৫১৫. সম্ভৱজাতকং (৫)

১৩৮. ৰজ্জঞ্চ পটিপন্নাস্ম, আধিপচ্চং সুচীৰত;

মহত্তং পত্তুমিচ্ছামি, ৱিজেতুং পথৱিং ইমং.

১৩৯. ধম্মেন নো অধম্মেন, অধম্মো মে ন ৰুচ্চতি;

কিচ্চোৱ ধম্মো চৰিতো, ৰঞ্ঞো হোতি সুচীৰত.

১৪০. ইধ চেৱানিন্দিতা যেন, পেচ্চ যেন অনিন্দিতা;

যসং দেৱমনুস্সেসু, যেন পপ্পোমু [পপ্পেমু (সী. অট্ঠ.)] ব্ৰাহ্মণ.

১৪১. যোহং অত্থঞ্চ ধম্মঞ্চ, কত্তুমিচ্ছামি ব্ৰাহ্মণ;

তং ত্ৱং অত্থঞ্চ ধম্মঞ্চ, ব্ৰাহ্মণক্খাহি পুচ্ছিতো.

১৪২. নাঞ্ঞত্ৰ ৱিধুৰা ৰাজ, এতদক্খাতুমৰহতি;

যং ত্ৱং অত্থঞ্চ ধম্মঞ্চ, কত্তুমিচ্ছসি খত্তিয.

১৪৩. এহি খো পহিতো গচ্ছ, ৱিধুৰস্স উপন্তিকং;

নিক্খঞ্চিমং [নিক্খং ৰত্ত (সী.), নিক্খমিমং (পী.)] সুৱণ্ণস্স, হৰং গচ্ছ সুচীৰত;

অভিহাৰং ইমং দজ্জা, অত্থধম্মানুসিট্ঠিযা.

১৪৪. স্ৱাধিপ্পাগা ভাৰদ্ৱাজো, ৱিধুৰস্স উপন্তিকং;

তমদ্দস মহাব্ৰহ্মা, অসমানং সকে ঘৰে.

১৪৫. ৰঞ্ঞোহং পহিতো দূতো, কোৰব্যস্স যসস্সিনো;

‘‘অত্থং ধম্মঞ্চ পুচ্ছেসি’’, ইচ্চব্ৰৱি যুধিট্ঠিলো;

তং ত্ৱং অত্থঞ্চ ধম্মঞ্চ, ৱিধুৰক্খাহি পুচ্ছিতো.

১৪৬. গঙ্গং মে পিদহিস্সন্তি, ন তং সক্কোমি ব্ৰাহ্মণ;

অপিধেতুং মহাসিন্ধুং, তং কথং সো ভৱিস্সতি.

১৪৭. ন তে সক্কোমি অক্খাতুং, অত্থং ধম্মঞ্চ পুচ্ছিতো;

ভদ্ৰকাৰো চ মে পুত্তো, ওৰসো মম অত্ৰজো;

তং ত্ৱং অত্থঞ্চ ধম্মঞ্চ, গন্ত্ৱা পুচ্ছস্সু ব্ৰাহ্মণ.

১৪৮. স্ৱাধিপ্পাগা ভাৰদ্ৱাজো, ভদ্ৰকাৰস্সুপন্তিকং [ভদ্ৰকাৰস্স সন্তিকং (সী. স্যা.)];

তমদ্দস মহাব্ৰহ্মা, নিসিন্নং সম্হি ৱেস্মনি.

১৪৯. ৰঞ্ঞোহং পহিতো দূতো, কোৰব্যস্স যসস্সিনো;

‘‘অত্থং ধম্মঞ্চ পুচ্ছেসি’’, ইচ্চব্ৰৱি যুধিট্ঠিলো;

তং ত্ৱং অত্থঞ্চ ধম্মঞ্চ, ভদ্ৰকাৰ পব্ৰূহি [ব্ৰৱীহি (সী. পী.)] মে.

১৫০. মংসকাজং [মংসকাচং (পী.)] অৱহায, গোধং অনুপতামহং;

ন তে সক্কোমি অক্খাতুং, অত্থং ধম্মঞ্চ পুচ্ছিতো.

১৫১. সঞ্চযো [সঞ্জযো (সী. স্যা. পী.)] নাম মে ভাতা, কনিট্ঠো মে সুচীৰত;

তং ত্ৱং অত্থঞ্চ ধম্মঞ্চ, গন্ত্ৱা পুচ্ছস্সু ব্ৰাহ্মণ.

১৫২. স্ৱাধিপ্পাগা ভাৰদ্ৱাজো, সঞ্চযস্স উপন্তিকং;

তমদ্দস মহাব্ৰহ্মা, নিসিন্নং সম্হি ৱেস্মনি [পৰিসতি (স্যা.), পৰীসতি (পী.)].

১৫৩. ৰঞ্ঞোহং পহিতো দূতো, কোৰব্যস্স যসস্সিনো;

‘‘অত্থং ধম্মঞ্চ পুচ্ছেসি’’, ইচ্চব্ৰৱি যুধিট্ঠিলো;

তং ত্ৱং অত্থঞ্চ ধম্মঞ্চ, সঞ্চযক্খাহি পুচ্ছিতো.

১৫৪. সদা মং গিলতে [গিলতী (সী.), গিলতি (পী.)] মচ্চু, সাযং পাতো সুচীৰত;

ন তে সক্কোমি অক্খাতুং, অত্থং ধম্মঞ্চ পুচ্ছিতো.

১৫৫. সম্ভৱো নাম মে ভাতা, কনিট্ঠো মে সুচীৰত;

তং ত্ৱং অত্থঞ্চ ধম্মঞ্চ, গন্ত্ৱা পুচ্ছস্সু ব্ৰাহ্মণ.

১৫৬. অব্ভুতো ৱত ভো ধম্মো, নাযং অস্মাক ৰুচ্চতি;

তযো জনা পিতাপুত্তা, তেসু পঞ্ঞায নো ৱিদূ.

১৫৭. ন তং সক্কোথ অক্খাতুং, অত্থং ধম্মঞ্চ পুচ্ছিতা;

কথং নু দহৰো জঞ্ঞা, অত্থং ধম্মঞ্চ পুচ্ছিতো.

১৫৮. মা নং দহৰোতি উঞ্ঞাসি [মঞ্ঞাসি (স্যা. ক.)], অপুচ্ছিত্ৱান সম্ভৱং;

পুচ্ছিত্ৱা সম্ভৱং জঞ্ঞা, অত্থং ধম্মঞ্চ ব্ৰাহ্মণ.

১৫৯. যথাপি চন্দো ৱিমলো, গচ্ছং আকাসধাতুযা;

সব্বে তাৰাগণে লোকে, আভায অতিৰোচতি.

১৬০. এৱম্পি দহৰূপেতো, পঞ্ঞাযোগেন সম্ভৱো;

মা নং দহৰোতি উঞ্ঞাসি, অপুচ্ছিত্ৱান সম্ভৱং;

পুচ্ছিত্ৱা সম্ভৱং জঞ্ঞা, অত্থং ধম্মঞ্চ ব্ৰাহ্মণ.

১৬১. যথাপি ৰম্মকো মাসো, গিম্হানং হোতি ব্ৰাহ্মণ;

অতেৱঞ্ঞেহি মাসেহি, দুমপুপ্ফেহি সোভতি.

১৬২. এৱম্পি দহৰূপেতো, পঞ্ঞাযোগেন সম্ভৱো;

মা নং দহৰোতি উঞ্ঞাসি, অপুচ্ছিত্ৱান সম্ভৱং;

পুচ্ছিত্ৱা সম্ভৱং জঞ্ঞা, অত্থং ধম্মঞ্চ ব্ৰাহ্মণ.

১৬৩. যথাপি হিমৱা ব্ৰহ্মে, পব্বতো গন্ধমাদনো;

নানাৰুক্খেহি সঞ্ছন্নো, মহাভূতগণালযো;

ওসধেহি চ দিব্বেহি, দিসা ভাতি পৱাতি চ.

১৬৪. এৱম্পি দহৰূপেতো, পঞ্ঞাযোগেন সম্ভৱো;

মা নং দহৰোতি উঞ্ঞাসি, অপুচ্ছিত্ৱান সম্ভৱং;

পুচ্ছিত্ৱা সম্ভৱং জঞ্ঞা, অত্থং ধম্মঞ্চ ব্ৰাহ্মণ.

১৬৫. যথাপি পাৱকো ব্ৰহ্মে, অচ্চিমালী যসস্সিমা;

জলমানো ৱনে গচ্ছে [চৰং কচ্ছে (পী.)], অনলো কণ্হৱত্তনী.

১৬৬. ঘতাসনো ধূমকেতু, উত্তমাহেৱনন্দহো;

নিসীথে [নিস্সীৱে (স্যা.), নিসিৱে (ক.)] পব্বতগ্গস্মিং, পহূতেধো [বহুতেজো (স্যা. ক.)] ৱিৰোচতি.

১৬৭. এৱম্পি দহৰূপেতো, পঞ্ঞাযোগেন সম্ভৱো;

মা নং দহৰোতি উঞ্ঞাসি, অপুচ্ছিত্ৱান সম্ভৱং;

পুচ্ছিত্ৱা সম্ভৱং জঞ্ঞা, অত্থং ধম্মঞ্চ ব্ৰাহ্মণ.

১৬৮. জৱেন ভদ্ৰং জানন্তি, বলিবদ্দঞ্চ [বলিৱদ্দঞ্চ (সী. পী.)] ৱাহিযে;

দোহেন ধেনুং জানন্তি, ভাসমানঞ্চ পণ্ডিতং.

১৬৯. এৱম্পি দহৰূপেতো, পঞ্ঞাযোগেন সম্ভৱো;

মা নং দহৰোতি উঞ্ঞাসি, অপুচ্ছিত্ৱান সম্ভৱং;

পুচ্ছিত্ৱা সম্ভৱং জঞ্ঞা, অত্থং ধম্মঞ্চ ব্ৰাহ্মণ.

১৭০. স্ৱাধিপ্পাগা ভাৰদ্ৱাজো, সম্ভৱস্স উপন্তিকং;

তমদ্দস মহাব্ৰহ্মা, কীড়মানং বহীপুৰে.

১৭১. ৰঞ্ঞোহং পহিতো দূতো, কোৰব্যস্স যসস্সিনো;

‘‘অত্থং ধম্মঞ্চ পুচ্ছেসি’’, ইচ্চব্ৰৱি যুধিট্ঠিলো;

তং ত্ৱং অত্থঞ্চ ধম্মঞ্চ, সম্ভৱক্খাহি পুচ্ছিতো.

১৭২. তগ্ঘ তে অহমক্খিস্সং, যথাপি কুসলো তথা;

ৰাজা চ খো তং জানাতি, যদি কাহতি ৱা ন ৱা.

১৭৩. ‘‘অজ্জ সুৱে’’তি সংসেয্য, ৰঞ্ঞা পুট্ঠো সুচীৰত;

মা কত্ৱা অৱসী ৰাজা, অত্থে জাতে যুধিট্ঠিলো.

১৭৪. অজ্ঝত্তঞ্ঞেৱ সংসেয্য, ৰঞ্ঞা পুট্ঠো সুচীৰত;

কুম্মগ্গং ন নিৱেসেয্য, যথা মূড়্হো অচেতসো [অচেতনো (ক.)].

১৭৫. অত্তানং নাতিৱত্তেয্য, অধম্মং ন সমাচৰে;

অতিত্থে নপ্পতাৰেয্য, অনত্থে ন যুতো সিযা.

১৭৬. যো চ এতানি ঠানানি, কত্তুং জানাতি খত্তিযো;

সদা সো ৱড্ঢতে ৰাজা, সুক্কপক্খেৱ চন্দিমা.

১৭৭. ঞাতীনঞ্চ পিযো হোতি, মিত্তেসু চ ৱিৰোচতি;

কাযস্স ভেদা সপ্পঞ্ঞো, সগ্গং সো উপপজ্জতীতি.

সম্ভৱজাতকং পঞ্চমং.