৫১৭. দকৰক্খসজাতকং (৭)

২২৪. সচে ৱো ৱুয্হমানানং, সত্তন্নং উদকণ্ণৱে;

মনুস্সবলিমেসানো, নাৱং গণ্হেয্য ৰক্খসো;

অনুপুব্বং কথং দত্ৱা, মুঞ্চেসি দকৰক্খসা [দকৰক্খতো (পী.)].

২২৫. মাতৰং পঠমং দজ্জং, ভৰিযং দত্ৱান ভাতৰং;

ততো সহাযং দত্ৱান, পঞ্চমং দজ্জং [দজ্জ (স্যা.)] ব্ৰাহ্মণং;

ছট্ঠাহং দজ্জমত্তানং, নেৱ দজ্জং মহোসধং.

২২৬. পোসেতা তে জনেত্তী চ, দীঘৰত্তানুকম্পিকা;

ছব্ভী তযি পদুস্সতি [পদুট্ঠস্মিং (সী. স্যা.)], পণ্ডিতা অত্থদস্সিনী;

অঞ্ঞং উপনিসং কত্ৱা, ৱধা তং পৰিমোচযি.

২২৭. তং তাদিসিং [তাদিসং (ক.)] পাণদদিং, ওৰসং গব্ভধাৰিনিং [গব্ভধাৰিণিং (সী. স্যা.)];

মাতৰং কেন দোসেন, দজ্জাসি দকৰক্খিনো [দকৰক্খতো (পী.)].

২২৮. দহৰা ৱিযলঙ্কাৰং, ধাৰেতি অপিড়ন্ধনং;

দোৱাৰিকে অনীকট্ঠে, অতিৱেলং পজগ্ঘতি [সঞ্জগ্ঘতি (ক.)].

২২৯. অথোপি পটিৰাজূনং, সযং দূতানি সাসতি;

মাতৰং তেন দোসেন, দজ্জাহং দকৰক্খিনো.

২৩০. ইত্থিগুম্বস্স পৱৰা, অচ্চন্তং পিযভাণিনী [অচ্চন্তপিযৱাদিনী (সী. পী.)];

অনুগ্গতা [অনুব্বতা (স্যা.), অনুপুব্বতা (ক.)] সীলৱতী, ছাযাৱ অনপাযিনী.

২৩১. অক্কোধনা পুঞ্ঞৱতী [পঞ্ঞৱতী (সী. পী.)], পণ্ডিতা অত্থদস্সিনী;

উব্বৰিং [উপ্পৰিং (সী.)] কেন দোসেন, দজ্জাসি দকৰক্খিনো.

২৩২. খিড্ডাৰতিসমাপন্নং, অনত্থৱসমাগতং;

সা মং সকান পুত্তানং, অযাচং যাচতে ধনং.

২৩৩. সোহং দদামি সাৰত্তো [সাৰতো (স্যা.)], বহুং উচ্চাৱচং ধনং;

সুদুচ্চজং চজিত্ৱান, পচ্ছা সোচামি দুম্মনো;

উব্বৰিং তেন দোসেন, দজ্জাহং দকৰক্খিনো.

২৩৪. যেনোচিতা জনপদা [জানপদা (সী. স্যা. পী.)], আনীতা চ পটিগ্গহং;

আভতং পৰৰজ্জেভি, অভিট্ঠায বহুং ধনং.

২৩৫. ধনুগ্গহানং পৱৰং, সূৰং তিখিণমন্তিনং;

ভাতৰং কেন দোসেন, দজ্জাসি দকৰক্খিনো.

২৩৬. যেনোচিতা [মযোচিতা (সী.), মযাচিতা (পী.)] জনপদা, আনীতা চ পটিগ্গহং;

আভতং পৰৰজ্জেভি, অভিট্ঠায বহুং ধনং.

২৩৭. ধনুগ্গহানং পৱৰো, সূৰো তিখিণমন্তি চ [তিখিণমন্তিনো (ক.)];

মযাযং [মযা সো (সী. পী.)] সুখিতো ৰাজা, অতিমঞ্ঞতি দাৰকো.

২৩৮. উপট্ঠানম্পি মে অয্যে, ন সো এতি যথা পুৰে;

ভাতৰং তেন দোসেন, দজ্জাহং দকৰক্খিনো.

২৩৯. একৰত্তেন উভযো, ত্ৱঞ্চেৱ ধনুসেখ চ [ধনুসেখৱা (সী. স্যা. পী.)];

উভো জাতেত্থ পঞ্চালা, সহাযা সুসমাৱযা.

২৪০. চৰিযা তং অনুবন্ধিত্থো [অনুবন্ধো (ক.)], একদুক্খসুখো তৱ;

উস্সুক্কো তে দিৱাৰত্তিং, সব্বকিচ্চেসু ব্যাৱটো;

সহাযং কেন দোসেন, দজ্জাসি দকৰক্খিনো.

২৪১. চৰিযা মং অযং [চৰিযায অযং (সী. পী.)] অয্যে, পজগ্ঘিত্থো [সঞ্জগ্ঘিত্থো (স্যা.)] মযা সহ;

অজ্জাপি তেন ৱণ্ণেন, অতিৱেলং পজগ্ঘতি.

২৪২. উব্বৰিযাপিহং অয্যে, মন্তযামি ৰহোগতো;

অনামন্তো [অনামন্তা (সী.)] পৱিসতি, পুব্বে অপ্পটিৱেদিতো.

২৪৩. লদ্ধদ্ৱাৰো [লদ্ধৱাৰো (সী. পী.)] কতোকাসো, অহিৰিকং অনাদৰং;

সহাযং তেন দোসেন, দজ্জাহং দকৰক্খিনো.

২৪৪. কুসলো সব্বনিমিত্তানং, ৰুতঞ্ঞূ [ৰুদঞ্ঞূ (সী. স্যা. পী.)] আগতাগমো;

উপ্পাতে সুপিনে যুত্তো, নিয্যানে চ পৱেসনে.

২৪৫. পট্ঠো [পদ্ধো (সী. পী.)] ভূমন্তলিক্খস্মিং, নক্খত্তপদকোৱিদো;

ব্ৰাহ্মণং কেন দোসেন, দজ্জাসি দকৰক্খিনো.

২৪৬. পৰিসাযম্পি মে অয্যে, উম্মীলিত্ৱা উদিক্খতি;

তস্মা অচ্চভমুং লুদ্দং, দজ্জাহং দকৰক্খিনো.

২৪৭. সসমুদ্দপৰিযাযং, মহিং সাগৰকুণ্ডলং;

ৱসুন্ধৰং আৱসসি, অমচ্চপৰিৱাৰিতো.

২৪৮. চাতুৰন্তো মহাৰট্ঠো, ৱিজিতাৱী মহব্বলো;

পথব্যা একৰাজাসি, যসো তে ৱিপুলং গতো.

২৪৯. সোড়সিত্থিসহস্সানি, আমুত্তমণিকুণ্ডলা;

নানাজনপদা নাৰী, দেৱকঞ্ঞূপমা সুভা.

২৫০. এৱং সব্বঙ্গসম্পন্নং, সব্বকামসমিদ্ধিনং;

সুখিতানং পিযং দীঘং, জীৱিতং আহু খত্তিয.

২৫১. অথ ত্ৱং কেন ৱণ্ণেন, কেন ৱা পন হেতুনা;

পণ্ডিতং অনুৰক্খন্তো, পাণং চজসি দুচ্চজং.

২৫২. যতোপি আগতো অয্যে, মম হত্থং মহোসধো;

নাভিজানামি ধীৰস্স, অনুমত্তম্পি দুক্কটং.

২৫৩. সচে চ কিস্মিচি কালে, মৰণং মে পুৰে সিযা;

সো মে পুত্তে [পুত্তে চ মে (সী. স্যা. পী.] পপুত্তে চ, সুখাপেয্য মহোসধো.

২৫৪. অনাগতং পচ্চুপ্পন্নং, সব্বমত্থম্পি পস্সতি [সব্বমত্থং ৱিপস্সতি (সী. স্যা. পী.)];

অনাপৰাধকম্মন্তং, ন দজ্জং দকৰক্খিনো.

২৫৫. ইদং সুণাথ পঞ্চালা, চূড়নেয্যস্স [চূড়নীযস্স (সী.)] ভাসিতং;

পণ্ডিতং অনুৰক্খন্তো, পাণং চজতি দুচ্চজং.

২৫৬. মাতু ভৰিযায ভাতুচ্চ, সখিনো ব্ৰাহ্মণস্স চ;

অত্তনো চাপি পঞ্চালো, ছন্নং চজতি জীৱিতং.

২৫৭. এৱং মহত্থিকা [খহিদ্ধিযা (স্যা.), মহিদ্ধিকা (ক.)] পঞ্ঞা, নিপুণা সাধুচিন্তিনী;

দিট্ঠধম্মহিতত্থায, সম্পৰাযসুখায চাতি.

দকৰক্খসজাতকং সত্তমং.