১৫. ৱীসতিনিপাতো

৪৯৭. মাতঙ্গজাতকং (১)

১. কুতো নু আগচ্ছসি দুম্মৱাসী [ৰুম্মৱাসী (সী. পী.)], ওতল্লকো পংসুপিসাচকোৱ;

সঙ্কাৰচোড়ং পটিমুঞ্চ [পটিমুচ্চ (সী. পী.)] কণ্ঠে, কো ৰে তুৱং হোসি [হোহিসি (সী. পী.)] অদক্খিণেয্যো.

২. অন্নং তৱেদং [তৱ ইদং (ক. সী. পী.), তৱযিদং (স্যা.)] পকতং যসস্সি, তং খজ্জৰে ভুঞ্জৰে পিয্যৰে চ;

জানাসি মং ত্ৱং পৰদত্তূপজীৱিং, উত্তিট্ঠপিণ্ডং লভতং সপাকো.

৩. অন্নং মমেদং [মম ইদং (ক. সী. পী.), মমযিদং (স্যা.)] পকতং ব্ৰাহ্মণানং, অত্তত্থায সদ্দহতো মমেদং [মম ইদং (ক. সী. পী.), মমযিদং (স্যা.)];

অপেহি এত্তো কিমিধট্ঠিতোসি, ন মাদিসা তুয্হং দদন্তি জম্ম.

৪. থলে চ নিন্নে চ ৱপন্তি বীজং, অনূপখেত্তে ফলমাসমানা [মাসসানা (সী. পী.), মাসিং সমানা (স্যা.)];

এতায সদ্ধায দদাহি দানং, অপ্পেৱ আৰাধযে দক্খিণেয্যে.

৫. খেত্তানি ময্হং ৱিদিতানি লোকে, যেসাহং বীজানি পতিট্ঠপেমি;

যে ব্ৰাহ্মণা জাতিমন্তূপপন্না, তানীধ খেত্তানি সুপেসলানি.

৬. জাতিমদো চ অতিমানিতা চ, লোভো চ দোসো চ মদো চ মোহো;

এতে অগুণা যেসু চ সন্তি [যেসু ৱসন্তি (সী. পী.)] সব্বে, তানীধ খেত্তানি অপেসলানি.

৭. জাতিমদো চ অতিমানিতা চ, লোভো চ দোসো চ মদো চ মোহো;

এতে অগুণা যেসু ন সন্তি সব্বে, তানীধ খেত্তানি সুপেসলানি.

৮. ক্ৱেত্থ গতা [ক্ৱত্থ গতা (স্যা.), কত্থেৱ ভট্ঠা (পী.)] উপজোতিযো চ, উপজ্ঝাযো চ অথৱা গণ্ডকুচ্ছি [অণ্ডকুচ্ছি (সী. স্যা. পী.)];

ইমস্স দণ্ডঞ্চ ৱধঞ্চ দত্ৱা, গলে গহেত্ৱা খলযাথ [গলযাথ (ক.)] জম্মং.

৯. গিৰিং নখেন খণসি, অযো দন্তেহি [দন্তেন (সী. পী.)] খাদসি;

জাতৱেদং পদহসি, যো ইসিং পৰিভাসসি.

১০. ইদং ৱত্ৱান মাতঙ্গো, ইসি সচ্চপৰক্কমো;

অন্তলিক্খস্মিং পক্কামি [পক্কমি (ক.)], ব্ৰাহ্মণানং উদিক্খতং.

১১. আৱেল্লিতং [অৱেঠিতং (সী. পী.)] পিট্ঠিতো উত্তমঙ্গং, বাহুং [বাহং (সী. পী.)] পসাৰেতি অকম্মনেয্যং [অকম্পনেয্যং (ক.)];

সেতানি অক্খীনি যথা মতস্স, কো মে ইমং পুত্তমকাসি এৱং.

১২. ইধাগমা সমণো দুম্মৱাসী, ওতল্লকো পংসুপিসাচকোৱ;

সঙ্কাৰচোড়ং পটিমুঞ্চ কণ্ঠে, সো তে ইমং পুত্তমকাসি এৱং.

১৩. কতমং দিসং অগমা ভূৰিপঞ্ঞো, অক্খাথ মে মাণৱা এতমত্থং;

গন্ত্ৱান তং পটিকৰেমু অচ্চযং, অপ্পেৱ নং পুত্ত লভেমু জীৱিতং.

১৪. ৱেহাযসং অগমা ভূৰিপঞ্ঞো, পথদ্ধুনো পন্নৰসেৱ চন্দো;

অপি চাপি সো পুৰিমদিসং অগচ্ছি, সচ্চপ্পটিঞ্ঞো ইসি সাধুৰূপো.

১৫. আৱেল্লিতং পিট্ঠিতো উত্তমঙ্গং, বাহুং পসাৰেতি অকম্মনেয্যং;

সেতানি অক্খীনি যথা মতস্স, কো মে ইমং পুত্তমকাসি এৱং.

১৬. যক্খা হৱে সন্তি মহানুভাৱা, অন্ৱাগতা ইসযো সাধুৰূপা;

তে দুট্ঠচিত্তং কুপিতং ৱিদিত্ৱা, যক্খা হি তে পুত্তমকংসু এৱং.

১৭. যক্খা চ মে পুত্তমকংসু এৱং, ত্ৱঞ্ঞেৱ মে মা কুদ্ধো [কুদ্ধ (ক.)] ব্ৰহ্মচাৰি;

তুম্হেৱ [তুয্হেৱ (ক.)] পাদে সৰণং গতাস্মি, অন্ৱাগতা পুত্তসোকেন ভিক্খু.

১৮. তদেৱ হি এতৰহি চ ময্হং, মনোপদোসো ন মমত্থি [মম নত্থি (পী.)] কোচি;

পুত্তো চ তে ৱেদমদেন মত্তো, অত্থং ন জানাতি অধিচ্চ ৱেদে.

১৯. অদ্ধা হৱে ভিক্খু মুহুত্তকেন, সম্মুয্হতেৱ পুৰিসস্স সঞ্ঞা;

একাপৰাধং [এতাপৰাধং (ক.)] খম ভূৰিপঞ্ঞ, ন পণ্ডিতা কোধবলা ভৱন্তি.

২০. ইদঞ্চ ময্হং উত্তিট্ঠপিণ্ডং, তৱ [নত্থি সী. পী. পোত্থকেসু] মণ্ডব্যো ভুঞ্জতু অপ্পপঞ্ঞো;

যক্খা চ তে নং [তে পুত্তং (স্যা.)] ন ৱিহেঠযেয্যুং, পুত্তো চ তে হেস্সতি [হোহিতি (সী. পী.)] সো অৰোগো.

২১. মণ্ডব্য বালোসি পৰিত্তপঞ্ঞো, যো পুঞ্ঞখেত্তানমকোৱিদোসি;

মহক্কসাৱেসু দদাসি দানং, কিলিট্ঠকম্মেসু অসঞ্ঞতেসু.

২২. জটা চ কেসা অজিনা নিৱত্থা, জৰূদপানংৱ মুখং পৰূড়্হং;

পজং ইমং পস্সথ দুম্মৰূপং [ৰুম্মৰূপিং (সী. পী.)], ন জটাজিনং তাযতি অপ্পপঞ্ঞং.

২৩. যেসং ৰাগো চ দোসো চ, অৱিজ্জা চ ৱিৰাজিতা;

খীণাসৱা অৰহন্তো, তেসু দিন্নং মহপ্ফলন্তি.

মাতঙ্গজাতকং পঠমং.

৪৯৮. চিত্তসম্ভূতজাতকং (২)

২৪. সব্বং নৰানং সফলং সুচিণ্ণং, ন কম্মুনা কিঞ্চন মোঘমত্থি;

পস্সামি সম্ভূতং মহানুভাৱং, সকম্মুনা পুঞ্ঞফলূপপন্নং.

২৫. সব্বং নৰানং সফলং সুচিণ্ণং, ন কম্মুনা কিঞ্চন মোঘমত্থি;

কচ্চিন্নু চিত্তস্সপি এৱমেৱং, ইদ্ধো মনো তস্স যথাপি ময্হং.

২৬. সব্বং নৰানং সফলং সুচিণ্ণং, ন কম্মুনা কিঞ্চন মোঘমত্থি;

চিত্তম্পি জানাহি [চিত্তং ৱিজানাহি (সী. পী.)] তথেৱ দেৱ, ইদ্ধো মনো তস্স যথাপি তুয্হং.

২৭. ভৱং নু চিত্তো সুতমঞ্ঞতো তে, উদাহু তে কোচি নং এতদক্খা;

গাথা সুগীতা ন মমত্থি কঙ্খা, দদামি তে গামৱৰং সতঞ্চ.

২৮. ন চাহং চিত্তো সুতমঞ্ঞতো মে, ইসী চ মে এতমত্থং অসংসি;

‘‘গন্ত্ৱান ৰঞ্ঞো পটিগাহি [পটিগাযি (স্যা. ক.), পটিগায (?)] গাথং, অপি তে ৱৰং অত্তমনো দদেয্য’’ [অপি নু তে ৱৰং অত্তমনো দদেয্য (স্যা.), অপি নু তে অত্তমনো ৱৰং দদে (ক.)].

২৯. যোজেন্তু ৱে ৰাজৰথে, সুকতে চিত্তসিব্বনে;

কচ্ছং নাগানং বন্ধথ, গীৱেয্যং পটিমুঞ্চথ.

৩০. আহঞ্ঞন্তু [আহঞ্ঞৰে (স্যা.)] ভেৰিমুদিঙ্গসঙ্খে [সঙ্খা (স্যা.)], সীঘানি যানানি চ যোজযন্তু;

অজ্জেৱহং অস্সমং তং গমিস্সং, যত্থেৱ দক্খিস্সমিসিং নিসিন্নং.

৩১. সুলদ্ধলাভো ৱত মে অহোসি, গাথা সুগীতা পৰিসায মজ্ঝে;

স্ৱাহং ইসিং সীলৱতূপপন্নং, দিস্ৱা পতীতো সুমনোহমস্মি.

৩২. আসনং উদকং পজ্জং, পটিগ্গণ্হাতু নো ভৱং;

অগ্ঘে ভৱন্তং পুচ্ছাম, অগ্ঘং কুৰুতু নো ভৱং.

৩৩. ৰম্মঞ্চ তে আৱসথং কৰোন্তু, নাৰীগণেহি পৰিচাৰযস্সু;

কৰোহি ওকাসমনুগ্গহায, উভোপি মং ইস্সৰিযং কৰোম.

৩৪. দিস্ৱা ফলং দুচ্চৰিতস্স ৰাজ, অথো সুচিণ্ণস্স মহাৱিপাকং;

অত্তানমেৱ পটিসংযমিস্সং, ন পত্থযে পুত্ত [পুত্তং (সী. পী.)] পসুং ধনং ৱা.

৩৫. দসেৱিমা ৱস্সদসা, মচ্চানং ইধ জীৱিতং;

অপত্তঞ্ঞেৱ তং ওধিং, নড়ো ছিন্নোৱ সুস্সতি.

৩৬. তত্থ কা নন্দি কা খিড্ডা, কা ৰতী কা ধনেসনা;

কিং মে পুত্তেহি দাৰেহি, ৰাজ মুত্তোস্মি বন্ধনা.

৩৭. সোহং এৱং পজানামি [সো অহং সুপ্পজানামি (সী. পী.)], মচ্চু মে নপ্পমজ্জতি;

অন্তকেনাধিপন্নস্স, কা ৰতী কা ধনেসনা.

৩৮. জাতি নৰানং অধমা জনিন্দ, চণ্ডালযোনি দ্ৱিপদাকনিট্ঠা [দিপদাকনিট্ঠা (সী. পী.)];

সকেহি কম্মেহি সুপাপকেহি, চণ্ডালগব্ভে [চণ্ডালিগব্ভে (স্যা.)] অৱসিম্হ পুব্বে.

৩৯. চণ্ডালাহুম্হ অৱন্তীসু, মিগা নেৰঞ্জৰং পতি;

উক্কুসা নম্মদাতীৰে [ৰম্মদাতীৰে (স্যা. ক.)], ত্যজ্জ ব্ৰাহ্মণখত্তিযা.

৪০. উপনীযতি জীৱিতমপ্পমাযু, জৰূপনীতস্স ন সন্তি তাণা;

কৰোহি পঞ্চাল মমেত [মমেৱ (স্যা. ক.)] ৱাক্যং, মাকাসি কম্মানি দুক্খুদ্ৰযানি.

৪১. উপনীযতি জীৱিতমপ্পমাযু, জৰূপনীতস্স ন সন্তি তাণা;

কৰোহি পঞ্চাল মমেত ৱাক্যং, মাকাসি কম্মানি দুক্খপ্ফলানি.

৪২. উপনীযতি জীৱিতমপ্পমাযু, জৰূপনীতস্স ন সন্তি তাণা;

কৰোহি পঞ্চাল মমেত ৱাক্যং, মাকাসি কম্মানি ৰজস্সিৰানি.

৪৩. উপনীযতি জীৱিতমপ্পমাযু, ৱণ্ণং জৰা হন্তি নৰস্স জিয্যতো;

কৰোহি পঞ্চাল মমেত ৱাক্যং, মাকাসি কম্মং নিৰযূপপত্তিযা.

৪৪. অদ্ধা হি সচ্চং ৱচনং তৱেতং, যথা ইসী ভাসসি এৱমেতং;

কামা চ মে সন্তি অনপ্পৰূপা, তে দুচ্চজা মাদিসকেন ভিক্খু.

৪৫. নাগো যথা পঙ্কমজ্ঝে ব্যসন্নো, পস্সং থলং নাভিসম্ভোতি গন্তুং;

এৱম্পহং [এৱমহং (স্যা.)] কামপঙ্কে ব্যসন্নো, ন ভিক্খুনো মগ্গমনুব্বজামি.

৪৬. যথাপি মাতা চ পিতা চ পুত্তং, অনুসাসৰে কিন্তি সুখী ভৱেয্য;

এৱম্পি মং ত্ৱং অনুসাস ভন্তে, যথা চিৰং [যমাচৰং (সী. পী. ক. অট্ঠ.)] পেচ্চ সুখী ভৱেয্যং.

৪৭. নো চে তুৱং উস্সহসে জনিন্দ, কামে ইমে মানুসকে পহাতুং;

ধম্মিং [ধম্মং (সী. পী.)] বলিং পট্ঠপযস্সু ৰাজ, অধম্মকাৰো তৱ [অধম্মকাৰো চ তে (সী. স্যা. পী.)] মাহু ৰট্ঠে.

৪৮. দূতা ৱিধাৱন্তু দিসা চতস্সো, নিমন্তকা সমণব্ৰাহ্মণানং;

তে অন্নপানেন উপট্ঠহস্সু, ৱত্থেন সেনাসনপচ্চযেন চ.

৪৯. অন্নেন পানেন পসন্নচিত্তো, সন্তপ্পয সমণব্ৰাহ্মণে চ;

দত্ৱা চ ভুত্ৱা চ যথানুভাৱং, অনিন্দিতো সগ্গমুপেহি [মুপেতি (পী. ক.)] ঠানং.

৫০. সচে চ তং ৰাজ মদো সহেয্য, নাৰীগণেহি পৰিচাৰযন্তং;

ইমমেৱ গাথং মনসী কৰোহি, ভাসেসি [ভাসেহি (স্যা. পী. ক.)] চেনং পৰিসায মজ্ঝে.

৫১. অব্ভোকাসসযো জন্তু, ৱজন্ত্যা খীৰপাযিতো;

পৰিকিণ্ণো সুৱানেহি [সুপিনেহি (সী. পী.)], স্ৱাজ্জ ৰাজাতি ৱুচ্চতীতি.

চিত্তসম্ভূতজাতকং দুতিযং.

৪৯৯. সিৱিজাতকং (৩)

৫২. দূৰে অপস্সং থেৰোৱ, চক্খুং যাচিতুমাগতো;

একনেত্তা ভৱিস্সাম, চক্খুং মে দেহি যাচিতো.

৫৩. কেনানুসিট্ঠো ইধ মাগতোসি, ৱনিব্বক [ৱণিব্বক (সী.)] চক্খুপথানি যাচিতুং;

সুদুচ্চজং যাচসি উত্তমঙ্গং, যমাহু নেত্তং পুৰিসেন দুচ্চজং.

৫৪. যমাহু দেৱেসু সুজম্পতীতি, মঘৱাতি নং আহু মনুস্সলোকে;

তেনানুসিট্ঠো ইধ মাগতোস্মি, ৱনিব্বকো চক্খুপথানি যাচিতুং.

৫৫. ৱনিব্বতো [ৱনিব্বকো (স্যা. পী.)] ময্হ ৱনিং [ৱনং (ক.), ৱণিং (সী. স্যা. পী.)] অনুত্তৰং, দদাহি তে চক্খুপথানি যাচিতো;

দদাহি মে চক্খুপথং অনুত্তৰং, যমাহু নেত্তং পুৰিসেন দুচ্চজং.

৫৬. যেন অত্থেন আগচ্ছি [আগঞ্ছি (সী. পী.)], যমত্থমভিপত্থযং;

তে তে ইজ্ঝন্তু সঙ্কপ্পা, লভ চক্খূনি ব্ৰাহ্মণ.

৫৭. একং তে যাচমানস্স, উভযানি দদামহং;

স চক্খুমা গচ্ছ জনস্স পেক্খতো, যদিচ্ছসে ত্ৱং তদতে সমিজ্ঝতু.

৫৮. মা নো দেৱ অদা চক্খুং, মা নো সব্বে পৰাকৰি [পৰক্কৰি (স্যা. ক. অট্ঠ.), পৰিক্কৰি (ক.) পৰি + আ + কৰি = পৰাকৰি];

ধনং দেহি মহাৰাজ, মুত্তা ৱেড়ুৰিযা বহূ.

৫৯. যুত্তে দেৱ ৰথে দেহি, আজানীযে চলঙ্কতে;

নাগে দেহি মহাৰাজ, হেমকপ্পনৱাসসে.

৬০. যথা তং সিৱযো [সীৱিযো (স্যা.)] সব্বে, সযোগ্গা সৰথা সদা;

সমন্তা পৰিকিৰেয্যুং [পৰিকৰেয্যুং (স্যা. পী.)], এৱং দেহি ৰথেসভ.

৬১. যো ৱে দস্সন্তি ৱত্ৱান, অদানে কুৰুতে মনো;

ভূম্যং [ভূম্যা (সী. পী.)] সো পতিতং পাসং, গীৱাযং পটিমুঞ্চতি.

৬২. যো ৱে দস্সন্তি ৱত্ৱান, অদানে কুৰুতে মনো;

পাপা পাপতৰো হোতি, সম্পত্তো যমসাধনং.

৬৩. যঞ্হি যাচে তঞ্হি দদে, যং ন যাচে ন তং দদে;

স্ৱাহং তমেৱ দস্সামি, যং মং যাচতি ব্ৰাহ্মণো.

৬৪. আযুং নু ৱণ্ণং নু সুখং বলং নু, কিং পত্থযানো নু জনিন্দ দেসি;

কথঞ্হি ৰাজা সিৱিনং অনুত্তৰো, চক্খূনি দজ্জা পৰলোকহেতু.

৬৫. ন ৱাহমেতং যসসা দদামি, ন পুত্তমিচ্ছে ন ধনং ন ৰট্ঠং;

সতঞ্চ ধম্মো চৰিতো পুৰাণো, ইচ্চেৱ দানে ৰমতে মনো মম [মমং (সী. পী.)].

৬৬. সখা চ মিত্তো চ মমাসি সীৱিক [সীৱক (সী. পী.)], সুসিক্খিতো সাধু কৰোহি মে ৱচো;

উদ্ধৰিত্ৱা [উদ্ধত্ৱ (সী.), লদ্ধ ত্ৱং (পী.)] চক্খূনি মমং জিগীসতো, হত্থেসু ঠপেহি [আৱেসি (সী.)] ৱনিব্বকস্স.

৬৭. চোদিতো সিৱিৰাজেন, সিৱিকো ৱচনঙ্কৰো;

ৰঞ্ঞো চক্খূনুদ্ধৰিত্ৱা [চক্খূনি উদ্ধত্ৱা (সী. পী.)], ব্ৰাহ্মণস্সূপনামযি;

সচক্খু ব্ৰাহ্মণো আসি, অন্ধো ৰাজা উপাৱিসি.

৬৮. ততো সো কতিপাহস্স, উপৰূড়্হেসু চক্খুসু;

সূতং আমন্তযী ৰাজা, সিৱীনং ৰট্ঠৱড্ঢনো.

৬৯. যোজেহি সাৰথি যানং, যুত্তঞ্চ পটিৱেদয;

উয্যানভূমিং গচ্ছাম, পোক্খৰঞ্ঞো ৱনানি চ.

৭০. সো চ পোক্খৰণীতীৰে [পোক্খৰণিযা তীৰে (সী. পী.)], পল্লঙ্কেন উপাৱিসি;

তস্স সক্কো পাতুৰহু, দেৱৰাজা সুজম্পতি.

৭১. সক্কোহমস্মি দেৱিন্দো, আগতোস্মি তৱন্তিকে;

ৱৰং ৱৰস্সু ৰাজীসি, যং কিঞ্চি মনসিচ্ছসি.

৭২. পহূতং মে ধনং সক্ক, বলং কোসো চনপ্পকো;