৫০৯. হত্থিপালজাতকং (১৩)

৩৩৭. চিৰস্সং ৱত পস্সাম, ব্ৰাহ্মণং দেৱৱণ্ণিনং;

মহাজটং খাৰিধৰং [ভাৰধৰং (পী.)], পঙ্কদন্তং ৰজস্সিৰং.

৩৩৮. চিৰস্সং ৱত পস্সাম, ইসিং ধম্মগুণে ৰতং;

কাসাযৱত্থৱসনং, ৱাকচীৰং পটিচ্ছদং.

৩৩৯. আসনং উদকং পজ্জং, পটিগণ্হাতু নো ভৱং;

অগ্ঘে ভৱন্তং পুচ্ছাম, অগ্ঘং কুৰুতু নো ভৱং.

৩৪০. অধিচ্চ ৱেদে পৰিযেস ৱিত্তং, পুত্তে গহে [গেহে (সী. স্যা. পী.)] তাত পতিট্ঠপেত্ৱা;

গন্ধে ৰসে পচ্চনুভুয্য [পচ্চনুভোত্ৱ (স্যা.), পচ্চনুভুত্ৱ (পী.)] সব্বং, অৰঞ্ঞং সাধু মুনি সো পসত্থো.

৩৪১. ৱেদা ন সচ্চা ন চ ৱিত্তলাভো, ন পুত্তলাভেন জৰং ৱিহন্তি;

গন্ধে ৰসে মুচ্চন [মুঞ্চন (সী. ক.)] মাহু সন্তো, সকম্মুনা [সকম্মনা (সী. পী.)] হোতি ফলূপপত্তি.

৩৪২. অদ্ধা হি সচ্চং ৱচনং তৱেতং, সকম্মুনা হোতি ফলূপপত্তি;

জিণ্ণা চ মাতাপিতৰো তৱীমে [তৱেমে (সী.), তৱ যিমে (স্যা. পী.)], পস্সেয্যুং তং ৱস্সসতং অৰোগং [অৰোগ্যং (স্যা. ক.)].

৩৪৩. যস্সস্স সক্খী মৰণেন ৰাজ, জৰায মেত্তী নৰৱীৰসেট্ঠ;

যো চাপি জঞ্ঞা ন মৰিস্সং কদাচি, পস্সেয্যুং তং ৱস্সসতং অৰোগং.

৩৪৪. যথাপি নাৱং পুৰিসো দকম্হি, এৰেতি চে নং উপনেতি তীৰং;

এৱম্পি ব্যাধী সততং জৰা চ, উপনেতি মচ্চং [মচ্চু (স্যা. পী.)] ৱসমন্তকস্স.

৩৪৫. পঙ্কো চ কামা পলিপো চ কামা, মনোহৰা দুত্তৰা মচ্চুধেয্যা;

এতস্মিং পঙ্কে পলিপে ব্যসন্না [ৱিসন্না (স্যা. ক.)], হীনত্তৰূপা ন তৰন্তি পাৰং.

৩৪৬. অযং পুৰে লুদ্দমকাসি কম্মং, স্ৱাযং গহীতো ন হি মোক্খিতো মে;

ওৰুন্ধিযা নং পৰিৰক্খিস্সামি, মাযং পুন লুদ্দমকাসি কম্মং.

৩৪৭. গৱংৱ [গাৱংৱ (সী.)] নট্ঠং পুৰিসো যথা ৱনে, অন্ৱেসতী [পৰিযেসতী (সী. পী.)] ৰাজ অপস্সমানো;

এৱং নট্ঠো এসুকাৰী মমত্থো, সোহং কথং ন গৱেসেয্যং ৰাজ.

৩৪৮. হিয্যোতি হিয্যতি [হীযোতি হীযতি (সী.)] পোসো, পৰেতি পৰিহাযতি;

অনাগতং নেতমত্থীতি ঞত্ৱা, উপ্পন্নছন্দং কো পনুদেয্য ধীৰো.

৩৪৯. পস্সামি ৱোহং দহৰং [দহৰী (স্যা. পী. ক.)] কুমাৰিং, মত্তূপমং কেতকপুপ্ফনেত্তং;

অভুত্তভোগে [অভুত্ৱ ভোগে (স্যা. ক. অট্ঠ.), অভুত্ৱ ভোগে (পী.), ভোগে অতুত্ৱা (ক.)] পঠমে ৱযস্মিং, আদায মচ্চু ৱজতে কুমাৰিং.

৩৫০. যুৱা সুজাতো সুমুখো সুদস্সনো, সামো কুসুম্ভপৰিকিণ্ণমস্সু;

হিত্ৱান কামে পটিকচ্চ [পটিগচ্চ (সী.), পটিগচ্ছ (স্যা. পী.)] গেহং, অনুজান মং পব্বজিস্সামি দেৱ.

৩৫১. সাখাহি ৰুক্খো লভতে সমঞ্ঞং, পহীনসাখং পন খাণুমাহু;

পহীনপুত্তস্স মমজ্জ ভোতি, ৱাসেট্ঠি ভিক্খাচৰিযায কালো.

৩৫২. অঘস্মি কোঞ্চাৱ যথা হিমচ্চযে, কতানি [তন্তানি (সী. পী.)] জালানি পদালিয [পদালেয্য (সী.)] হংসা;

গচ্ছন্তি পুত্তা চ পতী চ ময্হং, সাহং কথং নানুৱজে পজানং.

৩৫৩. এতে ভুত্ৱা ৱমিত্ৱা চ, পক্কমন্তি ৱিহঙ্গমা;

যে চ ভুত্ৱান ৱমিংসু, তে মে হত্থত্ত [হত্থত্থ (সী. স্যা. পী.)] মাগতা.

৩৫৪. অৱমী ব্ৰাহ্মণো কামে, সো [তে (সী. পী.)] ত্ৱং পচ্চাৱমিস্সসি;

ৱন্তাদো পুৰিসো ৰাজ, ন সো হোতি পসংসিযো.

৩৫৫. পঙ্কে চ [পঙ্কেৱ (সী. পী.)] পোসং পলিপে ব্যসন্নং, বলী যথা দুব্বলমুদ্ধৰেয্য;

এৱম্পি মং ত্ৱং উদতাৰি ভোতি, পঞ্চালি গাথাহি সুভাসিতাহি.

৩৫৬. ইদং ৱত্ৱা মহাৰাজা, এসুকাৰী দিসম্পতি;

ৰট্ঠং হিত্ৱান পব্বজি, নাগো ছেত্ৱাৱ বন্ধনং.

৩৫৭. ৰাজা চ পব্বজ্জমৰোচযিত্থ, ৰট্ঠং পহায নৰৱীৰসেট্ঠো;

তুৱম্পি নো হোতি যথেৱ ৰাজা, অম্হেহি গুত্তা অনুসাস ৰজ্জং.

৩৫৮. ৰাজা চ পব্বজ্জমৰোচযিত্থ, ৰট্ঠং পহায নৰৱীৰসেট্ঠো;

অহম্পি একা [একাৱ (সী.)] চৰিস্সামি লোকে, হিত্ৱান কামানি মনোৰমানি.

৩৫৯. ৰাজা চ পব্বজ্জমৰোচযিত্থ, ৰট্ঠং পহায নৰৱীৰসেট্ঠো;

অহম্পি একা চৰিস্সামি লোকে, হিত্ৱান কামানি যথোধিকানি.

৩৬০. অচ্চেন্তি কালা তৰযন্তি ৰত্তিযো, ৱযোগুণা অনুপুব্বং জহন্তি;

অহম্পি একা চৰিস্সামি লোকে, হিত্ৱান কামানি মনোৰমানি.

৩৬১. অচ্চেন্তি কালা তৰযন্তি ৰত্তিযো, ৱযোগুণা অনুপুব্বং জহন্তি;

অহম্পি একা চৰিস্সামি লোকে, হিত্ৱান কামানি যথোধিকানি.

৩৬২. অচ্চেন্তি কালা তৰযন্তি ৰত্তিযো, ৱযোগুণা অনুপুব্বং জহন্তি;

অহম্পি একা চৰিস্সামি লোকে, সীতিভূতা [সীতীভূতা (সী.)] সব্বমতিচ্চ সঙ্গন্তি.

হত্থিপালজাতকং তেৰসমং.