৫১৯. সম্বুলাজাতকং (৯)

২৯৭. কা ৱেধমানা গিৰিকন্দৰাযং, একা তুৱং তিট্ঠসি সংহিতূৰু [সঞ্ঞতূৰ (সী. পী.), সঞ্চিতূৰু (স্যা.)];

পুট্ঠাসি মে পাণিপমেয্যমজ্ঝে, অক্খাহি মে নামঞ্চ বন্ধৱে চ.

২৯৮. ওভাসযং ৱনং ৰম্মং, সীহব্যগ্ঘনিসেৱিতং;

কা ৱা ত্ৱমসি কল্যাণি, কস্স ৱা ত্ৱং সুমজ্ঝিমে;

অভিৱাদেমি তং ভদ্দে, দানৱাহং নমত্থু তে.

২৯৯. যো পুত্তো কাসিৰাজস্স, সোত্থিসেনোতি তং ৱিদূ;

তস্সাহং সম্বুলা ভৰিযা, এৱং জানাহি দানৱ;

অভিৱাদেমি তং ভন্তে [ভদ্দন্তে (সী. স্যা.)], সম্বুলাহং নমত্থু তে.

৩০০. ৱেদেহপুত্তো ভদ্দন্তে, ৱনে ৱসতি আতুৰো;

তমহং ৰোগসম্মত্তং, একা একং উপট্ঠহং [উপট্ঠহিং (সী.)].

৩০১. অহঞ্চ ৱনমুঞ্ছায, মধুমংসং মিগাবিলং [মিগাৱিলং (সী.)];

যদা হৰামি তং ভক্খো, তস্স নূনজ্জ নাধতি [নাথতি (ক.)].

৩০২. কিং ৱনে ৰাজপুত্তেন, আতুৰেন কৰিস্সসি;

সম্বুলে পৰিচিণ্ণেন, অহং ভত্তা ভৱামি তে.

৩০৩. সোকট্টায দুৰত্তায, কিং ৰূপং ৱিজ্জতে মম;

অঞ্ঞং পৰিযেস ভদ্দন্তে, অভিৰূপতৰং মযা.

৩০৪. এহিমং গিৰিমাৰুয্হ, ভৰিযা মে [ময্হং (সী. স্যা. পী.)] চতুস্সতা;

তাসং ত্ৱং পৱৰা হোহি, সব্বকামসমিদ্ধিনী.

৩০৫. নূন [ননু (সী. স্যা. পী. ক.)] তাৰকৱণ্ণাভে [হাটকৱণ্ণাভে (পী.)], যং কিঞ্চি মনসিচ্ছসি;

সব্বং তং পচুৰং ময্হং, ৰমস্স্ৱজ্জ [ৰমসুজ্জ (সী. স্যা.)] মযা সহ.

৩০৬. নো চে তুৱং মহেসেয্যং, সম্বুলে কাৰযিস্সসি;

অলং ত্ৱং পাতৰাসায, পণ্হে [মঞ্ঞে (সী. পী.)] ভক্খা ভৱিস্সসি.

৩০৭. তঞ্চ সত্তজটো লুদ্দো, কড়াৰো পুৰিসাদকো;

ৱনে নাথং অপস্সন্তিং, সম্বুলং অগ্গহী ভুজে.

৩০৮. অধিপন্না পিসাচেন, লুদ্দেনামিসচক্খুনা;

সা চ সত্তুৱসম্পত্তা, পতিমেৱানুসোচতি.

৩০৯. ন মে ইদং তথা দুক্খং, যং মং খাদেয্য ৰক্খসো;

যঞ্চ মে অয্যপুত্তস্স, মনো হেস্সতি অঞ্ঞথা.

৩১০. ন সন্তি দেৱা পৱসন্তি নূন, ন হি নূন সন্তি ইধ লোকপালা;

সহসা কৰোন্তানমসঞ্ঞতানং, ন হি নূন সন্তি পটিসেধিতাৰো.

৩১১. ইত্থীনমেসা পৱৰা যসস্সিনী, সন্তা সমা অগ্গিৰিৱুগ্গতেজা;

তঞ্চে তুৱং ৰক্খসাদেসি কঞ্ঞং, মুদ্ধা চ হি সত্তধা তে ফলেয্য;

মা ত্ৱং দহী [জহী (পী.)] মুঞ্চ পতিব্বতায [পতিব্বতা সা (সী.), পতিব্বতা যা (পী.)].

৩১২. সা চ অস্সমমাগচ্ছি, পমুত্তা পুৰিসাদকা;

নীড়ং [নিড্ডং (স্যা. ক.)] পড়িনং সকুণীৱ [ফলিনসকুণীৱ (সী. স্যা. পী.)], গতসিঙ্গংৱ আলযং.

৩১৩. সা তত্থ পৰিদেৱেসি, ৰাজপুত্তী যসস্সিনী;

সম্বুলা উতুমত্তক্খা, ৱনে নাথং অপস্সন্তী [অপস্সতী (সী.)].

৩১৪. সমণে ব্ৰাহ্মণে ৱন্দে, সম্পন্নচৰণে ইসে;

ৰাজপুত্তং অপস্সন্তী, তুম্হংম্হি [তুম্হং হি (পী.)] সৰণং গতা.

৩১৫. ৱন্দে সীহে চ ব্যগ্ঘে চ, যে চ অঞ্ঞে ৱনে মিগা;

ৰাজপুত্তং অপস্সন্তী, তুম্হংম্হি সৰণং গতা.

৩১৬. তিণা [তিণ (পী.)] লতানি ওসধ্যো, পব্বতানি ৱনানি চ;

ৰাজপুত্তং অপস্সন্তী, তুম্হংম্হি সৰণং গতা.

৩১৭. ৱন্দে ইন্দীৱৰীসামং, ৰত্তিং নক্খত্তমালিনিং;

ৰাজপুত্তং অপস্সন্তী, তুম্হংম্হি সৰণং গতা.

৩১৮. ৱন্দে ভাগীৰথিং গঙ্গং, সৱন্তীনং পটিগ্গহং;

ৰাজপুত্তং অপস্সন্তী, তুম্হংম্হি সৰণং গতা.

৩১৯. ৱন্দে অহং পব্বতৰাজসেট্ঠং, হিমৱন্তং সিলুচ্চযং;

ৰাজপুত্তং অপস্সন্তী, তুম্হংম্হি সৰণং গতা.

৩২০. অতিসাযং ৱতাগচ্ছি, ৰাজপুত্তি যসস্সিনি;

কেন নুজ্জ সমাগচ্ছি [সমাগচ্ছি (সী. পী.)], কো তে পিযতৰো মযা.

৩২১. ইদং খোহং তদাৱোচং [তদৱোচং (সী. স্যা.)], গহিতা তেন সত্তুনা;

ন মে ইদং তথা দুক্খং, যং মং খাদেয্য ৰক্খসো;

যঞ্চ মে অয্যপুত্তস্স, মনো হেস্সতি অঞ্ঞথা.

৩২২. চোৰীনং বহুবুদ্ধীনং, যাসু সচ্চং সুদুল্লভং;

থীনং ভাৱো দুৰাজানো, মচ্ছস্সেৱোদকে গতং.

৩২৩. তথা মং সচ্চং পালেতু, পালযিস্সতি চে মমং;

যথাহং নাভিজানামি, অঞ্ঞং পিযতৰং তযা;

এতেন সচ্চৱজ্জেন, ব্যাধি তে ৱূপসম্মতু.

৩২৪. যে কুঞ্জৰা সত্তসতা উড়াৰা, ৰক্খন্তি ৰত্তিন্দিৱমুয্যুতাৱুধা;

ধনুগ্গহানঞ্চ সতানি সোড়স, কথংৱিধে পস্সসি ভদ্দে সত্তৱো.

৩২৫. অলঙ্কতাযো পদুমুত্তৰত্তচা, ৱিৰাগিতা পস্সতি হংসগগ্গৰা;

তাসং সুণিত্ৱা মিতগীতৱাদিতং [মিতগীতৱাদিনং (পী.)], ন দানি মে তাত তথা যথা পুৰে.

৩২৬. সুৱণ্ণসংকচ্চধৰা সুৱিগ্গহা, অলঙ্কতা মানুসিযচ্ছৰূপমা;

সেনোপিযা [সেনূপিযা (পী.)] তাত অনিন্দিতঙ্গিযো, খত্তিযকঞ্ঞা পটিলোভযন্তি [পটিলাভযন্তি (পী.)] নং.

৩২৭. সচে অহং তাত তথা যথা পুৰে, পতিং তমুঞ্ছায পুনা ৱনে ভৰে;

সম্মানযে মং ন চ মং ৱিমানযে, ইতোপি মে তাত ততো ৱৰং সিযা.

৩২৮. যমন্নপানে ৱিপুলস্মি ওহিতে, নাৰী ৱিমট্ঠাভৰণা অলঙ্কতা;

সব্বঙ্গুপেতা [পঞ্চঙ্গুপেতা (সী. স্যা. পী.)] পতিনো চ অপ্পিযা, অবজ্ঝ [অৱজ্ঝ (স্যা.), আবজ্ঝ (পী.)] তস্সা মৰণং ততো ৱৰং.

৩২৯. অপি চে দলিদ্দা কপণা অনাড়্হিযা, কটাদুতীযা পতিনো চ সা পিযা;

সব্বঙ্গুপেতাযপি অপ্পিযায, অযমেৱ সেয্যা [সেয্যো (স্যা. ক.)] কপণাপি যা পিযা [কপণাপি যা (ক.)].

৩৩০. সুদুল্লভিত্থী পুৰিসস্স যা হিতা, ভত্তিত্থিযা দুল্লভো যো হিতো চ;

হিতা চ তে সীলৱতী চ ভৰিযা, জনিন্দ ধম্মং চৰ সম্বুলায.

৩৩১. সচে তুৱং ৱিপুলে লদ্ধভোগে, ইস্সাৱতিণ্ণা মৰণং উপেসি;

অহঞ্চ তে ভদ্দে ইমা ৰাজকঞ্ঞা [ইমা চ কঞ্ঞা (পী.)], সব্বে [সব্বেৱ (সী. স্যা. পী.)] তে ৱচনকৰা ভৱামাতি.

সম্বুলাজাতকং নৱমং.