১৬. তিংসনিপাতো

৫১১. কিংছন্দজাতকং (১)

১. কিংছন্দো কিমধিপ্পাযো, একো সম্মসি ঘম্মনি;

কিং পত্থযানো কিং এসং, কেন অত্থেন ব্ৰাহ্মণ.

২. যথা মহা ৱাৰিধৰো, কুম্ভো সুপৰিণাহৱা [সুপৰিণামৱা (ক.)];

তথূপমং অম্বপক্কং, ৱণ্ণগন্ধৰসুত্তমং.

৩. তং ৱুয্হমানং সোতেন, দিস্ৱানামলমজ্ঝিমে;

পাণীহি নং গহেত্ৱান, অগ্যাযতনমাহৰিং.

৪. ততো কদলিপত্তেসু, নিক্খিপিত্ৱা সযং অহং;

সত্থেন নং ৱিকপ্পেত্ৱা, খুপ্পিপাসং অহাসি মে.

৫. সোহং অপেতদৰথো, ব্যন্তীভূতো [ব্যন্তিভূতো (সী. পী. ক.)] দুখক্খমো;

অস্সাদং নাধিগচ্ছামি, ফলেস্ৱঞ্ঞেসু কেসুচি [কেসুপি (ক. সী.)].

৬. সোসেত্ৱা নূন মৰণং, তং মমং আৱহিস্সতি;

অম্বং যস্স ফলং সাদু, মধুৰগ্গং মনোৰমং;

যমুদ্ধৰিং ৱুয্হমানং, উদধিস্মা মহণ্ণৱে.

৭. অক্খাতং তে মযা সব্বং, যস্মা উপৱসামহং;

ৰম্মং পতি নিসিন্নোস্মি, পুথুলোমাযুতা পুথু.

৮. ত্ৱঞ্চ খো মেৱ [মে (সী.), মম (?)] অক্খাহি, অত্তানমপলাযিনি;

কা ৱা ত্ৱমসি কল্যাণি, কিস্স ৱা ত্ৱং সুমজ্ঝিমে.

৯. ৰুপ্পপট্টপলিমট্ঠীৱ [ৰুপ্পপট্টপ্লমট্ঠীৱ (স্যা.), ৰূপপট্টপমট্ঠীৱ (ক.)], ব্যগ্ঘীৱ গিৰিসানুজা;

যা সন্তি নাৰিযো দেৱেসু, দেৱানং পৰিচাৰিকা.

১০. যা চ মনুস্সলোকস্মিং, ৰূপেনান্ৱাগতিত্থিযো;

ৰূপেন তে সদিসী নত্থি, দেৱেসু গন্ধব্বমনুস্সলোকে [দেৱগন্ধব্বমানুসে (স্যা.)];

পুট্ঠাসি মে চাৰুপুব্বঙ্গি, ব্ৰূহি নামঞ্চ বন্ধৱে.

১১. যং ত্ৱং পতি নিসিন্নোসি, ৰম্মং ব্ৰাহ্মণ কোসিকিং;

সাহং ভুসালযা ৱুত্থা, ৱৰৱাৰিৱহোঘসা.

১২. নানাদুমগণাকিণ্ণা, বহুকা গিৰিকন্দৰা;

মমেৱ পমুখা হোন্তি, অভিসন্দন্তি পাৱুসে.

১৩. অথো বহূ ৱনতোদা, নীলৱাৰিৱহিন্ধৰা;

বহুকা নাগৱিত্তোদা, অভিসন্দন্তি ৱাৰিনা.

১৪. তা অম্বজম্বুলবুজা, নীপা তালা চুদুম্বৰা [তালমুদুম্বৰা (স্যা. ক.)];

বহূনি ফলজাতানি, আৱহন্তি অভিণ্হসো.

১৫. যং কিঞ্চি উভতো তীৰে, ফলং পততি অম্বুনি;

অসংসযং তং সোতস্স, ফলং হোতি ৱসানুগং.

১৬. এতদঞ্ঞায মেধাৱি, পুথুপঞ্ঞ সুণোহি মে;

মা ৰোচয মভিসঙ্গং, পটিসেধ জনাধিপ.

১৭. ন ৱাহং ৱড্ঢৱং [ৱদ্ধৱং (সী. পী.)] মঞ্ঞে, যং ত্ৱং ৰট্ঠাভিৱড্ঢন;

আচেয্যমানো ৰাজিসি, মৰণং অভিকঙ্খসি.

১৮. তস্স জানন্তি পিতৰো, গন্ধব্বা চ সদেৱকা;

যে চাপি ইসযো লোকে, সঞ্ঞতত্তা তপস্সিনো;

অসংসযং তেপি [তে (সী. পী.)] জানন্তি, পট্ঠভূতা [ৱদ্ধভূতা (সী. পী.)] যসস্সিনো.

১৯. এৱং ৱিদিত্ৱা ৱিদূ সব্বধম্মং, ৱিদ্ধংসনং চৱনং জীৱিতস্স;

ন চীযতী তস্স নৰস্স পাপং, সচে ন চেতেতি ৱধায তস্স.

২০. ইসিপূগসমঞ্ঞাতে, এৱং লোক্যা ৱিদিতা সতি [পতি (ক. স্যা. ক.)];

অনৰিযপৰিসম্ভাসে, পাপকম্মং জিগীসসি [জিগিংসসি (সী. স্যা. পী.)].

২১. সচে অহং মৰিস্সামি, তীৰে তে পুথুসুস্সোণি;

অসংসযং তং অসিলোকো, মযি পেতে আগমিস্সতি.

২২. তস্মা হি পাপকং কম্মং, ৰক্খস্সেৱ [ৰক্খস্সু চ (স্যা.)] সুমজ্ঝিমে;

মা তং সব্বো জনো পচ্ছা, পকুট্ঠাযি [পকত্থাসি (সী. পী.), পত্ৱক্খাসি (স্যা.)] মযি মতে.

২৩. অঞ্ঞাতমেতং অৱিসয্হসাহি, অত্তানমম্বঞ্চ দদামি তে তং;

সো দুচ্চজে কামগুণে পহায, সন্তিঞ্চ ধম্মঞ্চ অধিট্ঠিতোসি.

২৪. যো হিত্ৱা পুব্বসঞ্ঞোগং, পচ্ছা সংযোজনে ঠিতো;

অধম্মঞ্চেৱ চৰতি, পাপঞ্চস্স পৱড্ঢতি.

২৫. এহি তং পাপযিস্সামি, কামং অপ্পোস্সুকো ভৱ;

উপানযামি সীতস্মিং, ৱিহৰাহি অনুস্সুকো.

২৬. তং পুপ্ফৰসমত্তেভি, ৱক্কঙ্গেহি অৰিন্দম;

কোঞ্চা মযূৰা দিৱিযা, কোলট্ঠিমধুসাড়িকা;

কূজিতা হংসপূগেহি, কোকিলেত্থ পবোধৰে.

২৭. অম্বেত্থ ৱিপ্পসাখগ্গা [ৱিপ্পসূনগ্গা (সী. স্যা. পী.), ৱিপ্পওনগ্গা (ক.)], পলালখলসন্নিভা;

কোসম্বসড়লা [কোসুম্ভসললা (সী. স্যা. পী.)] নীপা, পক্কতালৱিলম্বিনো.

২৮. মালী তিৰিটী কাযূৰী, অঙ্গদী চন্দনুস্সদো [চন্দনস্সদো (সী.)];

ৰত্তিং ত্ৱং পৰিচাৰেসি, দিৱা ৱেদেসি ৱেদনং.

২৯. সোড়সিত্থিসহস্সানি, যা তেমা পৰিচাৰিকা;

এৱং মহানুভাৱোসি, অব্ভুতো লোমহংসনো.

৩০. কিং কম্মমকৰী পুব্বে, পাপং অত্তদুখাৱহং;

যং কৰিত্ৱা মনুস্সেসু, পিট্ঠিমংসানি খাদসি.

৩১. অজ্ঝেনানি পটিগ্গয্হ, কামেসু গধিতো [গথিতো (সী. পী.), গিদ্ধিতো (স্যা. ক.), গিদ্ধিকো (ক. অট্ঠ.)] অহং;

অচৰিং দীঘমদ্ধানং, পৰেসং অহিতাযহং.

৩২. যো পিট্ঠিমংসিকো হোতি, এৱং উক্কচ্চ খাদতি;

যথাহং অজ্জ খাদামি, পিট্ঠিমংসানি অত্তনোতি.

কিংছন্দজাতকং পঠমং.

৫১২. কুম্ভজাতকং (২)

৩৩. কো পাতুৰাসী তিদিৱা নভম্হি, ওভাসযং সংৱৰিং চন্দিমাৱ;

গত্তেহি তে ৰস্মিযো নিচ্ছৰন্তি, সতেৰতা [সতেৰিতা (সী. স্যা. ক.)] ৱিজ্জুৰিৱন্তলিক্খে.

৩৪. সো ছিন্নৱাতং কমসী অঘম্হি, ৱেহাযসং গচ্ছসি তিট্ঠসী চ;

ইদ্ধী নু তে ৱত্থুকতা সুভাৱিতা, অনদ্ধগূনং অপি দেৱতানং.

৩৫. ৱেহাযসং গম্মমাগম্ম [কমমাগম্ম (সী. স্যা.)] তিট্ঠসি, কুম্ভং কিণাথাতি যমেতমত্থং;

কো ৱা তুৱং কিস্স ৱা তায কুম্ভো, অক্খাহি মে ব্ৰাহ্মণ এতমত্থং.

৩৬. ন সপ্পিকুম্ভো নপি তেলকুম্ভো, ন ফাণিতস্স ন মধুস্স কুম্ভো;

কুম্ভস্স ৱজ্জানি অনপ্পকানি, দোসে বহূ কুম্ভগতে সুণাথ.

৩৭. গড়েয্য যং পিত্ৱা [পীত্ৱা (সী. পী.)] পতে পপাতং, সোব্ভং গুহং চন্দনিযোড়িগল্লং;

বহুম্পি ভুঞ্জেয্য অভোজনেয্যং, তস্সা পুণ্ণং কুম্ভমিমং কিণাথ.

৩৮. যং পিত্ৱা [যং ৱে পীত্ৱা (সী.)] চিত্তস্মিমনেসমানো, আহিণ্ডতী গোৰিৱ ভক্খসাৰী [ভক্খসাদী (সী. স্যা. অট্ঠ.)];

অনাথমানো উপগাযতি নচ্চতি চ, তস্সা পুণ্ণং কুম্ভমিমং কিণাথ.

৩৯. যং ৱে পিৱিত্ৱা অচেলোৱ নগ্গো, চৰেয্য গামে ৱিসিখন্তৰানি;

সম্মূড়্হচিত্তো অতিৱেলসাযী, তস্সা পুণ্ণং কুম্ভমিমং কিণাথ.

৪০. যং পিত্ৱা উট্ঠায পৱেধমানো, সীসঞ্চ বাহুঞ্চ [বাহঞ্চ (পী.)] পচালযন্তো;

সো নচ্চতী দাৰুকটল্লকোৱ, তস্সা পুণ্ণং কুম্ভমিমং কিণাথ.

৪১. যং ৱে পিৱিত্ৱা অগ্গিদড্ঢা সযন্তি, অথো সিগালেহিপি খাদিতাসে;

বন্ধং ৱধং ভোগজানিঞ্চুপেন্তি, তস্সা পুণ্ণং কুম্ভমিমং কিণাথ.

৪২. যং পিত্ৱা ভাসেয্য আভাসনেয্যং, সভাযমাসীনো অপেতৱত্থো;

সম্মক্খিতো [সমক্খিতো (সী.)] ৱন্তগতো ব্যসন্নো, তস্সা পুণ্ণং কুম্ভমিমং কিণাথ.

৪৩. যং ৱে পিৱিত্ৱা উক্কট্ঠো আৱিলক্খো, মমেৱ সব্বা পথৱীতি মঞ্ঞে [মঞ্ঞতি (সী.)];

ন মে সমো চাতুৰন্তোপি ৰাজা, তস্সা পুণ্ণং কুম্ভমিমং কিণাথ.

৪৪. মানাতিমানা কলহানি পেসুণী, দুব্বণ্ণিনী নগ্গযিনী পলাযিনী;

চোৰান ধুত্তান গতী নিকেতো, তস্সা পুণ্ণং কুম্ভমিমং কিণাথ.

৪৫. ইদ্ধানি ফীতানি কুলানি অস্সু, অনেকসাহস্সধনানি লোকে;

উচ্ছিন্নদাযজ্জকতানিমায, তস্সা পুণ্ণং কুম্ভমিমং কিণাথ.

৪৬. ধঞ্ঞং ধনং ৰজতং জাতৰূপং, খেত্তং গৱং যত্থ ৱিনাসযন্তি;

উচ্ছেদনী ৱিত্তৱতং [উচ্ছেদনী ৱিত্তগতং (স্যা.), উচ্ছেদনিৱিত্তগতং (ক.)] কুলানং, তস্সা পুণ্ণং কুম্ভমিমং কিণাথ.

৪৭. যং ৱে পিত্ৱা দিত্তৰূপোৱ [দুট্ঠৰূপোৱ (সী.)] পোসো, অক্কোসতি মাতৰং পিতৰঞ্চ;

সস্সুম্পি গণ্হেয্য অথোপি সুণ্হং, তস্সা পুণ্ণং কুম্ভমিমং কিণাথ.

৪৮. যং ৱে পিত্ৱা দিত্তৰূপাৱ নাৰী, অক্কোসতি সসুৰং সামিকঞ্চ;

দাসম্পি গণ্হে পৰিচাৰকম্পি, তস্সা পুণ্ণং কুম্ভমিমং কিণাথ.

৪৯. যং ৱে পিৱিত্ৱান [যঞ্চে পীত্ৱান (পী.)] হনেয্য পোসো, ধম্মে ঠিতং সমণং ব্ৰাহ্মণং ৱা;

গচ্ছে অপাযম্পি ততোনিদানং, তস্সা পুণ্ণং কুম্ভমিমং কিণাথ.

৫০. যং ৱে পিৱিত্ৱা দুচ্চৰিতং চৰন্তি, কাযেন ৱাচায চ চেতসা চ;

নিৰযং ৱজন্তি দুচ্চৰিতং চৰিত্ৱা, তস্সা পুণ্ণং কুম্ভমিমং কিণাথ.

৫১. যং যাচমানা ন লভন্তি পুব্বে, বহুং হিৰঞ্ঞম্পি পৰিচ্চজন্তা;

সো তং পিৱিত্ৱা অলিকং ভণাতি, তস্সা পুণ্ণং কুম্ভমিমং কিণাথ.

৫২. যং ৱে পিত্ৱা পেসনে পেসিযন্তো, অচ্চাযিকে কৰণীযম্হি জাতে;

অত্থম্পি সো নপ্পজানাতি ৱুত্তো, তস্সা পুণ্ণং কুম্ভমিমং কিণাথ.

৫৩. হিৰীমনাপি অহিৰীকভাৱং, পাতুং কৰোন্তি মদনায [মদিৰায (পী.)] মত্তা;

ধীৰাপি সন্তা বহুকং ভণন্তি, তস্সা পুণ্ণং কুম্ভমিমং কিণাথ.

৫৪. যং ৱে পিত্ৱা একথূপা সযন্তি, অনাসকা থণ্ডিলদুক্খসেয্যং;

দুব্বণ্ণিযং আযসক্যঞ্চুপেন্তি, তস্সা পুণ্ণং কুম্ভমিমং কিণাথ.

৫৫. যং ৱে পিত্ৱা পত্তখন্ধা সযন্তি, গাৱো কুটহতাৱ ন হি ৱাৰুণিযা;

[যং ৱে পিত্ৱা পত্তক্খন্ধা, সযন্তি গাৱো কূটহতাৰিৱ; ন হি ৱাৰুণিযা ৱেগো, নৰেন সুস্সহোৰিৱ; (সী.)] ৱেগো নৰেন সুসহোৰিৱ [যং ৱে পিত্ৱা পত্তক্খন্ধা, সযন্তি গাৱো কূটহতাৰিৱ; ন হি ৱাৰুণিযা ৱেগো, নৰেন সুস্সহোৰিৱ; (সী.)], তস্সা পুণ্ণং কুম্ভমিমং কিণাথ.

৫৬. যং মনুস্সা ৱিৱজ্জেন্তি, সপ্পং ঘোৰৱিসং মিৱ [ৱিসমিৱ (স্যা.), ৱিসং ইৱ (ক.), ৱিসামিৱ (?)];

তং লোকে ৱিসসমানং, কো নৰো পাতুমৰহতি.

৫৭. যং ৱে পিত্ৱা অন্ধকৱেণ্ডপুত্তা, সমুদ্দতীৰে পৰিচাৰযন্তা [অন্ধকৱেণ্হুপুত্তা (সী. পী.), অণ্ডকৱেণ্ডপুত্তা (ক.)];

উপক্কমুং মুসলেহঞ্ঞমঞ্ঞং, তস্সা পুণ্ণং কুম্ভমিমং কিণাথ.

৫৮. যং ৱে পিত্ৱা পুব্বদেৱা পমত্তা, তিদিৱা চুতা সস্সতিযা সমায;

তং তাদিসং মজ্জমিমং নিৰত্থকং, জানং মহাৰাজ কথং পিৱেয্য.

৫৯. নযিমস্মিং কুম্ভস্মিং দধি ৱা মধু ৱা, এৱং অভিঞ্ঞায কিণাহি ৰাজ;

এৱঞ্হিমং কুম্ভগতা মযা তে, অক্খাতৰূপং তৱ সব্বমিত্ত.

৬০. ন মে পিতা ৱা অথৱাপি মাতা, এতাদিসা যাদিসকো তুৱংসি;

হিতানুকম্পী পৰমত্থকামো, সোহং কৰিস্সং ৱচনং তৱজ্জ.

৬১. দদামি তে গামৱৰানি পঞ্চ, দাসীসতং সত্ত গৱং সতানি;

আজঞ্ঞযুত্তে চ ৰথে দস ইমে, আচৰিযো হোসি মমত্থকামো.

৬২. তৱেৱ দাসীসতমত্থু ৰাজ, গামা চ গাৱো চ তৱেৱ হোন্তু;

আজঞ্ঞযুত্তা চ ৰথা তৱেৱ, সক্কোহমস্মী তিদসানমিন্দো.

৬৩. মংসোদনং সপ্পিপাযাসং [সপ্পিপাযঞ্চ (সী.)] ভুঞ্জ, খাদস্সু চ ত্ৱং মধুমাসপূৱে;

এৱং তুৱং ধম্মৰতো জনিন্দ, অনিন্দিতো সগ্গমুপেহি ঠানন্তি.

কুম্ভজাতকং দুতিযং.

৫১৩. জযদ্দিসজাতকং (৩)

৬৪. চিৰস্সং ৱত মে উদপাদি অজ্জ, ভক্খো মহা সত্তমিভত্তকালে;

কুতোসি কো ৱাসি তদিঙ্ঘ ব্ৰূহি, আচিক্খ জাতিং ৱিদিতো যথাসি.

৬৫. পঞ্চালৰাজা মিগৱং পৱিট্ঠো, জযদ্দিসো নাম যদিস্সুতো তে;

চৰামি কচ্ছানি ৱনানি চাহং, পসদং ইমং খাদ মমজ্জ মুঞ্চ.

৬৬. সেনেৱ ত্ৱং পণসি সস্সমানো [সয্হমানো (স্যা. ক.)], মমেস ভক্খো পসদো যং ৱদেসি;

তং খাদিযান পসদং জিঘঞ্ঞং [জিঘচ্ছং (?)], খাদিস্সং পচ্ছা ন ৱিলাপকালো.

৬৭. ন চত্থি মোক্খো মম নিক্কযেন [ৱিক্কযেন (সী.)], গন্ত্ৱান পচ্চাগমনায পণ্হে;

তং সঙ্কৰং [সঙ্গৰং (সী. স্যা. পী.)] ব্ৰাহ্মণস্সপ্পদায, সচ্চানুৰক্খী পুনৰাৱজিস্সং.

৬৮. কিং কম্মজাতং অনুতপ্পতে ত্ৱং [অনুতপ্পতী তং (সী. পী.)], পত্তং সমীপং মৰণস্স ৰাজ;

আচিক্খ মে তং অপি সক্কুণেমু, অনুজানিতুং আগমনায পণ্হে.

৬৯. কতা মযা ব্ৰাহ্মণস্স ধনাসা, তং সঙ্কৰং পটিমুক্কং ন মুত্তং;

তং সঙ্কৰং ব্ৰাহ্মণস্সপ্পদায, সচ্চানুৰক্খী পুনৰাৱজিস্সং.

৭০. যা তে কতা ব্ৰাহ্মণস্স ধনাসা, তং সঙ্কৰং পটিমুক্কং ন মুত্তং;

তং সঙ্কৰং ব্ৰাহ্মণস্সপ্পদায, সচ্চানুৰক্খী পুনৰাৱজস্সু.