৫০৫. সোমনস্সজাতকং (৯)

২১১. কো তং হিংসতি হেঠেতি, কিং [কিন্নু (পী. ক.)] দুম্মনো সোচসি অপ্পতীতো;

কস্সজ্জ মাতাপিতৰো ৰুদন্তু, ক্ৱজ্জ সেতু [কো ন্ৱেজ্জ সেতি (ক.), কো অজ্জ সেতু (?)] নিহতো পথব্যা.

২১২. তুট্ঠোস্মি দেৱ তৱ দস্সনেন, চিৰস্সং পস্সামি তং ভূমিপাল;

অহিংসকো ৰেণুমনুপ্পৱিস্স, পুত্তেন তে হেঠযিতোস্মি [পোথযিতোস্মি (ক.)] দেৱ.

২১৩. আযন্তু দোৱাৰিকা খগ্গবন্ধা [খগ্গবদ্ধা (সী. পী.)], কাসাৱিযা যন্তু [হন্তু (ক.)] অন্তেপুৰন্তং;

হন্ত্ৱান তং সোমনস্সং কুমাৰং, ছেত্ৱান সীসং ৱৰমাহৰন্তু.

২১৪. পেসিতা ৰাজিনো দূতা, কুমাৰং এতদব্ৰৱুং;

ইস্সৰেন ৱিতিণ্ণোসি, ৱধং পত্তোসি খত্তিয.

২১৫. স ৰাজপুত্তো পৰিদেৱযন্তো, দসঙ্গুলিং অঞ্জলিং পগ্গহেত্ৱা;

অহম্পি ইচ্ছামি জনিন্দ দট্ঠুং, জীৱং মং নেত্ৱা [জীৱং পনেত্ৱা (সী. পী.)] পটিদস্সযেথ.

২১৬. তস্স তং ৱচনং সুত্ৱা, ৰঞ্ঞো পুত্তং অদস্সযুং;

পুত্তো চ পিতৰং দিস্ৱা, দূৰতোৱজ্ঝভাসথ.

২১৭. আগচ্ছুং [আগঞ্ছুং (সী.), আগঞ্ছু (পী.)] দোৱাৰিকা খগ্গবন্ধা, কাসাৱিযা হন্তু মমং জনিন্দ;

অক্খাহি মে পুচ্ছিতো এতমত্থং, অপৰাধো কো নিধ মমজ্জ অত্থি.

২১৮. সাযঞ্চ পাতো উদকং সজাতি, অগ্গিং সদা পাৰিচৰতপ্পমত্তো;

তং তাদিসং সংযতং ব্ৰহ্মচাৰিং, কস্মা তুৱং ব্ৰূসি গহপ্পতীতি.

২১৯. তালা চ মূলা চ ফলা চ দেৱ, পৰিগ্গহা ৱিৱিধা সন্তিমস্স;

তে ৰক্খতি গোপযতপ্পমত্তো, [ব্ৰাহ্মণো গহপতি তেন হোতি (সী. স্যা. পী.)] তস্মা অহং ব্ৰূমি গহপ্পতীতি [ব্ৰাহ্মণো গহপতি তেন হোতি (সী. স্যা. পী.)].

২২০. সচ্চং খো এতং ৱদসি কুমাৰ, পৰিগ্গহা ৱিৱিধা সন্তিমস্স;

তে ৰক্খতি গোপযতপ্পমত্তো, স [নত্থি ইদং সী. স্যা. পী. পোত্থকেসু] ব্ৰাহ্মণো গহপতি তেন হোতি.

২২১. সুণন্তু ময্হং পৰিসা সমাগতা, সনেগমা জানপদা চ সব্বে;

বালাযং বালস্স ৱচো নিসম্ম, অহেতুনা ঘাতযতে মং [ঘাতযতে (সী. পী.)] জনিন্দো.

২২২. দড়্হস্মি মূলে ৱিসটে ৱিৰূড়্হে, দুন্নিক্কযো ৱেড়ু পসাখজাতো;

ৱন্দামি পাদানি তৱ [তৱং (সী. পী.)] জনিন্দ, অনুজান মং পব্বজিস্সামি দেৱ.

২২৩. ভুঞ্জস্সু ভোগে ৱিপুলে কুমাৰ, সব্বঞ্চ তে ইস্সৰিযং দদামি;

অজ্জেৱ ত্ৱং কুৰূনং হোহি ৰাজা, মা পব্বজী পব্বজ্জা হি দুক্খা.

২২৪. কিন্নূধ দেৱ তৱমত্থি ভোগা, পুব্বেৱহং [পুব্বে চহং (ক.)] দেৱলোকে ৰমিস্সং;

ৰূপেহি সদ্দেহি অথো ৰসেহি, গন্ধেহি ফস্সেহি মনোৰমেহি.

২২৫. ভুত্তা চ মে [ভুত্তা (সী. পী.)] ভোগা তিদিৱস্মিং দেৱ, পৰিৱাৰিতা [পৰিচাৰিতা (ক.)] অচ্ছৰানং গণেন [অচ্ছৰাসংগণেন (স্যা. পী. ক.)];

তুৱঞ্চ [তৱঞ্চ (সী. পী.)] বালং পৰনেয্যং ৱিদিত্ৱা, ন তাদিসে ৰাজকুলে ৱসেয্যং.

২২৬. সচাহং বালো পৰনেয্যো অস্মি, একাপৰাধং [এতাপৰাধং (ক.)] খম পুত্ত ময্হং;

পুনপি চে এদিসকং ভৱেয্য, যথামতিং সোমনস্স কৰোহি.

২২৭. অনিসম্ম কতং কম্মং, অনৱত্থায চিন্তিতং;

ভেসজ্জস্সেৱ ৱেভঙ্গো, ৱিপাকো হোতি পাপকো.

২২৮. নিসম্ম চ কতং কম্মং, সম্মাৱত্থায চিন্তিতং;

ভেসজ্জস্সেৱ সম্পত্তি, ৱিপাকো হোতি ভদ্ৰকো.

২২৯. অলসো গিহী কামভোগী ন সাধু, অসঞ্ঞতো পব্বজিতো ন সাধু;

ৰাজা ন সাধু অনিসম্মকাৰী, যো পণ্ডিতো কোধনো তং ন সাধু.

২৩০. নিসম্ম খত্তিযো কযিৰা, নানিসম্ম দিসম্পতি;

নিসম্মকাৰিনো ৰাজ, যসো কিত্তি চ ৱড্ঢতি.

২৩১. নিসম্ম দণ্ডং পণযেয্য ইস্সৰো, ৱেগা কতং তপ্পতি ভূমিপাল;

সম্মাপণীধী চ নৰস্স অত্থা, অনানুতপ্পা তে ভৱন্তি পচ্ছা.

২৩২. অনানুতপ্পানি হি যে কৰোন্তি, ৱিভজ্জ কম্মাযতনানি লোকে;

ৱিঞ্ঞুপ্পসত্থানি সুখুদ্ৰযানি, ভৱন্তি বুদ্ধানুমতানি [ৱদ্ধানুমতানি (সী. পী.)] তানি.

২৩৩. আগচ্ছুং দোৱাৰিকা খগ্গবন্ধা, কাসাৱিযা হন্তু মমং জনিন্দ;

মাতুঞ্চ [মাতুচ্চ (পী.)] অঙ্কস্মিমহং নিসিন্নো, আকড্ঢিতো সহসা তেহি দেৱ.

২৩৪. কটুকঞ্হি সম্বাধং সুকিচ্ছং [সুকিচ্ছ (সী. পী.)] পত্তো, মধুৰম্পি যং জীৱিতং লদ্ধ ৰাজ;

কিচ্ছেনহং অজ্জ ৱধা পমুত্তো, পব্বজ্জমেৱাভিমনোহমস্মি.

২৩৫. পুত্তো তৱাযং তৰুণো সুধম্মে, অনুকম্পকো সোমনস্সো কুমাৰো;

তং যাচমানো ন লভামি স্ৱজ্জ [সজ্জ (সী. পী.)], অৰহসি নং যাচিতৱে [যাচিতুযে (ক.)] তুৱম্পি.

২৩৬. ৰমস্সু ভিক্খাচৰিযায পুত্ত, নিসম্ম ধম্মেসু পৰিব্বজস্সু;

সব্বেসু ভূতেসু নিধায দণ্ডং, অনিন্দিতো ব্ৰহ্মমুপেহি ঠানং.

২৩৭. অচ্ছেৰ [অচ্ছৰিয (সী. স্যা. পী.)] ৰূপং ৱত যাদিসঞ্চ, দুক্খিতং মং দুক্খাপযসে সুধম্মে;

যাচস্সু পুত্তং ইতি ৱুচ্চমানা, ভিয্যোৱ উস্সাহযসে কুমাৰং.

২৩৮. যে ৱিপ্পমুত্তা অনৱজ্জভোগিনো [ভোজিনো (সী. স্যা. পী.)], পৰিনিব্বুতা লোকমিমং চৰন্তি;

তমৰিযমগ্গং পটিপজ্জমানং, ন উস্সহে ৱাৰযিতুং কুমাৰং.

২৩৯. অদ্ধা হৱে সেৱিতব্বা সপঞ্ঞা, বহুস্সুতা যে বহুঠানচিন্তিনো;

যেসাযং সুত্ৱান সুভাসিতানি, অপ্পোস্সুক্কা ৱীতসোকা সুধম্মাতি.

সোমনস্সজাতকং নৱমং.