৫২০. গন্ধতিন্দুকজাতকং (১০)

৩৩২. অপ্পমাদো অমতং পদং [অমতপদং (সী. পী.)], পমাদো মচ্চুনো পদং;

অপ্পমত্তা ন মীযন্তি, যে পমত্তা যথা মতা.

৩৩৩. মদা পমাদো জাযেথ, পমাদা জাযতে খযো;

খযা পদোসা [খযা চ দোসা (সী.)] জাযন্তি, মা পমাদো [মা মদো (সী. স্যা. পী.)] ভৰতূসভ [ভাৰধূসভ (ক.)].

৩৩৪. বহূ হি খত্তিযা জীনা, অত্থং ৰট্ঠং পমাদিনো;

অথোপি গামিনো গামা, অনগাৰা অগাৰিনো.

৩৩৫. খত্তিযস্স পমত্তস্স, ৰট্ঠস্মিং ৰট্ঠৱড্ঢন;

সব্বে ভোগা ৱিনস্সন্তি, ৰঞ্ঞো তং ৱুচ্চতে অঘং.

৩৩৬. নেস ধম্মো মহাৰাজ, অতিৱেলং পমজ্জসি;

ইদ্ধং ফীতং জনপদং, চোৰা ৱিদ্ধংসযন্তি নং.

৩৩৭. ন তে পুত্তা ভৱিস্সন্তি, ন হিৰঞ্ঞং ন ধানিযং [ন হিৰঞ্ঞনিধানিযা (ক.)];

ৰট্ঠে ৱিলুপ্পমানম্হি, সব্বভোগেহি জিয্যসি.

৩৩৮. সব্বভোগা পৰিজিণ্ণং, ৰাজানং ৱাপি খত্তিযং [খত্তিয (ক.)];

ঞাতিমিত্তা সুহজ্জা চ, ন তং মঞ্ঞন্তি মানিযং [মন্তিযং (স্যা.)].

৩৩৯. হত্থাৰোহা অনীকট্ঠা, ৰথিকা পত্তিকাৰকা;

তমেৱমুপজীৱন্তা, ন তং মঞ্ঞন্তি মানিযং.

৩৪০. অসংৱিহিতকম্মন্তং, বালং দুম্মন্তিমন্তিনং;

সিৰী জহতি দুম্মেধং, জিণ্ণংৱ উৰগো তচং.

৩৪১. সুসংৱিহিতকম্মন্তং, কালুট্ঠাযিং অতন্দিতং;

সব্বে ভোগাভিৱড্ঢন্তি, গাৱো সউসভামিৱ.

৩৪২. উপস্সুতিং মহাৰাজ, ৰট্ঠে জনপদে চৰ;

তত্থ দিস্ৱা চ সুত্ৱা চ, ততো তং [ত্ৱং (ক.)] পটিপজ্জসি.

৩৪৩. এৱং ৱেদেতু পঞ্চালো, সঙ্গামে সৰমপ্পিতো [সমপ্পিতো (সী. পী.)];

যথাহমজ্জ ৱেদেমি, কণ্টকেন সমপ্পিতো.

৩৪৪. জিণ্ণো দুব্বলচক্খূসি, ন ৰূপং সাধু পস্সসি;

কিং তত্থ ব্ৰহ্মদত্তস্স, যং তং মগ্গেয্য [মগ্ঘেয্য (পী.)] কণ্টকো [কণ্ডকো (সী. স্যা. পী.)].

৩৪৫. বহ্ৱেত্থ ব্ৰহ্মদত্তস্স, সোহং [যোহং (সী. স্যা. পী.)] মগ্গস্মি [মগ্গোস্মি (পী.)] ব্ৰাহ্মণ;

অৰক্খিতা জানপদা, অধম্মবলিনা হতা.

৩৪৬. ৰত্তিঞ্হি [ৰত্তিঞ্চ (সী.)] চোৰা খাদন্তি, দিৱা খাদন্তি তুণ্ডিযা;

ৰট্ঠস্মিং কূটৰাজস্স, বহু অধম্মিকো জনো.

৩৪৭. এতাদিসে ভযে জাতে [তাত (সী. পী.)], ভযট্টা তাত [তাৱ (সী. পী.)] মাণৱা;

নিল্লেনকানি কুব্বন্তি, ৱনে আহত্ৱ কণ্টকং.

৩৪৮. কদাস্সু নামযং ৰাজা, ব্ৰহ্মদত্তো মৰিস্সতি;

যস্স ৰট্ঠম্হি জিয্যন্তি, অপ্পতিকা কুমাৰিকা.

৩৪৯. দুব্ভাসিতঞ্হি তে জম্মি, অনত্থপদকোৱিদে;

কুহিং ৰাজা কুমাৰীনং, ভত্তাৰং পৰিযেসতি.

৩৫০. ন মে দুব্ভাসিতং ব্ৰহ্মে, কোৱিদত্থপদা অহং;

অৰক্খিতা জানপদা, অধম্মবলিনা হতা.

৩৫১. ৰত্তিঞ্হি চোৰা খাদন্তি, দিৱা খাদন্তি তুণ্ডিযা;

ৰট্ঠস্মিং কূটৰাজস্স, বহু অধম্মিকো জনো;

দুজ্জীৱে দুব্ভৰে দাৰে, কুতো ভত্তা কুমাৰিযো.

৩৫২. এৱং সযতু পঞ্চালো, সঙ্গামে সত্তিযা হতো;

যথাযং কপণো সেতি, হতো ফালেন সালিযো.

৩৫৩. অধম্মেন তুৱং জম্ম, ব্ৰহ্মদত্তস্স কুজ্ঝসি;

যো ত্ৱং সপসি ৰাজানং, অপৰজ্ঝিত্ৱান অত্তনো [অত্তনা (পী.)].

৩৫৪. ধম্মেন ব্ৰহ্মদত্তস্স, অহং কুজ্ঝামি ব্ৰাহ্মণ;

অৰক্খিতা জানপদা, অধম্মবলিনা হতা.

৩৫৫. ৰত্তিঞ্হি চোৰা খাদন্তি, দিৱা খাদন্তি তুণ্ডিযা;

ৰট্ঠস্মিং কূটৰাজস্স, বহু অধম্মিকো জনো.

৩৫৬. সা নূন পুন ৰে পক্কা, ৱিকালে ভত্তমাহৰি;

ভত্তহাৰিং অপেক্খন্তো, হতো ফালেন সালিযো.

৩৫৭. এৱং হঞ্ঞতু পঞ্চালো, সঙ্গামে অসিনা হতো [দড়্হং (পী.)];

যথাহমজ্জ পহতো, খীৰঞ্চ মে পৱট্টিতং.

৩৫৮. যং পসু খীৰং ছড্ডেতি, পসুপালং ৱিহিংসতি [পসুপালঞ্চ হিংসতি (সী.), পসু ফালঞ্চ হিংসতি (পী.)];

কিং তত্থ ব্ৰহ্মদত্তস্স, যং নো গৰহতে [গৰহতো (পী.)] ভৱং.

৩৫৯. গাৰয্হো ব্ৰহ্মে পঞ্চালো, ব্ৰহ্মদত্তস্স ৰাজিনো;

অৰক্খিতা জানপদা, অধম্মবলিনা হতা.

৩৬০. ৰত্তিঞ্হি চোৰা খাদন্তি, দিৱা খাদন্তি তুণ্ডিযা;

ৰট্ঠস্মিং কূটৰাজস্স, বহু অধম্মিকো জনো.

৩৬১. চণ্ডা অটনকা [অটনক (পী.), অকটনা (ক.)] গাৱী, যং পুৰে ন দুহামসে;

তং দানি অজ্জ দোহাম, খীৰকামেহুপদ্দুতা.

৩৬২. এৱং কন্দতু পঞ্চালো, ৱিপুত্তো ৱিপ্পসুক্খতু;

যথাযং কপণা গাৱী, ৱিপুত্তা পৰিধাৱতি.

৩৬৩. যং পসু পসুপালস্স, সম্ভমেয্য [পব্ভমেয্য (সী. পী.)] ৰৱেয্য ৱা;

কো নীধ অপৰাধত্থি, ব্ৰহ্মদত্তস্স ৰাজিনো.

৩৬৪. অপৰাধো মহাব্ৰহ্মে, ব্ৰহ্মদত্তস্স ৰাজিনো;

অৰক্খিতা জানপদা, অধম্মবলিনা হতা.

৩৬৫. ৰত্তিঞ্হি চোৰা খাদন্তি, দিৱা খাদন্তি তুণ্ডিযা;

ৰট্ঠস্মিং কূটৰাজস্স, বহু অধম্মিকো জনো;

কথং নো অসিকোসত্থা, খীৰপা হঞ্ঞতে পজা.

৩৬৬. এৱং খজ্জতু পঞ্চালো, হতো যুদ্ধে সপুত্তকো;

যথাহমজ্জ খজ্জামি, গামিকেহি [গামকেহি (সী. পী.)] অৰঞ্ঞজো.

৩৬৭. ন সব্বভূতেসু ৱিধেন্তি [ৱিধন্তি (ক.)] ৰক্খং, ৰাজানো মণ্ডূক মনুস্সলোকে;

নেত্তাৱতা ৰাজা অধম্মচাৰী, যং তাদিসং জীৱমদেয্যু ধঙ্কা.

৩৬৮. অধম্মৰূপো ৱত ব্ৰহ্মচাৰী, অনুপ্পিযং ভাসসি খত্তিযস্স;

ৱিলুপ্পমানায পুথুপ্পজায, পূজেসি ৰাজং পৰমপ্পমাদং [ৰাজং পৰমপ্পৱাদং (সী.), ৰাজা পৰমপ্পৱাদিং (স্যা.)].

৩৬৯. সচে ইমং ব্ৰহ্মে সুৰজ্জকং সিযা, ফীতং ৰট্ঠং মুদিতং [পূৰিতং (ক.)] ৱিপ্পসন্নং;

ভুত্ৱা বলিং অগ্গপিণ্ডঞ্চ কাকা, ন মাদিসং জীৱমদেয্যু ধঙ্কাতি.

গন্ধতিন্দুকজাতকং দসমং.

তস্সুদ্দানং –

কিংছন্দ কুম্ভ জযদ্দিস ছদ্দন্ত, অথ পণ্ডিতসম্ভৱ সিৰকপি;

দকৰক্খস পণ্ডৰনাগৱৰো, অথ সম্বুল তিন্দুকদেৱসুতোতি.

তিংসনিপাতং নিট্ঠিতং.