৫২৩. অলম্বুসাজাতকং (৩)

৯৫. ‘‘অথ ব্ৰৱি ব্ৰহা ইন্দো, ৱত্ৰভূ জযতং পিতা;

দেৱকঞ্ঞং পৰাভেত্ৱা, সুধম্মাযং অলম্বুসং.

৯৬. ‘‘মিস্সে দেৱা তং যাচন্তি, তাৱতিংসা সইন্দকা;

ইসিপ্পলোভনে [ইসিপলোভিকে (সী. স্যা.), ইসিং পলোভিকে (পী.)] গচ্ছ, ইসিসিঙ্গং অলম্বুসে.

৯৭. ‘‘পুৰাযং অম্হে অচ্চেতি [নাচ্চেতি (স্যা. ক.)], ৱত্তৱা [ৱতৱা (সী. স্যা. পী.)] ব্ৰহ্মচৰিযৱা;

নিব্বানাভিৰতো ৱুদ্ধো [ৱদ্ধো (পী.), বুদ্ধো (স্যা. ক.)], তস্স মগ্গানি আৱৰ’’.

৯৮. ‘‘দেৱৰাজ কিমেৱ ত্ৱং, মমেৱ তুৱং সিক্খসি;

ইসিপ্পলোভনে [ইসিপলোভিকে (সী. স্যা.), ইসিং পলোভিকে (পী.)] গচ্ছ, সন্তি অঞ্ঞাপি অচ্ছৰা.

৯৯. ‘‘মাদিসিযো পৱৰা চেৱ, অসোকে নন্দনে ৱনে;

তাসম্পি হোতু পৰিযাযো, তাপি যন্তু পলোভনা’’ [পলোভিকা (স্যা. পী.)].

১০০. ‘‘অদ্ধা হি সচ্চং ভণসি, সন্তি অঞ্ঞাপি অচ্ছৰা;

তাদিসিযো পৱৰা চেৱ, অসোকে নন্দনে ৱনে.

১০১. ‘‘ন তা এৱং পজানন্তি, পাৰিচৰিযং পুমং গতা;

যাদিসং ত্ৱং পজানাসি, নাৰি সব্বঙ্গসোভনে.

১০২. ‘‘ত্ৱমেৱ গচ্ছ কল্যাণি, ইত্থীনং পৱৰা চসি;

তৱেৱ ৱণ্ণৰূপেন, সৱসমানযিস্সসি’’ [ৱসমানাপযিস্সসি (স্যা.), ৱসমানামযিস্সসি (পী.), তং ৱসমানযিস্সসি (ক.)].

১০৩. ‘‘ন ৱাহং ন গমিস্সামি, দেৱৰাজেন পেসিতা;

ৱিভেমি চেতং আসাদুং, উগ্গতেজো হি ব্ৰাহ্মণো.

১০৪. ‘‘অনেকে নিৰযং পত্তা, ইসিমাসাদিযা জনা;

আপন্না মোহসংসাৰং, তস্মা লোমানি হংসযে’’.

১০৫. ‘‘ইদং ৱত্ৱান পক্কামি, অচ্ছৰা কামৱণ্ণিনী;

মিস্সা মিস্সিতু [মিস্সেতু (সী. স্যা. পী.)] মিচ্ছন্তী, ইসিসিঙ্গং অলম্বুসা.

১০৬. ‘‘সা চ তং ৱনমোগয্হ, ইসিসিঙ্গেন ৰক্খিতং;

বিম্বজালকসঞ্ছন্নং, সমন্তা অড্ঢযোজনং.

১০৭. ‘‘পাতোৱ পাতৰাসম্হি, উদণ্হসমযং [উদযসমযং (স্যা.), উদন্তসমযং (ক.)] পতি;

অগ্গিট্ঠং পৰিমজ্জন্তং, ইসিসিঙ্গং উপাগমি’’.

১০৮. ‘‘কা নু ৱিজ্জুৰিৱাভাসি, ওসধী ৱিয তাৰকা;

ৱিচিত্তহত্থাভৰণা [ৱিচিত্তৱত্থাভৰণা (সী.)], আমুত্তমণিকুণ্ডলা [আমুক্কমণিকুণ্ডলা (?)].

১০৯. ‘‘আদিচ্চৱণ্ণসঙ্কাসা, হেমচন্দনগন্ধিনী;

সঞ্ঞতূৰূ মহামাযা, কুমাৰী চাৰুদস্সনা.

১১০. ‘‘ৱিলগ্গা [ৱিলাকা (সী. স্যা. পী.)] মুদুকা সুদ্ধা, পাদা তে সুপ্পতিট্ঠিতা;

গমনা কামনীযা [কমনা কমনীযা (সী. পী.)] তে, হৰন্তিযেৱ মে মনো.

১১১. ‘‘অনুপুব্বাৱ তে ঊৰূ, নাগনাসসমূপমা;

ৱিমট্ঠা তুয্হং সুস্সোণী, অক্খস্স ফলকং যথা.

১১২. ‘‘উপ্পলস্সেৱ কিঞ্জক্খা, নাভি তে সাধু সণ্ঠিতা;

পূৰা কণ্হঞ্জনস্সেৱ, দূৰতো পটিদিস্সতি.

১১৩. ‘‘দুৱিধা জাতা উৰজা, অৱণ্টা সাধু পচ্চুদা;

পযোধৰা অপতিতা [অপ্পতীতা (সী. স্যা. পী.)], অড্ঢলাবুসমা থনা.

১১৪. ‘‘দীঘা কম্বুতলাভাসা, গীৱা এণেয্যকা যথা;

পণ্ডৰাৱৰণা ৱগ্গু, চতুত্থমনসন্নিভা.

১১৫. ‘‘উদ্ধগ্গা চ অধগ্গা চ, দুমগ্গপৰিমজ্জিতা;

দুৱিজা নেলসম্ভূতা, দন্তা তৱ সুদস্সনা.

১১৬. ‘‘অপণ্ডৰা লোহিতন্তা, জিঞ্জূক [জিঞ্জুক (সী. স্যা. পী.)] ফলসন্নিভা;

আযতা চ ৱিসালা চ, নেত্তা তৱ সুদস্সনা.

১১৭. ‘‘নাতিদীঘা সুসম্মট্ঠা, কনকব্যা [কনকগ্গা (পী.)] সমোচিতা;

উত্তমঙ্গৰুহা তুয্হং, কেসা চন্দনগন্ধিকা.

১১৮. ‘‘যাৱতা কসিগোৰক্খা, ৱাণিজানং [ৱণিজানং (পী.)] চ যা গতি;

ইসীনঞ্চ পৰক্কন্তং, সঞ্ঞতানং তপস্সিনং.

১১৯. ‘‘ন তে সমসমং পস্সে, অস্মিং পথৱি [পুথুৱি (পী.)] মণ্ডলে;

কো ৱা ত্ৱং কস্স ৱা পুত্তো, কথং জানেমু তং মযং’’.

১২০. ‘‘ন পঞ্হকালো ভদ্দন্তে, কস্সপেৱং গতে সতি;

এহি সম্ম ৰমিস্সাম, উভো অস্মাকমস্সমে;

এহি তং উপগূহিস্সং [উপগুয্হিস্সং (স্যা.)], ৰতীনং কুসলো ভৱ’’.

১২১. ‘‘ইদং ৱত্ৱান পক্কামি, অচ্ছৰা কামৱণ্ণিনী;

মিস্সা মিস্সিতুমিচ্ছন্তী, ইসিসিঙ্গং অলম্বুসা’’.

১২২. ‘‘সো চ ৱেগেন নিক্খম্ম, ছেত্ৱা দন্ধপৰক্কমং [দন্ধপদক্কমং (ক.)];

তমুত্তমাসু ৱেণীসু, অজ্ঝপ্পত্তো [অজ্ঝাপত্তো (পী.)] পৰামসি;

১২৩. ‘‘তমুদাৱত্ত কল্যাণী, পলিস্সজি সুসোভনা [সুসোভণী (স্যা. ক.)];

চৱিতম্হি [চৱি তম্হা (স্যা. ক.)] ব্ৰহ্মচৰিযা, যথা তং অথ তোসিতা.

১২৪. ‘‘মনসা অগমা ইন্দং, ৱসন্তং নন্দনে ৱনে;

তস্সা সঙ্কপ্পমঞ্ঞায, মঘৱা দেৱকুঞ্জৰো.

১২৫. ‘‘পল্লঙ্কং পহিণী খিপ্পং, সোৱণ্ণং সোপৱাহনং;

সউত্তৰচ্ছদপঞ্ঞাসং, সহস্সপটিযত্থতং [পটিকত্থতং (সী.)].

১২৬. ‘‘তমেনং তত্থ ধাৰেসি, উৰে কত্ৱান সোভনা;

যথা একমুহুত্তংৱ, তীণি ৱস্সানি ধাৰযি.

১২৭. ‘‘ৱিমদো তীহি ৱস্সেহি, পবুজ্ঝিত্ৱান ব্ৰাহ্মণো;

অদ্দসাসি হৰিত [হৰী (পী.)] ৰুক্খে, সমন্তা অগ্গিযাযনং.

১২৮. ‘‘নৱপত্তৱনং ফুল্লং, কোকিলগ্গণঘোসিতং;

সমন্তা পৱিলোকেত্ৱা, ৰুদং অস্সূনি ৱত্তযি.

১২৯. ‘‘ন জুহে ন জপে [জপ্পে (ক.)] মন্তে, অগ্গিহুত্তং পহাপিতং;

কো নু মে পাৰিচৰিযায, পুব্বে চিত্তং পলোভযি.

১৩০. ‘‘অৰঞ্ঞে মে ৱিহৰতো, যো মে তেজা হ সম্ভুতং [সম্ভতং (পী.)];

নানাৰত্নপৰিপূৰং, নাৱংৱ গণ্হি অণ্ণৱে’’.

১৩১. ‘‘অহং তে পাৰিচৰিযায, দেৱৰাজেন পেসিতা;

অৱধিং [অৱধী (স্যা. পী. ক.)] চিত্তং চিত্তেন, পমাদো [পমাদা (স্যা. পী.)] ত্ৱং ন বুজ্ঝসি’’.

১৩২. ‘‘ইমানি কিৰ মং তাতো, কস্সপো অনুসাসতি;

কমলাসদিসিত্থিযো [সৰিসিত্থিযো (স্যা. পী.)], তাযো বুজ্ঝেসি মাণৱ.

১৩৩. ‘‘উৰে গণ্ডাযো বুজ্ঝেসি, তাযো বুজ্ঝেসি মাণৱ;

ইচ্চানুসাসি মং তাতো, যথা মং অনুকম্পকো.

১৩৪. ‘‘তস্সাহং ৱচনং নাকং, পিতু ৱুদ্ধস্স সাসনং;

অৰঞ্ঞে নিম্মনুস্সম্হি, স্ৱজ্জ ঝাযামি [স্ৱাজ্জজ্ঝাযামি (সী. পী.)] এককো.

১৩৫. ‘‘সোহং তথা কৰিস্সামি, ধিৰত্থু জীৱিতেন মে;

পুন ৱা তাদিসো হেস্সং, মৰণং মে ভৱিস্সতি’’.

১৩৬. ‘‘তস্স তেজং [তেজঞ্চ (সী. পী.)] ৱীৰিযঞ্চ, ধিতিং [ধিতিঞ্চ (পী.)] ঞত্ৱা অৱট্ঠিতং [সুৱড্ঢিতং (সী.)];

সিৰসা অগ্গহী পাদে, ইসিসিঙ্গং অলম্বুসা.

১৩৭. ‘‘মা মে কুজ্ঝ [কুজ্ঝি (পী.)] মহাৱীৰ, মা মে কুজ্ঝ [কুজ্ঝি (পী.)] মহাইসে;

মহা অত্থো মযা চিণ্ণো, তিদসানং যসস্সিনং;

তযা সংকম্পিতং আসি, সব্বং দেৱপুৰং তদা’’.

১৩৮. ‘‘তাৱতিংসা চ যে দেৱা, তিদসানঞ্চ ৱাসৱো;

ত্ৱঞ্চ ভদ্দে সুখী হোহি, গচ্ছ কঞ্ঞে যথাসুখং’’.

১৩৯. ‘‘তস্স পাদে গহেত্ৱান, কত্ৱা চ নং পদক্খিণং;

অঞ্জলিং পগ্গহেত্ৱান, তম্হা ঠানা অপক্কমি.

১৪০. ‘‘যো চ তস্সাসি পল্লঙ্কো, সোৱণ্ণো সোপৱাহনো;

সউত্তৰচ্ছদপঞ্ঞাসো, সহস্সপটিযত্থতো;

তমেৱ পল্লঙ্কমাৰুয্হ, অগা দেৱান সন্তিকে.

১৪১. ‘‘তমোক্কমিৱ আযন্তিং, জলন্তিং ৱিজ্জুতং যথা;

পতীতো সুমনো ৱিত্তো, দেৱিন্দো অদদা ৱৰং’’.

১৪২. ‘‘ৱৰঞ্চে মে অদো সক্ক, সব্বভূতানমিস্সৰ;

নিসিপ্পলোভিকা [ন ইসিপলোভিকা (স্যা.), ন ইসিপলোভিযং (পী.)] গচ্ছে, এতং সক্ক ৱৰং ৱৰে’’তি.

অলম্বুসাজাতকং ততিযং.