৫২৪. সঙ্খপালজাতকং (৪)

১৪৩. ‘‘অৰিযাৱকাসোসি পসন্ননেত্তো, মঞ্ঞে ভৱং পব্বজিতো কুলম্হা;

কথং নু ৱিত্তানি পহায ভোগে, পব্বজি নিক্খম্ম ঘৰা সপঞ্ঞ’’ [সপঞ্ঞো (স্যা.), সপঞ্ঞা (পী.)].

১৪৪. ‘‘সযং ৱিমানং নৰদেৱ দিস্ৱা, মহানুভাৱস্স মহোৰগস্স;

দিস্ৱান পুঞ্ঞান মহাৱিপাকং, সদ্ধাযহং পব্বজিতোম্হি ৰাজ’’.

১৪৫. ‘‘ন কামকামা ন ভযা ন দোসা, ৱাচং মুসা পব্বজিতা ভণন্তি;

অক্খাহি মে পুচ্ছিতো এতমত্থং, সুত্ৱান মে জাযিহিতিপ্পসাদো’’.

১৪৬. ‘‘ৱাণিজ্জ [ৱণিজ্জ (পী.)] ৰট্ঠাধিপ গচ্ছমানো, পথে অদ্দসাসিম্হি ভোজপুত্তে [মিলাচপুত্তে (সী. পী.)];

পৱদ্ধকাযং উৰগং মহন্তং, আদায গচ্ছন্তে পমোদমানে’’.

১৪৭. ‘‘সোহং সমাগম্ম জনিন্দ তেহি, পহট্ঠলোমো অৱচম্হি ভীতো;

কুহিং অযং নীযতি [নিয্যতি (ক.)] ভীমকাযো, নাগেন কিং কাহথ ভোজপুত্তা.

১৪৮. ‘‘নাগো অযং নীযতি ভোজনত্থা [ভোজনত্থং (সী. স্যা. পী.)], পৱদ্ধকাযো উৰগো মহন্তো;

সাদুঞ্চ থূলঞ্চ মুদুঞ্চ মংসং, ন ত্ৱং ৰসঞ্ঞাসি ৱিদেহপুত্ত.

১৪৯. ‘‘ইতো মযং গন্ত্ৱা সকং নিকেতং [নিকেতনং (পী.)], আদায সত্থানি ৱিকোপযিত্ৱা;

মংসানি ভোক্খাম [ভক্খাম (স্যা.)] পমোদমানা, মযঞ্হি ৱে সত্তৱো পন্নগানং.

১৫০. ‘‘সচে অযং নীযতি ভোজনত্থা, পৱদ্ধকাযো উৰগো মহন্তো;

দদামি ৱো বলিবদ্দানি [বলিৱদ্দানি (পী.)] সোড়স, নাগং ইমং মুঞ্চথ বন্ধনস্মা.

১৫১. ‘‘অদ্ধা হি নো ভক্খো অযং মনাপো, বহূ চ নো উৰগা ভুত্তপুব্বা [বহুং চ নো উৰগো ভুত্তপুব্বো (ক.)];

কৰোম তে তং ৱচনং অড়াৰ [আড়াৰ (ক.) এৱমুপৰিপি], মিত্তঞ্চ নো হোহি ৱিদেহপুত্ত.

১৫২. ‘‘তদস্সু তে বন্ধনা মোচযিংসু, যং নত্থুতো পটিমোক্কস্স পাসে;

মুত্তো চ সো বন্ধনা নাগৰাজা, পক্কামি পাচীনমুখো মুহুত্তং.

১৫৩. ‘‘গন্ত্ৱান পাচীনমুখো মুহুত্তং, পুণ্ণেহি নেত্তেহি পলোকযী মং;

তদাস্সহং পিট্ঠিতো অন্ৱগচ্ছিং, দসঙ্গুলিং অঞ্জলিং পগ্গহেত্ৱা.

১৫৪. ‘‘গচ্ছেৱ খো ত্ৱং তৰমানৰূপো, মা তং অমিত্তা পুনৰগ্গহেসুং;

দুক্খো হি লুদ্দেহি পুনা সমাগমো, অদস্সনং ভোজপুত্তান গচ্ছ.

১৫৫. ‘‘অগমাসি সো ৰহদং ৱিপ্পসন্নং, নীলোভাসং ৰমণীযং সুতিত্থং;

সমোততং [সমোনতং (স্যা. ক.)] জম্বুহি ৱেতসাহি, পাৱেক্খি নিত্তিণ্ণভযো পতীতো.

১৫৬. ‘‘সো তং পৱিস্স ন চিৰস্স নাগো, দিব্বেন মে পাতুৰহুং জনিন্দ;

উপট্ঠহী মং পিতৰংৱ পুত্তো, হদযঙ্গমং কণ্ণসুখং ভণন্তো.

১৫৭. ‘‘ত্ৱং মেসি মাতা চ পিতা [পিতা চ (পী.)] অড়াৰ, অব্ভন্তৰো পাণদদো সহাযো;

সকঞ্চ ইদ্ধিং পটিলাভকোস্মি [পটিলাভিতোস্মি (পী.)], অড়াৰ পস্স মে নিৱেসনানি;

পহূতভক্খং বহুঅন্নপানং, মসক্কসাৰং ৱিয ৱাসৱস্স’’.

১৫৮. ‘‘তং ভূমিভাগেহি উপেতৰূপং, অসক্খৰা চেৱ মুদূ সুভা চ;

নীচত্তিণা [নীচা তিণা (স্যা. পী.)] অপ্পৰজা চ ভূমি, পাসাদিকা যত্থ জহন্তি সোকং.

১৫৯. ‘‘অনাৱকুলা ৱেড়ুৰিযূপনীলা, চতুদ্দিসং অম্বৱনং সুৰম্মং;

পক্কা চ পেসী চ ফলা সুফুল্লা, নিচ্চোতুকা ধাৰযন্তী ফলানি.

১৬০. ‘‘তেসং ৱনানং নৰদেৱ মজ্ঝে, নিৱেসনং ভস্সৰসন্নিকাসং;

ৰজতগ্গড়ং সোৱণ্ণমযং উড়াৰং, ওভাসতী ৱিজ্জুৰিৱন্তলিক্খে.

১৬১. ‘‘মণীমযা সোণ্ণমযা [সোৱণ্ণমযা (সী. স্যা. পী.)] উড়াৰা, অনেকচিত্তা সততং সুনিম্মিতা;

পৰিপূৰা কঞ্ঞাহি অলঙ্কতাভি, সুৱণ্ণকাযূৰধৰাহি ৰাজ.

১৬২. ‘‘সো সঙ্খপালো তৰমানৰূপো, পাসাদমাৰুয্হ অনোমৱণ্ণো;

সহস্সথম্ভং অতুলানুভাৱং, যত্থস্স ভৰিযা মহেসী অহোসি.

১৬৩. ‘‘একা চ নাৰী তৰমানৰূপা, আদায ৱেড়ুৰিযমযং মহগ্ঘং;

সুভং মণিং জাতিমন্তূপপন্নং, অচোদিতা আসনমব্ভিহাসি.

১৬৪. ‘‘ততো মং উৰগো হত্থে গহেত্ৱা, নিসীদযী পামুখআসনস্মিং;

ইদমাসনং অত্ৰ ভৱং নিসীদতু, ভৱঞ্হি মে অঞ্ঞতৰো গৰূনং.

১৬৫. ‘‘অঞ্ঞা চ নাৰী তৰমানৰূপা, আদায ৱাৰিং উপসঙ্কমিত্ৱা;

পাদানি পক্খালযী মে জনিন্দ, ভৰিযাৱ [ভৰিযা চ (পী.)] ভত্তূ পতিনো পিযস্স.

১৬৬. ‘‘অপৰা চ নাৰী তৰমানৰূপা, পগ্গয্হ সোৱণ্ণমযায [সোৱণ্ণমযা (পী.)] পাতিযা;

অনেকসূপং ৱিৱিধং ৱিযঞ্জনং, উপনামযী ভত্ত মনুঞ্ঞৰূপং.

১৬৭. ‘‘তুৰিযেহি [তূৰিযেহি (ক.)] মং ভাৰত ভুত্তৱন্তং, উপট্ঠহুং ভত্তু মনো ৱিদিত্ৱা;

ততুত্তৰিং [তদুত্তৰিং (ক.)] মং নিপতী মহন্তং, দিব্বেহি কামেহি অনপ্পকেহি.

১৬৮. ‘‘ভৰিযা মমেতা তিসতা অড়াৰ, সব্বত্তমজ্ঝা পদুমুত্তৰাভা;

অড়াৰ এতাস্সু তে কামকাৰা, দদামি তে তা পৰিচাৰযস্সু.

১৬৯. ‘‘সংৱচ্ছৰং দিব্বৰসানুভুত্ৱা, তদাস্সুহং [তদস্সহং (পী.)] উত্তৰিমজ্ঝভাসিং [উত্তৰি পচ্চভাসিং (সী. স্যা.), উত্তৰিং পচ্চভাসিং (পী.)];

নাগস্সিদং কিন্তি কথঞ্চ লদ্ধং, কথজ্ঝগমাসি ৱিমানসেট্ঠং’’.

১৭০. ‘‘অধিচ্চ লদ্ধং পৰিণামজং তে, সযংকতং উদাহু দেৱেহি দিন্নং;

পুচ্ছামি তং [তে (পী.)] নাগৰাজেতমত্থং, কথজ্ঝগমাসি ৱিমানসেট্ঠং’’.

১৭১. ‘‘নাধিচ্চ লদ্ধং ন পৰিণামজং মে, ন সযংকতং নাপি দেৱেহি দিন্নং;

সকেহি কম্মেহি অপাপকেহি, পুঞ্ঞেহি মে লদ্ধমিদং ৱিমানং’’.

১৭২. ‘‘কিং তে ৱতং কিং পন ব্ৰহ্মচৰিযং, কিস্স সুচিণ্ণস্স অযং ৱিপাকো;

অক্খাহি মে নাগৰাজেতমত্থং, কথং নু তে লদ্ধমিদং ৱিমানং’’.

১৭৩. ‘‘ৰাজা অহোসিং মগধানমিস্সৰো, দুয্যোধনো নাম মহানুভাৱো;

সো ইত্তৰং জীৱিতং সংৱিদিত্ৱা, অসস্সতং ৱিপৰিণামধম্মং.

১৭৪. ‘‘অন্নঞ্চ পানঞ্চ পসন্নচিত্তো, সক্কচ্চ দানং ৱিপুলং অদাসিং [অদাসি (পী.)];

ওপানভূতং মে ঘৰং তদাসি, সন্তপ্পিতা সমণব্ৰাহ্মণা চ.

১৭৫. [অযং গাথা পী. পোত্থকে নত্থি] ‘‘মালঞ্চ গন্ধঞ্চ ৱিলেপনঞ্চ, পদীপিযং [পদীপযং (স্যা. ক.)] যানমুপস্সযঞ্চ;

অচ্ছাদনং সেয্যমথন্নপানং, সক্কচ্চ দানানি অদম্হ তত্থ [অযং গাথা পী. পোত্থকে নত্থি].

১৭৬. ‘‘তং মে ৱতং তং পন ব্ৰহ্মচৰিযং, তস্স সুচিণ্ণস্স অযং ৱিপাকো;

তেনেৱ মে লদ্ধমিদং ৱিমানং, পহূতভক্খং বহুঅন্নপানং’’;

‘‘নচ্চেহি গীতেহি চুপেতৰূপং, চিৰট্ঠিতিকং ন চ সস্সতাযং.

১৭৭. ‘‘অপ্পানুভাৱা তং মহানুভাৱং, তেজস্সিনং হন্তি অতেজৱন্তো;

কিমেৱ দাঠাৱুধ কিং পটিচ্চ, হত্থত্ত [হত্থত্থ (সী. স্যা. পী.)] মাগচ্ছি ৱনিব্বকানং [ৱণিব্বকানং (সী.)].

১৭৮. ‘‘ভযং নু তে অন্ৱগতং মহন্তং, তেজো নু তে নান্ৱগং দন্তমূলং;

কিমেৱ দাঠাৱুধ কিং পটিচ্চ, কিলেসমাপজ্জি ৱনিব্বকানং’’.

১৭৯. ‘‘ন মে ভযং অন্ৱগতং মহন্তং, তেজো ন সক্কা মম তেহি হন্তুং [তেভিহন্তুং (স্যা. ক.)];

সতঞ্চ ধম্মানি সুকিত্তিতানি, সমুদ্দৱেলাৱ দুৰচ্চযানি.

১৮০. ‘‘চাতুদ্দসিং পঞ্চদসিং অড়াৰ, উপোসথং নিচ্চমুপাৱসামি;

অথাগমুং সোড়স ভোজপুত্তা, ৰজ্জুং গহেত্ৱান দড়্হঞ্চ পাসং.

১৮১. ‘‘ভেত্ৱান নাসং অতিকস্স [অন্তকস্স (ক.)] ৰজ্জুং, নযিংসু মং সম্পৰিগয্হ লুদ্দা;

এতাদিসং দুক্খমহং তিতিক্খং [তিতিক্খিং (পী.)], উপোসথং অপ্পটিকোপযন্তো’’.

১৮২. ‘‘একাযনে তং পথে অদ্দসংসু, বলেন ৱণ্ণেন চুপেতৰূপং;

সিৰিযা পঞ্ঞায চ ভাৱিতোসি, কিং পত্থযং [কিমত্থিযং (সী. স্যা. পী.)] নাগ তপো কৰোসি.

১৮৩. ‘‘ন পুত্তহেতূ ন ধনস্স হেতু, ন আযুনো চাপি অড়াৰ হেতু;

মনুস্সযোনিং অভিপত্থযানো, তস্মা পৰক্কম্ম তপো কৰোমি’’.

১৮৪. ‘‘ত্ৱং লোহিতক্খো ৱিহতন্তৰংসো, অলঙ্কতো কপ্পিতকেসমস্সু;

সুৰোসিতো লোহিতচন্দনেন, গন্ধব্বৰাজাৱ দিসা পভাসসি [পভাসি (ক.)].

১৮৫. ‘‘দেৱিদ্ধিপত্তোসি মহানুভাৱো, সব্বেহি কামেহি সমঙ্গিভূতো;

পুচ্ছামি তং নাগৰাজেতমত্থং, সেয্যো ইতো কেন মনুস্সলোকো’’.

১৮৬. ‘‘অড়াৰ নাঞ্ঞত্ৰ মনুস্সলোকা, সুদ্ধী ৱ সংৱিজ্জতি সংযমো ৱা;

অহঞ্চ লদ্ধান মনুস্সযোনিং, কাহামি জাতিমৰণস্স অন্তং’’.

১৮৭. ‘‘সংৱচ্ছৰো মে ৱসতো [ৱুসিতো (পী.)] তৱন্তিকে, অন্নেন পানেন উপট্ঠিতোস্মি;

আমন্তযিত্ৱান পলেমি নাগ, চিৰপ্পৱুট্ঠোস্মি [চিৰপ্পৱুত্থো অস্মি (পী.)] অহং জনিন্দ’’.

১৮৮. ‘‘পুত্তা চ দাৰা অনুজীৱিনো চ [চ’নুজীৱিনো (স্যা. পী.)], নিচ্চানুসিট্ঠা উপতিট্ঠতে তং;

কচ্চিন্নু তং নাভিসপিত্থ [নাভিসংসিত্থ (স্যা. পী.)] কোচি, পিযঞ্হি মে দস্সনং তুয্হং [তুয্হ (পী.)] অড়াৰ’’.

১৮৯. ‘‘যথাপি মাতূ চ পিতূ অগাৰে, পুত্তো পিযো পটিৱিহিতো ৱসেয্য [সেয্যো (পী.)];

ততোপি ময্হং ইধমেৱ সেয্যো, চিত্তঞ্হি তে নাগ মযী পসন্নং’’.

১৯০. ‘‘মণী মমং ৱিজ্জতি লোহিতঙ্কো [লোহিতঙ্গো (ক.)], ধনাহৰো মণিৰতনং উড়াৰং;

আদায ত্ৱং [তং (পী.)] গচ্ছ সকং নিকেতং, লদ্ধা ধনং তং মণিমোস্সজস্সু’’.

১৯১. ‘‘দিট্ঠা মযা মানুসকাপি কামা, অসস্সতা ৱিপৰিণামধম্মা;

আদীনৱং কামগুণেসু দিস্ৱা, সদ্ধাযহং পব্বজিতোম্হি ৰাজ.

১৯২. ‘‘দুমপ্ফলানীৱ পতন্তি মাণৱা, দহৰা চ ৱুদ্ধা চ সৰীৰভেদা;

এতম্পি দিস্ৱা পব্বজিতোম্হি ৰাজ, অপণ্ণকং সামঞ্ঞমেৱ সেয্যো’’.

১৯৩. ‘‘অদ্ধা হৱে সেৱিতব্বা সপঞ্ঞা, বহুস্সুতা যে বহুঠানচিন্তিনো;

নাগঞ্চ সুত্ৱান তৱঞ্চড়াৰ, কাহামি পুঞ্ঞানি অনপ্পকানি’’.

১৯৪. ‘‘অদ্ধা হৱে সেৱিতব্বা সপঞ্ঞা, বহুস্সুতা যে বহুঠানচিন্তিনো;

নাগঞ্চ সুত্ৱান মমঞ্চ ৰাজ, কৰোহি পুঞ্ঞানি অনপ্পকানী’’তি.

সঙ্খপালজাতকং চতুত্থং.