময্হং পৰিপূৰং;

পথৱী চ ময্হং ৱিজিতা, তং হিত্ৱা পব্বজিস্সামি’’.

২১৮. ‘‘ময্হম্পি ধনং পহূতং, সঙ্খাতুং [সঙ্খ্যাতুং (সী.)] নোপি দেৱ সক্কোমি;

তং তে দদামি সব্বম্পি [তং দেৱ তে দদামি সব্বম্পি (সী.), তং তে দদামি সব্বং (পী.)], ৰমস্সু মা পব্বজি দেৱ’’.

২১৯. ‘‘জানামি [জানামি তে (সী. স্যা.)] ধনং পহূতং, কুলৱদ্ধন পূজিতো তযা চস্মি;

সগ্গঞ্চ পত্থযানো, তেন অহং পব্বজিস্সামি’’.

২২০. ‘‘উক্কণ্ঠিতোস্মি বাড়্হং, অৰতি মং সোমদত্ত আৱিসতি [আৱীসতি (ক.)];

বহুকাপি [বহুকা হি (সী. স্যা.)] মে অন্তৰাযা, অজ্জেৱাহং পব্বজিস্সামি’’.

২২১. ‘‘ইদঞ্চ তুয্হং ৰুচিতং, সুতসোম অজ্জেৱ দানি ত্ৱং পব্বজ;

অহম্পি পব্বজিস্সামি, ন উস্সহে তযা ৱিনা অহং ঠাতুং’’.

২২২. ‘‘ন হি সক্কা পব্বজিতুং, নগৰে ন হি পচ্চতি জনপদে চ’’;

‘‘সুতসোমে পব্বজিতে, কথং নু দানি কৰিস্সাম’’.

২২৩. ‘‘উপনীযতিদং মঞ্ঞে, পৰিত্তং উদকংৱ চঙ্কৱাৰম্হি;

এৱং সুপৰিত্তকে জীৱিতে, ন চ পমজ্জিতুং কালো.

২২৪. ‘‘উপনীযতিদং মঞ্ঞে, পৰিত্তং উদকংৱ চঙ্কৱাৰম্হি;

এৱং সুপৰিত্তকে জীৱিতে, অন্ধবালা [অথ বালা (সী. স্যা. পী.)] পমজ্জন্তি.

২২৫. ‘‘তে ৱড্ঢযন্তি নিৰযং, তিৰচ্ছানযোনিঞ্চ পেত্তিৱিসযঞ্চ;

তণ্হায বন্ধনবদ্ধা, ৱড্ঢেন্তি অসুৰকাযং’’.

২২৬. ‘‘ঊহঞ্ঞতে ৰজগ্গং, অৱিদূৰে পুব্বকম্হি চ [পুপ্ফকম্হি চ (সী. পী.)] পাসাদে;

মঞ্ঞে নো কেসা ছিন্না, যসস্সিনো ধম্মৰাজস্স’’.

২২৭. ‘‘অযমস্স পাসাদো, সোৱণ্ণ [সোৱণ্ণো (পী.)] পুপ্ফমাল্যৱীতিকিণ্ণো;

যহি [যম্হি (পী.)] মনুৱিচৰি ৰাজা, পৰিকিণ্ণো ইত্থাগাৰেহি.

২২৮. ‘‘অযমস্স পাসাদো, সোৱণ্ণপুপ্ফমাল্যৱীতিকিণ্ণো;

যহিমনুৱিচৰি ৰাজা, পৰিকিণ্ণো ঞাতিসঙ্ঘেন.

২২৯. ‘‘ইদমস্স কূটাগাৰং, সোৱণ্ণপুপ্ফমাল্যৱীতিকিণ্ণং;