৫০৬. চম্পেয্যজাতকং (১০)

২৪০. কা নু ৱিজ্জুৰিৱাভাসি, ওসধী ৱিয তাৰকা;

দেৱতা নুসি গন্ধব্বী, ন তং মঞ্ঞামি মানুসিং [মানুসী (স্যা. ক.)].

২৪১. নম্হি দেৱী ন গন্ধব্বী, ন মহাৰাজ মানুসী;

নাগকঞ্ঞাস্মি ভদ্দন্তে, অত্থেনম্হি ইধাগতা.

২৪২. ৱিব্ভন্তচিত্তা কুপিতিন্দ্ৰিযাসি, নেত্তেহি তে ৱাৰিগণা সৱন্তি;

কিং তে নট্ঠং কিং পন পত্থযানা, ইধাগতা নাৰি তদিঙ্ঘ ব্ৰূহি.

২৪৩. যমুগ্গতেজো উৰগোতি চাহু, নাগোতি নং আহু জনা জনিন্দ;

তমগ্গহী পুৰিসো জীৱিকত্থো, তং বন্ধনা মুঞ্চ পতী মমেসো.

২৪৪. কথং ন্ৱযং বলৱিৰিযূপপন্নো, হত্থত্ত [হত্থত্থ (সী. স্যা. পী.)] মাগচ্ছি ৱনিব্বকস্স;

অক্খাহি মে নাগকঞ্ঞে তমত্থং, কথং ৱিজানেমু গহীতনাগং.

২৪৫. নগৰম্পি নাগো ভস্মং কৰেয্য, তথা হি সো বলৱিৰিযূপপন্নো;

ধম্মঞ্চ নাগো অপচাযমানো, তস্মা পৰক্কম্ম তপো কৰোতি.

২৪৬. চাতুদ্দসিং পঞ্চদসিং [পন্নৰসিং (সী. স্যা. পী.)] চ ৰাজ, চতুপ্পথে সম্মতি নাগৰাজা;

তমগ্গহী পুৰিসো জীৱিকত্থো, তং বন্ধনা মুঞ্চ পতী মমেসো.

২৪৭. সোড়সিত্থিসহস্সানি, আমুত্তমণিকুণ্ডলা;

ৱাৰিগেহসযা নাৰী [নাৰিযো (পী.)], তাপি তং সৰণং গতা.

২৪৮. ধম্মেন মোচেহি অসাহসেন, গামেন নিক্খেন গৱং সতেন;

ওস্সট্ঠকাযো উৰগো চৰাতু, পুঞ্ঞত্থিকো মুঞ্চতু বন্ধনস্মা.

২৪৯. ধম্মেন মোচেমি অসাহসেন, গামেন নিক্খেন গৱং সতেন;

ওস্সট্ঠকাযো উৰগো চৰাতু, পুঞ্ঞত্থিকো মুঞ্চতু বন্ধনস্মা.

২৫০. দম্মি নিক্খসতং লুদ্দ, থূলঞ্চ মণিকুণ্ডলং;

চতুস্সদঞ্চ পল্লঙ্কং, উমাপুপ্ফসৰিন্নিভং.

২৫১. দ্ৱে চ সাদিসিযো ভৰিযা, উসভঞ্চ গৱং সতং;

ওস্সট্ঠকাযো উৰগো চৰাতু, পুঞ্ঞত্থিকো মুঞ্চতু বন্ধনস্মা.

২৫২. ৱিনাপি দানা তৱ ৱচনং জনিন্দ, মুঞ্চেমু নং উৰগং বন্ধনস্মা;

ওস্সট্ঠকাযো উৰগো চৰাতু, পুঞ্ঞত্থিকো মুঞ্চতু বন্ধনস্মা.

২৫৩. মুত্তো চম্পেয্যকো নাগো, ৰাজানং এতদব্ৰৱি;

নমো তে কাসিৰাজত্থু, নমো তে কাসিৱড্ঢন;

অঞ্জলিং তে পগ্গণ্হামি, পস্সেয্যং মে নিৱেসনং.

২৫৪. অদ্ধা হি দুব্বিস্সসমেতমাহু, যং মানুসো ৱিস্সসে অমানুসম্হি;

সচে চ মং যাচসি এতমত্থং, দক্খেমু তে নাগ নিৱেসনানি.

২৫৫. সচেপি [সচে হি (সী. পী. অট্ঠ.)] ৱাতো গিৰিমাৱহেয্য, চন্দো চ সুৰিযো চ ছমা পতেয্যুং;

সব্বা চ নজ্জো পটিসোতং ৱজেয্যুং, ন ত্ৱেৱহং ৰাজ মুসা ভণেয্যং.

২৫৬. নভং ফলেয্য উদধীপি সুস্সে, সংৱট্টযে [সংৱট্টেযং (সী. পী.), সংৱট্টেয্য (স্যা. ক.)] ভূতধৰা ৱসুন্ধৰা;

সিলুচ্চযো মেৰু সমূলমুপ্পতে [মুব্বহে (সী. স্যা. পী. ক. অট্ঠ.), মুট্ঠহে (ক.)], ন ত্ৱেৱহং ৰাজ মুসা ভণেয্যং.

২৫৭. অদ্ধা হি দুব্বিস্সসমেতমাহু, যং মানুসো ৱিস্সসে অমানুসম্হি;

সচে চ মং যাচসি এতমত্থং, দক্খেমু তে নাগ নিৱেসনানি.

২৫৮. তুম্হে খোত্থ ঘোৰৱিসা উড়াৰা, মহাতেজা খিপ্পকোপী চ হোথ;

মংকাৰণা [মম কাৰণা (সী. স্যা. পী.)] বন্ধনস্মা পমুত্তো, অৰহসি নো জানিতুযে [জানিতাযে (সী.), জানিতৱে (স্যা.), জানিতযে (পী.)] কতানি.

২৫৯. সো পচ্চতং নিৰযে ঘোৰৰূপে, মা কাযিকং সাতমলত্থ কিঞ্চি;

পেড়ায বদ্ধো মৰণং উপেতু, যো তাদিসং কম্মকতং ন জানে.

২৬০. সচ্চপ্পটিঞ্ঞা তৱমেস হোতু, অক্কোধনো হোহি অনুপনাহী;

সব্বঞ্চ তে নাগকুলং সুপণ্ণা, অগ্গিংৱ গিম্হেসু [গিম্হাসু (সী. স্যা. পী.)] ৱিৱজ্জযন্তু.

২৬১. অনুকম্পসী নাগকুলং জনিন্দ, মাতা যথা সুপ্পিযং একপুত্তং;

অহঞ্চ তে নাগকুলেন সদ্ধিং, কাহামি ৱেয্যাৱটিকং উড়াৰং.

২৬২. যোজেন্তু ৱে ৰাজৰথে সুচিত্তে, কম্বোজকে অস্সতৰে সুদন্তে;

নাগে চ যোজেন্তু সুৱণ্ণকপ্পনে, দক্খেমু নাগস্স নিৱেসনানি.

২৬৩. ভেৰী মুদিঙ্গা [মুতিঙ্গা (সী. পী.)] পণৱা চ সঙ্খা, অৱজ্জযিংসু উগ্গসেনস্স ৰঞ্ঞো;

পাযাসি ৰাজা বহুসোভমানো, পুৰক্খতো নাৰিগণস্স মজ্ঝে.

২৬৪. সুৱণ্ণচিতকং ভূমিং, অদ্দক্খি কাসিৱড্ঢনো;

সোৱণ্ণমযপাসাদে, ৱেড়ুৰিযফলকত্থতে.

২৬৫. স ৰাজা পাৱিসি ব্যম্হং, চম্পেয্যস্স নিৱেসনং;

আদিচ্চৱণ্ণসন্নিভং, কংসৱিজ্জু পভস্সৰং.

২৬৬. নানাৰুক্খেহি সঞ্ছন্নং, নানাগন্ধসমীৰিতং;

সো পাৱেক্খি কাসিৰাজা, চম্পেয্যস্স নিৱেসনং.

২৬৭. পৱিট্ঠস্মিং কাসিৰঞ্ঞে, চম্পেয্যস্স নিৱেসনং;

দিব্বা তূৰিযা পৱজ্জিংসু, নাগকঞ্ঞা চ নচ্চিসুং [নচ্চযুং (সী. পী. ক.)].

২৬৮. তং নাগকঞ্ঞা চৰিতং গণেন, অন্ৱাৰুহী কাসিৰাজা পসন্নো;

নিসীদি সোৱণ্ণমযম্হি পীঠে, সাপস্সযে [সোপস্সযে (ক.)] চন্দনসাৰলিত্তে.

২৬৯. সো তত্থ ভুত্ৱা চ অথো ৰমিত্ৱা, চম্পেয্যকং কাসিৰাজা অৱোচ;

ৱিমানসেট্ঠানি ইমানি তুয্হং, আদিচ্চৱণ্ণানি পভস্সৰানি;

নেতাদিসং অত্থি মনুস্সলোকে, কিং পত্থযং [কিমত্থিযং (সী. স্যা. পী.)] নাগ তপো কৰোসি.

২৭০. তা কম্বুকাযূৰধৰা সুৱত্থা, ৱট্টঙ্গুলী তম্বতলূপপন্না;

পগ্গয্হ পাযেন্তি অনোমৱণ্ণা, নেতাদিসং অত্থি মনুস্সলোকে;

কিং পত্থযং নাগ তপো কৰোসি.

২৭১. নজ্জো চ তেমা পুথুলোমমচ্ছা, আটা [আদা (স্যা.), অদা (পী.)] সকুন্তাভিৰুদা সুতিত্থা;

নেতাদিসং অত্থি মনুস্সলোকে, কিং পত্থযং নাগ তপো কৰোসি.

২৭২. কোঞ্চা মযূৰা দিৱিযা চ হংসা, ৱগ্গুস্সৰা কোকিলা সম্পতন্তি;

নেতাদিসং অত্থি মনুস্সলোকে, কিং পত্থযং নাগ তপো কৰোসি.

২৭৩. অম্বা চ সালা তিলকা চ জম্বুযো, উদ্দালকা পাটলিযো চ ফুল্লা;

নেতাদিসং অত্থি মনুস্সলোকে, কিং পত্থযং নাগ তপো কৰোসি.

২৭৪. ইমা চ তে পোক্খৰঞ্ঞো সমন্ততো, দিব্বা [দিব্যা (স্যা.), দিৱিযা (পী.)] চ গন্ধা সততং পৱাযন্তি;

নেতাদিসং অত্থি মনুস্সলোকে, কিং পত্থযং নাগ তপো কৰোসি.

২৭৫. ন পুত্তহেতু ন ধনস্স হেতু, ন আযুনো চাপি [ৱাপি (সী. পী.)] জনিন্দ হেতু;

মনুস্সযোনিং অভিপত্থযানো, তস্মা পৰক্কম্ম তপো কৰোমি.

২৭৬. ত্ৱং লোহিতক্খো ৱিহতন্তৰংসো, অলঙ্কতো কপ্পিতকেসমস্সু;

সুৰোসিতো লোহিতচন্দনেন, গন্ধব্বৰাজাৱ দিসা পভাসসি.

২৭৭. দেৱিদ্ধিপত্তোসি মহানুভাৱো, সব্বেহি কামেহি সমঙ্গিভূতো;

পুচ্ছামি তং নাগৰাজেতমত্থং, সেয্যো ইতো কেন মনুস্সলোকো.

২৭৮. জনিন্দ নাঞ্ঞত্ৰ মনুস্সলোকা, সুদ্ধী ৱ সংৱিজ্জতি সংযমো ৱা;

অহঞ্চ লদ্ধান মনুস্সযোনিং, কাহামি জাতিমৰণস্স অন্তং.

২৭৯. অদ্ধা হৱে সেৱিতব্বা সপঞ্ঞা, বহুস্সুতা যে বহুঠানচিন্তিনো;

নাৰিযো চ দিস্ৱান তুৱঞ্চ নাগ, কাহামি পুঞ্ঞানি অনপ্পকানি.

২৮০. অদ্ধা হৱে সেৱিতব্বা সপঞ্ঞা, বহুস্সুতা যে বহুঠানচিন্তিনো;

নাৰিযো চ দিস্ৱান মমঞ্চ ৰাজ, কৰোহি পুঞ্ঞানি অনপ্পকানি.

২৮১. ইদঞ্চ মে জাতৰূপং পহূতং, ৰাসী সুৱণ্ণস্স চ তালমত্তা;

[ইতো হৰিত্ৱা সোৱণ্ণঘৰানি কাৰয, ৰূপিযস্স চ পাকাৰং কৰোন্তু (সী. স্যা.) ইতো হৰিত্ৱা সোৱণ্ণঘৰানি, [কাৰয] ৰূপিযস্স চ পাকাৰং কৰোন্তু (পী.)] ইতো হৰিত্ৱান সুৱণ্ণঘৰানি, কৰস্সু ৰূপিযপাকাৰং কৰোন্তু [ইতো হৰিত্ৱা সোৱণ্ণঘৰানি কাৰয, ৰূপিযস্স চ পাকাৰং কৰোন্তু (সী. স্যা.) ইতো হৰিত্ৱা সোৱণ্ণঘৰানি, [কাৰয] ৰূপিযস্স চ পাকাৰং কৰোন্তু (পী.)].

২৮২. মুত্তা চ [মুত্তানঞ্চ (সী. স্যা.)] ৱাহসহস্সানি পঞ্চ, ৱেড়ুৰিযমিস্সানি ইতো হৰিত্ৱা;

অন্তেপুৰে ভূমিযং সন্থৰন্তু, নিক্কদ্দমা হেহিতি নীৰজা চ.

২৮৩. এতাদিসং আৱস ৰাজসেট্ঠ, ৱিমানসেট্ঠং বহু সোভমানং;

বাৰাণসিং নগৰং ইদ্ধং ফীতং, ৰজ্জঞ্চ কাৰেহি অনোমপঞ্ঞাতি.

চম্পেয্যজাতকং দসমং.