৫০৮. পঞ্চপণ্ডিতজাতকং (১২)

৩১৫. পঞ্চ পণ্ডিতা সমাগতাত্থ, পঞ্হা মে পটিভাতি তং সুণাথ;

নিন্দিযমত্থং পসংসিযং ৱা, কস্সেৱাৱিকৰেয্য [কস্স ৱাৱীকৰেয্য (ক.)] গুয্হমত্থং.

৩১৬. ত্ৱং আৱিকৰোহি ভূমিপাল, ভত্তা ভাৰসহো তুৱং ৱদে তং;

তৱ ছন্দৰুচীনি [ছন্দঞ্চ ৰুচিঞ্চ (সী. পী.)] সম্মসিত্ৱা, অথ ৱক্খন্তি জনিন্দ পঞ্চ ধীৰা.

৩১৭. যা সীলৱতী অনঞ্ঞথেয্যা [অনঞ্ঞধেয্যা (সী. পী.)], ভত্তুচ্ছন্দৱসানুগা (পিযা) [( ) নত্থি সী. পী. পোত্থকেসু] মনাপা;

নিন্দিযমত্থং পসংসিযং ৱা, ভৰিযাযাৱিকৰেয্য [ভৰিযায ৱাৱীকৰেয্য (ক.)] গুয্হমত্থং.

৩১৮. যো কিচ্ছগতস্স আতুৰস্স, সৰণং হোতি গতী পৰাযনঞ্চ;

নিন্দিযমত্থং পসংসিযং ৱা, সখিনো ৱাৱিকৰেয্য গুয্হমত্থং.

৩১৯. জেট্ঠো [যো জেট্ঠো (স্যা.)] অথ মজ্ঝিমো কনিট্ঠো, যো [সো (সী. স্যা. পী.)] চে সীলসমাহিতো ঠিতত্তো;

নিন্দিযমত্থং পসংসিযং ৱা, ভাতু ৱাৱীকৰেয্য গুয্হমত্থং.

৩২০. যো ৱে পিতুহদযস্স পদ্ধগূ [পত্থগূ (স্যা.), পত্তগূ (ক.)], অনুজাতো পিতৰং অনোমপঞ্ঞো;

নিন্দিযমত্থং পসংসিযং ৱা, পুত্তস্সাৱিকৰেয্য [পুত্তস্স ৱাৱীকৰেয্য (ক.)] গুয্হমত্থং.

৩২১. মাতা দ্ৱিপদাজনিন্দসেট্ঠ, যা নং [যো তং (সী. পী.)] পোসেতি ছন্দসা পিযেন;

নিন্দিযমত্থং পসংসিযং ৱা, মাতুযাৱীকৰেয্য [মাতুযা ৱাৱীকৰেয্য (ক.)] গুয্হমত্থং.

৩২২. গুয্হস্স হি গুয্হমেৱ সাধু, ন হি গুয্হস্স পসত্থমাৱিকম্মং;

অনিপ্ফন্নতা [অনিপ্ফাদায (সী. পী.), অনিপ্ফন্নতায (স্যা.), আ নিপ্ফাদা (?)] সহেয্য ধীৰো, নিপ্ফন্নোৱ [নিপ্ফন্নত্থো (সী. পী.), নিপ্ফন্নত্থোৱ (স্যা.)] যথাসুখং ভণেয্য.

৩২৩. কিং ত্ৱং ৱিমনোসি ৰাজসেট্ঠ, দ্ৱিপদজনিন্দ [দিপদিন্দ (সী. স্যা. পী.)] ৱচনং সুণোম মেতং [নেতং (সী. পী.), তেতং (স্যা.)];

কিং চিন্তযমানো দুম্মনোসি, নূন দেৱ অপৰাধো অত্থি ময্হং.

৩২৪. ‘‘পণ্হে [পঞ্ঞো (সী. পী.), পঞ্হে (স্যা.), পন্হে (ক.)] ৱজ্ঝো মহোসধো’’তি, আণত্তো মে ৱধায ভূৰিপঞ্ঞো;

তং চিন্তযমানো দুম্মনোস্মি, ন হি দেৱী অপৰাধো অত্থি তুয্হং.

৩২৫. অভিদোসগতো দানি এহিসি, কিং সুত্ৱা কিং সঙ্কতে মনো তে;

কো তে কিমৱোচ ভূৰিপঞ্ঞ, ইঙ্ঘ ৱচনং সুণোম ব্ৰূহি মেতং.

৩২৬. ‘‘পণ্হে ৱজ্ঝো মহোসধো’’তি, যদি তে মন্তযিতং জনিন্দ দোসং;

ভৰিযায ৰহোগতো অসংসি, গুয্হং পাতুকতং সুতং মমেতং.

৩২৭. যং সালৱনস্মিং সেনকো, পাপকম্মং অকাসি অসব্ভিৰূপং;

সখিনোৱ ৰহোগতো অসংসি, গুয্হং পাতুকতং সুতং মমেতং.

৩২৮. পুক্কুস [পক্কুস (ক.) জা. ১.৭.৪১ পণ্ণজাতকে পস্সিতব্বং] পুৰিসস্স তে জনিন্দ, উপ্পন্নো ৰোগো অৰাজযুত্তো;

ভাতুঞ্চ [ভাতুচ্চ (সী. পী.), ভাতুৱ (স্যা.)] ৰহোগতো অসংসি, গুয্হং পাতুকতং সুতং মমেতং.

৩২৯. আবাধোযং অসব্ভিৰূপো, কামিন্দো [কাৱিন্দো (সী. পী.)] নৰদেৱেন ফুট্ঠো;

পুত্তস্স ৰহোগতো অসংসি, গুয্হং পাতুকতং সুতং মমেতং.

৩৩০. অট্ঠৱঙ্কং মণিৰতনং উড়াৰং, সক্কো তে অদদা পিতামহস্স;

দেৱিন্দস্স গতং তদজ্জ হত্থং [দেৱিন্দস্স তদজ্জ হত্থগতং (ক.)], মাতুঞ্চ ৰহোগতো অসংসি;

গুয্হং পাতুকতং সুতং মমেতং.

৩৩১. গুয্হস্স হি গুয্হমেৱ সাধু, ন হি গুয্হস্স পসত্থমাৱিকম্মং;

অনিপ্ফন্নতা সহেয্য ধীৰো, নিপ্ফন্নোৱ যথাসুখং ভণেয্য.

৩৩২. ন গুয্হমত্থং ৱিৱৰেয্য, ৰক্খেয্য নং যথা নিধিং;

ন হি পাতুকতো সাধু, গুয্হো অত্থো পজানতা.

৩৩৩. থিযা গুয্হং ন সংসেয্য, অমিত্তস্স চ পণ্ডিতো;

যো চামিসেন সংহীৰো, হদযত্থেনো চ যো নৰো.

৩৩৪. গুয্হমত্থং অসম্বুদ্ধং, সম্বোধযতি যো নৰো;

মন্তভেদভযা তস্স, দাসভূতো তিতিক্খতি.

৩৩৫. যাৱন্তো পুৰিসস্সত্থং, গুয্হং জানন্তি মন্তিনং;

তাৱন্তো তস্স উব্বেগা, তস্মা গুয্হং ন ৱিস্সজে.

৩৩৬. ৱিৱিচ্চ ভাসেয্য দিৱা ৰহস্সং, ৰত্তিং গিৰং নাতিৱেলং পমুঞ্চে;

উপস্সুতিকা হি সুণন্তি মন্তং, তস্মা মন্তো খিপ্পমুপেতি ভেদন্তি.

পঞ্চপণ্ডিতজাতকং দ্ৱাদসমং.