৫১৪. ছদ্দন্তজাতকং (৪)

৯৭. কিং নু সোচসিনুচ্চঙ্গি, পণ্ডূসি ৱৰৱণ্ণিনি;

মিলাযসি ৱিসালক্খি, মালাৱ পৰিমদ্দিতা.

৯৮. দোহড়ো মে মহাৰাজ, সুপিনন্তেনুপজ্ঝগা [নু’পচ্চগা (সী. স্যা. পী.)];

ন সো সুলভৰূপোৱ, যাদিসো মম দোহড়ো.

৯৯. যে কেচি মানুসা কামা, ইধ লোকস্মি নন্দনে;

সব্বে তে পচুৰা ময্হং, অহং তে দম্মি দোহড়ং.

১০০. লুদ্দা দেৱ সমাযন্তু, যে কেচি ৱিজিতে তৱ;

এতেসং অহমক্খিস্সং, যাদিসো মম দোহড়ো.

১০১. ইমে তে লুদ্দকা দেৱি, কতহত্থা ৱিসাৰদা;

ৱনঞ্ঞূ চ মিগঞ্ঞূ চ, মমত্থে [মম তে (পী.)] চত্তজীৱিতা.

১০২. লুদ্দপুত্তা নিসামেথ, যাৱন্তেত্থ সমাগতা;

ছব্বিসাণং গজং সেতং, অদ্দসং সুপিনে অহং;

তস্স দন্তেহি মে অত্থো, অলাভে নত্থি জীৱিতং.

১০৩. ন নো পিতূনং ন পিতামহানং, দিট্ঠো সুতো কুঞ্জৰো ছব্বিসাণো;

যমদ্দসা সুপিনে ৰাজপুত্তী, অক্খাহি নো যাদিসো হত্থিনাগো.

১০৪. দিসা চতস্সো ৱিদিসা চতস্সো, উদ্ধং অধো দস দিসা ইমাযো;

কতমং দিসং তিট্ঠতি নাগৰাজা, যমদ্দসা সুপিনে ছব্বিসাণং.

১০৫. ইতো উজুং উত্তৰিযং দিসাযং, অতিক্কম্ম সো সত্তগিৰী ব্ৰহন্তে;

সুৱণ্ণপস্সো নাম গিৰী উড়াৰো, সুপুপ্ফিতো [সম্পুপ্ফিতো (স্যা.)] কিম্পুৰিসানুচিণ্ণো.

১০৬. আৰুয্হ সেলং ভৱনং কিন্নৰানং, ওলোকয পব্বতপাদমূলং;

অথ দক্খসী মেঘসমানৱণ্ণং, নিগ্ৰোধৰাজং অথ সহস্সপাদং [পোৰং (ক.)].

১০৭. তত্থচ্ছতী কুঞ্জৰো ছব্বিসাণো, সব্বসেতো দুপ্পসহো পৰেভি;

ৰক্খন্তি নং অট্ঠসহস্সনাগা, ঈসাদন্তা ৱাতজৱপ্পহাৰিনো.

১০৮. তিট্ঠন্তি তে তুমূলং [তুমূল (স্যা.), ভিমূল (পী. ক.)] পস্সসন্তা, কুপ্পন্তি ৱাতস্সপি এৰিতস্স;

মনুস্সভূতং পন তত্থ দিস্ৱা, ভস্মং কৰেয্যুং নাস্স ৰজোপি তস্স.

১০৯. বহূ হিমে ৰাজকুলম্হি সন্তি, পিড়ন্ধনা জাতৰূপস্স দেৱী;

মুত্তামণীৱেড়ুৰিযামযা চ, কিং কাহসি দন্তপিড়ন্ধনেন;

মাৰেতুকামা কুঞ্জৰং ছব্বিসাণং, উদাহু ঘাতেস্সসি লুদ্দপুত্তে.

১১০. সা ইস্সিতা দুক্খিতা চস্মি লুদ্দ, উদ্ধঞ্চ সুস্সামি অনুস্সৰন্তী;

কৰোহি মে লুদ্দক এতমত্থং, দস্সামি তে গামৱৰানি পঞ্চ.

১১১. কত্থচ্ছতী কত্থমুপেতি ঠানং, ৱীথিস্স কা ন্হান [নহান (সী. পী.)] গতস্স হোতি;

কথঞ্হি সো ন্হাযতি [নহাযতি (সী. পী.)] নাগৰাজা, কথং ৱিজানেমু গতিং গজস্স.

১১২. তত্থেৱ সা পোক্খৰণী অদূৰে [অৱিদূৰে (স্যা. ক.)], ৰম্মা সুতিত্থা চ মহোদিকা [মহোদকা (স্যা. ক.)] চ;

সম্পুপ্ফিতা ভমৰগণানুচিণ্ণা [কিণ্ণা (কত্থচি)], এত্থ হি সো ন্হাযতি নাগৰাজা.

১১৩. সীসং নহাতুপ্পল [নহাতো উপ্পল (সী. স্যা. পী.)] মালভাৰী, সব্বসেতো পুণ্ডৰীকত্তচঙ্গী;

আমোদমানো গচ্ছতি সন্নিকেতং, পুৰক্খত্ৱা মহেসিং সব্বভদ্দং.

১১৪. তত্থেৱ সো উগ্গহেত্ৱান ৱাক্যং, আদায তূণিঞ্চ ধনুঞ্চ লুদ্দো;

ৱিতুৰিযতি [ৱিতুৰিয সো (সী. অট্ঠ.)] সত্তগিৰী ব্ৰহন্তে, সুৱণ্ণপস্সং নাম গিৰিং উড়াৰং.

১১৫. আৰুয্হ সেলং ভৱনং কিন্নৰানং, ওলোকযী পব্বতপাদমূলং;

তত্থদ্দসা মেঘসমানৱণ্ণং, নিগ্ৰোধৰাজং অট্ঠসহস্সপাদং.

১১৬. তত্থদ্দসা কুঞ্জৰং ছব্বিসাণং, সব্বসেতং দুপ্পসহং পৰেভি;

ৰক্খন্তি নং অট্ঠসহস্সনাগা, ঈসাদন্তা ৱাতজৱপ্পহাৰিনো.

১১৭. তত্থদ্দসা পোক্খৰণিং অদূৰে, ৰম্মং সুতিত্থঞ্চ মহোদিকঞ্চ;

সম্পুপ্ফিতং ভমৰগণানুচিণ্ণং, যত্থ হি সো ন্হাযতি নাগৰাজা.

১১৮. দিস্ৱান নাগস্স গতিং ঠিতিঞ্চ, ৱীথিস্স যা ন্হানগতস্স হোতি;

ওপাতমাগচ্ছি অনৰিযৰূপো, পযোজিতো চিত্তৱসানুগায.

১১৯. খণিত্ৱান কাসুং ফলকেহি ছাদযি, অত্তানমোধায ধনুঞ্চ লুদ্দো;

পস্সাগতং পুথুসল্লেন নাগং, সমপ্পযী দুক্কটকম্মকাৰী.

১২০. ৱিদ্ধো চ নাগো কোঞ্চমনাদি ঘোৰং, সব্বে চ [সব্বেৱ (সী. স্যা. পী.)] নাগা নিন্নদুং [নিন্নাদু (স্যা.), নিন্নাদং (ক.)] ঘোৰৰূপং;

তিণঞ্চ কট্ঠঞ্চ ৰণং [চুণ্ণং (ক. সী. পী.)] কৰোন্তা, ধাৱিংসু তে অট্ঠদিসা সমন্ততো.

১২১. ৱধিস্সমেতন্তি [ৱধিস্সমেনন্তি (স্যা.)] পৰামসন্তো, কাসাৱমদ্দক্খি ধজং ইসীনং;

দুক্খেন ফুট্ঠস্সুদপাদি সঞ্ঞা, অৰহদ্ধজো সব্ভি অৱজ্ঝৰূপো.

১২২. অনিক্কসাৱো কাসাৱং, যো ৱত্থং পৰিদহিস্সতি [পৰিদহেস্সতি (সী. পী.), পৰিধস্সতি (কত্থচি)];

অপেতো দমসচ্চেন, ন সো কাসাৱমৰহতি.

১২৩. যো চ ৱন্তকসাৱস্স, সীলেসু সুসমাহিতো;

উপেতো দমসচ্চেন, স ৱে কাসাৱমৰহতি.

১২৪. সমপ্পিতো পুথুসল্লেন নাগো, অদুট্ঠচিত্তো লুদ্দকমজ্ঝভাসি;

কিমত্থযং কিস্স ৱা সম্ম হেতু, মমং ৱধী কস্স ৱাযং পযোগো.

১২৫. কাসিস্স ৰঞ্ঞো মহেসী ভদন্তে, সা পূজিতা ৰাজকুলে সুভদ্দা;

তং অদ্দসা সা চ মমং অসংসি, দন্তেহি অত্থোতি চ মং [অত্থোতি মমং (স্যা. ক.)] অৱোচ.

১২৬. বহূ হি মে দন্তযুগা উড়াৰা, যে মে পিতূনঞ্চ [পিতুন্নম্পি (পী.)] পিতামহানং;

জানাতি সা কোধনা ৰাজপুত্তী, ৱধত্থিকা ৱেৰমকাসি বালা.

১২৭. উট্ঠেহি ত্ৱং লুদ্দ খৰং গহেত্ৱা, দন্তে ইমে ছিন্দ পুৰা মৰামি;

ৱজ্জাসি তং কোধনং ৰাজপুত্তিং, ‘‘নাগো হতো হন্দ ইমস্স দন্তা’’.

১২৮. উট্ঠায সো লুদ্দো খৰং গহেত্ৱা, ছেত্ৱান দন্তানি গজুত্তমস্স;

ৱগ্গূ সুভে অপ্পটিমে পথব্যা, আদায পক্কামি ততো হি খিপ্পং.

১২৯. ভযট্টিতা [ভযদ্দিতা (সী. পী.)] নাগৱধেন অট্টা, যে তে নাগা অট্ঠ দিসা ৱিধাৱুং;

অদিস্ৱান [অদিস্ৱ (সী. পী.)] পোসং গজপচ্চমিত্তং, পচ্চাগমুং যেন সো নাগৰাজা.

১৩০. তে তত্থ কন্দিত্ৱা ৰোদিত্ৱান [ৰোদিত্ৱ (সী. পী.)] নাগা, সীসে সকে পংসুকং ওকিৰিত্ৱা;

অগমংসু তে সব্বে সকং নিকেতং, পুৰক্খত্ৱা মহেসিং সব্বভদ্দং.

১৩১. আদায দন্তানি গজুত্তমস্স, ৱগ্গূ সুভে অপ্পটিমে পথব্যা;

সুৱণ্ণৰাজীহি সমন্তমোদৰে, সো লুদ্দকো কাসিপুৰং উপাগমি;

উপনেসি সো ৰাজকঞ্ঞায দন্তে, নাগো হতো হন্দ ইমস্স দন্তা.

১৩২. দিস্ৱান দন্তানি গজুত্তমস্স, ভত্তুপ্পিযস্স পুৰিমায জাতিযা;

তত্থেৱ তস্সা হদযং অফালি, তেনেৱ সা কালমকাসি বালা.

১৩৩. সম্বোধিপত্তো স [চ (সী. স্যা.), ৱ (পী.)] মহানুভাৱো, সিতং অকাসি পৰিসায মজ্ঝে;

পুচ্ছিংসু ভিক্খূ সুৱিমুত্তচিত্তা, নাকাৰণে পাতুকৰোন্তি বুদ্ধা.

১৩৪. যমদ্দসাথ দহৰিং কুমাৰিং, কাসাযৱত্থং অনগাৰিযং চৰন্তিং;

সা খো তদা ৰাজকঞ্ঞা অহোসি, অহং তদা নাগৰাজা অহোসিং.

১৩৫. আদায দন্তানি গজুত্তমস্স, ৱগ্গূ সুভে অপ্পটিমে পথব্যা;

যো লুদ্দকো কাসিপুৰং উপাগমি, সো খো তদা দেৱদত্তো অহোসি.

১৩৬. অনাৱসূৰং চিৰৰত্তসংসিতং, উচ্চাৱচং [উচং নীচং (সী. স্যা. পী.)] চৰিতমিদং পুৰাণং;

ৱীতদ্দৰো ৱীতসোকো ৱিসল্লো, সযং অভিঞ্ঞায অভাসি বুদ্ধো.

১৩৭. অহং ৱো তেন কালেন, অহোসিং তত্থ ভিক্খৱো;

নাগৰাজা তদা হোমি [হোসিং (সী. স্যা. পী.)], এৱং ধাৰেথ জাতকন্তি.

ছদ্দন্তজাতকং চতুত্থং.