৫০৪. ভল্লাতিযজাতকং (৮)

১৮৬. ভল্লাতিযো [ভল্লাটিযো (সী. পী.)] নাম অহোসি ৰাজা, ৰট্ঠং পহায মিগৱং অচাৰি সো;

অগমা গিৰিৱৰং গন্ধমাদনং, সুপুপ্ফিতং [সম্পুপ্ফিতং (সী. পী.)] কিম্পুৰিসানুচিণ্ণং.

১৮৭. সাড়ূৰসঙ্ঘঞ্চ নিসেধযিত্ৱা, ধনুং [ধনু (সী. স্যা. পী.)] কলাপঞ্চ সো নিক্খিপিত্ৱা;

উপাগমি ৱচনং ৱত্তুকামো, যত্থট্ঠিতা কিম্পুৰিসা অহেসুং.

১৮৮. হিমচ্চযে হেমৱতায তীৰে, কিমিধট্ঠিতা মন্তযৱ্হো অভিণ্হং;

পুচ্ছামি ৱো মানুসদেহৱণ্ণে, কথং নু [কথং ৱো (সী. স্যা. পী.)] জানন্তি মনুস্সলোকে.

১৮৯. মল্লং গিৰিং পণ্ডৰকং তিকূটং, সীতোদকা [সীতোদিযা (সী. পী.), সীতোদিকা (?)] অনুৱিচৰাম নজ্জো;

মিগা মনুস্সাৱ নিভাসৱণ্ণা, জানন্তি নো কিম্পুৰিসাতি লুদ্দ.

১৯০. সুকিচ্ছৰূপং পৰিদেৱযৱ্হো [পৰিদেৱথৱ্হো (?) মোগ্গল্লানব্যাকৰণে ৬.৩৮ সুত্তং], আলিঙ্গিতো চাসি পিযো পিযায;

পুচ্ছামি ৱো মানুসদেহৱণ্ণে, কিমিধ ৱনে ৰোদথ অপ্পতীতা.

১৯১. সুকিচ্ছৰূপং পৰিদেৱযৱ্হো, আলিঙ্গিতো চাসি পিযো পিযায;

পুচ্ছামি ৱো মানুসদেহৱণ্ণে, কিমিধ ৱনে ৱিলপথ অপ্পতীতা.

১৯২. সুকিচ্ছৰূপং পৰিদেৱযৱ্হো, আলিঙ্গিতো চাসি পিযো পিযায;

পুচ্ছামি ৱো মানুসদেহৱণ্ণে, কিমিধ ৱনে সোচথ অপ্পতীতা.

১৯৩. মযেকৰত্তং [ৰত্তিং (পী.)] ৱিপ্পৱসিম্হ লুদ্দ, অকামকা অঞ্ঞমঞ্ঞং সৰন্তা;

তমেকৰত্তং অনুতপ্পমানা, সোচাম ‘‘সা ৰত্তি পুনং ন হেস্সতি’’.

১৯৪. যমেকৰত্তং অনুতপ্পথেতং, ধনং ৱ নট্ঠং পিতৰং ৱ পেতং;

পুচ্ছামি ৱো মানুসদেহৱণ্ণে, কথং ৱিনা ৱাসমকপ্পযিত্থ.

১৯৫. যমিমং [যযিমং (ক. সী.)] নদিং পস্সসি সীঘসোতং, নানাদুমচ্ছাদনং সেলকূলং [দুমচ্ছদনং সেলকূটং (সী. পী.), দুমসঞ্ছন্নং সেলকূলং (ক.)];

তং মে পিযো উত্তৰি ৱস্সকালে, মমঞ্চ মঞ্ঞং অনুবন্ধতীতি.

১৯৬. অহঞ্চ অঙ্কোলকমোচিনামি, অতিমুত্তকং সত্তলিযোথিকঞ্চ;

‘‘পিযো চ মে হেহিতি মালভাৰী, অহঞ্চ নং মালিনী অজ্ঝুপেস্সং’’.

১৯৭. অহঞ্চিদং কুৰৱকমোচিনামি, উদ্দালকা পাটলিসিন্ধুৱাৰকা [সিন্ধুৱাৰিতা (স্যা. পী. ক.)];

‘‘পিযো চ মে হেহিতি মালভাৰী, অহঞ্চ নং মালিনী অজ্ঝুপেস্সং’’.

১৯৮. অহঞ্চ সালস্স সুপুপ্ফিতস্স, ওচেয্য পুপ্ফানি কৰোমি মালং;

‘‘পিযো চ মে হেহিতি মালভাৰী, অহঞ্চ নং মালিনী অজ্ঝুপেস্সং’’.

১৯৯. অহঞ্চ সালস্স সুপুপ্ফিতস্স, ওচেয্য পুপ্ফানি কৰোমি ভাৰং;

ইদঞ্চ নো হেহিতি সন্থৰত্থং, যত্থজ্জিমং [যত্থজ্জমং (সী. পী.)] ৱিহৰিস্সাম [ৱিহৰিস্সামু (পী.)] ৰত্তিং.

২০০. অহঞ্চ খো অগড়ুং [অগ্গলু (স্যা. ক.), অকলুং (পী.)] চন্দনঞ্চ, সিলায পিংসামি পমত্তৰূপা;

‘‘পিযো চ মে হেহিতি ৰোসিতঙ্গো, অহঞ্চ নং ৰোসিতা অজ্ঝুপেস্সং’’.

২০১. অথাগমা সলিলং সীঘসোতং, নুদং সালে সলড়ে কণ্ণিকাৰে;

আপূৰথ [অপূৰথ (সী. পী.), আপূৰথে (স্যা.)] তেন মুহুত্তকেন, সাযং নদী আসি মযা সুদুত্তৰা.

২০২. উভোসু তীৰেসু মযং তদা ঠিতা, সম্পস্সন্তা উভযো অঞ্ঞমঞ্ঞং;

সকিম্পি ৰোদাম সকিং হসাম, কিচ্ছেন নো আগমা [অগমা (সী. স্যা. পী.)] সংৱৰী সা.

২০৩. পাতোৱ [পাতো চ (সী. স্যা. পী.)] খো উগ্গতে সূৰিযম্হি, চতুক্কং নদিং উত্তৰিযান লুদ্দ;

আলিঙ্গিযা অঞ্ঞমঞ্ঞং মযং উভো, সকিম্পি ৰোদাম সকিং হসাম.

২০৪. তীহূনকং সত্তসতানি লুদ্দ, যমিধ মযং ৱিপ্পৱসিম্হ পুব্বে;

ৱস্সেকিমং [ৱাসেকিমং (সী. পী.)] জীৱিতং ভূমিপাল, কো নীধ কন্তায ৱিনা ৱসেয্য.

২০৫. আযুঞ্চ ৱো কীৱতকো নু সম্ম, সচেপি জানাথ ৱদেথ আযুং;

অনুস্সৱা ৱুড্ঢতো আগমা ৱা, অক্খাথ মে তং অৱিকম্পমানা.

২০৬. আযুঞ্চ নো ৱস্সসহস্সং লুদ্দ, ন চন্তৰা পাপকো অত্থি ৰোগো;

অপ্পঞ্চ [অপ্পংৱ (স্যা. ক.)] দুক্খং সুখমেৱ ভিয্যো, অৱীতৰাগা ৱিজহাম জীৱিতং.

২০৭. ইদঞ্চ সুত্ৱান অমানুসানং, ভল্লাতিযো ইত্তৰ জীৱিতন্তি;

নিৱত্তথ ন মিগৱং অচৰি, অদাসি দানানি অভুঞ্জি ভোগে.

২০৮. ইদঞ্চ সুত্ৱান অমানুসানং, সম্মোদথ মা কলহং অকত্থ;

মা ৱো তপী অত্তকম্মাপৰাধো, যথাপি তে কিম্পুৰিসেকৰত্তং.

২০৯. ইদঞ্চ সুত্ৱান অমানুসানং, সম্মোদথ মা ৱিৱাদং অকত্থ;

মা ৱো তপী অত্তকম্মাপৰাধো, যথাপি তে কিম্পুৰিসেকৰত্তং.

২১০. ৱিৱিধং [ৱিৱিধ (সী. স্যা.)] অধিমনা সুণোমহং, ৱচনপথং তৱ অত্থসংহিতং;

মুঞ্চং [মুঞ্চ (সী. পী.)] গিৰং নুদসেৱ মে দৰং, সমণ সুখাৱহ জীৱ মে চিৰন্তি.

ভল্লাতিযজাতকং অট্ঠমং.