৫১৬. মহাকপিজাতকং (৬)

১৭৮. বাৰাণস্যং [বাৰাণস্সং (সী. পী.)] অহূ ৰাজা, কাসীনং ৰট্ঠৱড্ঢনো;

মিত্তামচ্চপৰিব্যূড়্হো, অগমাসি মিগাজিনং [মিগাজিৰং (সী.), মিগাচিৰং (পী.)].

১৭৯. তত্থ ব্ৰাহ্মণমদ্দক্খি, সেতং চিত্ৰং কিলাসিনং;

ৱিদ্ধস্তং কোৱিড়াৰংৱ, কিসং ধমনিসন্থতং.

১৮০. পৰমকাৰুঞ্ঞতং পত্তং, দিস্ৱা কিচ্ছগতং নৰং;

অৱচ ব্যম্হিতো ৰাজা, ‘‘যক্খানং কতমো নুসি.

১৮১. ‘‘হত্থপাদা চ তে সেতা, ততো সেততৰং [সেততৰো (পী.)] সিৰো;

গত্তং কম্মাসৱণ্ণং তে, কিলাসবহুলো চসি.

১৮২. ‘‘ৱট্টনাৱড়ি [ৱট্ঠনাৱলি (পী.)] সঙ্কাসা, পিট্ঠি তে নিন্নতুন্নতা;

কাড়পব্বাৱ [কাড়পব্বা চ (স্যা.), কাড়া পব্বা চ (পী.)] তে অঙ্গা, নাঞ্ঞং পস্সামি এদিসং.

১৮৩. ‘‘উগ্ঘট্টপাদো তসিতো, কিসো ধমনিসন্থতো;

ছাতো আতত্তৰূপোসি [আদিত্তৰূপোসি (ক.), অতিত্তৰূপোসি (স্যা. ক. অট্ঠ.)], কুতোসি কত্থ গচ্ছসি.

১৮৪. ‘‘দুদ্দসী অপ্পকাৰোসি, দুব্বণ্ণো ভীমদস্সনো;

জনেত্তি যাপি তে মাতা, ন তং ইচ্ছেয্য পস্সিতুং.

১৮৫. ‘‘কিং কম্মমকৰং [কম্মমকৰা (সী. স্যা. পী.)] পুব্বে, কং অৱজ্ঝং অঘাতযি;

কিব্বিসং যং কৰিত্ৱান, ইদং দুক্খং উপাগমি’’.

১৮৬. তগ্ঘ তে অহমক্খিস্সং, যথাপি কুসলো তথা;

সচ্চৱাদিঞ্হি লোকস্মিং, পসংসন্তীধ পণ্ডিতা.

১৮৭. একো চৰং গোগৱেসো, মূড়্হো অচ্চসৰিং ৱনে;

অৰঞ্ঞে ইৰীণে [ঈৰিণে (সী. স্যা. পী.)] ৱিৱনে, নানাকুঞ্জৰসেৱিতে.

১৮৮. ৱাড়মিগানুচৰিতে, ৱিপ্পনট্ঠোস্মি কাননে;

অচৰিং তত্থ সত্তাহং, খুপ্পিপাস [খুপ্পিপাসা (সী. পী.)] সমপ্পিতো.

১৮৯. তত্থ তিন্দুকমদ্দক্খিং, ৱিসমট্ঠং বুভুক্খিতো;

পপাতমভিলম্বন্তং, সম্পন্নফলধাৰিনং.

১৯০. ৱাতস্সিতানি ভক্খেসিং, তানি ৰুচ্চিংসু মে ভুসং;

অতিত্তো ৰুক্খমাৰূহিং [মাৰুয্হ (সী. স্যা.)], তত্থ হেস্সামি আসিতো.

১৯১. একং মে ভক্খিতং আসি, দুতিযং অভিপত্থিতং;

ততো সা ভঞ্জথ সাখা, ছিন্না ফৰসুনা ৱিয.

১৯২. সোহং সহাৱ সাখাহি, উদ্ধংপাদো অৱংসিৰো;

অপ্পতিট্ঠে অনালম্বে, গিৰিদুগ্গস্মি পাপতং.

১৯৩. যস্মা চ ৱাৰি গম্ভীৰং, তস্মা ন সমপজ্জিসং [সমপজ্জসিং (সী.), সমভজ্জিসং (পী.)];

তত্থ সেসিং নিৰানন্দো, অনূনা [অনাথো (সী.)] দস ৰত্তিযো.

১৯৪. অথেত্থ কপি মাগঞ্ছি [মাগচ্ছি (স্যা. ক.)], গোনঙ্গুলো দৰীচৰো;

সাখাহি সাখং ৱিচৰন্তো, খাদমানো দুমপ্ফলং.

১৯৫. সো মং দিস্ৱা কিসং পণ্ডুং, কাৰুঞ্ঞমকৰং মযি;

অম্ভো কো নাম সো এত্থ, এৱং দুক্খেন অট্টিতো.

১৯৬. মনুস্সো অমনুস্সো ৱা, অত্তানং মে পৱেদয;

তস্সঞ্জলিং পণামেত্ৱা, ইদং ৱচনমব্ৰৱিং.

১৯৭. মনুস্সোহং ব্যসম্পত্তো [ৱসম্পত্তো (স্যা. ক.)], সা মে নত্থি ইতো গতি;

তং ৱো ৱদামি ভদ্দং ৱো, ত্ৱঞ্চ মে সৰণং ভৱ.

১৯৮. গৰুং [গৰু (সী. পী.)] সিলং গহেত্ৱান, ৱিচৰী [ৱিচৰি (পী.)] পব্বতে কপি;

সিলায যোগ্গং কত্ৱান, নিসভো এতদব্ৰৱি.

১৯৯. এহি মে পিট্ঠিমাৰুয্হ, গীৱং গণ্হাহি বাহুভি;

অহং তং উদ্ধৰিস্সামি, গিৰিদুগ্গত ৱেগসা.

২০০. তস্স তং ৱচনং সুত্ৱা, ৱানৰিন্দস্স সিৰীমতো;

পিট্ঠিমাৰুয্হ ধীৰস্স, গীৱং বাহাহি অগ্গহিং.

২০১. সো মং ততো সমুট্ঠাসি, তেজস্সী [তেজসী (স্যা. পী. ক.)] বলৱা কপি;

ৱিহঞ্ঞমানো কিচ্ছেন, গিৰিদুগ্গত ৱেগসা.

২০২. উদ্ধৰিত্ৱান মং সন্তো, নিসভো এতদব্ৰৱি;

ইঙ্ঘ মং সম্ম ৰক্খস্সু, পস্সুপিস্সং মুহুত্তকং.

২০৩. সীহা ব্যগ্ঘা চ দীপী চ, অচ্ছকোকতৰচ্ছযো;

তে মং পমত্তং হিংসেয্যুং, তে ত্ৱং দিস্ৱা নিৱাৰয [দিস্ৱান ৱাৰয (পী.)].

২০৪. এৱং মে পৰিত্তাতূন [পৰিত্তাতুন (ক.)], পস্সুপি সো মুহুত্তকং;

তদাহং পাপিকং দিট্ঠিং, পটিলচ্ছিং অযোনিসো.

২০৫. ভক্খো অযং মনুস্সানং, যথা চঞ্ঞে ৱনে মিগা;

যং নূনিমং ৱধিত্ৱান, ছাতো খাদেয্য ৱানৰং.

২০৬. অসিতো [আসিকো (পী.)] চ গমিস্সামি, মংসমাদায সম্বলং;

কন্তাৰং নিত্থৰিস্সামি, পাথেয্যং মে ভৱিস্সতি.

২০৭. ততো সিলং গহেত্ৱান, মত্থকং সন্নিতাড়যিং;

মম গত্ত [ভত্ত (সী. স্যা.), হত্থ (পী.)] কিলন্তস্স, পহাৰো দুব্বলো অহু.

২০৮. সো চ ৱেগেনুদপ্পত্তো, কপি ৰুহিৰ [ৰুধিৰ (সী.)] মক্খিতো;

অস্সুপুণ্ণেহি নেত্তেহি, ৰোদন্তো মং উদিক্খতি.

২০৯. মায্যোমং কৰি ভদ্দন্তে, ত্ৱঞ্চ নামেদিসং কৰি;

ত্ৱঞ্চ খো নাম দীঘাৱু [দীঘাযু (পী.)], অঞ্ঞে [অঞ্ঞং (পী.)] ৱাৰেতুমৰহসি.

২১০. অহো ৱত ৰে পুৰিস, তাৱ দুক্কৰকাৰক;

এদিসা ৱিসমা দুগ্গা, পপাতা উদ্ধতো [উদ্ধটো (পী.)] মযা.

২১১. আনীতো পৰলোকাৱ, দুব্ভেয্যং মং অমঞ্ঞথ;

তং তেন পাপধম্মেন, পাপং পাপেন চিন্তিতং.

২১২. মা হেৱ ত্ৱং অধম্মট্ঠ, ৱেদনং কটুকং ফুসি;

মা হেৱ পাপকম্মং তং, ফলং ৱেড়ুংৱ তং ৱধি.

২১৩. তযিমে নত্থি ৱিস্সাসো, পাপধম্ম অসঞ্ঞত [পাপধম্মং অমঞ্ঞথ (পী.)];

এহি মে পিট্ঠিতো গচ্ছ, দিস্সমানোৱ সন্তিকে.

২১৪. মুত্তোসি হত্থা ৱাড়ানং, পত্তোসি মানুসিং পদং;

এস মগ্গো অধম্মট্ঠ, তেন গচ্ছ যথাসুখং.

২১৫. ইদং ৱত্ৱা গিৰিচৰো, ৰহদে [ৰুহিৰং (স্যা. ক.)] পক্খল্য মত্থকং;

অস্সূনি সম্পমজ্জিত্ৱা, ততো পব্বতমাৰুহি.

২১৬. সোহং তেনাভিসত্তোস্মি, পৰিড়াহেন অট্টিতো;

ডয্হমানেন গত্তেন, ৱাৰিং পাতুং উপাগমিং.

২১৭. অগ্গিনা ৱিয সন্তত্তো, ৰহদো ৰুহিৰমক্খিতো;

পুব্বলোহিতসঙ্কাসো, সব্বো মে সমপজ্জথ.

২১৮. যাৱন্তো উদবিন্দূনি, কাযস্মিং নিপতিংসু মে;

তাৱন্তো গণ্ড [গণ্ডূ (সী. পী.), গণ্ডু (স্যা.)] জাযেথ, অদ্ধবেলুৱসাদিসা.

২১৯. পভিন্না পগ্ঘৰিংসু মে, কুণপা পুব্বলোহিতা;

যেন যেনেৱ গচ্ছামি, গামেসু নিগমেসু চ.

২২০. দণ্ডহত্থা নিৱাৰেন্তি, ইত্থিযো পুৰিসা চ মং;

ওক্কিতা [ওকিণ্ণা (সী.)] পূতিগন্ধেন, মাস্সু ওৰেন আগমা [মাগমা (সী. পী.)].

২২১. এতাদিসং ইদং দুক্খং, সত্ত ৱস্সানি দানি মে;

অনুভোমি সকং কম্মং, পুব্বে দুক্কটমত্তনো.

২২২. তং ৱো ৱদামি ভদ্দন্তে [ভদ্দং ৱো (সী. পী.)], যাৱন্তেত্থ সমাগতা;

মাস্সু মিত্তান [মিত্তানং (সী. পী.)] দুব্ভিত্থো, মিত্তদুব্ভো হি পাপকো.

২২৩. কুট্ঠী কিলাসী ভৱতি, যো মিত্তানিধ দুব্ভতি [যো মিত্তানং ইধদ্দুভি (সী. অট্ঠ.), যো মিত্তানং ইধ দুব্ভতি (পী.)];

কাযস্স ভেদা মিত্তদ্দু [মিত্তদুব্ভী (স্যা. ক.)], নিৰযং সোপপজ্জতীতি [সো উপপজ্জতীতি (সী. স্যা. পী.)].

মহাকপিজাতকং ছট্ঠং.