৫১০. অযোঘৰজাতকং (১৪)

৩৬৩. যমেকৰত্তিং পঠমং, গব্ভে ৱসতি মাণৱো;

অব্ভুট্ঠিতোৱ সো যাতি [সযতি (সী. পী.), স যাতি (কত্থচি)], সগচ্ছং ন নিৱত্ততি.

৩৬৪. ন যুজ্ঝমানা ন বলেনৱস্সিতা, নৰা ন জীৰন্তি ন চাপি মিয্যৰে;

সব্বং হিদং [হি তং (সী. পী.)] জাতিজৰাযুপদ্দুতং, তং মে মতী হোতি চৰামি ধম্মং.

৩৬৫. চতুৰঙ্গিনিং সেনং সুভিংসৰূপং, জযন্তি ৰট্ঠাধিপতী পসয্হ;

ন মচ্চুনো জযিতুমুস্সহন্তি, তং মে মতী হোতি চৰামি ধম্মং.

৩৬৬. হত্থীহি অস্সেহি ৰথেহি পত্তিভি, পৰিৱাৰিতা মুচ্চৰে একচ্চেয্যা [একচেয্যা (সী. পী.)];

ন মচ্চুনো [ন মচ্চুতো (সী.)] মুচ্চিতুমুস্সহন্তি, তং মে মতী হোতি চৰামি ধম্মং.

৩৬৭. হত্থীহি অস্সেহি ৰথেহি পত্তিভি, সূৰা [পুৰা (ক.)] পভঞ্জন্তি পধংসযন্তি;

ন মচ্চুনো ভঞ্জিতুমুস্সহন্তি, তং মে মতী হোতি চৰামি ধম্মং.

৩৬৮. মত্তা গজা ভিন্নগড়া [পভিন্নগলা (সী.)] পভিন্না, নগৰানি মদ্দন্তি জনং হনন্তি;

ন মচ্চুনো মদ্দিতুমুস্সহন্তি, তং মে মতী হোতি চৰামি ধম্মং.

৩৬৯. ইস্সাসিনো কতহত্থাপি ৱীৰা [ৱীৰা (সী. পী.)], দূৰেপাতী [পতী (ক.)] অক্খণৱেধিনোপি;

ন মচ্চুনো ৱিজ্ঝিতুমুস্সহন্তি, তং মে মতী হোতি চৰামি ধম্মং.

৩৭০. সৰানি খীযন্তি সসেলকাননা, সব্বং হিদং [হি তং (সী. পী.), পিতং (স্যা.)] খীযতি দীঘমন্তৰং;

সব্বং হিদং [হি তং (সী. পী.), পিতং (স্যা.)] ভঞ্জৰে কালপৰিযাযং, তং মে মতী হোতি চৰামি ধম্মং.

৩৭১. সব্বে সমেৱং হি নৰাননাৰিনং [নৰানৰীনং (পী.), নাৰী নৰানং (স্যা.), নৰনাৰীনং (ক.)], চলাচলং পাণভুনোধ জীৱিতং;

পটোৱ ধুত্তস্স দুমোৱ কূলজো, তং মে মতী হোতি চৰামি ধম্মং.

৩৭২. দুমপ্ফলানেৱ পতন্তি মাণৱা, দহৰা চ ৱুদ্ধা চ সৰীৰভেদা;

নাৰিযো নৰা মজ্ঝিমপোৰিসা চ, তং মে মতী হোতি চৰামি ধম্মং.

৩৭৩. নাযং ৱযো তাৰকৰাজসন্নিভো, যদব্ভতীতং গতমেৱ দানি তং;

জিণ্ণস্স হী নত্থি ৰতী কুতো সুখং, তং মে মতী হোতি চৰামি ধম্মং.

৩৭৪. যক্খা পিসাচা অথৱাপি পেতা, কুপিতাতে [কুপিতাপি তে (সী. পী.)] অস্সসন্তি মনুস্সে;

ন মচ্চুনো অস্সসিতুস্সহন্তি, তং মে মতী হোতি চৰামি ধম্মং.

৩৭৫. যক্খে পিসাচে অথৱাপি পেতে, কুপিতেপি তে নিজ্ঝপনং কৰোন্তি;

ন মচ্চুনো নিজ্ঝপনং কৰোন্তি, তং মে মতী হোতি চৰামি ধম্মং.

৩৭৬. অপৰাধকে দূসকে হেঠকে চ, ৰাজানো দণ্ডেন্তি ৱিদিত্ৱান দোসং;

ন মচ্চুনো দণ্ডযিতুস্সহন্তি, তং মে মতী হোতি চৰামি ধম্মং.

৩৭৭. অপৰাধকা দূসকা হেট্ঠকা চ, লভন্তি তে ৰাজিনো নিজ্ঝপেতুং;

ন মচ্চুনো নিজ্ঝপনং কৰোন্তি, তং মে মতী হোতি চৰামি ধম্মং.

৩৭৮. ন খত্তিযোতি ন চ ব্ৰাহ্মণোতি, ন অড্ঢকা বলৱা তেজৱাপি;

ন মচ্চুৰাজস্স অপেক্খমত্থি, তং মে মতী হোতি চৰামি ধম্মং.

৩৭৯. সীহা চ ব্যগ্ঘা চ অথোপি দীপিযো, পসয্হ খাদন্তি ৱিপ্ফন্দমানং;

ন মচ্চুনো খাদিতুমুস্সহন্তি, তং মে মতী হোতি চৰামি ধম্মং.

৩৮০. মাযাকাৰা ৰঙ্গমজ্ঝে কৰোন্তা, মোহেন্তি চক্খূনি জনস্স তাৱদে;

ন মচ্চুনো মোহযিতুস্সহন্তি, তং মে মতী হোতি চৰামি ধম্মং.

৩৮১. আসীৱিসা কুপিতা উগ্গতেজা, ডংসন্তি মাৰেন্তিপি তে মনুস্সে;

ন মচ্চুনো ডংসিতুমুস্সহন্তি, তং মে মতী হোতি চৰামি ধম্মং.

৩৮২. আসীৱিসা কুপিতা যং ডংসন্তি, তিকিচ্ছকা তেস ৱিসং হনন্তি;

ন মচ্চুনো দট্ঠৱিসং [দট্ঠস্স ৱিসং (ক.)] হনন্তি, তং মে মতী হোতি চৰামি ধম্মং.

৩৮৩. ধম্মন্তৰী ৱেত্তৰণী [ৱেতৰণী (সী. পী.)] চ ভোজো, ৱিসানি হন্ত্ৱান ভুজঙ্গমানং;

সুয্যন্তি তে কালকতা তথেৱ, তং মে মতী হোতি চৰামি ধম্মং.

৩৮৪. ৱিজ্জাধৰা ঘোৰমধীযমানা, অদস্সনং ওসধেহি ৱজন্তি;

ন মচ্চুৰাজস্স ৱজন্তদস্সনং [ৱজন্তি অদস্সনং (স্যা. ক.)], তং মে মতী হোতি চৰামি ধম্মং.

৩৮৫. ধম্মো হৱে ৰক্খতি ধম্মচাৰিং, ধম্মো সুচিণ্ণো সুখমাৱহাতি;

এসানিসংসো ধম্মে সুচিণ্ণে, ন দুগ্গতিং গচ্ছতি ধম্মচাৰী.

৩৮৬. ন হি ধম্মো অধম্মো চ, উভো সমৱিপাকিনো;

অধম্মো নিৰযং নেতি, ধম্মো পাপেতি সুগ্গতিন্তি.

অযোঘৰজাতকং চুদ্দসমং.

তস্সুদ্দানং –

মাতঙ্গ সম্ভূত সিৱি সিৰিমন্তো, ৰোহণ হংস সত্তিগুম্বো ভল্লাতিয;

সোমনস্স চম্পেয্য ব্ৰহ্ম পঞ্চ-পণ্ডিত চিৰস্সংৱত অযোঘৰাতি.

ৱীসতিনিপাতং নিট্ঠিতং.