৫০৭. মহাপলোভনজাতকং (১১)

২৮৪. ব্ৰহ্মলোকা চৱিত্ৱান, দেৱপুত্তো মহিদ্ধিকো;

ৰঞ্ঞো পুত্তো উদপাদি, সব্বকামসমিদ্ধিসু.

২৮৫. কামা ৱা কামসঞ্ঞা ৱা, ব্ৰহ্মলোকে ন ৱিজ্জতি;

স্ৱাস্সু [য্ৱাস্স (সী.)] তাযেৱ সঞ্ঞায, কামেহি ৱিজিগুচ্ছথ.

২৮৬. তস্স চন্তেপুৰে আসি, ঝানাগাৰং সুমাপিতং;

সো তত্থ পটিসল্লীনো [পটিসল্লানো (ক.)], একো ৰহসি ঝাযথ.

২৮৭. স ৰাজা পৰিদেৱেসি, পুত্তসোকেন অট্টিতো;

একপুত্তো চযং ময্হং, ন চ কামানি ভুঞ্জতি.

২৮৮. কো নু খ্ৱেত্থ [খেত্থ (সী. পী.)] উপাযো সো, কো ৱা জানাতি কিঞ্চনং;

যো [কো (সী. পী.)] মে পুত্তং পলোভেয্য, যথা কামানি পত্থযে.

২৮৯. অহু কুমাৰী তত্থেৱ, ৱণ্ণৰূপসমাহিতা;

কুসলা নচ্চগীতস্স, ৱাদিতে চ পদক্খিণা.

২৯০. সা তত্থ উপসঙ্কম্ম, ৰাজানং এতদব্ৰৱি;

অহং খো নং পলোভেয্যং, সচে ভত্তা ভৱিস্সতি.

২৯১. তং তথাৱাদিনিং ৰাজা, কুমাৰিং এতদব্ৰৱি;

ত্ৱঞ্ঞেৱ নং পলোভেহি, তৱ ভত্তা ভৱিস্সতি.

২৯২. সা চ অন্তেপুৰং গন্ত্ৱা, বহুং কামুপসংহিতং;

হদযঙ্গমা পেমনীযা, চিত্ৰা গাথা অভাসথ.

২৯৩. তস্সা চ গাযমানায, সদ্দং সুত্ৱান নাৰিযা;

কামচ্ছন্দস্স উপ্পজ্জি, জনং সো পৰিপুচ্ছথ.

২৯৪. কস্সেসো সদ্দো কো ৱা সো, ভণতি উচ্চাৱচং বহুং;

হদযঙ্গমং পেমনীযং, অহো [অথো (সী. পী.)] কণ্ণসুখং মম.

২৯৫. এসা খো পমদা দেৱ, খিড্ডা এসা অনপ্পিকা [অনপ্পকা (ক.)];

সচে ত্ৱং কামে ভুঞ্জেয্য, ভিয্যো ভিয্যো ছাদেয্যু তং.

২৯৬. ইঙ্ঘ আগচ্ছতোৰেন [আগচ্ছতোৰেনং (ক.) আগচ্ছতু + ওৰেন], অৱিদূৰম্হি গাযতু;

অস্সমস্স সমীপম্হি, সন্তিকে ময্হং গাযতু.

২৯৭. তিৰোকুট্টম্হি গাযিত্ৱা, ঝানাগাৰম্হি পাৱিসি;

বন্ধি নং [ভন্ধিতুং (স্যা. ক.)] অনুপুব্বেন, আৰঞ্ঞমিৱ কুঞ্জৰং.

২৯৮. তস্স [তস্সা (স্যা.)] কামৰসং ঞত্ৱা, ইস্সাধম্মো অজাযথ;

‘‘অহমেৱ কামে ভুঞ্জেয্যং, মা অঞ্ঞো পুৰিসো অহু’’.

২৯৯. ততো অসিং গহেত্ৱান, পুৰিসে হন্তুং উপক্কমি;

অহমেৱেকো ভুঞ্জিস্সং, মা অঞ্ঞো পুৰিসো সিযা.

৩০০. ততো জানপদা সব্বে, ৱিক্কন্দিংসু সমাগতা;

পুত্তো ত্যাযং মহাৰাজ, জনং হেঠেত্যদূসকং.

৩০১. তঞ্চ ৰাজা ৱিৱাহেসি [নিৱাহেসি (স্যা.), ৱিহাহেসি (পী.)], সম্হা ৰট্ঠা চ [ৰট্ঠাতো (সী. পী.), ৰট্ঠতো (ক.)] খত্তিযো;

যাৱতা ৱিজিতং ময্হং, ন তে ৱত্থব্ব [ৱত্তব্ব (সী. পী.)] তাৱদে.

৩০২. ততো সো ভৰিযমাদায, সমুদ্দং উপসঙ্কমি;

পণ্ণসালং কৰিত্ৱান, ৱনমুঞ্ছায পাৱিসি.

৩০৩. অথেত্থ ইসি মাগচ্ছি, সমুদ্দং উপৰূপৰি;

সো তস্স গেহং পাৱেক্খি, ভত্তকালে উপট্ঠিতে.

৩০৪. তঞ্চ ভৰিযা পলোভেসি, পস্স যাৱ সুদাৰুণং;

চুতো সো ব্ৰহ্মচৰিযম্হা, ইদ্ধিযা পৰিহাযথ.

৩০৫. ৰাজপুত্তো চ উঞ্ছাতো, ৱনমূলফলং বহুং;

সাযং কাজেন [কাচেন (পী.)] আদায, অস্সমং উপসঙ্কমি.

৩০৬. ইসী চ খত্তিযং দিস্ৱা, সমুদ্দং উপসঙ্কমি;

‘‘ৱেহাযসং গমিস্স’’ন্তি, সীদতে সো মহণ্ণৱে.

৩০৭. খত্তিযো চ ইসিং দিস্ৱা, সীদমানং মহণ্ণৱে;

তস্সেৱ অনুকম্পায, ইমা গাথা অভাসথ.

৩০৮. অভিজ্জমানে ৱাৰিস্মিং, সযং আগম্ম ইদ্ধিযা;

মিস্সীভাৱিত্থিযা গন্ত্ৱা, সংসীদসি মহণ্ণৱে.

৩০৯. আৱট্টনী মহামাযা, ব্ৰহ্মচৰিযৱিকোপনা;

সীদন্তি নং ৱিদিত্ৱান, আৰকা পৰিৱজ্জযে.

৩১০. অনলা মুদুসম্ভাসা, দুপ্পূৰা তা নদীসমা;

সীদন্তি নং ৱিদিত্ৱান, আৰকা পৰিৱজ্জযে.

৩১১. যং এতা উপসেৱন্তি, ছন্দসা ৱা ধনেন ৱা;

জাতৱেদোৱ সং ঠানং, খিপ্পং অনুদহন্তি নং.

৩১২. খত্তিযস্স ৱচো সুত্ৱা, ইসিস্স নিব্বিদা অহু;

লদ্ধা পোৰাণকং মগ্গং, গচ্ছতে সো ৱিহাযসং.

৩১৩. খত্তিযো চ ইসিং দিস্ৱা, গচ্ছমানং ৱিহাযসং;

সংৱেগং অলভী ধীৰো, পব্বজ্জং সমৰোচযি.

৩১৪. ততো সো পব্বজিত্ৱান, কামৰাগং ৱিৰাজযি;

কামৰাগং ৱিৰাজেত্ৱা, ব্ৰহ্মলোকূপগো অহূতি.

মহাপলোভনজাতকং একাদসমং.